Eze 6 | XteSC | STEP | Allah Yahwehdi ne Yeheskiel tep, ken mapsa deiki di upepneu.

Ezekiel 6

Allah Yahwehdi, Israel nesaladi isok si eremamyai tep wipdongopu upu

1 Allah Yahwehdi ne Yeheskiel tep, ken mapsa deiki di upepneu.

2 “Uo, Yeheskiel, kanda nimi sisa dipapu deipkei ngebo kurume. Kan urasin erepmemdi, Israel mutu neitamai buku mutu-mutu dupai dipetepmemdi, nedi amenda kupkamne keca tep lap pepkurume. Ada nedi, ‘Sun amutu kunge nesaladi, mali weik kuramidi, tupa mali kununga cadi, nedi sun wenemna tep, ila kange mun keca dopra, amutu deiki deipkamne,’ pepra, deipne upuda, sun gekena tep lap perbenkurume. Kandi pepkurum upuda ake,” peipneu.

3 Upeipneu dingeda, aupu ton dukdongopra peipneu.

Israel mutu neitamai bukamu mutu-mutu dup yuma cap, amutu neitamai kunge nesala yuma cap tep, aupu pepmempa gekepkamnunge. Ne Allah ^{▼▼Allah – Aca cap, ayat 11 capda, Ibrani upu di, ‘Yahweh Adonay’ pepra seki. Sun kael kemna tep, ‘Adonay’ deiyo ngeda, katuai sekmupu.} Yahweh, akeca-keca yuma talenedi, deiki tara erepra, ila puto weik deiyo ngebo kunedi, upepkusene. Ne Allah Yahweh, akeca-keca yuma talepra deiki tara erepra, ila puto weik kunun ngebodi, Yerusalem mutu dana-dana tara kupu mutu-mutu dupai cap, yambul mutu buma-buma cap, kot damai cap, ila mutu pirman, me embaramrai cap tep, nedi upepra deipkusen upu yumada, moupra kael kemna cap, gekena cap kunkamnunge. Tek sisi pepne. Nedi sun yu parang ya doupi neng, yuk mutu jen talena neng go karepnedi, dokotepnepa, sun mutu yankamenge. Ada, sun Israel yala nesaladi tali keca tep, ‘Nun nai bo ake’ tenen, isok si eremrumai mutu dup domrum ati yumada, ajen neng yangedi, ange yuma urupra, sikke buktapkamenge.

4 Ada, sundi isok si eremna tep, gam keca popra uku dongorumai, er si mesba-mesba cap, tonda ‘Nun moronup upu gekenkamseng’ tenen, sundi siltong telep keca dopra uku dongona tepai peda, uruptapnapu kupkamenge. Tonda adipapu akeca sikke buktapmenge taru dipapu, isok si eremnai kunkameng nesala yuma peda, aisok si eremnungai urasin tarapu, anesala popra gawal dakamenge.

5 Ukupkamne taruda, ne adipapu go karepnepa, sun yu jen talena nengdi, sun Israel nesala dinin, isok si erenung nesala weika di popmengedi, sun gemnada ketenepra, isok si eremrumai urasin tara taplakra deipkamenge. Tonda, nedi go karepnepa, sundi, sun popkameng nesala, ataru dipapu, sun isok si eremnung mesba-mesba damaipu sun yoka peda, aceipu yamuptapkamenge. 6 Sun Israel tara neitamai kurum nesala yumada, wenepra popsenedi, gum kupra deipkamsene. Ada, sun kurum mutu-mutu yuma neitamai di, ila ati arum domrumai, urupra sikke buluktapkamne. Atarupu, sundi si domrum isok si eremnai cap, isok karena tep mesba domrumai cap, tonda sundi, ‘Isok si eremkamep’ tenen, petupra deiamrum patung cap, tonda ‘Isok-isokdi gekepkamseng’ tenen, sun si eremrumudi, siltong pena telep keca dopra uku dongoprumai peda, sikke bukra tapnedi, gum kupra deipkamne. Tonda, ware keca do yuma, sundi, ‘Isok si erepkamep’ tenen, ketenepra derirum keca yuma peda, uruptapnedi, gawal dakamne. Akeca yumada sikke bukra tapkamne. 7 Dan cei do, sun Israel yala nesala kurumu mutu-mutu yuma neitamaida, nedi sun anesala weika di popnapu kupne pangeda, ange epkamruma deiki di, sundi, ‘Uo, tek sisi ange yumada, Allah Yahweh, er ila puto ngebo ja. Er puto pio weik kurure,’ teneprumudi, tumi-tumi yuma moupra kael kemkamnerume.

8 Uda, ne tek sisi pepsene. Ne cap, nedi sun dokotepkamne jen talena neng capdi, sun Israel yala nesala weika di popkamep dinino, sun kankan neitamaipu dinin, yambul tarada men poptapkamepe. Deiyoda, nedi sun mutu sisa neitamai di enepra dokotepsenedi, weik tarada popkamne dinino, yambul tara nengda, bura saka bendopmengedi, dana-dana tara kunge mutu nesala kankan bena dakunkamenge. Ton tara nesalada, sun karen mutu jen nengdi, tomopmengedi, sun pe mutu dubengedi, pio ikin pel dipkamenge. 9 Yuk karen mutu nengdi, anesala tomopra dubena deipkamengaida, amutu-amutu kunkameng Israel yala nesaladi, dabena kunkameng taru neitamaida, sundi ne tep kange tamupra tenenkamnenge. Tenepnengedi, moupra kael kemkamenge ngeda, ‘Uo, Allahdi nun tep, wenepseunge deiyo cap, erdi nun tep, dipru pu jeramupa, ‘Ne songe,’ tenepseunge cap, adeiyoda nun tepa. Ada, nundi, nun dipru neitamai di, Allah tep kange pio men deiamupka tep, er taprapmupudi, tali isok keca tep wepra, akeca si eremamupu. Tonda, nundi pio mali kuna keca talepra kuramupu ngeda, tek sisi mali nengpu kuramupu. Tonda, Allahdi, ‘Akecada ne pio songe. Ange yumada, mem keca cadi pio men kunkamrume,’ pepra, lap pepra deipseu dinin, nundi amali kecapu talepra kuramupka deiki di, Allah wenepseudi tapseu. ‘Ange yumada, kange di tamupra tenenkamenge’ tenen, kupseue.

