Eze 44 | XteSC | STEP | Allah er karena tep, mesba deiki uku dongopkameng keca tep konum lap pepneu dingeda, ne damai yanmau ngebo dipapu, ne Yeheskiel dopra, Allah er si eremna ati damai dinin, yambul go tamyai dana-dana tara ongopgenepra gel di wipra deipidi doming damai dubeneu. Acada, Allah er si eremna ati ortara wengbana tep, keteng yakan tara potokeiami bisi buplan, er sida gapura damai dubeneu. Adubeneu tara wengban bisi buplan, keteng yakan tara ngeda, konum dekdongopnapu kwamupa epsi.

Ezekiel 44

Allah er si eremna ati wengban bisi buplan, keteng yakan tara ngeda, Allahdi dekdongopka tep, pepu upu

1 Allah er karena tep, mesba deiki uku dongopkameng keca tep konum lap pepneu dingeda, ne damai yanmau ngebo dipapu, ne Yeheskiel dopra, Allah er si eremna ati damai dinin, yambul go tamyai dana-dana tara ongopgenepra gel di wipra deipidi doming damai dubeneu. Acada, Allah er si eremna ati ortara wengbana tep, keteng yakan tara potokeiami bisi buplan, er sida gapura damai dubeneu. Adubeneu tara wengban bisi buplan, keteng yakan tara ngeda, konum dekdongopnapu kwamupa epsi. 2 Epsipa, Allah Yahwehdi ne tep upepneu. “Abuplanda, kange di ton cap pio men pangkamenge. Abuplan pio dekdongopnapu kunkamre. Tenpu ngebo peda, abisi buplan ton men wekamrure. Deiyoda, ake. Neda Allah Yahweh, Israel nesala yuma tep talepra melimnun Allah, tonda sundi si eremnenung Allahda, abisi buplan di weksi. Ada, neda akati wengna tep, menop taru abisi buplan wekamsi. Atep nengeda, ne si eremna ati damai bana tep, abisi buplan, keteng yakan tara ngeda, pio dekdongopnapu kunkamre.

3 Dinino, Israel nesala, sun nimi deiyo kepra, upu pena deiyo ngebo, Rajada abisi buplan wektudi, abuplan damai betudi acada jen jeptue. Ada, angebo erpuda, Israel nesala sun Raja kurura cadi, ne si eremna tep, gam keca popmengedi, ne tep karepkamnengeda, atu kankan di galepra, pio telep lengna jen keca keteneipkameng ngeda, bena aca jena telepe. Er angebodi, abisi buplan, er si gapura wekredi jepkuryopda, abuplan damai go weik tara di wengkamrure. Ange utopu, konum jepyopda, akati pumbon neitamai di tamupra, bura tara bankure taruda, ayanmare bisipu, abuplan go weik tara di tamupra bankamrure.

Allah er si eremna ati neitamai pel donkameng nge tep, lap pepu upu

4 Ne damai yanmau ngebo dipapu, ne doupra, Allah er si eremna ati damai dinin, arah utara, dapu tara bisi buplan potokaminge, ada lyom gel di deipra domi ati damai dubeneu. Adininda, dapu tara bisi buplan er si gapura weknumudi kirikra ortara dinmanemupa, Allah er si eremna ati urasin tara keiamyaipu doupra dubeneu. Dubeneu taruda, ne dinmasipa, Allah er si eremna ati pumbon tarada, Allah Yahweh er pio telep kurenge cap, ila puto kurenge cap, kurya deiki di, melangdang pepudi, ila dirine kupra akati pumbon yuma dekpepra diniku. Angeda, Allah Yahweh akati yana wekunge deiyo tep adirin kupu. Dirin weik kupu pangeda, epsidi, ‘Uo tek sisi Allah Yahweh erda pio mambule. Er si eremna ati pumbon konum wekra akunmare’ tenen kael kepsi. Ukupra kael kepsopda, ne nong yuma tu deiki mapsidi, giso tu dipra Allah tep gispal dopsi.

