Eze 47 | XteSC | STEP | Malaikat ngebodi ne Yeheskiel dopra, adipapu tamupra, Allah Yahweh er si eremna ati wengbana tep bisi buplan damai derirbeneu. Ukupneupa, dinmasi taruda, me bungna tenpu bisi buplan amutara dinin, iknapi dam tara (arah selatan) di, bukamodi embaramngada, keteng yakan tara embenamupa epsi. Ange utopu, Allah Yahweh er si eremna tep tenda ati peda, keteng yakan tara urasin deipra domi. Ukupra domipa, ameda Allah Yahweh, er ati ila pala bisi buplan damai di pakra weleramudi, iknapi dam tara, selatan tara urasin deiamudi embaramu. Ada gam keca popnedi, uku dongonai mesba dopra deiami tara, arah selatan pirman tara dipu bukra, keteng yakan tara embanmaupa epsi.

Ezekiel 47

Allah Yahweh er ati me bungna tep, pepu upu

1 Malaikat ngebodi ne Yeheskiel dopra, adipapu tamupra, Allah Yahweh er si eremna ati wengbana tep bisi buplan damai derirbeneu. Ukupneupa, dinmasi taruda, me bungna tenpu bisi buplan amutara dinin, iknapi dam tara (arah selatan) di, bukamodi embaramngada, keteng yakan tara embenamupa epsi. Ange utopu, Allah Yahweh er si eremna tep tenda ati peda, keteng yakan tara urasin deipra domi. Ukupra domipa, ameda Allah Yahweh, er ati ila pala bisi buplan damai di pakra weleramudi, iknapi dam tara, selatan tara urasin deiamudi embaramu. Ada gam keca popnedi, uku dongonai mesba dopra deiami tara, arah selatan pirman tara dipu bukra, keteng yakan tara embanmaupa epsi.

2 Uda, angebo erdi ne adipapu doupra, dapu tara bisi buplan damai tara di dubeneu. Ada, kange di tamupra, Allah si eremna tep tenda ati pirman, bura tara dubeneudi, keteng yakan tara bisi buplan potokeiamyai dubeneu. Dubeneupa epsada, yambul meda iknapi dam tara pirmanai di, ame bungna bukra embanmaupa epsi.

3 Keteng yakan tara bisi buplan damai di, amalaikat ngebodi, ‘Ware kupra lyom kurur do?’ tenen, ‘Bumada, ukuprap lyomda ukuprap’ tenen, kunumpetena tep dopmau maca doupra kunumbeu. Ukupra ukur kemna tep beu taruda, angebodi ne doupra ame balalpu dinin, keteng yakan tara dubeneu tara, er karen lyomda 500 meter nukrapudi doupra beneu. Adoupra beneu dingeda, “Kanda ame goupkurume,” pepneu. “Ame goupra benkurume,” pepneuaida, ame er dalaida, yan asuru damai di dutara kepmaupa, ame goupra besi. 4 Ange yuma konum kupu dingeda, arup kupmautopu, ton cap 500 meter ton kiklipu. Ukupu dinin, aceida me yambulanun ton kaurye kupupa, me goupterepsidi, gutam damai baripneu. Ange utopu, ton cap tapakra kiklipu ngeda, 500 meter ton kiklipupa, aceida ame barimna tep nengeda, ne deiyo damai baripneu.

5 Uda ton cap tamakra, abisi banmaudi kunupetepunge, pera karenda 500 meter ton kiklipra benmau. Aceida, me mokon pio kaurye weik kupu. Ada yan deiki di yanipra goupnedi, bana tep nengeda, men kupmanto kupsi. Ameda ne taram damai kupka cadi, me men goupmanto kupsi. Uda nepu gum dinin, ware nesala do yuma, me gekra embana kael nengdi ame piripra goupra ortara betenge dinin, tali neng yumadi ame goupra ortara banada, men kupmanto kwamupa epsi.

