Eze 48 | XteSC | STEP | Allah Yahwehdi, Yeheskiel tep aupu pepu. Israel nesala dopropkameng mutu tu tep nengeda, ukupra karepkamrume. Dapu tara, ada arah utara mutu neitamai kurami Israel yala nengda, sun mutu tu wilimdona tep nengeda, aupu lap pepra deipi. Israel nesala kurami tara dinin, pio dapu tara sirikaida, Helton tara bana tep bisi dinin, gonga kemnaida, mutu si Lebo-Hamat damai di gonga kepra, adinin dipra, keteng yakan tara bena wilimdona deiami. Ada, ila laut mokon er si Laut Tengah (Mediterania) adinin, er lyomda, keteng yakan tara bena, wilipra dopromidi, ortara ati arum sida, Hazar-Enan mutu damai kiklipra deipi. Uda, Hazar-Enan mutuda, ada Damsyik mutu wilimdonai damai dinin, dapu tara sirikai kwamu. Tonda Hamat mutu peda, acapu dinin, deiki tara, iknapi dam tara kwamu. Abenami mutu wilimdonaida, Damsyik mutu cap, Hamat mutu cap, dana-dana wilimdonai benami. Ada, Israel yala nengdi atu neitamai di bokra, tenpu-tenpu talenkameng tuda, ton tara wilimdonaida, keteng yakan tara di wilipra dipdongopra, keteng dangban tara mutu dinin, Laut Tengah damaipu bena deipi. Iknapidam tarada, sun ayalada, Dan yala neng tep, tenpu tu bokra karepkamrume.

Ezekiel 48

Nimi yala yuk-yuk kuramitopu, tu bokamya tep, pepu upu

1 Allah Yahwehdi, Yeheskiel tep aupu pepu.

Israel nesala dopropkameng mutu tu tep nengeda, ukupra karepkamrume. Dapu tara, ada arah utara mutu neitamai kurami Israel yala ^{▼▼Israel yala – Israel yala nesala, sun yumada Yahudi nesala kurami dinin, aneitamaida sun yala yuk-yuk ton kurami. Ada sun apu Yakubdi deiamu neng, sun nimi si peramitopu, sun yala peda, yuk-yuk kepropidi asipu perami. Israel yala nesalada, 12 kurami dinin, Allahdi sun Lewi yala neng tep nengeda, mutu tu ton bokra men karepu. Tonda, Yusup er yala nengda, ‘Kikiman men kunkamep’ tenen, neitamai di bokdapidi, sun mutu tu yuk-yuk dopropidi, talepra kurami. Ataruda, Israel yala nesala yuma neitamai di bokra 13 yala kepropidi, yoneitam bari yala nengda, dapu tara (arah utara) bulupra kurami. Pamubari yala nengda, iknapi dam tara bulupra yuk tara kurami. Lewi yala nengdi tu men dopropi. Apasal ayat neitamaida, dapu tara yoneitam bari kurami Israel yala neng tep lap pepra seki.} nengda, sun mutu tu wilimdona tep nengeda, aupu lap pepra deipi. Israel nesala kurami tara dinin, pio dapu tara sirikaida, Helton tara bana tep bisi dinin, gonga kemnaida, mutu si Lebo-Hamat damai di gonga kepra, adinin dipra, keteng yakan tara bena wilimdona deiami.

Ada, ila laut mokon er si Laut Tengah (Mediterania) adinin, er lyomda, keteng yakan tara bena, wilipra dopromidi, ortara ati arum sida, Hazar-Enan mutu damai kiklipra deipi. Uda, Hazar-Enan mutuda, ada Damsyik mutu wilimdonai damai dinin, dapu tara sirikai kwamu. Tonda Hamat mutu peda, acapu dinin, deiki tara, iknapi dam tara kwamu. Abenami mutu wilimdonaida, Damsyik mutu cap, Hamat mutu cap, dana-dana wilimdonai benami. Ada, Israel yala nengdi atu neitamai di bokra, tenpu-tenpu talenkameng tuda, ton tara wilimdonaida, keteng yakan tara di wilipra dipdongopra, keteng dangban tara mutu dinin, Laut Tengah damaipu bena deipi. Iknapidam tarada, sun ayalada, Dan yala neng tep, tenpu tu bokra karepkamrume.

