Eze 7 | XteSC | STEP | Allah Yahwehdi ne Yeheskiel damai ken mapsa deiki di yana upu pepneu.

Ezekiel 7

Israel nesala popra sikke bungtamne taru damai konum kupka tep, pepu upu

1 Allah Yahwehdi ne Yeheskiel damai ken mapsa deiki di yana upu pepneu.

2 “Uo, kanda nimi sisa dipapu deipkei ngebo kurume. Neda, Allah ^{▼▼Allah – Aca cap, ayat 5 cap, tonda pasal 8.1 capda, Ibrani upu di, ‘Yahweh Adonay’ pepra seki. Sun kael kemna tep, aupu ‘Adonay’ deiyo ngeda, jenek kupra sekmepu.} Yahweh, akeca-keca yuma talepra, deiki tara erepra, ila puto weik deiyo ngebo kunedi, tek sisi sun Israel tara kunge nesala yuma tep pepne. Sirya gawal dangna taru konum yanmare! Ada, sun amutu dana-dana tara yuma neitamai kurum Israel yala nesala yuma tep nengeda, ne adipapu wenepsenedi, gum kupra deipkamsene! 3 Uo, sun Israel nesala, ukutaruda sun tep gum kupra deipkamsen taruda, konum damai kupre. Sundi mali-mali kurumnge tep, ne Allahdi yu pio weik kupner ngeda, sun deiki deipkamsene! Atep, nedi, ‘Sun mali kurumunge yumada, ne pio dabal weik kunerura cadi, ange yumada, taprumudi, pio men kunkamrume,’ pepra, deiamsisi keca dinin, sundi tali lupra mali kuramrumnge cap, sundi mali-mali kun keca weik talepra kuramrumtopu, er menenga tep, upu bokeipsenedi, ila di wenepkamsene.

4 Tek sisi sun Israel yala nesala yuma tep nedi, ‘Pio bicau, anesalada, ila ikin keca sun nong deiki men deipkamne,’ men tenepkamsene. Tonda, ‘Dakwapye’ tenen, sun tep pio men kaukepkamsene. Ange gum dinin, nedi tek sisi sun mali kuramumnya utopu kunumna peda, ange utopu wenepra popkamsene. Tonda, nedi, ‘Akumum ngeda, ne pio dabal kunurura cadi, ange yumada, pio men kunkamrume,’ pepra, deiamsisi keca dinin, sundi tali lupra tupa-tupa mali kurumnge tep, wenepra popkamsene. Ukupra wenepsenya deiki di, sun adipapu, ‘Uo, Allah Yahwehda, akeca-keca yuma talepra, tek sisi erda ila puto ngebo kurure,’ tenen, kael kepkamnerume.

5 Neda, Allah Yahweh, akeca-keca yuma talepra, deiki tara erepra, ila puto weik deiyo ngebo kunedi, sun Israel tara kurum nesala yuma tep pepsene. Ila kange mun kecada, sun nong deiki yankamre ja! Ada, pumun taru kurami nesaladi, akange mun keca utopunge ton, pio men diramidi, men kael kemami. Tonda, yuk mutu ton angeda ukwamupa, sundi ton pio men gekemrume. Dinino, ukutaruda, aikin keca yumada, sun damai yana, kupkamsere. 6 Uo ukutaruda, sirya gawal dangna tep tumida, sun damai konum yare! Ukutaruda, sun cap, sun talerum keca cap, gum kupkamre taruda, sun damai konum yana kupkusere. Adano, sun popra gawal dangna taruda, konum sun damai akupkure. Konum damai kupmara cadi, sun kange moupso!

7 Sun Israel yala nesala damai di, akeca yala-yala yumada, konum gum kupkamre taru cap, sun ila kange mun kange doupra kupkamrum taru capda, konum damai yanmasere! Atep uo, sun amutu neitamai kurum nesalada pio bicaue. Tek sisi ila kange mun keca sun nong deiki konum kupkusere! Atep ukutaruda, sundi amutu-amutu gon dana-dana bukua deiki kurumu nesala yumada, kange ping-ping kuna gum dinin, kange mun tenena cap, ila kware cap, dipru bulungsangana cappu kunkamrume. Ukunkamrum taruda, iknapi dam tara di ila kailya mesba-mesba deiki di men kalepra jenkamrume. Tek sisi ila kange mun keca sun nong deiki konum kupkusera tepa!