5 Ukupsi taruda, Allah Yahwehdi ne tep upepneu. “Uo, kanda nimi sisadi deipkei ngebo kuruma cadi, kanda menmena depkamrume. Nedi pepkuken upu cap, nedi pepkenepa kandi dinkurem keca cap yumada, kange moupra tenepmemdi kael kepkurume. Ne si eremna ati pumbon pel donkameng nge tep, ‘Angeda ukupkamrume. Apelda ukupra-ukupra donkamrume,’ pepra deipkuken upu cap, tonda, ne karena tep, ‘Akeca karenkamnerume. Akeca karenkamenga deiyo nengda, ukupra-ukupra kunkamenge,’ pepra deipkuken upu cap, moupra gekepmemdi kael kepkamrume. Moupra kael kepmemdi, ange yuma telep kupra sekamrume. Ange yuma lap pepmemnyopda, sun imam nengdi, apelpu donkamenge. Tonda, nedi, ‘Ato nengda, akati wengna telepe, dinin ato nengda, akati wengna meme,’ pepra, lap pepkukentopu, ange peda moupra gekepmemdi, sekra deipkurume.

6 Tonda, sun tali Israel yala nesala yuma, ne upu tep, ‘Nun songe’ tenen, yanipmengedi, mali kun kecapu talepra, mali weik kunmange nesala yuma tep, upepkamarume. Ada, ne Allah Yahweh, akeca-keca yuma talepra, deiki tara erepra, ila puto deiyo ngebodi, sun Israel yala nesala yuma tep pepsene. “Uo, sun Israel yala nesala yumada, nedi, ‘Akecada ne pio songe,’ pepra, deipsisi dinin, angepu tupa talepra mali-mali weik kurum keca yumada, adipapu yapkurume.

7 Sun anesalada, mali kun keca pio weik kununga deiki di, ne si eremna ati pio mali weik kudinenunge. Ne si eremna cap, ne gispal dona cap tep, sundi domba bisam popnedi, abisam er meta cap, yapi cap tupa karenerum dinin, sundi apio mali-mali weik kuruma deiki di, akeca yuma pio mali kudirume. Tonda, sun Israel yala nengdi, yuk yala nesala, tali-tali dakunge nesalada, sun den bam bol deiki tara men sengnung dinin, sundi, ‘Gume, Allah er si eremna ati damai tali lupra wektume,’ peruma deiki di, pio mali kurume. Ange utopu, anesalada, yuk mutu nimi bo neng kungedi, nedi, ‘Angeda kunkamrume, angeda pio men kunkamrume,’ pepra deiamsisi upu tep, teka men tenengedi, yaninenunge.

Tonda, ne sipu men eremnenunga cadi, ne damai pio men yanmanto neng kununge. Sunda, den bam bol deiki tara men sengmengedi, sun kange dipru cap, sun nong cap yumada, mali tupa kununga cadi, ne damai men yatenge. Atep, sun Israel nesaladi, ne si eremna tep, gam keca yuma popra, yapi cap, meta cap dopra, ne tep kareryakanenung taruda, sun animi bo nesala cap wisipmumdi, ne si eremna ati damai men wektume. Amali keca weik kupmumnya deiki di, ne si eremna ati pio mali kweipneruma deiki di, ne pio dabal kudinenunge. Nedi sun Israel nesala tep, ‘Angepu kunkamrume, angeda pio men kunkamrume. Ukupmumnyopda, ne dipapu, ukupra kalekra pio melimkamsene,’ pepra, pedina upu deiki di peiamsisinge yumada, sundi konum yanitamnapu kurume.

8 Angepu gum dinin, ton ngeda ake. Ada, sun Israel nengdi, ne si eremna ati pumbon ne si eremna pel dona tep kwamu keca cap, ne gispal dona tep karena pel don keca cap, ange yumada pio telep lengna keca kurur dinin, ange yumada, telep kupra men kalengrume. Tonda, sundi ne karena pel dona tep, ‘Allah karena pel donada, nun dabale,’ tenepmumdi, ‘Yuk tali yala neng dipapu apel dopsetenge’ tenen, yuk-yuk yala nesala, tali nimi bo neng ton wepra deipmumdi, ‘Nun melimna tep, sun dipapu Allah karena tep pel dopseso,’ pepra, aneng wepmumdi, apel kareramrume.

