Eze 5 | XteSC | STEP | Allah Yahwehdi Yeheskiel tep pepu. “Uo kanda nimi sisa dipapu deipkei ngebo kurume. Parang ya pio si yunge dopropmem dingeda, kan bana potong cap, giso potong cap toupra gawal dakamarume. Ukupmem dingeda, ‘Apotong er ikin ware kupkamre do?’ tenen, timbang kepkamrume. Ukupmem dingeda, apotong weneri di bokra deipkamrume.

Ezekiel 5

Yeheskiel er potong toupya tep, seku upu

1 Allah Yahwehdi Yeheskiel tep pepu.

“Uo kanda nimi sisa dipapu deipkei ngebo kurume. Parang ya pio si yunge dopropmem dingeda, kan bana potong cap, giso potong cap toupra gawal dakamarume. Ukupmem dingeda, ‘Apotong er ikin ware kupkamre do?’ tenen, timbang kepkamrume. Ukupmem dingeda, apotong weneri di bokra deipkamrume. 2 Ukupmemdi, dakunmamemnyanen, ‘Atumi-tumi kuretopu dinin, keteng tamun 390 deiki di, Israel nesala karen mutu neitamai di ikin kunkamenge,’ tenepra, kael kepkameng’ tenen, kanda ue 390 tumi deiki di, kan tebalal tara tu deiki mapmamemyanen, ataru konum kupyopda, ukupkamrume. Kan giso potong menmena taru sekamrumnge bokra, weneri bokra deipkamrumnge neitamai dinin, tenpunge seper tiga ton dopropkurume. Apotong dopra, boun gel deiki sekmamum gambar, Yerusalem mutu gambar neitamai deipmemdi, uku sekra dongopkurume. Ukupmem dingeda, kan potong sekmumnge, seper tiga ton, Yerusalem mutu gambar sekmumnge, dana-dana tara ongopdongopra deipkurume. Kan giso potong seper tiga konum deipmemnyopda, kan parang ya dopra, apotong deiki bongopkurume.

Ange konum ukupmu dingeda, peten kemdina tep kupkamrum dinin, er nong deiyoda ake. Ada, nedi go karepnepa, Yerusalem mutu nesala, sun podan tara jen talena neng yangedi, parang ya di popkamenge. Tonda kan giso potong men di toupmamemnge, seper tiga ton sirik ngeda, kumanya punmareyai yamupra dokotepmempa, kumanya di dubenkamre. Ukupkamrum ngeda, peten kemdina tep kupkamrume. Dinino, ange er deiyoda ake. Ada, Israel nesaladi, ‘Nun podan nengdi popsengedi, gawal dakamseng’ tenen, sepdaro yukai benkamenga peda, nedi go karepnepa, sun podan nengdi, tupa poryakankamenge. Sun Israel nesala, pio weika di popkamenge.

3 Tonda, kan giso potong yambulanun ton tupa tapkamrem ngeda, ange dopra geteprapmemdi kan kenengrum lyom opkal er si juba pumbon koupra dongopkurume. 4 Ukupmem dingeda, apotong neitamai di, yambulanun ton cap dopropkurume. Apotong dopropmemdi uku jenmaryai neitamai donokurume. Ukuprap tapmempa, uku bu di ange yuma jepra gawal dakamre. Ada peten kemdina tep kupkurume. Dinino, ange nong neitamaida, ake. Ada, amenda taru nedi karepnepa, ila uku bu Yerusalem mutu neitamai di, gonga kepra jenmaryanen, Israel mutu neitamai yuma kwamre keca yumada, auku di jepra lelekamre.”