8 Ukutaruda, ne ila yu kupnerya deiki di, sun tep ila kange mun keca karepkusene! Ukupmantoda, nimidi me mau di me mokon gwepra dinikyopda, adipapu ange yuma dingtamamengtopu, tek sisi ila yu kunerenge yumada, adipapu sun nong deiki deipsenedi, ukutaru wenepkusene! Ukupsene pangeda, sundi ‘Uo’ tenen, kange mun kange dounkamrume. Atep, nedi, ‘Akuna ngeda, ne pio dabal tenenuna cadi, ange yumada, pio men kunkamrume,’ pepra, deiamsisi keca dinin, sundi gekena gum dipapu, tali lupra mali kuramrumnge tep, wenepkusene. Tonda, sundi mali-mali kun kecapu weik talepra kuramrumtopu, amali keca yuma menenga tep, upu bokeipsenedi, ila di wenepkamsene.

9 Tek sisi sun Israel yala nesala yuma tep nedi, ‘Pio bicau men tenepkamsene. Anesalada, pio ikin keca, sun nong deiki men deipkamne,’ men tenepkamsene. Tonda, dipru men karepsetenya tep, ‘Dakwapye’ tenen, sun mali kurum keca tep, tek sisi men kaukepkamsene. Ange gum dinin, nedi tek sisi sun mali kuramrum keca konum epra kael keamsa cadi, amali kun keca weik kuramrumnya utopu, er kunumna peda, utopu weika di wenepra popkamsene. Tonda, nedi, ‘Akuna ngeda, ne pio dabal tenenuna cadi, ange yumada, pio men kunkamrume,’ pepra, deiamsisi keca dinin, sundi tali lupra mali kuramrumnge tep, ila di wenepra popkamsene. Ukupra wenepsenya deiki di, sun adipapu, ‘Uo, Allah Yahwehda, er dipapu nun wenemna tep, akange mun keca konum karepmasere. Er dipapu nun tep wenepra ponmasere’ tenen, kael kepkamnerume.

10 Sunda moupra diso! Sun tep wenepkusen tumida konum yare! Ataruda ila kange mun ikin keca, sun Israel nesala damai deipnepa, konum yankusere! Sun Israeldi balila kange deipra, mali weik kurumu keca yumada, puto boun kupkuser ja. Nimidi kourameng keca neramredi, kait keca cap, du cap menmena di paramretopu, sun Israel nesalada, salnong-nong pio weik kurumudi, gemerum keca yumada, weik kupbarure. Akuruma deiki di, sun wenemna keca konum damai kupkusere.

11 Sun mutu kunge deiyo-deiyo nengdi, tali kan-kan nesala tep, ila ikin keca sun nong deiki derinunge. Ukupra kunmanganen, siryada, nimi deiyo talepra ereipdangedi, sun amutara kunge kan-kan nesala tep, yaninapu kununge. Ange tep nengeda, ne Allahdi sun Israel tara deiyo neng yuma tep wenepra popsene dingeda, gawal dakamsene. Tonda, sundi akeca-keca yuma, pio telep bung keca talenung nge yumada, gum kupra deipkamsene. Ange utopu, sun kunumna weik keca yuma peda, gum kupra deipkamsene. Telep talen keca tenpunge peda, tupa men kwapkamre! Sundi talenung isomka keca yuma cap, nimi deiyo talepra, ila-ila neng kununga deiyo kunge keca yuma capda, nedi gum kupra deipkamsene. Sun aila neng cap, isomka kunge nesala cap yumada, wenepnedi gum kupra deipnyopda, sun yumada amutarapu kunkamenge.

12 Nedi sun wenemna tep, ‘Ataru, atumi ukupkamne,’ tenemsitopu, konum damai kupre. Kange mun keca dopra, sun nong deiki deipkamsen tumida, konum damai kupre! Atep nengeda, sun bung keca kunupmengedi, isomka keca dopropkameng nengda, kange men derinkamenge. Ange utopu, ‘Co bo putapsera cadi, nun bung keca dopra deipmepepa, yuk nengdi akeca kunupkameng’ tenen, kunumrum nesala peda, kange men derinkamrume. Deiyoda, sun abutene yala neng yumada, tapaknepa kange derinange ton pio gume. Deiyoda, ne Allahdi wenemna keca cap, yu weik kunerenge cap dopra, sun anesala yumada, sun deiki ila ikin keca deipkamne ja!