Kareramrum pangeda, yuk tali nimi bo nengdi, ne mambul keca karena pel cap, ne si eremna ati pel don keca cap, akati dana-dana kurur keca cap, damai pel dopyakaramitopu, tupua donunge. Ukupmumnya deiki di, akeca yumada, sun Israel yala imam nengdi, pio mali weik kudirume.

Sun Lewi yala neng tep, pepu upu

9 Ange tep nengeda, ne Allah Yahwehdi pepsene. Neda, akeca-keca yuma talepra, deiki tara erepra, ila puto deiyo ngebodi ^{▼▼deiyo ngebo – Acada, Ibrani upu deiki di, Allah er si tep, ‘Yahweh’ pepi dinin, tonca, ‘Adonay’ ton pepra seki. Atep, ‘Sun kael kepkamrum’ tenen, nundi aupu ‘Adonay’ deiyo ngeda, konum jenek kupra sekmupu.} pepsene. Sun Israel nesala kumumnya kankan neitamaida, yuk mutu nimi bo neng, yala-yala weik ton, sun cap wisipra kunung dinino, ato nengda, ne si eremna tep pel pio men doptenge. Tonda, ne si eremna ati damaida, pio men wektenge. Deiyoda, ne Allah tep, teka men tenenengedi, ne upu moupra gekepmengedi, men talenenung nesala cadi, sun kange dipru cap, sun nong capda, malipu tupa kununge.

Sunda, yuk mutu nimi bo nengda, den bam bol deiki tara sengna gum neng kununga cadi, ne damai pio men yanetenge. Atep, ne si eremna ati damai cap, akati pumbon capda, pio men wengyakankamenge. Ne pio telep lengna si eremna atida, pio men wekmanto nesala kununga tepa.

Allah Yahwehdi ne Yeheskiel tep, aupu yuma pepnue.

Lewi yala nengdi, Allah si eremna tep karen pel donange tep, pepu upu

10 Allah Yahwehdi ne Yeheskiel tep, aupu ton dukdongopra pepnue.

Israel nesaladi, ne Allah tep, ‘Allahda, nun dabale’ tenen, tamamneidi, tali keca tep, ‘Nun nai bo’ tenen, isok-isok si eremami taruda, Lewi yala neng kankan neitamai di, ton neng dingeda, sun peda ne tep tamamneidi, isok sipu eremami. Atep nengeda, ne Allahdi sun Lewi yala neng, tamamnei neng tep nengeda, sun mali weik kuraminge wenemna tep, menenga keca karepnedi, aneng wenepra popkamne ja. Ada, men taruda, sundi ne tep konum tapneidi, tali isok si eremamya tep, sun tep pio wenemkamne.

11 Lewi yala neng weik tara ngeda, ukupra mali kurami dinino, menop taruda, ‘Ne si eremna pel donkamneng’ tenen, sun Lewi yala nengpu wepra deiamsa cadi, sun ayala neng dipapu, ne Allah si eremna ati pumbon neitamai pel dona ngeda, ayala nengpu dinin, bokra yambulanpu, apelda talepra donkamnenge. Tonda, sun Lewi yala neng dipapu, ne si eremna ati, ‘Tali neng weknung’ tenen, akati er si gapura buplan damai kalengna cap, tonda ne si eremna tep, karen pel don keca cap, Israel nesaladi mali kunge keca daemna tep, sun aneng dipapu apel talepra donkamnunge. Ada, gam keca popra, karepnengedi, mesba deiki uku dongonkameng pel cap, sun Lewi neng dipapu tupa-tupa, tali dakunge Israel nesala yuma tep melimkamenge.

12 Amenda taruda, Lewi yala nengpu dinin, yambul tara bokra dopropkamne nengpu, apel dopra kunkameng dinino, sun Israel yala nesala yumadi, ne tapra isok sipu eremami taruda, Lewi yala neng kankan di, ton nengdi gonga kepra, isok si eremna pel ton melipra doramya deiki di, Israel nesala yuma peda, utotopu mali-mali pio weik kurami. Isok si eremamya tep, Israel yala nesala yumada, akeca di ateng koudongoramupa, mali kecapu kurami. Sun Lewi yala nengdi, isok si eremna pel melipra doramya tep, ila di wenepkamsene. Ada, ne Allah Yahweh, akeca-keca yuma talepra, deiki tara erepra, ila puto deiyo ngebodi, tek sisi pedina upu deiki, puto di pepsene. Sun Lewi yala neng, isok si eremami neng tep, menenga karepnedi, ila di wenepkamsen ja! Ange konum peipsena cadi, nong kupkamre ja!

