Eze 41 | XteSC | STEP | Ne ken mapsa deiki di, angebo dipapu ne douprapneudi, Allah er si eremna ati pumbon neitamai dinin, menmena ati, er sida, Telep Lengna Ati derirbenu. Akati menmenange pumbon neitamaida, go weik kwamu. Akati wengban bisi dinin, yambul bura tara dela domi ngeda, ‘Ware kuprap meter kurur do?’ tenen, angebo dipapu doupmau pina di deipra kunupetepupa, dana-dana tara peiami dela er bukamda, 3 meter kupu. Tonda, abisi buplan wengnai er pala tep nengeda, atara di dipra, ortara kunupetepupa, er palada 5 meter lebar kupu.

Ezekiel 41

Allah er si eremna ati pumbon, menmena ati er si Telep Lengna Ati tep, lap pepu upu

1 Ne ken mapsa deiki di, angebo dipapu ne douprapneudi, Allah er si eremna ati pumbon neitamai dinin, menmena ati, er sida, Telep Lengna Ati derirbenu. Akati menmenange pumbon neitamaida, go weik kwamu. Akati wengban bisi dinin, yambul bura tara dela domi ngeda, ‘Ware kuprap meter kurur do?’ tenen, angebo dipapu doupmau pina di deipra kunupetepupa, dana-dana tara peiami dela er bukamda, 3 meter kupu. Tonda, abisi buplan wengnai er pala tep nengeda, atara di dipra, ortara kunupetepupa, er palada 5 meter lebar kupu. 2 Akati wengbana tep bisi dinin, atara di, ortara dukdongopra domi ngeda, kunupetepupa, er palada, 5 meter kupu. Akati wengban bisi dinin, dana-dana tara pepra domi dela buteneda, er bukamda 2 setengah meter (2.5) tebal kupu. Ukupu dingeda, Telep Lengna Ati pumbon neitamai ila go kwamu atida, er doupmau pina di adinor dukdongopra ortara kunupetepra banmaupa, ortara dela dam kunupetepu ngeda, er lyomda 21 meter panjang kupu. Ange konum kupu dingeda, Telep Lengna Ati tebalal tara di dukdongopra ortara dumsisi tara, kunupetepupa, palada 10 meter kupu.

3 Akati pumbon yuma konum kunupra seng pepu dingeda, akati tapra ortara ati, keteng dangban tara, orsirikai domi ati, er sida Pio Telep Lengna Ati ^{▼▼Pio Telep Lengna Ati – Aupu deiyoda, ake. Akaik pumbon, Allah er si eremna tep, yambul ati butene wilipra deiami. Akati buteneda, ‘Allah er ngepu kurure,’ teneramya tep, sun imam-imam neng dipapu akati wengbarami. Menmena domi ati pumbonda, roti jen kwaning deirina meja cap, weica laramre keca derinai cap, dopra deiamya cadi, akati er sida, Telep Lengna Ati kuramu. Akati dinin, yambulanun ortara pumbonda, lyom opkal er si gorden ton kapkotepi. Gorden ortarada, ati butenenge ton wilipra deiami. Akati sida, ‘Pio Telep Lengna Ati’ kuramu. ‘Akatida, tali imam neng ton wengnung’ tenen, telep lyom opkal, er si gorden kapkoptepi. Akati pio pumbonaida, imam neng, sun ila deiyo ngebopu, er dipapu akati wengbaramu. Yuk imam neng pio gume. Akati pumbonda, ‘Allahdi Israel nesala, sun mali kun keca yuma daepredi, gum kupra deipkamre’ tenen, gam keca popinge, imam ila deiyo ngebo, ayapi doupra, akati pumbon dubenamudi, Peti Perjanjian deiki tara bublan deiki di gege pepra likra deiamu.} wekudi, akati peda kunupetepu. Angebo akati neitamainge weku dingeda, yambul metek bisi, er sida lorong damai bena kunupetepu. Ukupupa, er lyomda, satu meter kepu. Dinin, er palada, 3 meter kepu. Ati dela deipra domingeda, butene, er palada, tiga setengah (3.5) meter kepu. 4 Ukupra konum kunupra seng pepu dingeda, adipapu akati pumbon neitamai peda, angebo dipapu, er doupmau pina di kunupetepu. Akati er urasin kamoda, persegi empat kepra domi. Atep nengeda, ange utopu, akati er lyom cap, er pala capda, yuk-yuk dinin, utotopu sepuluh meter (10) kepra domi. Ukupu dingeda, angebodi ne tep upepneu. “Aceida, Pio Telep Lengna Ati adano,” pepneu.

