Eze 43 | XteSC | STEP | Uda, Allah si ereman ati bura tara tami go weik tara konum kunupetepu dingeda, angebodi ne doupra, keteng yakan tara bisi buplan potokra deiamyai doupra beneu. Ada, lyom gel di deipra domi ati, er sida gapura damai dubenue. Ada, Allah er si eremna ati wengbanai tep bisi damai dubeneu.

Ezekiel 43

Allah Yahweh er si eremna ati pumbon tamupra wengbeua tep, lap pepu upu

1 Uda, Allah si ereman ati bura tara tami go weik tara konum kunupetepu dingeda, angebodi ne doupra, keteng yakan tara bisi buplan potokra deiamyai doupra beneu. Ada, lyom gel di deipra domi ati, er sida gapura damai dubenue. Ada, Allah er si eremna ati wengbanai tep bisi damai dubeneu. 2 Ukupneu taru di, dinmasipa, keteng yakan tara di akati damai yau ila dirin ngeda, melangdang pepra yaupa, neda men epmanto kupsi. Aila dirin ^{▼▼dirin – Allah yakare taru yumada, ila dirin weik kurure. Aila dirinda, tali dirin gume. Adirin tep nengeda, Ibrani upu deik di, ‘kabod’ penunge. Aupu deiyoda, Allah er ila puto weik kurenge cap, pio teleppu kurenge cap, pio lekpu kurenge cap, akeca-keca yuma taleredi, puto weik deiyo ngebo kureng cap deiki di yakarura cadi, petenkemna tep, ila dirin weik melangdang perure.} yau ngeda, Israel yala nesala sun tep kalekra pio melimrur ngebo, Allah Yahweh, acei yanmaua tep, petenkemna tep adirinda kupu. Tonda, ila laut mokon longteng pepredi, me kait welepmarya, kwerepa, ila lelim peramretopu, Allah akati wekmau tarada, alelim peramretopu penmaupa gekepsi. Tonda, Allah yanmau deiki di, er ila dirine weik kupka cadi, mutu ban-ban yuma peda dirin, weik kupupa epsi.

3 Aila dirin epsi ngeda, Allah Yahwehdi, ‘Yerusalem mutu yuma popnedi, sikki buktapkamne’ tenen, yau taru dirin weik kupupa, epsitopu, ataru peda kupu. Tonda, ken mapsa deiki di epmasi kecada, men taru Babel mutu neitamai dinin, Kebar me damai kunmasi taru emsinge utopu, ila dirin weik cap, lelim weik cap, kupu. Tonda, Allah Yahweh yanmau tep, kware weik kupneupa, ‘Allah gispal dopkun’ tenen, ne nong yuma tu deiki mapsidi, giso tu dipdongopsi.

4 Allah, er si eremna ati damai yau taruda, er ila puto kurenge cap, pio lek kurenge cap kupupa, ila dirin melangdang pepra yau ngeda, lyom gel di deipra domi ati, er si gapura dinin, keteng yakan tara dominge bisi buplan di wekra, adipapu ortara, Allah er si eremna ati wekroupa epsi. 5 Ataruda, Allah er Lek Sambaladi ne erepra dubeneudi, Allah er si eremna ati damai yambul go taminge neitamai deipneu. Ukupra deipneupa, abena teksidi, dinmasipa, Allah Yahweh er ila dirinda, Allah er si eremna ati neitamai dekpepra dinikmaupa epsi.

6 Ataruda, angebo ne damai tupa atekmau taruda, Allah Yahweh er si eremna ati pumbondi upu ne tep pepneupa, gekepmasi. Allah Yahwehdi pepneu upuda ake.