13 Sun menop taru amali kun keca talepra, kurami Lewi yala nengda, ton cap ne damai pio men yakankamnenge. Tonda, Israel yala nesala makuna tep, imam pel talepra men donkamenge. Israel nengdi, ne si eremna tep, gam keca popnedi, karenenung keca peda, anengdi ne damai pio men duyakankamenge. Tonda, ne pio mali kuna gum di, pio telep lengna kecapu, ne si eremna ati cap, akati pumbon deiami keca cap, pio telep, lengna keca yuma peda, pio men talepra pel donkamenge. Sun anengdi mali-mali pio weik kuraminge tep, ali dakra kunkamenge. Tonda, amali kuraminge menengada, sun wenemna tep, ila ikin keca sun deiki deipnyopda, ikin keca karepnepa, doupmengedi, ‘Uo’ tenen, mambul kange doupra kunkamnunge.

14 Dinino, sun Lewi yala neng kankan neitamaida, tupa telep kunge nengda, ukutaru di dipra dorkunkamre taru pel donkamengeda pepkune. Sundi ne si eremna ati neitamai deiamsi keca kalengna pel cap, akati pumbon mambul pel talepra dona cap, donkamenge. Deiyoda, nedi ayala neng konum wepra deipsa cadi, ne si eremna tep karen pel cap, akati pumbon mambul pel cap karepnepa, sundi angepu talepra, pel tupa donkamnunge.

Allah er si eremna ati pumbon pel dona deiyo neng, sun imam-imam neng tep, pepu upu

15 Neda, Allah Yahweh, akeca-keca yuma talepra, deiki tara erepra, ila puto deiyo ngebodi, aupu pepkene. Israel yala nesala, tali dakurami nesala weik tara ngeda, pumun taru tamamneidi, mali weik kurami dinin, Lewi yala neng, kankan, ton tara nengda, men tamamneidi, ne si eremna ati pumbon pel, tupa melimami. Ada nimi er si Sadok, ^{▼▼Sadok – Angebo Sadokda, Lewi yala nengdi deiami ngebo kuramu dinin, Allahdi er tara neng wepra deiamupa, sundi imam pelpu talepra dorami. Harunda, Israel nesala, sun imam pel dona ila deiyo ngebo, menmena di gonga kepra apel deiyo talepra pel doramu. Ange kael kemna tep, 1 Tawarikh 6:50-53 dinkurume. Harundi deipu ngebo Elieser, erdi Sadok deipupa, dakuramnganen, Raja Daud kuramu taruda, Sadokdi imam-imam neng, sun ila deiyo ngebo keprapudi, apel talepra kuramu. Er tara nengdi apel talepra doramyanen, sirya taruda, Babel mutu yu nengdi, Israel tara kurami nesala yuma damai yana poprapidi, ila ati arum kota Yerusalem cap, Allah er si eremna ati capda, uruprapidi, tupa gam kurami Israel yala nengda, ateng koupra Babel mutu dubenami. Ada Yeheskiel kuramu taru neitamai di ukurami.} erdi deipupa, dadeipdanen yakaramyanen, deipipa kunge nengda, ne si eremna tep, Israel nengdi karepmengepa, gam keca dopra popmengedi, Israel nesala, sun mali kunange daemna tep, mesba deiki di, uku dongonkamenge. Ada Lewi yala neng dinin, sun tupa telep kunge imam-imam neng tep pepne. Menop taru, sun Sadok tara nengda, Israel yala neng yumadi, ne tep tamamneidi, mali weik kurami taruda, anengdi tupa telep kuramidi, ne si eremna ati pumbon kwamu keca yuma kalengami.