2 Asher yala neng talenkameng tuda, Dan yala nengdi kunkamnung mutu wilimdonai damai, adinin keteng yakan tara di wilipra dipdongopra, benamyanen, keteng dangban tara mutu dinin, Asyer yala neng tep dopra karepkamrume. 3 Asher yala nengdi kunkameng mutu wilimdonai damai, adinin keteng yakan tara di wilimdonai di dipdongopra, keteng dangban tara mutu ton, Naftali yala neng tep tu ton bokra karepkamrume.

4 Naftali yala nengdi talepra kunkameng mutu wilimdonai damai, adinin keteng yakan tara di wilipra dipdongopra benamnganen, keteng dangban tara mutu ton, Manasye yala neng tep, tu ton bokra, bena karepkamrume. 5 Manasye yala nengdi kunkameng mutu tu wilimdonai damai, adinin keteng yakan tara di wilipromudi dipdongopra benamnganen, keteng dangban tara mutu ton, Efraim yala neng tep, tu ton bokra karepkamrume.

6 Efraim yala nengdi kunkamnung mutu wilimdonai damai, adinin keteng yakan tara di wilipra dipdongopra, keteng dangban tara mutu ton, Ruben yala neng tep, tu ton bokra karepkamrume. 7 Ruben yala nengdi kunkamnung mutu wilimdonai damai, adinin keteng yakan tara di wilipra dipdongopra, keteng dangban tara mutu ton, Yehuda yala neng tep, tu ton wilipmumdi bokra karepkamrume.

Israel yala neng tep, mutu yuk-yuk wepra deipi tarupu, Allah Yahweh, er si eremna ati kunkamngai tep, tu ton wilipra deipya tep, seku upu

8 Yehuda neng dopropkameng tu damai dinin, ton tara dukdongopra, ne Allah Yahwehpu dopropkamne tu ton, wepra deipkamnerume. Ne si eremna ati kupkamraida, tu ton kiklipra, wepra deipkamnerum ngeda, keteng yakan tara di dipra dukdongopra orketeng dangban tara cap, er palada, 12,5 kilometer ketenepra deipkamnerume. Atu er lyomda, Israel nesala, yala-yala yuk-yuk akungetopu, tenpu yala nengdi dopropkameng tu pala utopunge, nenge peda utopu kupkamre. Tonda, atu tek sisi neitamaida, ne si eremna ati dopra deipkamenge.

9 Awilipra deipkamnerum mutuda, ne mawangepu kupkamre. Ada ne Allah Yahweh, ne dipapu ange talenkamne. Angeda atu neitamaipu dinin, pio neitamai ton ketenepra deipkurumaida, er lyomda 12,5 kilometer cap, er palada 10 kilometer cap, ketenepra deipkamnerume. Angeda, nengepua. Ada ne si eremna ati aceipu dinin, tek sisi neitamaipu deipkamnerume.

10 Atuda, ne Allah Yahweh, ne mawange kurur dinin, atu neitamaida, ne Allah tep, ne si eremna pel talepra donkameng nengpu dopropkamenge. Ne si eremna ati pumbon, mambul pel donkamneng deiyo neng, sun imam-imam neng tepapu, atu ton bokra karenkamrume. Sundi dopropmengedi kunkamengaida, pio telep lengnaipu kunkamrure. Atu dinin, arah utara, dapu tara wilimdonai, er lyomda, 12,5 kilometer kupkamre. Ange utopu, arah selatan, iknapi dam tara ngeda, er lyomda 12,5 kilometer kiklikra wepra deipkamrume. Dinino, atu er keteng dangban tara pe, keteng yakan tara peda, er pala ngeda, 10,000 kilometer kiklipra wepra deipkamrume. Arup konum pepmanutopu, atu sun imam neng tep keteneipkamrumai dinin, aneitamaida neda Allah Yahweh, ne si eremna ati dopra deipkamnenge.