5 Ne Allah ^{▼▼ware – Aca cap, ayat 7-8 cap, 11 capda, Ibrani upu di, Allah er si tep, ‘Yahweh Adonay’ pepra seki.} Yahwehdi, akeca-keca yuma talepra, ila puto weik deiyo ngebo kunedi, sun Israel yala nesala tep pepsene. Dinkurume, Yerusalem mutu ila ati arum domrum ngeda, akapupa, amutu dana-dana tara yumada, yuk-yuk mutu nesala ton akununge. Nedi Yerusalem mutu ketenepra deipsidi, yuk mutu dana-dana ongopdongopra kunung nesalada, ne dipapu ketenepra deipsi. 6 Dinino, Yerusalem mutu neitamai kunung nesala yumada, nedi, ‘Angeda kunkamrume, angeda pio men kunkamrume,’ pepra deipsi upu yumada, ‘Nun songe,’ pepra yanitamnapu kununge. Sun yuk mutu-mutu yuma neitamai kunung nesalada mali kuna pio weik kunung dinin, sun Yerusalem mutu kunge nesalada, pio mali weik tapakra pel donunge. Atep, yuk-yuk mutu kunung nengda, yambula di mali kunung dinin, Yerusalem mutu neitamai kunge nesalada, nedi, ‘Angeda ukunkamrume, angeda pio men kunkamrume,’ pepra deipsisi upu cap, ‘Telep kunada ake, mali kunada ake,’ pepra, deipsisi upu cap yumada, tali lupra yanitapmengedi, pio mali weik kununge.

7 Ange tep nengeda, ne Allah Yahweh, akeca-keca yuma talepra, ila puto weik deiyo ngebo kunedi pepsene. Uo, sun Yerusalem mutu kurum nesalao, moupra gekepneso! Sun anesala yumada nedi, ‘Angeda kunkamrume, angeda pio men kunkamrume. Telep kunada ake, mali ngeda ake,’ pepra deipsisi upu yumada, moupra men tenerumdi, men talerume. Ange yumada, yanitamnapu kurume. Tonda, angepu gum dinin, sun dana-dana tara yuk-yuk mutu nengdi ongopdongopsengedi, sundi, ‘Telep kuna ngeda ake,’ pepra peramseng upu peda, sundi ange talepra pio men kurume. Sun amutu-amutu neitamai kunge nesaladi, yambul mali kunung dinin, sun Yerusalem kurum nesaladi, pio weika di mali kun keca weik talepra kurume.

8 Ange tep nengeda, ne Allah Yahweh, akeca-keca yuma talepra, deiki tara erepra, ila puto weik deiyo ngebo kunedi, sun Yerusalem mutu kurum nesala tep upepsene. Neda tek sisi sun mar podana ngebo utopu kunkamsene. Ukunkamna cadi, yuk mutu-mutu sun dana-dana tara dakunung nesala yuma dinmangai di, nedi sun nong deiki pio ila ikin keca deipkamsena deiki di, sun tep ila di wenepkamkesene.

9 Wenepsenedi, ukupkamsena deiyoda ake. Nedi, ‘Angeda pio kuna meme,’ pepra deipsisi dinino, sundi pio mali kun kecapu talepra kumemdi, tali keca tep, ‘Nun nai ake’ tenen, isok si eremrume. Ukurumnya cadi, sun kumum mutu yuma neitamaida, nedi pio ikin wenemna keca ton karepkamsene. Angeda, tenpunge peda, men di pio men kupsi keca dopra, sun mutu nesala deiki deipkamsene. Tonda ukupne dingeda, amenda dorkunkamre taru neitamaida, ange utopu ila kange mun keca ton, kange di ton cap, sun deiki pio men deipkamsene.

10 Apio ila kange mun keca konum karepsenyopda, ikin weik kunkamra tep, sun dakunkameng wisi nesaladi, sun pe deiami nyapu popra jepkamenge. Angetopu, sun kankan di, ton nyapudi sun nai yapu sisapu dinin, popmengedi, jepkamenge. Ange utopu, sun Yerusalem mutu kurum nesala yuma tep nengeda, wenepra ila kange mun keca dopra, sun deiki deipsenyopda, nimi weik depkameng dinin, sun tupa tapnepa, yambulanun tupa gam kunkameng nesalada, yukai enepra dopkotepnepa, yuk mutu-mutu, im sirik mutu sirikda, bena kunkamenge. Kumanya dana-dana tara di puramretopu, sun peda dana-dana tara mutu neitamai, sepdaro bena kunkamrume.