Atep nengeda, ataru sun Sadok tara imam nengdi, ne damai yana, ne si eremna ati neitamai pel donkamenge. Ada, Israel yala nesala, ‘Nun mali kunup keca, Allahdi kaukepra daepsetue’ tenen, gam keca karepmengepa, Sadok yala imam nengdi, popnopda, sun dipapu mesba deiki uku dongonkameng pel talepra donkamenge. Israel nengdi, agam keca karepmengepa, Sadok yala imam nengdi, akeca galepra, meta cap, yapi cap, dopropmengedi, ne Allah tep karenkamnenunge.

16 Atep, sun Sadok tara imam neng puda, ne si eremna ati dinin, Pio Telep Lengna Ati pumbon wengkamenge. Tonda, Israel nesala sun mali kun keca daemna tep nengeda, gam keca karepmengopda, sun Sadok tara imam nengdi, ne Allah gispal dona tep, akeca popmengedi, mesba deiki uku dongonkamenge. Tonda, nedi sun Israel nesala tep, ‘Sundi ne karena tep nengeda, ukupra-ukupra apel donkamrume. Aupu ton penkamrume,’ pepra, konum lap pemsi pel yumada, Sadok yala neng dipapu talepra donkamnenge. Ada, ne Allah si eremna ati neitamai wekmengedi, ne si eremna pel yumada, sun dipapu apel donkamenge.

17 Uda, sun aimam nengdi, ne si eremna ati damai bana tep, bura tara wiami beilya potokra deiami bisi buplan er si gapura damai di wekra, alyom gel di deipra domi ati dam wengkameng taruda, pio boun opkal, er sida kain lenan di wiramenge opkalpu kepra bankamnunge. Ne karena tep keca, er si mesba derirban taru pe, tonda ne si eremna ati pirman ban taru peda, sun anengda, kain wol di wirameng opkal ton, pio men kepra wengkamnunge. Ada domban bisam potong dopropmengedi, opkal wiramenge nge tep pepne. Dinin, sundi kemkamnung opkalda, kain lenan di wiramenge ngepu kenengkamenge.

18 Tonda, sun nong bupu kupya deiki di, ‘Nong me pakredi tong peprur’ tenena tep, sun amu kemne opkal, er si celana dalam peramenge peda, lenan di wirameng ngepu kepkamenge. Tonda, sun deiyoteng peda men darapdongopra men kemkamnunge. Tonda lenan di wirameng nge dipapu, sun giso deiki peda ongopra koudongonkamnunge. Ange yumada, ‘Nong me pakserur’ tenen, akati wengkameng taruda, yuk yala opkal ton men kepkamenge. Lenan wirameng opkalpu kenengkamenge.

19 Dinino, imam nengdi pel konum dopra seng pepmengopda, sun tali Israel nesala yumada, bura tara bulupra kunkamengai, imam neng tamupra yankunge taruda, imam nengdi ne si eremna ati neitamai pel don taru kemna tep, kain lenan di wirami opkalda, ne telep lengna ati neitamaipu kwiripra derinkamnunge. Ukupmengedi, akati pumbon di, bura tara yankunge taruda, tali opkal kenekra bura tara yakankamnunge. Ne lengna ati pumbon pel dona tep keteneipsi opkal, kepmange dipapu, bura tara yangepa, Israel nesaladi aopkal mangkau di bepmengopda, Allah er lengna puto di sun poprepa adipapu depnung tep pepne.

20 Tonda, sun imam-imam nengda, sun giso potong yuma toupra delau kuramretopu men kemdinkamenge. Tonda, sun giso potong tamengepa, pio lyom weik kupredi dolomamretopu pio gume. Sun aneng potongda, ‘Ukupra toupmengepa, yambulanun bum kemdinkamrume,’ pepra deipsisitopu kupra, tounkamnunge. 21 Ware imam-imam neng do yuma, Allah si eremna tep ati pumbon cap, akati damai dinin mesba domyai cap bena, pel dopkunge taruda, sun anengda anggur yu me pe, yuk kange yawaramne me yala-yala yuma peda, pio men jenkamnunge.