6 Uda, angebodi ton asipetepneu upuda ake, “Uo kanda nimi sisa dipapu deipkeipa kurum ngebo, acei akwapmar keca yuma tep nengeda, kandi kapul men epmuma cadi, moupra kael kepkurume,” pepneu. Upepu dingeda, adipapu erdi ne tamupra doupra, me pirmanaipu kepra dubeneupa epsi. 7 Aembaramu me pirman tamupra dubenu taruda, nedi me pirman dinmasipa, ame dana-dana tara yumada, co palpal pio weika di pamunge akupmaupa epsi.

8 Epsipa malaikat ngebodi pepneu. “Ameda poprapudi keteng yakan tara mutu embarure. Ada amutu neitamai di gonga kepudi, dutarada mutu si Arabah mutu embeue. Ada, Yordan me goupra, ortarada, atarada, ila ati arum Yerusalem mutu dominge kupkai, aneitamai di ame keprapudi embaramudi, Yordan me dukdongopudi, karenai dutamna arah selatanda, ila laut mokon, er si Laut Mati ^{▼▼Laut Mati – Amokonda, er lyom cap, ila pala capda, ila weik mokon cadi, “Laut,” penunge. Tonda, amokon er si tep, “Laut Asin,” ton penunge. “Laut Mati,” penunga deiyoda, amokon pumbon ua garamda, pio weik akurura cadi, mekina do, ware keca do, gam keca men kupmanto mokon kurura cadi, “Laut Mati,” penunge. Laut Mati mokonda, Yerusalem mutu di, pio karenai, arah selatan akurure.} konum kwamu mokon damaipu embaramupa epsi. Uda, ameda konum depu laut mokon, Laut Mati neitamai konum embaramu dingeda, ame Laut Mati mokon deiamupa, yu min-min peramu ngeda, kange di tamupra, telep me kepra deipkamre ja,” pepneu.

9 Ameda dan mutu ben taru peda, pio yo mepu, tupa embanpu kunkamre. Ukunkamre me neitamai ada, mekina yala-yala yumada gam kupmengepa, nimidi tomonkamenge. Utopu tali bura tara gam kuramre keca peda, ame mokon damai telep kupra kunkamenge. Tonda, Laut Mati, ua garam weik kwamu mokon peda, ayambul me dutamna baredi, amokon deipkai wekyopda, kange di ton cap, amokon pio telep yo mepu kupkamre ja. Tonda ameda pio men tapkamre, dan mutu yumada ame embaramre mutu yumada, ukuramrepa aneitamai dipapu amutu gam keca cap, paramre keca cap, nesala cap yuma, telep kupra gampu kunkamenge.

10 Menop taruda, aila mokon, er sida Laut Mati, garam weik kupka cadi, ame pumbonda mekina pio men kwamu dinin, amenda taruda, ayambul me, amokon konum embaredi wekyopda, aila laut mokon dana-dana tara yumada, nimidi mekina tomonkamenge. Ada, keteng wengbaramre tara, mutu si En-Gedi adinin, dipdongopra embenamyanen, ortara keteng yakan tara mutu, er si En-Eglaim mutu yumada, amokon pio telep kupkamre ja. Ukupre pangeda, alaut mokon pirmanaida, mekina yangne nesala yumada, pingpinga dipapu kunkamenge. Ukunge dingeda, sun mekina yangne alen, er sida jala kalapra derinkamenge. Ame mokon konum telep kupyopda, amokon neitamai yumada, mekina yala-yala yuma akunkamenge. Ada ila Laut Mokon, er si Laut Mediterania, tonda Laut Tengah perameng laut mokon kuretopu, Laut Mati peda utopu kunkamre.

11 Ila laut mokon meda, telep kupkamre dinino, amokon pirmanda, tali ban mutu bura deriramre mokon cap, amutu tali deriramre metek me mokon cap yumada, tupa garam uwada, weik akapkamre. Acei neitamaida, min-min telep keca garam uada, nimi tup putapkamra cadi, aceida garam doronkamengai tep, ange keteneipkamre.