7 Yahwehdi upepneu. “Uo, kanda nimi sisa di deipkei ngebo kuruma cadi, kanda menmena di depkamrume. Neda, akati kununa deiki di, akeca-keca yuma talepra, ila nimi deiyo kepra kunedi, tuai mutu nesala yuma tep upu bongdinkamne. Akati neitamaida, ne yandi yanipra kunkamne. Atep nengeda, nimi deiyo neng bungnung keca, er sida takhta utopu, akati kunurure. Atep, aceida, ne kunedi, Israel yala nesala sun kan-kan pio tep akuramnedi, sun Israel nesala tep, ‘Ange kupkamrume, angeda pio men kupkamrume,’ pepra upu bongdinkamne. Ada, sun Israel tali nesala cap, sun deiyo-deiyo kepra, Raja-Raja kunge neng capdi, ne pio lengna ngebo si tep, tupa yaninengedi, mali men kudinkamnenge. Sundi ne pio telep si, yaninengedi, mali kudinenung ngeda, ake. Ada, isok-isok tep, ‘Nun nai’ tenen, si eremnunge. Tonda, sun mutu talepra deiyo-deiyo neng, sun Raja neng depmengepa, ne si eremna ati bura tara wiami gel beilya damai peinunga deiki di mali kudinenunge. Menop taru ange yuma ukurami dinin, ataru di dipra dorkunkamre taru yumada, ange tupa men kunkamenge.

8 Tonda, menop taruda, sun Israel yala nesala, sun deiyo-deiyo nengdi, sun pe ati domidi, bisi buplan dana-dana tara co deipra dominge cap, abuplan wengban bisi yaninai cap, ne pe ati damai utopu domi. Ukuramya tep, sun ati ortara, ne ati atara neitamaida, tenpu gel beilya wipra deiami dinin, sun atida pio meneng damai kupka cadi, ukuramya deiki di, ne lek ngebo si tep pio mali kudiramnei. Sun ukuraminge yuma tep nengeda, nedi, ‘Akeca-keca yuma, ne pio dabale. Ange yumada ne pio songe,’ tenenun dinin, ange tenena gum dipapu, tali lupra mali kun keca weik kurami. Ukuramya tep, sun tep yu weik kuneupa, amutu kurami nesala yuma popra gawal daksi. ^{▼▼gawal daksi – Ada, Allah di sun Israel yala nesala yuma tep yu weik kupka cadi, go karepupa, sun Babel mutu jen talen nengdi, Yerusalem mutu yana, popra sikke buktapi. Akati-akatai yumada, urupra gawal dakidi, uku dongopi.}

9 Pio mali weik kurami dinin, ukutaru di gonga kepra, sundi isok-isok si eremnung ngeda, adipapu tamkamenge. Tonda, sun nimi deiyo neng, Raja-Raja depnepa, ne ati dam beilya pirmanai tu palipra peirami ngeda, adipapu dopra, per orkarenai dubenkamenge. Apepmantopu tek sisi kupmengopda, neda sun kan-kan pio tep akunkamne.

Allahdi, ‘Sun Israel nesala ali dakameng’ tenen, Yeheskiel tep, pepu upu

10 Yahwehdi aupu yuma konum pepu dingeda, Yeheskiel tep aupu ton cap dukdongorpra pepu.

Uo, kanda nimi sisadi deipkei ngebo kuruma cadi, menmena depkamrume. Kandi, ‘Sun Israel yala nesala yuma kael kepkameng’ tenen, ne si eremna tep ati pumbon kure keca cap, akati dana-dana tara kure keca yuma cap, er kunumpetena meter yuma cap, er urasin yuma capda, sun damai lape perbenkamrume. Ange pepmemnya deiki di, sun mali kunge keca moupra kael kepmengedi, ali weik dangkamenge. 11 Sun Israel yala nesaladi ange yuma gekepmengedi, ali weik dakmenge taruda, kan Yeheskeildi, ne si eremna ati pumbon kurenge kamo tep, lap pepkamrume. Tonda, akati wengban bisi buplan cap, akati tapra ban bisi cap, ati taplakra deipidi dominge cap lap penkamrume. Tonda, ne Allahda, ne si eremna tep ati neitamai pel dona tep, ‘Ukunkamrume, apelda ukupra donkamrume. Angeda telepe, angeda meme,’ pepra lap pepsinge cap, tonda, ange men kupmengepa, yu kupnernyopda, wenepkamsen nge cap, kandi lap perbenkamrume.