22 Sun imam nengda, kaber nerapu donkamnunge. Ada, tek sisi Israel yala sisa nengdi deipmenge kaber nerapu cap, nimi cap kapul men antamamenge nerapu cap, tonda nimi men domenge nerapu cappu, imam nengdi donkamnunge. Ada, Allah er si eremna tep ati pumbon pel donge imam nengdi, domenge nerapuda, imam ngebo depredi, soli tapre nerda, yuk imam ngebo dipapu, asolu neda, dona telepe. Dinino, yuk tali dakunge nengdi domenge nerapuda, er nenge depyopda, solu kuramrepanen, yuk imam nengdi, asolu ner pio men donkamnunge. Tonda, yuk tali dakunge nengdi, domenga, tamenge nerapu yumada, imam nengdi pio men donkamnunge.

23 Sun imam-imam nengdi, ne nyapu sun Israel nesala yuma tep, peterenkamenge. Ada, “Angeda, Allah er mawange tep, pio telep lengna keca kurure. Dinino, angeda, tali akwamre keca cadi, angeda pio telep lengna keca gume. Tali kecapu kurur ngeda ake, pio telep lengna kecada ake,” pepra peterenkamenge. Tonda, “Angeda, Allahdi, ‘Akeca cap, akunge keca capda, ne song cadi, akecada, pio men talenkamrume. Akeca ton pio men jenkamrume, akeca ton pio men kunkamrume. Ange yumada, ne pio song cadi, ange kupmumnyop do, talepmumnyop do, jepmumnyop do, bepmumnyop do, ne damai ton pio men yakankamrume,’ pepra, deipseu keca yumada, angeda mem keca cadi, pio tenena gume. Imam nengdi, ‘Telepnge ake, malinge ake,’ pepra, lape pepmengedi, peteremkamnunge.

24 Tonda, sun imam-imam nengdi apel ton donkamnunge. Ada, mali kun keca ton akaprepa, Israel nesaladi, yu kuprepa, upu deiki di pedangopda, sun imam-imam nengdi, ange yuma gekepmengedi, ‘E, telep kuna ngeda ake. Mali kuna deiyo ngeboda ake’ tenen, upu bokeipkamnunge. Ada, sun pe kange deiki di gum dinin, ne Allahdi sun tep, “Angeda kunkamrume, angeda, pio men kunkamrume,” pepra deipsisitopu, aupupu tenepra, upu bokeipkamsenunge. Tonda, ne Allahda, “Sun Israel nesaladi, ‘Atumida ila mambul tumi’ tenen, kalemkamnung tumida, nedi, “Ange-ange kupmumdi kunkamrume,” pepra, lap peipsisitopu, sun imam nengdi gonga kepmengedi, kunkamnunge. Ange utopu, ne Allahdi, “Sun Israel nesalada, ne si eremna cap, sun beipye peingna cap tep, tenpu tumi neitamai yumada, tali pel yuma men donkamrume. Atumida, Sabat tumi tep, ketenepra deipsisi tumi cadi, sundi ne tep, gispal donkamnenunge,” pepsisitopu, sun imam neng yumadi, ‘Atumida, pio mambul tumi, lengna tumi kupsere,’ tenenkamnunge.

25 Tonda, nedi pepsisitopu, “Sun imam nengda, tali yuk dakunge nesala kankan, ton konum depmange neng ton akapyopda, imam nengdi bol bepmengopda, er peda ukupra bol bepya deiki di, mali kweipdaryopda, ne damai men yakankamre. Atep, konum depmange nesala damai banada, pio meme, angeda men kunkamnunge,” pepsene. Dinino, imam neng, sun nai yapu do, sun nin yapu do, sun wisi nesala cap, sun pe nyapu cap, ner nyapu cap, tonda sun pe, sun nin yapudi deiami neng cap, nerapu cap dinin, nimi men dopdanamenge nerapu tep nengeda, depmengopda sun bol benada telepe pua. 26 Ange pepmaken utopu, imam ngebodi konum depmange nesala bol bepyopda, ne Allahdi, ‘Angeda mali kunange cadi, ne damai pio men yakankamrume,’ konum pepra deipsa cadi, ange mali kudanange yuma gum kuna tep, tali dakunmrepane, komuni yoneitam bari deiki di tali kunkamre. Yoneitam bari tumi konum kupyopda, ne kangeda, ‘Angebo kange di telep kupmare,’ tenenkamne.