Allah Yahweh er si eremna tep ati neitamai yuk-yuk gel pala di deipra bokra dominge tep upu

5 Ange konum kupra seng pepu dingeda, er angebodi ne doupra, Allah si eremna ati tapra bura tara bena deipneudi, tamupra ati pumbon tara dinimasi. Udingeda, angebodi, Allah er si eremna ati bura tara dela peaminge pirman tara ngeda, er doupmau pina di kunupetepupa, er bukam tebalda 3 meter kepu. Allah si eremna ati bura tara ongopdongopra domi ati yumada, angebo doupmau pina di kunupetepupa, ayuk-yuk wilipra domi ati er palada, dua meter (2) meter kepu. 6 Allah si eremna ati bura tara dinin, akati pirmanai dana-dana tara, ada iknapi dam tara cap, udapu tara cap, ati weneri tingkat domingeda, ada menmena ngeda, tuai domi, adinin butene ngeda yambula di gisikra, Allah si eremna ati dam tara cap domi. Ange utopu, weneri ngeda, yambula di ton gisikra, Allah si eremna ati dam tara cap domi. Akati weneri tingkat domi ngeda, yuk-yuk wilipra deipidi domi. Akati tingkat weneri dominge neitamaida, yambul ati yuk-yuk wilipra domi atida, 30 ati domi. Ada, tuainge pe, neitamainge pe, deiki tarange peda, yambul ati 30 wilipra domi. Tonda, akati tingkat weneri domi nge barimna tep, ila lyom ayumnya co utopu gel weika di ongomgenem pepra ikidi domi. Tonda, atingkat weneri domi ati di, ‘Allah er si eremna ati men baripkamre’ tenen, go tami.

7 Allah si eremna ati pirman domi tingkat weneri ati dinin, tenpu tuai tara domi ngeda, akati nong palada, yambul kupra domi. Dinin, butene neitamai tingkat domi atida, er nong palada yambulanun ton weik kupra domi. Ange utopu, deiki tara tingkat weneri domi atida, yambulanun ton weik kupra domi. Atep deiki tara tingkat weneri domi ati pio weik kepra domi. Tuai domi atida, yambul metek kepra domi. Tuai tara di aweneri tingkat ati welena tep, domi moromna er urasinda, menmena domi ati pumbon di gwalipra butene ati domyai moropra derirbei. Ange utopu, amoromna butene ati damai di, weneri tingkat damai gwalipdanen beidi, moropra derirbei.

8 – 9 – 10 – 11 Allah er si eremna ati damai di teka dinmasipa, akati amutara tuai yumada, ila gel di taplakra deiamyai udi dipra deiki tara er lyomda, tiga meter (3) kupu. Adeiki tara di dipra ortara er bukamda, dua setengah (2.5) meter kupu. Atingkat weneri domi ati, er bura tara delada, kunupetepupa, er bukamda, dua setengah (2.5) meter kupu. Tonda, weneri ati tingkat dopidi, Allah er si eremna ati dopra, dana-dana tara yambul weik go tamyai kunupetepupa, er palada, 10 meter kupu. Tonda, Allah er si eremna ati pirman iknapi dam tara cap, udapu tara cap, akati wengban bisi buplan potokeiamidi domi. Abuplan butene potokeiamya damai tebala tara cap, dumsisi tara cap, deiki tara capda, utotopu dua setengah meter (2.5) kupu. Tonda, Allah er si eremna tep ati lamdinai, er palada, dua setengah meter (2.5) kupu.

Keteng dangban tara domi ati tep, seku upu

12 Allah er si eremna tep domi ati kaplepra ortarada, ila ati ton domi. Allah si eremna ati atara cap, ortara cap domi ati daneitamaida, yambul go ton tami. Aneitamai go er palada, 10 meter kupu. Aneitamai tami go kaplepra, orketeng dangban tara domi atida, angebo doupmau pina di deipra kunupetepupa, akati bura tebalal tara kumunai di dipra dumsisi tara kumunai er palada 45 meter kupu. Tonda, akati urasin dam tara di dipra, akati amnyo tara, er lyomda, 35 meter kupu. Tonda akati bura tara ongopgenepra peami dela, er bukamda dua setengah meter (2.5) kupu.