12 Yambul mokonaida, garam ua akapkamre dinino, ayambul me embankamrai pirmanaida, co yala-yala yuma paramredi, du weika di pio mounkamre. Aco bo daksangna cap, nimidi dakameng nge yuma capda, ton men nunumdonkamre. Tonda aco du mounkamrenge peda, ton men gawal dakmanto kunkamre. Aco yala-yala yumada, atengkamrenge yumada, er du pio telep ngeda, awar-awar deiki yumada, mounapu kunkamre ja. Ukupkamra deiyoda, aco du me kemamu meda, Allah Yahweh er si eremna tep tenda ati damai tara di, me bungna bukra yakankamra tepa. Aco er du mouramnga yumada, nimidi jena tepa dinin, aco er boda, pu jenman nesala, sun obat jena tep, aco bo paramu. Utopu, tonda, nimidi dakra jepmengopda, sun pu dim pepkamre ja.

Amutu tu wilimdonai cap, bokra karenkamrai cap tep, lap pepu upu

13 Uda, Allah Yahweh akeca-keca yuma talepra, deiki tara erepra, pio puto weik deiyo ngebodi, ne Yeheskiel tep pepneu upuda, ake.

“Uda, sun Israel yala nesala yuma kankan yuma dinin, amul di dutara yuma (12) nukra akapmare yala nesala tep, Israel nesala sun kunai tep nengeda, tu wilipra bokra karenkamrumaida adano. Menmenada, Yusuf er yala neng tep nengeda, mutu tu butene tara bokra karepmempa, dopropkamenge. 14 Ange tep nengeda, ne tek sisi Allah, ne si deiki di pepsene. Ada menop taru, ne pedina upu deiki di, konum upepra deipsisi. Ada, nedi sun apu yapu neng tep, ‘Amutu tu neitamaida, boknedi dopra karepkamsene. Karepsenyopda, sun cap, sundi deipmumdi, dadeipdanen, benkameng neng yumada, atu dopropmengedi, dakunkamnunge,’ pepra, pedina upu deiki di pepsisi. Ange tep nengeda, atuda kandi dopropkurume. Tonda, tek sisi telep kupra bokmumdi, sun kikiman kumum neng tep karepkamrume.

15 Israel nesala yumadi dopropkameng mutu tu bokra wilimdonaida, lape pepkusene. Ada, dapu tara, arah utara di gonga kepra wiliprapmumdi, ila laut mokon, Laut Tengah (Mediterania) damai, keteng wengbaramre tara di dipdongopra benamumnyanen, keteng yakan tara, mutu si Hetlon mutu di, wiliprapmumdi, bokropkurume. Tonda, aca di dipdongopra, mutu si Hamat tara di dipdongopra benamumnyanen, Zedad mutu deiki tara bena wilipropkamrume.

16 Utopu, adinin dipdongopra, Berota mutu cap, Sibraim mutu cap, dipdongopra benamumnyanen, wilipropkamrume. (Sibraim mutuda, ada Damsyik mutu atara, Hamat mutu ortara, daneitamai mutu akupu.) Adinin dipdongopra benamrumnyanen, Hazar-Enan mutu bena wilipropkamrume. Hazar-Enon mutuda, Hauran mutu wilimdonai damai kupu.

17 Ukupra nukra wilipropkamruma tep, dapu tara utara wilimdonaida, ila laut mokon, Laut Tengah deipka damai di gonga kepra, keteng yakan tara benamrumnyanen, ortara bena wilipropkamrume. Tonda, adinin dipra, Hazar-Enon mutu neitamai dimbenkurume. Tonda, Hazar-Enon mutu dinin, iknapi tara (arah selatanda), Damsyik mutu kupu. Israel nesala mutu tu dopropkamenge ngeda, Damsyik mutu di, iknapi dam tara dinin (arah selatan) dipdongopra, Hamat mutu cap, dapu tara (arah utara) mutu neitamai wilimdonai tara kupkamre.

18 Tonda, keteng yakan tara wilimdonai tep nengeda, adi dipdongopra benamrumnyanen, Damsyik mutu cap, Hauran mutu cap, atara kupkai dinin, daneitamaida, me embaramre me, Yordan meda, atarada Gilead mutu kupu. Tonda, me ortarada, Israel nesala talenkameng tara akapu. Amutu di iknapi dam tara (arah selatan) dipdongopra enamrumnyanen, wilipropkamrume. Atep Yordan meda, sun Israel nesala sun mutu tu wilimdonai kupkamre ngeda, keteng dangban tarada, Gilead mutu dinin, keteng yakan tara bena wilimdonkamenge Israel nesala talenkameng tara, adinin dipdongopra, iknapi dama tara adinin, dipdongopra benamrumnyanen, wilipropkamrume. Ada, Tamar mutu bena wilipropkamrume. Angeda, keteng yakan tara wilimdonai kupkamre.

