Eze 45 | XteSC | STEP | Israel yala nesala yuma, sun mutu neitamai, tu yuma yuk-yuk bokra karepmumpa, dopropmengedi, atu talepra kunkamnungai tep, kapul men bokumum taruda, menmena taru adipapu ne Allah Yahweh tep, yuk tu ton bokra ketenepra deipkamnerume. Ada, atu er lyomda, 12,5 kilometer nukra wepkamrume. Ange utopu, atu er palada, 10 kilometer nukra wepkamrume. ‘Atuda, ukupra kupre’ tenen, ketenepra deipkamrumai yumada, ada ne Allah Yahweh, ne pe mawangepu kunkamra tep, atuda pio telep lengna mutu kunkamre.

Ezekiel 45

Allah Yahweh tep, er mawa mutu yuk-yuk wepra ketenepra derina tep, pepu upu

1 Israel yala nesala yuma, sun mutu neitamai, tu yuma yuk-yuk bokra karepmumpa, dopropmengedi, atu talepra kunkamnungai tep, kapul men bokumum taruda, menmena taru adipapu ne Allah Yahweh tep, yuk tu ton bokra ketenepra deipkamnerume. Ada, atu er lyomda, 12,5 kilometer nukra wepkamrume. Ange utopu, atu er palada, 10 kilometer nukra wepkamrume. ‘Atuda, ukupra kupre’ tenen, ketenepra deipkamrumai yumada, ada ne Allah Yahweh, ne pe mawangepu kunkamra tep, atuda pio telep lengna mutu kunkamre.

2 Uda, atu bokra deipnemum pangeda, atu neitamaida, ne Allah Yahweh ne si eremna tenda ati ketenepra derina tep nengeda, ton nge bokra persegi empat deiki ketenepkamrume. Aketenepra deipkamrumai, er kumun damaida, 250 meterpu empat persegi nukra ketenepkamrume. Tonda, atu neitamaida, ne Allah Yahweh, ne si eremna ati dinin, aneitamaida, Pio Telep Lengna Ati ton ketenepra acapu deipkamnerume. Tonda, atuai dana-dana tara yumada, tu ton, er palada, 25 meter nukra, ongopdongopra ketenepra deipkamrume. Ange yuma ukupra keteneipkamnemum mutuda, ne Allah Yahweh, ne si eremna ati dopkamruma cadi, atu yumada, pio telep, lengnaipu kunkamra cadi, atuda kunkamre.

3 Atara tu nukmumdi, ketenepra deipkamruma neitamaipu dinin, ton cap bokrapmumdi, er lyom 12,5 kilo meter nge cap, tonda er pala 5 kilo meter nge cap yumada, ne Allah Yahweh, ne pe mawangepu kunkamra tep, ‘Atuda pio telep lengna mutupu kunkamre,’ tenenkamrume. Ukupkurumu mutu neitamaida, Pio Telep Lengna Ati keipkamrume. 4 Atu neitamaida, pio telep lek mutu ketenepkamrume. Tonda, sun imam neng tep ketenepra deipkamrume. Ada, sundi Allah Yahweh ne upu geken ati pumbon neitamai pel talepra donkamenga tepa. Atu pu dinin, bokra ton tarada, sun aimam neng, sun ila ati arumda, pala-pala mutu, er si kota ketenepra dopkamenge. Ange utopu, ton tarada, bokra, Allah Yahweh ne si eremna ati, pio telep lengani keteneipkamnenge.

5 Acapu dinin, yuk tu ton bokra, ton tarada, atu er lyomda 12,5 kilometer nukra deipmumdi, er palada, 5 kilometer nukra deipkamrume. Atu yuma peda, sun Lewi yala neng tep ketenepra deipkamrume. Ada, sundi Allah Yahweh ne ati pel donkameng neng, Lewi yala neng sun nge tepa. Amutu neitamaida, sun Lewi neng kunkameng mutu cadi, sun ila ati arum dopra kungedi, kota kepra acapu kunkamnungai tepa. 6 Pio telep lengna tu pirman tarada, adipapu tu yuk ton bokra, er lyomda dua belas setengah (12,5) kilometer cap, er palada dua setengah (2.5) kilometer yuk bokra deipkurume. Amutu keteneipkamrum mutu neitamaida, sun Israel yala nesala yumada, pio bouna di, dim pepra, amutupu kunkamenge.

