Eze 42 | XteSC | STEP | Uda, ange yuma konum kupu dingeda, angebo er dipapu, ne doupra Allah si eremna tep ati damai dinin, udapu tara kwamu gapura neitamai di kirikra, ortara go weik taminge neitamai bena teknumu. Acadi, ka tamupra, iknabi dam tara dinmasipa, Allah si eremna ati damaipu dinin, ketengdangban tara domi ati epsi. Akati damai di dinmasipa, dapu tara udomipa kwamu ati epsi.

Ezekiel 42

Allah Yahweh, er si eremna ati damaida, ati butene ton dominge tep, lap pepu upu

1 Uda, ange yuma konum kupu dingeda, angebo er dipapu, ne doupra Allah si eremna tep ati damai dinin, udapu tara kwamu gapura neitamai di kirikra, ortara go weik taminge neitamai bena teknumu. Acadi, ka tamupra, iknabi dam tara dinmasipa, Allah si eremna ati damaipu dinin, ketengdangban tara domi ati epsi. Akati damai di dinmasipa, dapu tara udomipa kwamu ati epsi. 2 Adomi ila ati er nong yuma lyomda, 50 meter kepu. Ange utopu, er palada, 25 meter kepu.

3 Akati domidi, er urasin deiami tara go er palada, sepuluh meter (10) kupu. Akati dinin ton tarada, er urasin deipra domi tarada, bura di nimi yanipra yakana tep, gel pala yakra deiamidi, domi tarada, lantai batu damai akati urasin bura tara kepra deiamidi domi. Akati dominge, tenpu menmena domingeda tu deiki amutara domi. Adinin, butene ngeda, neitamai domi. Adinin weneri ngeda, deiki tara domidi, tiga tingkat ati pepra dorameng utopu kupra domi. Atiga tingkat ati dominge er urasinda, Allah si eremna ati iknapi dam tara kepra deiamidi domi tarapu keiami. 4 Akati yuk-yuk wilipra domidi, urasin tara dinin, yambul go taminge, er palada, 10 meter kupu. Tonda, agopu dinin, er lyomda 50 meter kupu. Atingat tiga domi kati er ati pumbon wengbana tep bisida, udapu tarapu potokra deiami.

5 Akati pumbon neitamai alau tara wilipra domi atida, er go pio yambula di kepra domi. Dinin, yuk amutara domi ati pumbon neitamai yumada, yambulanun pala weik kepra domi. Deiyoda, yambul metek bisi er sida, lorong-lorong damai domi atida, er pala weika di domi. Adinin, amutara domi atida, yambula dipapu domi. 6 Atiga tingkat ati pumbon neitamai yuk-yuk wilipra dominge yumada, weneri tingkat kepra domi. Tonda, Allah er si eremna ati damai dinin, dana-dana tara ati cap, bura tara gel beilya damai domi ati cap, akati-akati er ayumnya co di ikra dorami utopu kupra, atiga tingkat ati ton pio men domi. Yuk ati dopkungedi, ati dam tara cap, ati pumbon cap di ayumnya ikra doramengtopu kupra men domi. Ange tep nengeda, atiga tingkat domi ati, alau tara wilipra domi atida, er goda yambulanun pala weik cap kepra domi. Dinin, daneitamai domi ati pumbon yumada, er go yambula di kepra domi. Pio amutara dinin, tu deiki domi ati go yumada, metekanunpu kepra domi.

7 – 8 Ton tara di bokra tuai amutara domi tingkat, er lyomda 25 meter kwamupa domi. Akati-akati yuma dominge buplan bisi urasin tarada, ‘Tali nengdi, akati-akati pumbon men eptenge’ tenen, yambul gel beilya er si tembok deiki dipapu deipra domi. Atembok sirik-sirik tara yumada, dua puluh lima (25) meter kupu. Dinino, ortara ati-ati weik dominge, sun urasin tara deipidi domi ngeda, Allah si eremna ati dam tara deipra domi. Ange er sirik-sirik tara yumada, lima puluh (50) meter kupu. 9 – 10 Atingkat tiga ati domi ngeda iknapi dam tara domi. Atingkat ati amutarada, akati keteng yakan tara sirikaida, akati wengna tep bisi buplan tenpu potokra deami. Abisi buplan tenpunge damaipu, gat gel di dopra bum beilya wiamidi dominge, er si tembok gonga keami damaipu, abisi buplan potokeiami.

Ada, atingkat ati tapnedi, ortara Allah er si eremna ati damai bana tep, abisi buplan potokeiami. Ayambul gel beilya tembokda buma deiki deipra domi. Allah si eremna ati damai go weik tami tara di, abisi buplan wengyakarami. Tonda, dapu tara tingkat tiga domi ati urasin utopu kupra, iknapi dam tara domi tingkat tiga ati peda, er urasin cap, kunupetepupa, meter kwamunge cap, buplanai cap, ange yumada pio utopu kupra domi.