Allah Yahweh er si eremna tep ati cap, orketeng dangban tara domi ati cap, kunupra dominge tep, lap pepu upu

13 Angeboda, ‘Allah si eremna tep ati er lyomda, ware kupra meter do?’ tenen, er doupmau pina di deipra kunupetepupa, er lyomda 50 meter kepu. Ada, akati urasin tara di dipra, amnyo tara tep kunupetepu. Tonda, Allah er si eremna tep ati dominge, amnyo tara di dipra, orketeng dangban tara yambul weik ati dominge kaplepra, akati amnyo tara bena kunupetepupa, er lyom peda, 50 meter kupu.

14 Allah er si eremna ati urasin tarada, keteng yakan tara keiami. Atep, akati urasin tara dinin, udapu tara wiami gel beilya di dipra, iknapi dam tara wiami gel beilya, daneitamai tami go yumada, ‘Ware kupra meter kupkur do?’ tenen, angebo doupmau pina di deipra kunuputepupa, ago er palada, 50 meter kupu. 15 Ukupu dingeda, angebodi, orketeng dangban tara domi ati, ‘Er nong yumada, ware kuprap meter kupkur do?’ tenen, dapu tara deipra peami dela kumunai di dipra, iknapi dam tara peami dela kumunaida, kunupetepupa, er palada 50 meter kupu. Ayambul weik ati domyai di, ortara, Allah si eremna ati dominge atara, daneitamai tami yambul goda, kunupetepupa, er palada 10 meter kupu.

Allah er si eremna tep ati pumbon kwamu keca tep, lap pepu upu

16 Allah er si eremna tep ati neitamai yuk-yuk wilipra domi ati dinin, menmena ngeda, er si Telep Lengna Ati cap, tonda, Allah si eremna ati bisi buplan damai lapra doamya atolong dominge cap epsi. Uda, menmena domi ati buplanai adinin tekra ortara dinmasipa, mambul keca mawa derina tep, metek co bekin dopra dela taram deiki deiaminge epsi. Abekin er lelimdongona tep keca, telep opkal kapkotemipa, leliamunge epsi. Aco bekin deiki tarada, ‘Akati dela taram urasin pio telep kupkamre’ tenen, metek co weneri, er sida bingkai, adela taram deiki lelepra deiamidi, palepdongomi. Tonda, ago weik ati er dela taram deiki yumada, ‘Urasin telep kupkamre’ tenen, pala co lase er bukam pio metek kwamunge er sida tripleks utopunge palepdongomi. Angeda, ason deiki udi dipra, jendela potokra deiamyai damai amutara deiami. Tonda, metek jendela potokra deiamyaida, er lelimna tep keca, er sida kain tirai di kapkotemi.

17 Allah si eremna ati pumbon tara cap, bura tara capda, akati dela yuma, ‘Urasin pio telep kupkamre’ tenen, akati dela taram deiki yumada, nimidi gambar ton petupra deiaminge epsi. Agambarda malaikat utopu keca er si Kerub cap, tonda koroma co cap, urasin utopu kupra petupra deiami. 18 Aketenepra deiamingeda, akati urasin telep kuna tep, kael nengdi petupra deiami gambarda, ake. Neitamaida, malaikat urasin utopu dinin, er sida Kerub petupra deiami. AKerub dana-dana tarada, co er si Koroma co urasin utopu gambar petupra deiami. AKerub er urasinda, butene kepra deami.

19 AKerub urasin kepra deiaminge tebalal tarada, bura tara kuramre keca er sida, Yu Singa Pus urasin utopu kupra deiami. Tonda, ange utopu, dumsisi tarada, nimi urasin utopu kepra deiami. Aurasin telep kuna tep petupra deiami ngeda, Allah er si eremna ati dela taram deiki yumada, akeca urasin utopu kupra gambar petupra deiami. 20 Akati ason deiki di gonga kepra, adinin bisi buplan deiki tara yumada, malaikat utopu keca, er sida Kerub cap, koroma co cap urasin utopu petupra deiami. 21 Telep Lengna Ati wengna tep bisi buplan damai dana-dana barimna tep tekra deiami co, er kamo urasinda, persegi empat kepra deiamidi domi. Tonda, ortara domi ati, er sida Pio Telep Lengna Ati, er bisi buplan damai dana-dana barimna tep tekra deiami co peda, er kamo urasinda, persegi empat kepra deiamidi domi.