Upu pena ila deiyo neng, Raja-Raja nengdi tu dopropkamenge nge tep, pepu upu

7 Tonda, Israel nesala yuma talepra kunkameng nimi deiyo nengda, sunda nimi upu penkami neng tep nengeda, adipapu utopu ketenepra, yuk tu ton wepra deipkamrume. Atuda, ne Allah Yahweh, ne mawa tu damai dinin, tonda ngeda, keteng dangban tara kupkamre. Ton ngeda, keteng yakan tara kupkamre. Sun nimi deiyo neng, Raja-Raja nengda, sun tuda, keteng dangban tara wilimdonai di dipdongopra, ila laut mokon, er si Mediterania damai bena deiamrume. Tonda, adinin dipdongopra, ortara keteng yakan tara wilimdonaidi dipdongopra konum wepra keteneiamrume. Tonda, Israel nesala kunkamnungai pirman kupkamre. Keteng yakan tara wilimdonai bena deiamrume. Atep er lyomda, Israel yala nesalada, sun yala tenpu dopropkamenge, ange utopu, er lyomda bokra deiamrume. Atu lap pepmasen ngeda, Israel yala nesala yuma talepra nimi deiyo kunkamre ngebo, er mawange kupkamra cadi, er tep karepkamrume.

8 Atu neitamai yumada, sun Israel mutu neitamai talepra kuna deiyo neng dipapu talepra kunkamnunge. Tonda, nedi wepra deipnepa, Israel nesala yuma talepra kunkameng deiyo-deiyo nengdi, sun amutara kunkameng nesala, ne nyapu sisa tep, sun nong deiki ikin keca men derinkamnunge. Ange gum dinin, amutu neitamai weika di kareamumpa, Israel yala nesala yumadi atu talepmengedi, tali dim pepra kunkamnunge. Sun nimi deiyo nengdi, mali ton men kweipkamnunge.

Sun nimi deiyo nengda, tamna gum di, upu penkaminge tep, pepu upu

9 Uda neda Allah Yahweh, akeca-keca yuma talepra, deiki tara erepra, pio puto weik deiyo ngebodi pepsene. “Ada sun nimi deiyo neng Raja-Raja nengdi, mali-mali kurum ngeda, akonuma. Sundi mali-mali kumum kecada yapkurume! Uo, sun Israel nesala, sun deiyo nengo, sun amutara kunge nesala tep, pona cap, yu kuprepa upu di mali perumnge cap, ikin keca sun nong deiki deirumnge cap, akumum keca yuma deiki di, sun dipru bulungsangrure. Atep, ange yumada adipapu tapronkurume! Angeda tapmumdi, pio telep dumsisi kuna ngepu kunkamrume!

Tonda, nedi, ‘Ukunkamrume, angeda pio men kunkamrume,’ pepsisitopu, pio telep nge tepapu kunkamrume. Ange utopu, tupa-tupa ne mawa nesala sun tepapu sun kunkameng tu neitamai di tupa men enemkotenkamrume. Ange peda, yapronkurume! Neda, Allah Yahweh, akeca-keca yuma talepra, deiki tara erepra, ila puto kunun ngebodi, sun nimi deiyo neng tep konum pepsene.

10 Ange utopu, sundi mouprapmumdi, ikin keca erempetena keca yumada, pio tek sisingepu talepra kemkamrume. Ada, ikin tep erempeten keca, er sida timbangan cap, tonda me telepnge gwena tep, er si takaran capda, tek sisi telepnge dipapu moupra kemdinkamrume. Ton ngeda, kalkal peramre keca timbangan tep, er sida, Bat ^{▼▼Bat – Aupu deiyoda, ake. Tenpu ‘Bat’ perami ngeda, 22 liter kwamu. Utopu, tenpu Hefa perami ngeda, 22 liter kwamu.} penup keca peda, tek sisi 22 liternge cap, tonda, me kipnedi er ikin tep kunumpetena keca, er si Hefa, tek sisi 22 liter tep nengeda, pio dumsisi ngepu kemkamrume. 11 Ada koluamne keca, er kiklimterena tep kecada, tek sisingepu kemkamrume. Bat (22 liter) cap, Hefa (22 liter) capda, 22 liter ngepu kunupetepra kemkamrume. Ange utopu, koluamne keca, Bat pe, me di tudon keca peda, sepuluh kali lipat kiklimterenange tep nengeda, akunumterena keca, er si Homer (220 liter) tek sisi ngepu kemkamrume. Akeca-keca yuma kiklimterena tep nengeda, tenpu deiyo kemna tep, tenpu Homer ^{▼▼Homer – Aupu deiyoda, ake. Tenpu ‘Homer’ perami ngeda, 10 Bat utopu kwamu. Utopu, tenpu Homerda, 10 Hefa utopu kwamu. Atep, tenpu Homerda, 220 liter kwamu.} pua. Er tenpu deiyo kemna tep nengeda, koluamne keca pe, me keca peda, tenpu Homer ngeda, Hefa 10 utopu kupkamre. Tenpu Homerda, 10 Bat kupkamre. Atep, er wena tep kecada, adipapu utopu kunkamrume.