13 Ataruda, sun pe mutu tu talepra deiyo kunung nengda, ‘Yuk nengdi nun talenup mutu tu kunuptenge,’ tenepmengedi, konum kunupmengopda, akonuma, sun men di talerami mutuda, kange di ton cap tamupra men yana dopropkamenge. Amutu tu kunupmengedi, isomka keca dopropkameng neng cap, sun mutu tu kunumkameng neng cap, sun yuma tupa gam kunkameng taruda, amutu tu tamupra men yana dopropkamenge. ^{▼▼dopropkamenge – Aupu pepka deiyoda, ake. Ada, Babel mutu nengdi, Israel tara kurami nesala yumada, popra gawal dakmanto kupidi, tupa gam kunkameng nesala dopra, sun pe mutu tamupra dubekaminge tep pepu. Dubena deipkameng nesalada, sun mutu sisa tamupra men yanmanto kupkamenga tepa.} Deiyoda, ware ngebo do yuma, ne Allahdi sun Israel nesala tep, ‘Ukupra wenepkamsene,’ pepra, lape peipsisi upuda, men gum kupkamre. Ne kange tenepsi ngeda, men lupronkamne. Angeda tupa tenenkamne. Anesala yumada, sun mali-mali pio weik kuramya tep nengeda, anesala yuma wenepra poptapnyopda, tenpu ngebo peda, ton men lyepdankamre. 14 Sun Israel yala nesalada, ‘Yu neng nun damai poryasenunga, tep, nun tara jen talen nengdi bulupra yankameng’ tenen, jem domba bisam giso takke dopra lelim pena keca dopra, ila di lelim pepkamtenga peda, sun mutu jen talen neng ton bulupra men yankamenge. Ataruda, sun amutu nesala yuma, adipapu nimi pona tep keca yala-yala yuma ketenepra deiptenga peda, sun tara jen talena nengdi, nimi mar podarbenkamengaida, tek sisi men benkamenge. Deiyoda, neda Allah, ne ila yu kupneu ngeda, sun Israel yala nesala yuma, sun deiki deipkamna tep, kwar weik kuprepa, sun men benmanto kupkamenge.

Ikin keca deipkamra deiyoda, “Israel nesala mali kununga tepa,” pepu upu

15 Yerusalem mutu ila ati arum dominge dinin, lyom gel beilya ongopgenepra wiaminge bura tarada, yuk mutu jen talena nengdi, parang ya doupmengedi, ‘Amutu nesala yuma poptapkupe’ tenen, ketenepra warengkamenge. Tonda, Yerusalem ila ati arum domi mutu neitamaida, nedi karepnepa, ila kange mun pu jenkamre. Tonda jen keca gum kupra deipnepa, jen putana weik kunkamre. Atep nengeda, ware neng do yuma, akati arum bura tara kunkameng nengda, sun poda nengdi yu parang ya di poptapkamenge. Dinino, akati arum neitamai kunkameng nesalada, kange mun pu cap, jen putana cap deiki di, pio weika di depkamenge.

16 Akati arum neitamaida, ila pu cap, jen putana cap di depkamenge. Akati bura tara nengda, bura tara dakunge nengdi podankamenga deiki di, nimi weik tarada denapu kunkameng. Dinino, yambul tara nengdi, bura saka mutu-mutu buma bukwai neitamai sepdaro bendopkamenge. Abena kunkamengaida, kasi mada, ila mutu amutara ban kupkai bukra engerameng utopu, agam tupa kunkameng neng peda, yuk mutu bena engenapu kunkamenge. Ukunkamenga deiyoda, sun anesala yumadi, ‘Uo, uo, nun pe mali kuramupunge deiki di, Allahdi wenepseupa, denapu kunupe,’ tenepmengedi, mali pepra, mambul kange dounkamenge.

17 Ataru neitamaida, Israel yala nesalada, ukunkameng taruda, sun buru yumada, pio puto boun kupra dersangkamre. Tonda, sun gutam yuma peda, luklem-luklem penapu kuprepa, bisi men bemanto kunkamenge. 18 Ukupmengedi, sun Israel nesala kuramengtopu, sun yumada, ‘Uo, pio ikin kunmasere’ tenen, petenkemna tep, mali opkal bol er si kain karung dipapu, opkal wipmengedi kenengkamenge. Tonda, sun yuma kware pio weik kuprepa, kange mun kange doupra, sun nong yumada, moropsemnapu kunkamenge. Tonda, sun ukunkameng taruda, ali weik dangkamenga cadi, sun urasinda pio mali kupkamre. Tonda, sun Israel nesala, pio kange mun kange doupmengedi, dipru bulungsangamre taru neitamaida, sun pedi sun giso potong yumada, adipapu toupmengepa, delaupu kunkamenge.