11 Uda, aneitamai tu wilipra keteneipkamrum ngeda, sun imam-imam neng, ne pelpu talepra donenung neng dipapu atu bokra karepkamrume. Amutu yuk ketenepra weipkamrum mutuda, Zadokdi deiamupa, dadeipdanen yakaramyanen, sundi deiamipa imam-imam kunge nengpu karepmumpa, anengpu sun pe tu kepropkamenge. Ada, tali imam nengpu gum dinin, sun Israel nesala cap, sun imam neng cap, kankan di, ton tara neng weika di, mali kun keca talepra kurami.

Ada, nedi, ‘Angeda kunkamrume, angeda pio men kunkamrume,’ pepra deipsisi upu yanitamamidi, mali kun kecapu talepra kurami neng kankan gum dinino, sun Zadok tara imam-imam nengdi, ne peipsisi upu moupra taleamidi, ne pelpu dumsisipu, telep kupra pel doramnei neng tep pepne. Zadok tara nengdi deiami imam neng dipapu, ne si eremna ati kupkamrai damai, amutu tu ton dopra kunkamenge.

12 Ange tep nengeda, sun Zadokdi deiamupa dadeipdanen yakaramya deipi imam neng tep nengeda, ne mawa tu neitamai di wilipmumdi, bokra karepkamrum dinin, sun tu yuk wilipra karepkamrume. Amutu tuda, neda Allah, ne si eremna ati damai di pel donge neng, sun Lewi yala neng tep karepkamrum tara damai di, wilipra Zadok yala imam neng tep karepkamrume. Akarepkamrum tu neitamai yumada, ne Allah, ne mawange cadi, ‘Atuda pio telep lengnaipu kurure,’ tenenkamrume.

13 Ne mawa tu neitamai di bokra, sun Lewi yala neng, ne ati damai pel donge neng tep karepkamrum tuda, er lyomda 12,5 kilometer kupkamre. Ada keteng yakan tara di dipra, keteng dangban tara kiklipra wilimdonai deipkamrume. Tonda, sun dopropkameng tu, er palada, 5 kilometer kupkamre. Ada, sun imam neng tep karepkamrum tara, apirmanpu, sun Lewi yala neng tep, tu bokra karepkamrume.

14 Sun Lewi yala nengdi dopropkameng tuda, atu neitamaida, tu metekanun puda, sundi, ‘Yuk keca dengdana cap kunupropkune. Agum dingeda, co bo deiki di kunupropnepa, yuk nengdi atu dopropkamenge,’ tenenada, pio meme. Angeda pio men tenenkamnunge. Ware nesala do yuma, yuk Israel nesaladi, atu pio men dopropkamenge. Deiyoda, atuda, ne Allah Yahweh, ne mawa kecapu kunerura cadi, pio telep lengnai kurura tep, yuk tali neng yumada, pio men doproptenge.

15 Ne mawa tu damai dinin, yambulanun yukaida, er lyomda 12,5 kilometer akupu. Tonda, er palada, 2,5 (dua setengah) kilometer di kupu. Amutu tu neitamai yumada, tali Israel yala nesaladi doproptenge. Atuda, wa penai do, bura tara nimi gumai do, sun ila ati arum donkamengai do, sun Israel yala nesaladi, teneprumutopu atu bokra dopropkamrume.