12 Ange utopu ton, ware bung keca do yuma, sundi, ‘Akecada er ikinda, ware kuprap kilo kurur do?’ tenen, kunupetepkamrum taruda, sun timbangan deiki yambul ikin keca derina tep kecada, adipapu ukunkamrume. Tenpu syikalda, 11.4 gram kupkamre. Angetopu, 1 syikalda 20 gerah utopu kupkamrure. Atep, 1 syikal ngeda, 20 gerah kupkamre. Angetopu, 1 mina penup ngeda, 60 syikal kupkamre. Kunumpetena keca yumada tek sisingepu talepra kemkamrume.

13 – 14 – 15 Ange tep nengeda, ne Allah gispal dona cap, ne si eremna cap tep, ne si eremna ati damai yana karenkamnerum taruda, ukupkamrume. Tenpu literpu kunumna deiyo kecada, tenpu Homer ^{▼▼Homer – Aupu deiyoda, ake. Yeheskiel kuramu taruda, sun Israel nesaladi, kunumpeten keca cap, timbangan kemna keca capda, pio yuk kwamu. Tonda, sundi akeca si perami ngeda, pio yuk kwamu. Atep, ‘Wang-wang pepserur’ tenen, nundi ataru penup kecapu sekra deipmupu. Ukupmantoda, 60 liter akapyopda, tenpu liter karerami. Ada 60 liter neitamai di tenpungepu dopra karerami. Ibrani upu deiki di, ‘Homer’ cap, ‘Hefa’ cap, ‘Bat’ cap perami dinin, ange lap pepmepudi, sekmepu. Utopu ngeda, tenpu Homerda (220 liter), 10 kali Hefa (22 liter), tonda 10 kali Bat (22 liter) utopu kwamu. BIS sekaminge peda dinkurume.} talepra kunupetepkamruma cadi, ange bokmumdi, sebagian 60 liter neitamai di tenpungepu nukmumdi, bokra deipkamrume. Atep, sun gandum du cap, jelai cap dakmumdi, 60 liter kipmumpa, konum akwapyopda, ange neitamai di bokra, tenpu liter dopra, adipapu Allah tep kareryakankamrume.

Tonda, sun Israel nesaladi derina tep nengeda, Raja Israel sun deiyo neng damai kareryakankamengeda ake. Ada, minyak Zaitun me mokon, 100 liter ketenepra deipmumnyopda, ange bokra, tenpu liter dopra, adipapu Allah tep kareryakankamrume. Ange utopu, sundi peirum domba bisam, 200 domba konum akwapyopda, sun adipapu tenpu domba bisa doupra Allah tep kareryakankamrume.

Ajen keca yuma tep nengeda, Israel nesala sun mali kuramrum keca yuma daemna tep nengeda, gam keca popnedi, doupra yana, uku dongopmumpa, uku jeprepa, siltong gekepnedi kaukemkamsene. Tonda, sun gandum du cap, jelai capda, ‘Pio teleppu kunkamep’ tenen, karen keca cap, uda sun mali-mali kurumnge yo pununa tep nengeda, ne pepsisi keca duyakankamnerume. Atep neda, Allah Yahweh, akeca-keca yuma talepra, deiki tara erepra, pio puto weik deiyo ngebodi, aupu yumada, konum pepsena cadi, angepu kunkamrume.