19 Angepu gum dinin, sun kunumna weik gat keca, er si emas cap, perak cap, ila mambul keca dinin, nimi ila bisi embanungaipu yamupra tapkamenge. Ada, tali-tali keca abisi damaipu dortamameng utopu, sun kunumna weik keca peda dopra, abisaipu yamupra tapkamenge. Deiyoda, sundi, ‘Uo, akeca peda, mambul gume. Nun lyemna tep, akunumna weik keca peda, tek sisi pio men melipsetue’ tenen, yamuptapkamenge. Allah Yahweh er ila kange mun yuda, atumi di sun deiki konum deipkamra tep, sun talenung kunumna weik keca, emas cap, perak cap deiki di, pio men lyepdatenge. Ataruda akecada, pio mem keca utopu konum kuprepa, Allahdi, ‘Angeda ne pio dabale,’ tenerenge utopu konum kupmare. Allah Yahwehdi, sun Israel nesala wenepra poptapkamre taruda, tek sisi, emas cap, perak cap talenunga deiki di, men lyepdatenge.

Ange utopu, akunumna weik keca akaptua peda, sun jen cap, me cap putana weik kunkamre taruda, emas cap, perak cap dopra men jeptengedi, sun mundu men dekpeptudi, men boupkamre. Akunumna gat keca jeptenga deiki di, jen putana men gum kuptupa, akeca deiki men lyepdatenge. Tek sisi ngeda, akunumna weik keca taleramya deiki di, sun pedi, sun pe tep, mali weik kudaramidi, mali kun kecapu talepra kurami.

20 Israel yala nesalada, sundi talepra kunumami weik keca emas cap, perak cap dopramidi, keteneipra deiamidi, talerami urasin pio telep kwerya kecada, cincin do, gelang do, permata do, ange yuma tep, sundi, ‘Uo, ange yumada, urasin pio telep keca kurure,’ teneramidi salnong-nong kurami. Tonda, ato keca emas cap, perak cap doupra, tali keca dinin, sundi, ‘Nun nai bo ake’ tenen, isok si eremna tep, urasin telep keca ton, patung ketekepra derirami. Ukurami dinin, ne Allahdi, ‘Akeca cap, akeca dopra mali keca sundi petupra derinung nge yuma capda, ne pio dabal,’ tenenune. Ange tep nengeda, ne Allahdi ange sun talenung urasin telep keca emas cap, perak cap tep, ‘Ange yumada, ne pio songe,’ tenenune. ‘Akeca talenunga cadi, ne damai ton cap men yatengedi, ne si men ereptenge,’ tenenune.

21 Ne Allah Yahwehdi, sun Israel nesala talenung kunumna weik keca emas cap, perak cap tep, “Tek sisi akeca yuma tep tapronedi, go karepnepa, sun podan nesala, Babel mutu nengdi yana, sun tep popsenge dingeda, akeca yumada, dalupra dopropkamsenge. Ukupkameng taruda, tuai mutu neitamai kunge nesala, pio mali-mali weik kunge nengdi, Israel nesala talerum bung keca yuma peda, dalupra dopropmengedi, akeca yuma pio mali kupra deipkamenge. Ukupmengopda, dumsisi kunge nesaladi, akeca kange di ton cap pio men talenkamenge. 22 Ataruda, sun yuk mutu di poryankamseng jen talen nengda, mali pio weik kupkameng dinin, nedi, ‘Dakwapye, dakupkamenge’ tenen, kau kepnedi sun tep men wenepkamne. Ukupnyopda, amali kunge nesaladi, ne si eremna tep, Pio Telep Lengna Ati yuma peda, tali wekmengedi, akati neitamai kapu keca yuma pio mali kweipkamenge.