11 Ikapi dam tara domi ati, tingkat tiga ati dopra yuk-yuk wiliamidi, akati urasin tarada, wekra bena yana kemna tep bisida, udapu tara ati keteneiamidi domi utopu, akati peda utopu kupra domi. Ada ikapi dam tara domi tingkat ati pe, udapu tara domi tingkat ati peda, er kamoda utotopu kupu. Tonda iknapi dam tara domi ati kunupetepupa, er lyom pe, er pala peda, udapu tara domi ati utopu kupu. Tonda, akati buteneda, er bisi buplan potokra deiamyai peda er kamo utopu kupu. 12 Iknapi dam tara domi tingkat ati dopra, yuk-yuk wilipra domidi, akati amutara, ara selatan tarada, akati di bura tara bisi buplan ton potokra deiami. Cadi, udapu taru domi tingat atida, akati pumbon di bura tara bisi buplan potokra deiami ngeda, dapu tarapu deipra domi. Uda, iknapi dam tara tingkat tiga domi ati pirmanaida, gel di dopra bum beilya wiamidi dominge, er si tembok gonga keamya damaipu, abisi buplan potokra deiami. Abuplan er urasinda, keteng yakan tara deiami.

13 Angebodi upepneu. “Adana-dana tara domi tingkat ati butene yumada, telep lek ati kurure,” pepneu. Atingat ati pumbonda, Allah si eremna ati pumbon pel dona deiyo neng, sun imam-imam neng dipapu wektenge. Tonda, sun imam-imam neng dipapu, Allah er si eremna ati pumbon yana wekmengedi, Allah Yahweh cap kikiman antapmengedi, sun Israel yala nesala tep, Allah moronunge. Tonda, Allah tep karen keca pio telep lek ngeda, ange neitamai di dopropnedi, bokra akati pumbon duyana jenunge. Allah karena tep yapi keca dopra, galepnedi, pio telep lek ngepu akati pumbon peda, mawa derinunge.

‘Allah er si eremna tep, amenda taru karenkamep’ tenen, akati mawa derinungada, ake. Ton ngeda, Allah gispal dona tep, gandum du dopra derinunge. Tonda, Israel nesala mali kupnepa, ‘Allahdi ange yuma kaukepseredi, gum kupra deipkamser’ tenena cap, tonda amalinge yo pununa cap tep, yapi keca ^{▼▼yapi keca – Sun Israel nesaladi, ‘Nun mali kunup kecada, Allah kaukepseredi, ange yuma gum kupra deipsetu’ tenen, tonda, Allah er si eremna tep kareraminge kael kemna tep, Imamat 2:1-16; 6:14-23 dinkurume.} popnedi, galepra dan tarada dopra akai mawa derinunge. Ton ngeda, Israel nesaladi mali kupnedi, ‘Uo, nunda tek sisi pio mali kupmape,’ tenen, ikin kange doupra, tenenge ngeda, Allahdi atenenge ngeda, gum kupra deipsetu’ tenena tep, akaren keca dopra, akati mawa derinunge. Ada, ‘Amenda taru ton ngeda, jenkamepe, ton ngeda, Allah tep karenkamepe,’ tenena tep, akeca-keca dopra, akati pumbon mawa derinunge. Aca domi atida, pio telep lekai kurura cadi, Allah er karen keca dana tara ngeda dopra, akati pumbon jenunge, tonda, mawa derinunge.

14 Allah si eremna ati pumbon pel dona deiyo neng, sun imam-imam nengdi, sun pel donmananen, konum pel dopra seng pepnopda, akati tapra, bura tara benkun taruda, sun kenekman opkalda, atingakat tiga ati pumbonpu, kwiripra, deipnopda, yuk tali opkal kenekra orbura tara go weik tamyaida, abisi dorbena banunge. Ukununga deiyoda, Allah si eremna ati pumbon keneknedi pel don opkalda, pio telep leknge kurura tep, ukununge. Ukupmengopda, sunda yuk tali-tali nesala weik wekmangai peda, tali embanunge.

Allah er si eremna ati bura tara go kwamngai kunupetepka tep, lap pepu upu

15 Angebodi, Allah si eremna tep ati dinin, ati pumbon tara konum kunupetepu dingeda, ne doupra, lyom gel di deipra domi ati, er sida gapura, dinin keteng yakan tara bisi buplan di kirikra, go weik tamyai dubeneu. Ada, Allah er si eremna ati bura tara pirman go kwamngai, akwamu keca yuma cap, ‘Kunupetepkunem’ tenen, dubena deipneu. 16 Angebo doupmau pina di, bura tara dinin, keteng yakan tara di deipra wiami gel beilya, atara di dipra ortara kunupetepupa, er palada, dua ratus lima puluh (250) meter kupu.

17 – 18 – 19 Ukupu dingeda, angebo er doupmau pina di deipra, udapu tara deipra wiami gel beilya, kunupetepu. Tonda, ange utopu, angebodi iknapi dam tara deipra wiami gel beilya damai bena, kunupetepu. Tonda, ange utopu, angebodi keteng dangban tara deipra wiami gel beilya damai bena, kunupetepu. Abeilya kunupetepunge yumada, er lyom yumada, dua ratus lima puluh (250) meter kupu. 20 Cadi, Allah er si eremna ati cap, akati damai kwamu keca cap, kupkai yumada, dana-dana tara yuma utopu kupka cadi, persegi empat kupu. Ange yuma er kunumpetenada, utotopu panjang dua ratus lima puluh (250) meter kupu.

Allah er si eremna ati cap, akati damai kwamu keca yuma cap, akati damai yambul go tamyai capda, ‘Ange yumada, Allah erngepu kurure. Akwamunge yumada, pio telep lekai kurure,’ tenerami. Uteneramya tep, gel beilya di wipra ongopdongomi. Agel beilya di ongopdongominge deiyoda, Allah er tara pio lek kurura cadi, ernge yuke, nimi tali-tali neng embana yuke,’ teneramidi abeilya wipra ongopdongomi.