16 Israel tara mutu neitamai kunkameng Israel nesala sisa yumada, adipapu akeca yuma duyana, karenkamnunge. Ada Israel nesala, sun ila nimi deiyo nengdi, ne Allah tep, akeca yuma duyana kareryakankamnenung taruda, sun peda akeca utopu keca doupra kareryakankamnerume. 17 Nedi, ‘Ukupra karenkamnerume,’ pepra lap pepsisitopu, ange yuma kareryakankamnerum dinin, Israel nesala, sun ila nimi deiyo ngebo, Raja erdi gonga kepredi ange yuma kupkamre. Ada, sun Israel nesaladi mali-mali kunkamnung keca tep, ‘Allahdi akeca daepseredi, telep kweipkamser’ tenen, gam keca popnedi kareryakankamner kecada, gam keca popnedi, uku dongopkamrenge cap, gandum du karenkamnenung nge cap, ne karena tep anggur me mokon gwepra karenkamnenung keca cap, akeca yumada Raja ngebo, er dipapu kunupra kareryakankamnerure.

Tonda, nedi, ‘Sun Israel nesalada, sun ila mambul-mambul tumi yumada ake,’ pepra, lap peramsisi tumi cap, tonda ukupu war kupne pangeda, ‘Awar ake,’ tenena tep karenkamnenung taru cap, tonda tali pel dona gum dipapu, beipye peikra, ne si eremkamnenung tumi, Sabat tumi yuma cap, tonda Israel nesala tep, nedi, ‘Sun ila mambul tumi ake,’ pepra, ‘Kalya kalemkamrum tumi yuk-yuk kupnetopu, ange yuma ukunkamnunge. Ataru-ataru yumada, Israel nesala sun ila nimi deiyo ngebodi, ne Allah tep karen kecada, bulupredi kareryakankamnerure. Ada, sun anesala yumadi, mali kunup keca daepsetudi, kaukepra lyepropsetue’ tenen, ketenepra derinkameng keca cap, gandum karenkamneng keca cap, gam keca popra uku dongonkamneng keca cap, ‘Nun nai Allah cap telep kupra kikiman kutepe’ tenen, karenkamneng keca cap, sun Israel nesala mali kunange yo pununa cap, antamderina cap tep nengeda, Israel mutu Raja ngebodi ketenepredi, akeca yuma kareryakankamnerure. Ukupyopda, ne Allahdi, Israel yala nesala yumadi mali-mali kunge keca tep, gum kupra deipnedi, kaukepnyopda, sun tep lyepropkamsene.

Ila tumi, Kaplemna Kalya Kalemna tep, pepu upu

18 Allah Yahweh akeca-keca yuma talepra, deiki tara erepra, pio puto weik deiyo ngebodi, er nyapu sisa sun Israel nesala tep pepsere. “Ware tenpu deiki, tanggal tenpunge deikida, sun adipapu ne si eremna atida pio telep kudinkamrume. Ukupkamruma tep nengeda, jem sapi bisam uku nenmaredi, bol mali douna pio gumngepu duyamumdi, ne si eremna ati telep kudina tep, kareryakankamnerume.

19 Jem sapi bisam konum karepmum pangeda, sun imam nengdi Israel nesala mali kuramenge keca yuma tep, ‘Allahdi daepredi, gum kupra deipkamser’ tenen, uku dongonkameng ngeda, asapi bisam popmenge taruda, yapi ton dopra, ne si eremna tenda ati keteng yakan tara bisi buplan dana-dana tara co deipra dopinge yumada, yapi likra deipmengedi, akati telep kudinkamenge. Ange utopu, mesba er kumunai dumbari pe, tonda akati bo tara wengyakan bisi buplan, keteng yakan tarada, ikra deipipa teku co peda, adeiki yapi likra deipkamenge. Ukupkamenga deiki di, akati buplan yuma peda, telep kudinkamenge.

20 Arup pepmasentopu, apel utopu ngeda, war tenpu neitamai dinin, tanggal yoneitam bari (7) konum kupre pangeda apel utopu kupkamenge. Dinin, tanggal 7 deikida, ada sun Israel nesala yuma, mali kun kan-kan kurami neng, sundi, ‘Mali kupkune,’ tenena gum, tonda sun walwal deiki di tali kurami nengdi, mangkau di mali kupmengopda, yapi kecapu popra kareryakankamenge. Ange karepmengopda, sun imam nengdi, ne si eremna akati wengban bisi buplan domi ngeda, co dana-dana tara deipinge deiki yapi likra, telep kudinkamenge.

Ukupkamenga deiki di, ne si eremna ati yumada, malinge akapyopda, gum kupra deipmengedi, pio telep kudinkamenge. Ada, sundi ne ati pio lengnai tep kalengkamnerume.