16 Amutu neitamai er urasinda, persegi empat kupkamre. Atep, utopu kumun tara yuk-yukda, 2,250 meter kupkamre. Ada, seper empat kilometer (1/4 kilometer) di kiklipra deipkamrume. Ange utopu iknapi dam tara (arah selatan) pe, dapu tara (arah utara) pe, keteng dangban tara (arah barat) pe, keteng yakan tara (arah timur) peda, 2,250 meter utopu kupra, kiklipra deipkamrume. Atep, dana-dana tara yumada, seper empat kilometer (1/4 kilometer) di kiklikra deipkamrume. Atuda tupa gawal ton akupunge cadi, ne Allah cap, sun imam neng cap, dopropkamepai pirman tarapu kupkamra cadi, atuda pio telep lengna gumai cadi, sun amutu neitamai kunge Israel yala nengdi, ‘Nunda acapu kunkamep,’ tenena dingeda, dorona telepe pua. Tonda, ‘Amutuda katawai mutupu kupkamre. Amutuda, ila ati arum dopmepedi acapu kunkamepe,’ tenepmengopda, ange peda telepe pua.

17 Amutu neitamai ila ati arum dopkamrum ngeda, dana-dana tara ton, tali bura mutu ton tapkamrume. Amutu neitamaida, ati dona gume. Atep, er urasinda, persegi empat kupkamre. Atep, utopu kumun tara yuk-yuk yumada, 125 meter kupkamre. Atep, iknapi dam tara (arah selatan) pe, dapu tara (arah utara) pe, keteng dangban tara (arah barat) pe, keteng yakan tara (arah timur) peda, 125 meter kupra, kiklipra deipkamrum tuda, bura mutupu kupkamre. Aca neitamaida ati dona gume.

18 Keteng yakan tara cap, keteng dangban tara capda gawal tupa akapkamre tuda, wa penaipu kupkamre. Atara er urasinda, persegi empat kupkamre. Atep, utopu kumun tara yuk-yuk yumada, 5 kilometer kupkamre. Atu yumada, sun Israel nesaladi wa penkamengai ton ketenepkamenge. Abutene ila go kapkamre tuaida, nimidi yal keca yala yuma kouna tep, talenkamenge. Wa pepra koupmengepa, kin taru kinkameng kecada, sun ila ati arum dopkamrumnge neitamai ati dopra kunkameng nesaladi, ajen keca dopra jenkamnunge.

19 Ada, Israel nesala yala-yala yumadi, ila ati arum Yerusalem mutu neitamai pel donkameng nesala yumadi, awa penai neitamai di, wa pepra yal keca koupmengedi, wisiprepa kinkamnunge. Sun yuma tali dim pepra bouna di dakungedi, aceipu wa pepra kunge nesala yumada, yal keca kin taru bulupra kiryakankamenge. 20 Atep, sundi wilipra keteneipkamrum mutu neitamai yuma, er urasinda persegi empat kupkamre. Atep, utopu kumun tara yuk-yuk yumada, 12,5 kilometer kupkamre. Ada, wa penai cap, ila ati arum Yerusalem mutu dopkamrumnge cap, ne Allah Yahweh tep, ne mawange wilipropkamnerumnge cap, sun imam-imam neng tep wilipra deipkamrumnge cap, amutu-amutu yuma adipapu wepra ketenepkamrume ngeda, er pala cap, er lyom cap, dana-dana tara yuma capda, persegi empat kupkamre. Er kunumnada, 12,5 kilo meter, atara cap, ortara cap, itara cap, utara cap pirman tara yumada, utopu 12,5 kilometer wilipra kiklipmumdi, ketenepkamrume.

21 – 22 Ne Allah cap, imam neng cap, kota Yerusalem dopkamrumai cap tep, atu wilipra deipkamrumai, pio telep lengna utopu persegi empat kiklipra, 12,5 kilometer deipkamrum ngeda, tek sisi neitamaipu kupkamre. Atu damaipu dinin, dana-dana tara, keteng dangban tara cap, keteng yakan tara cap, gawal tupa akapkamre tuda, Israel nesala talenkameng ila deiyo neng, sun Raja nengdi atu sirikai talepra kunkamenge.