27 Ukupyopda, er imam ngebodi, ne si eremna tep ati, karerbanenung ati neitamai beredi, er mali kupmarenge kunumna tep, gam keca popra duberedi, ‘Allah tep, akeca karepnyopda, erdi ne mali kunange gum kupra deipneryopda, kange di ton cap telep kupra deipkamanere’ tenen, akati bena karepyopda, kange di tamupra, ne si eremna tep ati neitamai tamupra bena, pel donkamrure. Ange yumada, ne Allah Yahweh akeca-keca yuma talepra, deiki tara erepra, ila puto deiyo ngebodi, konum pepra deipsa tep, angeda tek sisi kunkamnunge.

28 Tonda, Lewi yala nengda, sun kunkameng mutu tu ton, men doropkamnunge. Ada ne Allah deikipu kunkamenge. Ne dipapu sun putan keca yuma karenkamnune. Sun Lewi yala nesala tep, sun Israel yala nesala deiyo nengdi, Israel nesala kunkamrumai di, wa tu ton bokra, Lewi yala neng tep men karenkamrume. Ada, sun Lewi yala nesalada, ne Allah deikipu kunkamenge. Ne dipapu sun putan keca yuma karenkamnune. Ne si eremna pel tep dopyakankamnerum ngeda, sun Lewi yala neng dipapu apel donkamnunge.

29 Sun Lewi yala nengdi jenkamnung ngeda ake. Ada, Israel yala nesala yumadi, ne Allah tep karenkamnerum keca deiki dipapu kunkamenge. Ada, sun yuk Israel yala nesaladi, ne gispal dona tep, gandum du karenkamneng ngeda, imam nengdi dopra jenkamnunge. Tonda, Israel nesala sun mali keca daemna cap, yo pununa cap tep, gam keca popnedi, uku dongopra kareryakankameng keca cap, tonda sun mali kupmange nge tep, ‘Uo, nun mali kupmepu’ tenen, akeca yo pununa tep, doupra kareryakankameng nge capda, sun Lewi yala nengdi akeca doronkamnunge. Deiyoda, tali Israel yala nesala yumadi, ne Allah tep, ‘Er mawa keca kupkamre’ tenen, ne tep kareryakankamnenung keca yala-yala yumada, konum karepnengopda, sun Lewi yala neng dipapu dopropmengedi, jenkamnunge.

30 Sun Israel nesala yumadi, sun wa pepra kouamengepanen, du konum mouprepa, ne si eremna cap, ‘Telepe’ pena cap tep, nong kinkamnung keca yala-yala yuma weninge, ila telep ngeda, doupra kareryakankamnerume. Ange yumada, sun imam neng dipapu dopropmengedi, jenkamnunge. Ange utopu tonda, ne karena tep kareryakankamnung keca yala-yala yumada, karepnengedi, tupa gawal tapkameng ngeda, sun imam neng dipapu dopropmengedi, jenkamnunge. Tonda, tumi-tumi yuma, Israel nesaladi roti kwanengpu dapra jenkamnung taruda, ne karena tep, menmena taru ketenepkamenge ngeda, ange kan-kan di bokra, ne karena tep, ne si eremna ati duyakankamnenge. Ange peda, imam-imam neng, sun jena tepa. Ange lap pepmasentopu, sundi tek sisi konum kupmumnyopda, nedi sun Israel nesala yuma cap, sun nyapsilip cap, sun ati yuma cap, telep kupra derinkamsene.

31 Dinino, sun imam neng tep nengeda, mem keca ton lap pepkusene. Ada, ma yala-yala yuma cap, yuk tali gam kure keca yala-yala yuma cap, er pedi tali depmarengeda, sun imam nengdi pio men jenkamnunge. Ange utopu bura tara tali gam kuramre yu keca yumadi, gam kuramenge keca poptapmare ngeda, sun ton yalange di yunge yaredi poptapmare ngeda, sun imam-imam nengdi, akeca dopra pio men jenkamnunge.