11 Ange tep nengeda, teka neda sun nai bo Allah Yahweh, akeca-keca yuma talepra deiki tara erepra, ila puto weik ngebo kunedi, aupuda pepsene. Ne tek sisi pio gam kunetopu, apepkusen kecada, tek sisi kupkamre ja. Tek sisi wenepkamsena deiyoda ake. Sundi ne si eremna ati pumbon, Pio Telep Lengna Ati tep, pio mali kweipmarume. Sundi, pio mali-mali keca talepra kurum keca cap, tali keca tep, ‘Nun nai bo’ tenen, isok si erepra mororumnge cap deiki di, ne si eremna ati konum mali kupra deipmarume. Ukuruma tep nengeda, nedi sun yuma tep pio bicau tenena gum di, wenepra poptapkamsene. Tonda, nedi sun tep, ‘Uo, sunda ne mawa nesala kuramya cadi, bicaue tenepnedi, sun tep telep kupra makuramsitopu, tupa men kunkamsene. Ange gum dinin, poprapsenedi, sikke buktapkamsene.

12 Nedi sun tep, ila kange mun keca karepsenyopda, sundi talepra kurum mutu nesala bokra, weneri kupyopda, tenpunge seper tiga ton, ila kange mun pu yalange yaredi, sun tep talepra jenmarepanen, nimi weik depkamrume. Tonda, ange utopu, ila kange mun jen putana ton, sun Yerusalem mutu neitamai yarepa, jen gum kuprepa, jen keca ton jena gum di, tali dakunkamruma deiki di, sun kankan neitamaida, nimi pio weik ton cap depkamenge. Ange utopu ton, sun dakurum nesala neitamai dinin, seper tiga nge ton, sun mutu tapra, ila lyom gel beilya wiamrumnge bura tara kunkamrum nesalada, sun yu jen talena nengdi, si yu kure parang ya dopra, sun tep popra tamkamenge.

Tonda ange utopu, sun amutu kurum nesala kankan di bokra, seper tiga nengda, ‘Nimidi popsenung’ tenen, Yerusalem mutu tapra, bura saka, dana-dana tara sepdaro benkameng nesala peda, sun podana nengdi, ‘Anesala poptapkamep’ tenen, sepra domembengedi, sun damai yana, sun yu parang ya deiki di poptapkamsenge. Ada, kumanya dana-dana tara di puramretopu, nedi sun wenemna tep, mutu sirik dana-dana tara yumada, yamupra dokotepkamsen dinin, sun podana nengdi, adokotepkamne nesala yuma tep, yu parang ya doupra domembengedi, sun Israel nesala weika di popkamsenge.

13 Akonum poptapsenyopda, nedi sun tep, ila yu kupnere ngeda, gum kupkamnere. Nedi sun mali kurum keca tep, ila kange mun wenemna keca konum karepsenepa, nimi weik konum popnyopda, ukutaru ila yu kupnere ngeda, amenda taru gum kupnerepa ne kange lopkamnere. Dinino, ne yu weik kupnerya deiki di, sun tepapu konum wenepra popne pangeda, adeiki di sun moupra kael kepkamenge. Ange yuma konum kupnyopda, sun Yerusalem mutu kurum nesaladi ne tep utenepkamnerume. Ada, ‘Uo, erda Allah Yahweh, akeca-keca talepra ila puto ngebodi, deiyo men kwamupa wenepseua guma. Deiyoda, nun pedi mali kuramepunge tep, ila yu kuramnga deiki di wenepseue. Ukupseua deiyoda, erdi, ‘Uo, sunda ware deiyo tep, mali-mali kunung do?’ tenepseudi, kange mun kange doupudi, ila wenemna keca dopra, nun deikipu deipseue,’ tenen, sundi moupra kael kepkamnerume.