10 ‘Sun Israel nesaladi amenda taru kael kepkameng,’ tenena tep, ‘Uo, tek sisi, nun nai bo Allah Yahweh, er tenpu kurure,’ tenen, kael kemkamnenge. Neda Allah Yahweh kununa cadi, menop taruda, sun kael kemna tep, nedi, ‘Gume, mali kun kecapu talepra kupmumnyopda, amenda taru, nedi sun nong deiki pio ila ikin keca karenkamsene. Ila di wenepkamsene,’ pepra deipsi ngeda, tali upu pertamna tep, men pepsi. Ne penun upu yumada, tek sisi kunedi penuna cadi, sun wenemna keca karepsada, tali wenemna tep gume. Sun pe mali kuna deiki di, akeca pio ila ikin ngeda, sun deiki derinune. 11 Tonda, ne Allah Yahweh, akeca-keca yuma talepra, deiki tara erepra, ila puto weik deiyo ngebo kunedi pepkene. Kanda Yeheskielda, adipapu kan buru bongopmemdi, kan yanda tu deiki puto di yanipkurume. Ukupmem dingeda, engepmemdi, ila upu deiki di penkamrume. ‘Uo, uo, sun yuma moupra tenepso! Israel yala nesaladi, sun mali kuna cap, nedi, ‘Angeda pio mali, angeda kuna telepe,’ pepsa cadi, ‘Angeda pio men kunkamrume,’ pepra, lap pepsi keca dinin, sundi amali kunangepu talepra kurami. Ange tep nengeda, nedi ataru neitamai di, nimi podana cap, ila kange mun pu yala-yala karepkamnenge cap, ila kange mun jen putana karepkamnenge cap deiki di, Israel nesala pio weika di depnapu kupkamenge.

12 Sun anesala yumada, kange yu tenepnedi, sun deiki ila ikin keca deipkamsena deiki di, kael kepkamenge. Ukupkamengedi, ware ngebo do yuma, yuk karen mutu neitamai dakunge Israel nesalada, ila kange mun pu jepkamra deiki di depkamenge. Yerusalem mutu tupa sun adamaipu kunge Israel yala nengda, yuk mutu yu jen talena nengdi, sun damai yangedi, parang ya doupkamenga deiki di poptapkamsenge. Sun Israel yala nesala dinin, akange mun keca butene deiki di kael kepkameng dinin, sun men depkameng neng tep kael kepkamenge. Ada, tapnepa, sun tupa gam kunkameng nesala tepa. Sun mutu neitamai ila kange mun jen putana deiki di, depnapu kupkamenge. Ange-ange ikin keca yumada, ne ila yu kupkamnera deiki di, sun tep wenemna keca karepkamne ja.

13 Ukupne pangeda, anesala weika di poptapnyopda, aneng sun gemna yumada, sun si eremengedi, gam keca popra karenung keca, isok-isok tep nimi urasin utopu petupra derinung keca damaipu dopra deipkamne. Tonda, sun tara neng popnedi, sun gemna dopra, sundi sun isok si karena tep, domi mesba-mesba pirmanaipu dopra deipkamne. Tonda, nedi Israel nesala ton popnyopda, sun aneng gemnada doupra, ila mutu dupai deiki bena deirbenkamne. Ange utopu, yuk mutu buma-buma deiki di, ne popkamne neng, sun gemnada doupra, abuma buma, amutu buma deikipu deribenkamne.

Tonda, aneng sun gemnapu dopropnedi, ila di nemredi tekamre co, er teru yakamre co kawaipu bena deipkamne. Tonda, sun pedi dan cei do yuma, yapi keca popra, duyandi siltong telep keca uku dongopidi, isok si berhala-hala si eremamyaipu, nedi sun gemna dopra aceipu deipkamne ja. Ange yuma epkamenga tep nengeda, sun aneng yumadi, ne tep nengeda, ‘Uo, erda tek sisi Allah Yahweh, ila puto weik ngebo kurura cadi, erdi, ‘Ukupkamne,’ perur upuda, tek sisipu akecapu kurure’ tenen, moupra kael kepkamnenge.

14 Teka, ne Allahdi, ne buru puto dokotepnepa, sun kunung mutu neitamai yumada, nimi weika di popra sikke buktapkamne. Ukupnepa, gam kure keca cap, co cap, akeca-keca yuma gum kupra deipnyopda, sun mutuda walangapu kupkamre. Ada, iknapi dam tara (arah selatan), me cap, nimi cap pio gumai di, adinin dipdongopra, dapu tara (arah utara), adinin dipdongopra, Ribla mutu damai cap, aneitam mutu yumada, akeca-keca yuma gum kupra deipne pangeda, sun Israel yala nesala yumadi, ne tep, ‘Uo, erda tek sisi Allah Yahweh kurure. Er putoda pio weik kurura cadi, erdi perurtopu, tek sisipu kurure,’ tenen, moupra kael kepkamnenge.