Tonda aupu-aupu yumada, kandi sun Israel nesala dinkamengai di, aupu sengkamrume. Ukupkamruma deiyoda, sundi epmengedi, akati pum pel dona yuma tep, ‘Ukupra apel donkamrume,’ pepsinge, moupra kael kepmengedi, ne pepsitopu kunkamenge. Tonda, nedi sun tep, “Akati pumbon cap, bura tara cap, ange kunkamrume, angeda pio men kunkamrume,” pepra deipsitopu moupra tenepmengedi, kunkamenge.

12 Apepkuken upu yumada, ne si eremna ati pumbon pel donkamenge cap, akati-akati damai kunkamenge cap tep nengeda, nedi, ‘Ukunkamrume,’ pepra deipsentopu, angepu kunkamrume. Yuk nge ton tenepra kuna gume. Ada, agel beilya wipra dominge neitamai cap, akati dam bukamu mutu dupai capda, pio tek sisi ila mambul telep lek mutu kurure.

Allah karena tep yapi keca popnedi, uku dongonai tep, lap pepu upu

13 Ne Allah karena tep, yapi keca popnedi, uku dongonai tep, er si mesba, akeca dona tep pepkuken kunumpetena meter yumada, ne Allah si eremna ati pumbon kwamu keca cap, akati pirmanai kwamu keca yuma cap, akati dana-dana tara kwamu keca capda, malaikat ngebo pina di deipra kunupetepungepu doupra deipmemdi kunupetepkamrume. Er pina lyomda, 53 sentimeter kuputopu, angepu talepra amesba nong tep kunupetepkurume. Amesba amutara ongopgenepra dopkameng yangdinada, er pala pe, er lyom peda, pina tenpu 53 sentimeter, ange utopu setengah meter kupkamre. ‘Amesba amutara dopkamya tep, yapi keca popnedi, mena deipnepa, yapi sangredi embankamre’ tenen, matap sekra keteneipkamenge. Amatap bisi er bukam peda, setengah meter kupkamre. Ayangdina keca deiki tara deipkameng matap bisida, udi dipra deiki tara, 25 sentimeter (seperempat meter) kupkamre.

14 ‘Yapi embankamre’ tenen, sekameng matep bisi deiki di, dipdongopra deiki tarada, akeca yuma ongopgenepra dopkamenge. Angeda, matap deiki di dipra deiki tara er lyomda, tenpu meter kunupetepmengedi, dopkamenge. Akeca er bukamda, setengah meter kupra deipkamenge. Akeca deiki deipkamenge ngeda, udi dipra deiki tara, er lyomda, dua meter (2) kunupetepra deipkamenge. Ange er bukamda, 50 sentimeter (setengah meter) kupkamre.

15 Akeca deiki tarada, yapi keca popnedi, uku dongopkamengai, kunupetepra deipkamenge. Uku sengna tep dopra deipkamengaida, udi dipra deiki tara, er lyomda, tinggi empat meter (4) kunupetepra deipkamenge. Tonda, uku sengkameng keca deiki tara, sirik dana-danada, imam nengdi takke keca dumbari (4) dopra deipkamenge. 16 Yapi keca popnedi, mesba deiki tara uku sengkamengaida, er lyom cap, er pala capda, utotopu 6 meter kunupetepra deipkamenge. Akeca er nong yumada, persegi empat kupkamra cadi, er nong dana-dana tara yuma peda, utotopu 6 meter kunupetepra deipkamenge.

17 Yapi keca popnedi, Allah karena tep, uku sekmengedi dongonkamengaida, er nong dana-dana yumada, empat segi 7 meter kunupetepra deipkamenge. Atep, akeca er lyom cap, er pala cap utotopu 7 meter kupkamre. Akeca deiki tara ongopgenepra pirman deipkameng ngeda, udi dipra deiki tarada, 25 sentimeter kunupetepra deipkamenge. Akecada, gam keca galepra derinkameng ngeda, ‘Tuai sakrur’ tenen, barimna tep gel di deipkamenge.

Uku sengkamengai amutarada, ‘Yapi sakredi embankamre’ tenen keca tep, matap bisi sekra derinkamenge. Er bukam palada, 50 sentimeter kupkamre. Allah karen keca popnedi, uku dongorbankamengai, deiki tara weler bana tep nengeda, moromnada, keteng yakan tara di moropra mesba taram damai derinkamenge.