21 Tonda, ware tenpu neitamai dinin, tanggal empat belas (14) konum kupyopda, sun adipapu ila kailya kalemkamrume. Ada, Kaplemna Kalya kalepkamrume. Ange ukunkamrum taruda, atumi tanggal empat belas di nukra, ue ngantan bari ton nukbemumdi, atumi-tumi neitamai yumada, nena gum roti kwanengpu dapra jenkamrume. Ukupbamumpanen, tanggal 22 konum kupyopda, sun anesala yumadi nena gum roti kwaneng jenada yamdongonkamenge.

22 Kaplemna Kailya ^{▼▼Kaplemna kailya – Aupu deiyoda ake. Pumun taruda, Allahdi sun Israel nesala doupra, Mesir mutu neitamai di lyepra duyanamu taruda, Mesir mutu nesala yuma, sun weni nyapu poptapu dinin, Israel yala nesala, sun weni nyapu men popu. Allahdi peiamutopu, sun Israel nesaladi domba bisam mi popinge, er yapi doupra, sun ati bublan dana-dana tara cap, deiki tara cap, likra deipi. Ukupya tep, alukunda neitamai Allah er malaikatdi, ayapi epi dingeda, akati pumbon kunmai weni nyapu men poptapi. Tali kaplepra akati tapra kirikra ortara atipu bena, yapi men kapu ati pumbon kunmai weni nyapu tep porami. Nyapu pon malaikatda ayapi epidi, akati tep tali kaplepra ortara benmaiya tep, akailyada, kaplemne kailya perami.} kalepkamrum taru dinin, menmena tumida, sun Israel nesala talepra nimi deiyo Raja ngebodi jem sapi bisam ukupu nenmarenge, tenpu ketenepra karepkamnerure. Angeda, ‘Ne cap, ne amutara Israel nesala cap, mali kunup keca, Allahdi daepredi gum kupra deipkamser’ tenen, asapi bisam popra uku dongopra karepmengepa, erdi mali kurenge cap, Israel nesaladi mali kurumnge capda, Allahdi kilitamnapu kunkamre.

23 Angepu gum dinin, yuk gam keca ton karenkamrure. Ada, Kaplemna Kalya kalemna taru neitamai dinin, ue yoneitam bari tumi neitamai yuma, tumi-tumi yumada, Raja ngebodi tupa-tupa Allah Yahweh tepapu karenapu kunkamrure. Ada, jem sapi bisam, ukupu nenmarenge yoneitam barida, er yo kwanena gum, pio telepnge, nong kip deiki dipapu, duyana popra, uku dongopra, Allah tep karenkamrure. Tonda, atumi-tumi yuma peda, erdi jem kambing bisam ton karenkamrure. Ange peda, sun mali kun keca daemna cap, kaukemna cap tep, doupra yana popra karenapu kunkamrure.

24 Angepu gum dinin, tonda tapakra karena tep nengeda, gandum du, er ikinda 17,5 liter ketenepra duyaredi karenkamrure. Ada, tenpu jem sapi bisam cap, tonda tenpu jem domba bisam cap yumada, akeca tapangna tep, gandum 17,5 liter ketenepra duyaredi karenkamrure. Tonda, akeca karepkamre taru peda, tenpu jem sapi bisam cap, tenpu jem domba bisam cap, minyak zaitun mokon tiga liter cap, tamakra duyaredi, Allah er si eremna tep, kareryakankamrure.

25 Ange utopu, ware ngangtan baringe, tanggal lima belas deiki konum kupyopda, ada ila Kaplemna Kalya kalemna taru neitamai dinin, yambul co teru ton dopropredi, yambul bura ati utopu kupra, er si pondok ton dopra deipkamrume. Ada, Israel mutu neitamai talepra kunkamre nimi deiyo Raja ngeboda, ayoneitam tumi deiki cap, tonda, tanggal 15 deiki cap, Allah tepapu telep karena keca pio tupa-tupa karenapu kunkamrure. Ada, arup taru di konum pepmanutopu, atumi-atumi neitamai yumada, akecapu ketenepra karenkamrure.

Ukupkamra deiyoda, ada sun mali kuramrum keca yuma tep, ‘Allahdi amali kun keca daepseredi, kange di telep kweipkamser’ tenen, akeca yuma karenkamrure. Ayapi keca popra uku dongona cap, gandum du dakra karena cap, minyak zaitun me mokon duyana kareryakana cap kunkamrure.