23 Ataruda, amutu neitamai yumada, mali-mali pio weika di konum kununge. Utopu, dan cei do yumada, amutu neitamai yuma nimi podana cap, tonda yu tenedana cappu kununge. Atep nengeda, mali kunge nesala ateng koudongona tep nengeda, besi keca di ketekemenge rantai tapu weika di ketenepkamrume. 24 Israel yala nesala, sun wenemna tep, nedi tuai mutu ban-ban yuma dipetepnedi, pio mali kunge neng wepra deipnedi, go karepnyopda, sundi ila yu deiki yangedi, Israel mutu nesala yuma, sun ati yanapmengedi, dalupra dopropkamenge. Utopu, Israel nesala kunge mutu neitamaida, ‘Nunda ila mambul neng kunupe’ tenen, salnong-nong kunge deiyo-deiyo neng yumada, wenepra popnedi, amutarapu deipkamne. Tonda, ne Allahdi Israel mutu yuma tapnedi, kaukepronyopda, ne Allah si eremna tep, ketenepra domi ati yuma peda, sun yuk karen mutu di poryankameng nengdi, akati yawa popra tapmengedi, sikke buktapkamenge. Akati urupra mali kweipmengopda, neda akati ton cap, ne kange men deipkamna tepa. Akati pumbon ton, amenda taru peda, ne si pio men erepkamenge.

25 Sun podan neng yangedi, popkuseng taruda, sun Israel mutu talepra kurum nesalada, dipru buluksakerepa, ‘Uo’ teneprumudi, ‘Aneng cap, nun cap telep kupra kikiman kuna tep, dipru antapra deiapnedi, tenpu kange doupra kunange tep, aneng cap pedina upu pepdatepe’ tenen, putaprepa, piripetepmengedi, moropra enkameng dinino, ayu nengdi men gekenkamsenge. Sun poryanapu kupkamsenge. 26 Ataru neitamaida, yu keca tenena kange cap, kange mun kange doupra, dipru daksaknepa, mali upu pena capda, pio tupa-tupa yakankamre. Tonda, ton nengdi, ‘Uo, kange mun keca ton aca konum kupmare, aca ton yankamre ja,’ pepra, tali upu pertamkameng dinin, ange yumada, tali-tali upu pepmengepa, gekenapu kunkamrume. Ukuprepa, sun Israel yala nengdi, ‘Uo, nabi neng tep, moropmepepa, ken deiki di telep kun keca ton epmengedi, nun melipra lap pepsetenge’ tenen, sundi mororbenkameng dinin, ange peda, men karepnyopda men kupkamre.

Tonda, ange utopu, imam-imam neng, sun deiyo ngebo tep, ‘Uo, sundi melipra peterepsetume,’ pepra moronkamrum dinino, ataruda sun imam neng peda, Allah upu tupa men peteremkamsenge. Allahdi, ‘Angeda kunkamrume, angeda pio men kunkamrume,’ pepra deipseu upuda pio gum kupkamre. Utopu sun nimi deiyo-deiyo neng cap, upu bongdina deiyo neng cap, sun wisi neng cap peda, ‘Ukupra-ukupra kunkamrume,’ pepra, men peteremkamsenge. Ange yuma konum gawal dakronkamre.

27 Tonda, ukupkamra tep, sun mutu talepra ila nimi deiyo ngebo Rajada, ‘Uo, ware kuptepe do?’ tenen, engepnapu kunkamre. Ange utopu, Raja er amutara pel melipra donge deiyo neng peda, sun dipru sakrepa, ‘Uo, nun mutu neitamaida, kange di ton cap telep men kupkamre,’ tenen, dipru buluksangkamre. Kange mun kange doupra kunkamenge. Tonda, amutu neitamai kunung nesala yumadi, kware weik kuprepa, ‘Uo, uo,’ tenepmengedi, sun buru cap, yo cap, moropsemkamre. Ange tep nengeda, nedi sun mali kuramrum keca epnedi, akwamutopu, nedi kange mun yu keca deipsenedi, wenepkamsene. Tonda, sun yuma tep, ila wenemna keca karepnedi, sun tep gum kupra deipkamsene. Ada, menop taru sundi, sun kayapu neng tep, wenepra upu bokeipmumdi, gum kupra deiamrumtopu, sun akumum nesala tep nengeda, nedi ange utopu kupkamsene. Ukupkamsena deiki di, sun yumadi ne tep nengeda, ‘Uo. Gume, ukutaru nun konum kael kepmepe. Aikin kupmasernge yumada, Allah er ja! Tek sisi er Allah Yahwehda, ila puto weik ngebo kurure,’ tenepra kael kepkamnerume.

Allahdi peipupa, Yeheskiel gekepudi, seku.