Allahdi Yeheskiel tep mesba deiki karenkamenge tep, lap pepu upu

18 Ataruda, Allah Yahweh, akeca-keca yuma talepra deiki tara ila puto kure ngebodi pepneu. “Uo, nimi sisa di deipkei ngebo, kanda menmena dipu depkamrume. Ne Allah Yahweh pepkuken upuda, moupra gekepkurume. Ne karena tep, uku sengkamengai, er sida mesba, konum dopra seng pepmengopda, amesba pio telep kudina tep nengeda, yapi keca popmemdi, amesba deiki uku sekra dongopkamrume. Tonda, agam keca er yapi dopropmemdi, amesba deiki tarada, ayapi di gege pepra, embenkamrume.

19 Ukupmem dingeda, Lewi yala neng dinin, Allah er si eremna ati pumbon pel dona deiyo neng, sun imam neng tep apel karepkamrume. Ada, Lewi yala nengdi deami ngebo er sida Sadok, erdi deiamupa, dadeipdanen yakankameng nengpu, ne damai yangedi apel donkamenge. Ada, ‘Israel nesala sun mali kunge keca yuma, kaukepnedi, gum kupra derinkamne’ tenen, tenemsi keca karenkamnenge nge tep, Sadok er yala neng dipapu, yana apel donkamenge. Neda Allah Yahweh, ^{▼▼Yahweh – Acada, Ibrani upu deiki di, ‘Yahweh Adonay’ pepra sekya cadi, sun kael kemna tep, nundi aupu, ‘Adonay’ deiyo ngeda, ‘Akeca-keca yuma talepra, deiki tara ila puto kure ngebo’ jenek kupra sekmupu. ‘Yahweh’ pepra seki ngeda, lap pen upu nomor 49 dinkurume.} akeca-keca yuma talepra, deiki tara ila puto kune ngebodi, ‘Ukupkamrume,’ pepra konum deipmakena tep, angepu talepra kunkamrume. Atep nengeda, kandi sun Sadok yala imam neng tep, tenpu jem sapi bisam keteng tamun yambulnge dopra karenkamrume. Ada, ne Allahdi sun Israel yala nesala mali kunge keca daepnedi gum kupra deipkamna tepa. Allahdi Yeheskiel tep pepu.

20 Tonda, Allah tep asapi bisam popra karenkamrum ngeda, popmemdi, yapi yambulanun ton dopra, amesba deiki tara sirik-sirikai sapi bisam er giso deiki tengamre keca, er si abolyakot urasin utopu, atakke keca dumbari deipmengepa belepkamra deiki tara, yapi gege pepra likeipkamrume. Tonda, ange utopu, amesba er sirik tara dana-dana dumbari yuma, bingkai utopu keca ketenepra deipkamenge ngeda, er kumunai dana-dana tara dumbari deiki cap, tonda mesba deiki tara gam keca popmengedi, galemna deipmengepa, ‘Tuai sakrur’ tenen, barimna tep gel di ketenepra deipkameng nge deiki cap, akeca yuma deiki tara yapi gege pepra likeipkamrume. Ukupmemnya deiki di, amesba nong yumada, nenge tep, telep kweipkamnerume. Ada, mali kurenge ^{▼▼mali kurenge – Amesbada, tuai nengdi ketekepra deipkameng keca cadi, akeca cap, akeca dopkameng neng cap mali kurur keca yuma, Allahdi daepredi, yo punupkamre. Ukupyopda, amesbada teleppu kupkamre ja. Tonda, aukupkamenga deiki di, sun imam-imam neng cap, Allah cap antapmengedi, sun imam nengdi akati mambul pel donkamenge.} yumada, nedi gum kupra deipkamna tep pepkene.

21 Uda, mesba damai pel konum dopmemnyopda, Israel nesala sun mali kunge keca kaukepnedi, gum kupra deipkamna tep, jem sapi bisam popra karepkamnerumnge, ne Allah si eremna ati bura tara wiami gel beilya damai di dipdongopra dorbura tara neitamai, nedi, ‘Acapu uku sengkamrume,’ pepra deipkesaipu, asapi bisam tupa datapkamrumge ^{▼▼tapkamrumge – Ada, asapi bisam er bol cap, deiplyu cap, yo cap, giso capda, datapkamenge tep pepu.} yumada, uku sekrumudi dongopkamrume.