Amutu yuma tek sisi neitamaida, sundi ne Allah Yahweh, ne si eremna ati deipkamnerume. Ange pirmanaida, sun imam neng cap, sun Lewi yala neng cap, sun kunkamengai peda ketenepra deipkamrume. Atuda tek sisi neitamaipu kupkamre dinin, acei di dana-dana tara, gawal tupa akapkamre tuda, sun Raja nengdi talenkamenge. Raja nengdi talenkameng tu dinin, dapu tarada (arah utara) Yehuda yala nengpu kunkameng tu akapkamre. Angetopu, iknapi dam tarada, (arah selatan) sun Benjamin yala nengdi kunkameng tu akapkamre. Dinino, atu yuma kupkamrai tek sisi neitamaida, ne Allah, ne si eremna ati dopra deipkamrume.

Israel nesala dinin, sun yala yuk-yuk nengdi kunkamengai tep, pepu upu

23 Uda, Israel nesala dinin, sun yala yuk-yuk nengdi talepra kunkameng tu tep lap pepkune. Ada, pio telep lengna tu, persegi empat 12,5 kilometer ngeda, neitamai akwamrepa, acei tara pirmanaida, Raja nengdi talenkameng tu akapkamre. Aca di iknapi dam tara cap, dapu tara cap kuamu tuda, tali Israel nesala yala yuk-yuk kuramengtopu, sun kuna tu ton wilipra deipkamrume. Menmena ngeda, Benjamin yala nengdi kunkamengai wilipra deipkamrume. Atu er palada gonga kemnada, keteng yakan tara di, wilimdonai di dipdongopra benamnganen, keteng dangban tara kupkamre.

24 Benjamin yala nengdi kunkameng mutu wilimdonai damai, adinin keteng yakan tara di wilipromudi dipdongopra benamnganen, keteng dangban tara mutu ton, Simeon yala neng tep, tu ton bokra karepkamrume. 25 Simeon yala nengdi talepra kunkameng mutu wilimdonai damai, adinin keteng yakan tara di wilipra dipdongopra, keteng dangban tara mutu ton, Isakar yala neng tep, tu ton bokra karepkamrume.

26 Isakar yala nengdi talepra kunkameng mutu wilimdonai damai, adinin dipra, keteng yakan tara di wilipra dipdongopra, keteng dangban tara mutu ton, Zebulon yala neng tep, tu ton bokra karepkamrume. 27 Zebulon yala nengdi talepra kunkameng mutu wilimdonai damai, adinin keteng yakan tara di wilipra dipdongopra, keteng dangban tara mutu ton, Gad yala neng tep, sun tu ton bokra karepkamrume.

28 Gad yala nengdi kunkamengai dinin, iknapi dam tarada (arah selatan), sun wilimdonai gonga kemnada, keteng yakan tara Tamar mutu di dipdongopra keteng dangban tara ila katuai mutu dinin, Kades-Meriba me bungnai di dipdongopra, keteng dangban tara ton adinin dipra, dortara Mesir mutu wilimdonai Mesir me embarur pirman, adinin dipra benamnganen, ortara wilipra benamnrumnyanen, Laut Tengah me mokon deiamngaipu bena deipkamrume.

29 Ne Allah Yahweh, akeca-keca yuma talepra, deiki tara erepra, pio puto weik deiyo ngebodi, pepsene. Angeda lap pepmasentopu, amutu tu neitamai yumada, sun adipapu Israel nesala yala-yala yuma kunge nengda, sun talepra kunkamengai tep, amutu tu bokra yuk-yuk deipmumdi karepmumnyopda, Israel yala nengdi atu pio tep talenkamenge. Sun yala yuk-yuk akungetopu, bokra karepmumpa, apu talepra kunkamnunge.