14 Atep nengeda, ne Allahdi sun Yerusalem mutu neitamai kurum nesala yuma tep popra, sikke buktapkamne. Ukupkamsena deiki di, sun mutu ongopdongopsei mutu nesala yumadi, sun cap, sun mutu cap epsengedi, ‘Uo’ tenen, mali kange doupra nalemkamsenge. Sun dana-dana tara kunge nesala yuma, sun mutu damai bena epkamseng nesaladi, sun tep, ‘Uo anesalada, tek sisi mali kuramya cadi, Allahdi sun tep wenepra, gum kupra deipu,’ pepra epsengedi, sun damai di gopra, yukai embankamenge. 15 Ange tep nengeda, nedi wenepsenepa, sun nong yuma teia deipkamsere. Tonda, wenepra ikin keca deipsenepa, sikke buktapsenyopda, yuk dana-dana tara kunge nesala epsengedi, ‘Uo, sunda tek sisi mali weik kuramruma cadi, walito Allahdi wenepseue,’ pepsengedi, nalemkamsenge. Tonda, sundi, ‘Dyo, sunda mali kun keca pio weik men kuramrum teptoda, Allahdi wenepra men popsetu dinin, mali kuruma cadi, deiyoda sun ca!’ pepra nalemkamsenge.

Sun mutu ongopdongopseidi, mutu dana-dana tara yuma kunge nesalada, sun tep kware pio weik kuprepa, sun tep pio mali pepra nalepsengedi, yuk-yuk nesala tep upenkamenge. ‘Sunda moupra kael kepso! Israel nesala mali weik kuramitopu, sun peda mali kuprumnyopda, Allahdi ila kange mun keca karepkamser ja!’ pepmengedi, wenemkamenge. Sun dana-dana tara kunge nesaladi, sun Yerusalem mutu kurum nesala epsengedi, sun dinada dukna-dukna utopu kunkamenge.

16 Atep nengeda, sundi ketenepra deipkamrum jen keca yumada, ne Allahdi sun wenemna tep gum kupra deipnepa, ila jen putana konum kupseryopda, ada ukupmanto ngeda, nimidi mar urup lupmengepa, urup takke kuramrengedi, yuk ngebo er mundu lukamretopu kupkamsere. Ukupmantoda, mar dopnyopda, ada tali tep gum dinin, tek sisi sun portamna cap, gum kupra derina cap tep ukupkamsene. Atep nengeda, sundi talerum mutu yumada, tapnedi, sun jen keca gum kupra deipnyopda, tek sisi ila jen putana yankamre ja. Ukunkamre taruda, sun amutu kurum nesala yumadi, jen putana deiki di ‘Uo’ tenena cap, jen putana cap kunkamrume.

17 Sun jen putanapu karepkamsen dinin, angepu gume. Nedi go akarepne pangeda, bura tara gam kuramre keca, ila yu kure ngeda, singa pus utopunge do, yu kam do? Sun damai yana si topsengedi poryakankamsenge. Ukupsengopda, sun nyapu weik popra jepmengepa, sun nyapu gum kupbankamenge. Tonda, yuk ila kange mun keca ton karepkasene. Ada, kange mun pu yala-yala yuma cap, tonda yuk mutu yu nengdi parang ya di dopra poryakankamsenge cap, sun deiki dopra deipsene pangeda, sun Yerusalem mutu neitamai kurum nesalada, popnedi gawal dakamsene. Neda sun nai bo, Allah Yahwehdi, aupuda konum pepmasena cadi, tek sisi apepmantopu kupkamre ja,” Allah Yahwehdi pepu.

Ada Allahdi, ‘Yerusalem mutu kunge nesaladi mali weik kuramya cadi, sun tep wenepkamne’ tenen, amenda taru sun nong deiki ila kange mun keca derinkamrenge tep, ne Yeheskiel damai yana lap peipneu.