22 Uda apel yuma konum doprumudi, mapmamumnya berekyopda, atumida, jem kambing bisamda, bol mali douna gum di, pio telepngepu dopra, ne Allah tep karepkamrume. Ajem kambing bisam karepkamnerumnge deiyoda, sun Israel nesala mali kunge keca daepnedi, gum kupra deipkamna tepa. Ajem kambing konum popmumdi, amesba mali kupreng telep kudina tep, yapi dopra, amesba deiki gege pepra likeipkamrume. Ada, menmena tumi, ukupu sapi bisam yapi dopra, mesba deiki gege pepra likeipmamumtopu, u butene tumi peda, apel dopmamumtopu kupkamrume.

23 Amesba telep kudina tep, yapi gege pepra likeipkamrumnya deiki di, konum pel dopmumdi, gawal dakmumnyopda, ne Allah karena tep, yuk gam keca ton popra ketenepkamrume. Ada, jem sapi bisam ukupunge cap, jem kambing bisam ukupunge capda, bol mali douna gum, pio telepngepu dopropkurume. 24 Abisam butene popmumdi galemna ketenepra dopropmum dingeda, ne Allah damai duyankamnerume. Akeca duyana ne damai deipmumnyopda, sun imam nengdi, garam ua dopra, abutene bisam galemna deiki yungkamenge. Ukupmengopda, sun imam nengdi, akeca yuma dopra, ne Allah Yahweh karena tep, uku dongopkamnenge.

25 Kanda, ue yoneitam bari tumi yumada, ukupu jem kambing bisam cap, jem sapi bisam cap, jem kambing nong konum nemunge cap, popra, ne tep karenkamenge. Ada, sun Israel nesala mali kunge keca daepnedi, gum kupra deipkamna tep, akeca karenkamnerume. Ajem sapi bisam ukupunge cap, jem kambing bisam ukupunge cap, jem kambing bisam konum nemunge capda, bol mali douna gum, pio telepngepu wepra karenkamnerume.

26 Apel yumada, ue yoneitambari tumi deiki donkamruma deiyoda, ake. Ada, sun imam nengdi, apel dopkamenga deiki di, amesba nong yumada, nenge tep, telep kweipkamnerume. Ada, amesba dona tep, gel yakra deipra donkameng neng, sun mali kunange cap, amesba damai pel donkameng imam neng cap, sun mali kunange peda, nedi kaukepnedi, gum kupra deipkamna tep, apel donkamrume. ^{▼▼donkamrume – Amesbada, tuai nengdi ketekepra deipkameng keca cadi, akeca cap, akeca dopkameng neng cap mali kurur keca yuma, Allahdi daepredi, yo punupkamre. Ukupyopda, amesbada teleppu kupkamre ja. Tonda, ukupkamenga deiki di, sun imam-imam neng cap, Allah cap antapmengedi, sun imam nengdi akati mambul pel donkamenge.} Apel yuma konum dopmumnyopda, amesba konum telep kweipnyopda, amesba damai ne tep dor taru tali lupra pel dopbankamruma yuma tep pepsene.

27 Komuni yoneitam bari tumi pepsinge konum kupyopda, ban tumi cap, dortaru yumada, imam-imam nengdi, gam keca popmengedi, amesba deiki ne Allah tep ketenepra karenkamnenge. Sundi karekamneng ngeda ake. Ada, sun Israel nesaladi mali kunge keca yuma daepnedi gum kupra derinange tep, yapi keca popmengedi, uku dongonkamenge. Ton ngeda, sun Israel nesala cap, ne Allah cap, kange deipra antamdapedi, kikiman kunkamepa tep, yapi keca popmengedi, karenkamnenge. Ange yuma ukupmum pangeda, ne Allahdi sun Israel nesala yuma tep, kange pio deipsenedi, sun damai kikiman pio kunkamne. Aupu yumada, neda Allah Yahweh, akeca-keca yuma talepra, deiki tara erepra kunedi, ila puto deiyo ngebodi pepsene. Atep nengeda, nedi pepmasentopu angepu talepra pio kunkamrume.