Ila ati arum, kota Yerusalem dopmengedi, ila pala bisi buplan potokeipkamengai tep, pepu upu

30 Ila ati arum, kota Yerusalem mutu dopkamrumaida, dana-dana tara yumada, ongopra ila lyom gel beilya ton wipra deipkamrume. Alyom gel beilya wengbana tep bisi buplan yumada, dua belas di potokeipkamrume. Kota Yerusalem ongopdongopra wipkamrum lyom gel beilyada, persegi empat kupra, 2,250 meter kunupra wipkamrume. Atep nengeda, dapu tara (arah utara) gat gel di deipra wipkamrum gel beilya er kunumna lyomda, 2,250 meterpu kiklipra deipkamrume. Atara beilya er ila pala bisi buplan potokeipkamrum ngeda, weneri di ketenepkamrume.

31 Dapu tara lyom beilya potokeipkamrum pala bisi buplanda, yuk-yuk weneri ketenepkamrume. Apala bisi buplanda, yuk-yuk ketenepra Israel nesala yala yuk-yuk kuramengtopu, si tenpu yuk-yuk wepra karepkamrume. Tenpu ngeda, dapu tara (arah utara) potokeipkamrum buplan, er sida Ruben kupkamre. Butene pala buplanda, er si Yehuda kupkamre. Weneri pala buplanda, er si Lewi kupkamre.

32 Ange utopu dinin, kota Yerusalem gel beilya neitam dinin, keteng yakan tara ila pala buplan potokra deipkamrum ngeda, yuk-yuk weneri ketenepkamrume. Ada, keteng yakan tara peda, gat gel di deipra wipkamrum gel beilya er kunumna lyomda, 2,250 meterpu kunupra deipkamrume. Atara beilya er ila pala bisi buplan potokeipkamkurum ngeda, weneri di ketenepkamrume. Tenpunge potokeipkamrum buplan, er sida Yusup kupkamre. Butene pala buplanda, er si Benjamin kupkamre. Weneri pala buplanda, er si Dan kupkamre.

33 Angetopu dinin, kota Yerusalem gel beilya neitamai dinin, iknapi dam tara (arah selatan) ila pala buplan potokra deipkamrum ngeda, yuk-yuk weneri ketenepkamrume. Ada, iknapi dam tara peda, gat gel di deipra wipkamrum gel beilya er kunumna lyomda, 2,250 meterpu kunupra deipkamrume. Atara beilya, er ila pala bisi buplan potokeipkamkurum ngeda, weneri di ketenepkamrume. Tenpunge potokeipkamrum buplan, er sida Simeon kupkamre. Butene pala buplanda, er si Isakar kupkamre. Weneri pala buplanda, er si Zebulon kupkamre.

34 Ange utopu, keteng dangban tara peda, ila pala buplan potokra deipkamrum ngeda, yuk-yuk weneri ketenepkamrume. Ada, gat gel di deipra wipkamrum gel beilya er kunumna lyomda, 2,250 meter kiklipra deipkamrume. Atara beilya, er ila pala bisi buplan potokeipkamkrum ngeda, weneri di ketenepkamrume. Tenpunge potokeipkamrum buplan, er sida Gad kupkamre. Butene pala buplanda, er si Asher kupkamre. Weneri pala buplanda, er si Naftali kupkamre.

35 Agat gel di lyom beilya wipra deipkamrum ngeda, kota Yerusalem ongopdongopra dana-dana tara yuma nukmumnyopda, er lyom yumada 9 kilometer deiki di kunupra dopkamrume. Tonda, kota Yerusalem dona tep, sun gonga kepkamrum taru di dipdongopra, oryankamre taru yumada, akota si ton si sipenkameng ngeda, ake. Ada, ake. Akota er sida, Allah Yahweh, amutu neitamai tupa akurure,” pepra, kota si tep si sipenkamrume.