19 Uda, Tamar mutu di iknapi dam tara (arah selatan) di wilimdonaidi dipdongopra benamrumnyanen, keteng dangban tara (arah barat) dabena wilipropkamrume. Ati arum domi ngeda, Kades-Meriba me bungna di dipdongopra wilipra benamrumnyanen, menop taru me embarangai dinin, konum koloupunge damai di dipdongopra enamrumnyanen, dabena wilipropkamrume. Adinin, ila laut me mokon, keteng dangban tara kwamunge, er si Laut Tengah (Mediterania) Mesir mutu damaipu dipdongopra wilipropkamrume.

20 Adinin, keteng dangban tara wilimdonaida, Laut Tengah mokon deiamngai dipapu ketenepmumdi, adinin dapu tara (arah utara) dipdongopra benamrumnyanen, arah utara tenpu mutu tarada, Hamat mutu bisi wengbarameng tara dinin, keteng dangban tara dimbe tara bena deipkamrume. Acapu akupkamre.

21 Ange yuma lap pepmasentopu, amutu tu neitamai yuma tep nengeda, sun kayapu neng, ‘Israel yala nesala yuma dopropmengedi, acapu kunkameng’ tenen, bokdankamrume. Ada sun yala-yala yuk-yuk kurum dinin, sun Israel nesala talenkamrum mutu, akumumtopu bokdankamrume. 22 Tonda, atu neitamaida, sun pe mutu sisa pua, pio-pio tep talepra kunkamrume. Tonda, ware yuk mutu nesala do, sun yuk mutu nimi bo nengdi, sun Israel yala nesala damai yana kikiman kumumdi, ataru tupa akunge nengdi, sun cap, sundi sun nyapu derirami neng cap, sun kikimanpu atu dopropkamrume. Ada, sun Israel yala nesala cap, sun kikiman kunge nimi bo neng cap peda, amutu tu bokra deipmumpa, talepra kunkamnunge.

Ada, sundi, ‘Gume, anesala yumada, Israel yala nesala pua,’ tenenkamruma tepa. Tonda, sundi pio tu dorona tep, ‘Ware ngebodi, dan tu dopropkamre’ tenen, undi ^{▼▼undi – Aupu deiyoda, nun ataru kunup nesala yambul walwal kunup dinin, er lap pen upuda ake. Ada, pumun taruda, sun Israel yala nesala kankan dinin, imam nengdi, yambul keca dopra adeiki di si yuk-yuk seki. Ukupidi, ‘Nun wepra deipkup keca, tonda nundi kupkup kecada, Allahdi lap pepkuser’ tenen, Allah moropidi, akeca tu deiki siptapipa, Allahdi er pel dopka deiki di, tenpu si sekinge katuai kupu pangeda, sundi, ‘E, akonuma, Allahdi ange konum wepra deipmasera cadi, angepu kupkamepe, akecapu wepkupe,’ teneramidi, akeca er si undi dopra apel dorami.} pel donkamruma deiki di, sun cap kikiman bokmumdi dopkamrume. Ada atu sun Israel yala-yala nesaladi tu wilimkumum taruda, sun kayapu neng, yuk mutu nimi bo neng dinin, sun cap kikiman kunge nesala peda bokra karenkamrume. Ukupmumpa anesala yumada sun cap kikimanpu kunkamruma tepa.

23 Uda, nimi bo neng dinin, amutu neng kepra kumum neng yumada, sun Israel nesala cap kikiman kunungaipu, tu wilipra karepmum pangeda, sun Israel nesala kunkamengaida, sun cap kikiman wisipra kunkamrume. Neda Allah Yahweh, akeca-keca yuma talepra, deiki tara erepra, pio puto weik deiyo ngebodi, konum pepsena cadi, angepu kunkamrume.