Israel nesaladi, ‘Nun mali kun keca yuma, Allahdi ange kaukepserdi, gum kupra deipkamser’ tenen, co di dopra deiami keca tep, lap pepu upu

Pio Telep Lengna Ati, tali neng men wekmantoaida, Allah morona tep, ‘Akeca deiki tara yapi dopra likeipkamep’ tenen, co di dopra deiami keca, er sida mesba akwamupa epsi. 22 Angebo er doupmau pina di akeca kunupetepu. Akeca er utara di dipra deiki tarada, er lyomda, satu setengah meter tinggida, (1.5) kupu. Tonda er pala dana-dana tarada, satu meterpu kupu. Tonda amesba derina tep, amutara yangdina cap, tonda akeca kupkupai sirik dana-dana yuma cap, tonda akeca er lelimna tep peami dela capda, co di domi.

Akeca konum epsi pangeda, angebodi upepneu. “Gume, amesbada, Allah Yahweh er dinai urasin tara deipitopu, tupa acapu kurure,” pepneu.

Allah si eremna ati pumbon dinin, Telep Lengna Ati wengban bisi buplan tep, lap pepu upu

23 Uda, Allah er si eremna ati pumbon dinin, Telep Lengna Ati wengban bisi buplanda, butene ketenepra deiami. Dinin, abuplan dengdongona cap, pangna cap tep nengeda, ukuramu. Imam deiyo ngebodi, abuplan pange tarada, tenpu kepra pakubaramu. Tonda, abuplan dengne taruda, tengepra dengyakaramu. Ada, tebalal tara buplan pe, dumsisi tara buplan peda, pakupra tenpu kemdoramu.

Uda, ange utopu, ortara domipa kwamu ati er sida, Pio Telep Lengna Ati, tali neng pe, yuk-yuk imam-imam neng peda, akati tali lupra men wekmanto kurami. Imam neng, sun ila deiyo ngebopu akati wengbaramudi pel doramu. Ortara ati, er sida Pio Telep Lengna Ati peda, er buplan bisi wengbanai tep nengeda, bisi bon tenpu potokra keteneiami. Dinino, abisi buplan dengdongona cap, pangna cap tep nengeda, ake. Imam ila deiyo ngebodi pakra wekun taruda, buplan tenpu keiaminge paknepa, abuplan er yuk dana-dana tara pakudorbaramu. Ange utopu, imam ngebodi tamupra dekne taruda, abuplan er yuk tengepra dana-dana tara dengyakaramu.

24 Abuplan yumada, butene-butenepu potokami. Ukuamidi, buplanda neitamai dipapu buplan pangami. 25 Telep Lengna Ati neitamai wengbana tep potokeiami buplan deiki, er urasin telep kuna tep keca, co er si koroma perameng co urasin utopunge cap, tonda malaikat urasin utopu keca, er sida Kerub cap di, petupra deiami. Angeda, akati dela taram deiki yuma petupra deiamipa kwamutopu, abuplan nong deiki ton petupra deiami. Tonda, akati urasin damai tara dinin, bura tarada, tenpu keca er sida, tirai co deiki di dopra deiami. Atirai deiaminge deiyoda, ‘Tali dakunge nengdi, Telep Lengna Ati pumbon kwamu keca yuma epnung’ tenen, atirai di bisi buplan damai lelipdongomi.

26 Telep Lengna Ati bura tara atolong damai dela pepra dominge deikida, malaitkat urasin utopu keca er sida Kerub cap, koroma co urasin utopunge cap, petuprapidi deiami. Tonda, ange utopu, yambul ortara domi ati er bura tara dela deikida, Kerub cap, koroma co urasin utopunge cap, petuprapidi deiami. Tonda, abura tara domya dela deiki yumada, metek bisi er sida jendela-jendela ton potokra deiamidi domi. Tonda, Telep Lengna Ati bisi buplan damai cap, yambul ortara domi ati jendela bon bisi damai yuma capda, ‘Tali nengdi akati pumbon kurur keca epnung’ tenen, lelimdongona tep keca er sida terai di ketenepra deipidi, lelipdongomi.