Eze 8 | XteSC | STEP | Babel mutu jen talena nengdi, popseidi, ateng koupra, sun pe karen mutu dubenamseidi, ikin pel dimamseipanen, amenda taru, keteng tamun ngantan bari konum kupupa, ware ngantan bari neitamai dinin, tanggal lima deiki di, ne Yeheskielda, ne ati bukmasi. Akati neitamai bukmasi taruda, Yehuda tara kurami nimi deiyo-deiyo neng capda, ne damai kikiman yaipa bukmapu. Ukupra bukmapupa, Allah Yahweh akeca-keca yuma deiki tara erepra, ila puto weik deiyo ngebo kuredi, er ila putoda, ne deiki yana kupneu.

Ezekiel 8

Yerusalem mutu neitamai dinin, Allah er si eremna ati damai di, tali isok si eremamya tep, pepu upu

1 Babel mutu jen talena nengdi, popseidi, ateng koupra, sun pe karen mutu dubenamseidi, ikin pel dimamseipanen, amenda taru, keteng tamun ngantan bari konum kupupa, ware ngantan bari neitamai dinin, tanggal lima deiki di, ne Yeheskielda, ne ati bukmasi. Akati neitamai bukmasi taruda, Yehuda tara kurami nimi deiyo-deiyo neng capda, ne damai kikiman yaipa bukmapu. Ukupra bukmapupa, Allah Yahweh akeca-keca yuma deiki tara erepra, ila puto weik deiyo ngebo kuredi, er ila putoda, ne deiki yana kupneu. 2 Ukupneu taruda, men mapsi taru dinin, ken utopu keca karepneua deiki di akeca-keca epsi. Ne ken deiki di epsi kecada, nimi urasin utopu kupupa, epsi. Aepsi ngeboda, er deiyo damai di dutarada, uku bo jeramre utopu kunmaupa, epsi. Tonda, er deiyo damai tara di itarada, er giso tarada, urasin pio telep keca, er sida perunggu deiki di likamengepa, merenglang-merenglang peramretopu kunmaupa, epsi.

3 Angebo epsi taruda, er dipapu er buru deiki di doupmanenga utopu kepra bepekrapudi, ne giso potong yana talepneu. Angebodi ukupra talepneupa, adinmasi taru dipapu, Allah er ila puto Sambaladi erepdaro, im alau tara pio deiki tara dubeneupa epsi. Im alau tarada, deiki tara kwamu dinin, tuai tara mutu ban-ban yumada, utara kwamupa, epsi. Tonda ataru dipapu, Allah er Sambaladi, Allah karepneu ken deiki di, Yerusalem mutu debeneu.

Ada, Yerusalem mutu neitamai dinin, Allah Yahweh er si eremna ati damai dubeneu. Ada akati dapu tara, arah utara pirman potokra deiami bisi buplan damai di deipneupa epsi. Adoupra deipneu tara damaida, isok er si eremna tep keca, nimidi urasin utopu petupra ikra deiami keca, er sida patung berhala ^{▼▼berhala – Aupu deiyoda, ada, isok si eremna tep, patung petupra deiamidi, isok si eremami.} kwamu. Adeiaminge tep nengeda, Allah er yu weik kwamupa, ‘Ne mawa nesalada, ne tepapu si erepnetenge. Yuk keca ton si pio guma tep, akecada ne songe,’ teneramu. 4 Ukunmasidi, enmasipa, ataruda, ne adipapu Israel nesaladi si eremameng Allah, er ila lengna dirineda epsi. Epra kael kepsi ngeda, menop taru di Kebar me pirman kunmasi taru di emsinge utopu, angeda kange di epsi.

5 Aepsi taruda, Allahdi ne tep upepneu, “Uo kanda nimi sisa dipapu deipkei ngebo kurume. Kan urasinda tamupra dapu tara, (arah utara) dipetepo,” upepneupa, dinmasi. Arah utara dinmasipa, akati bisi buplan potokaming damaida, aisok si eremna tep betapra deiami keca ortarada, nimi urasin utopu ketekepra, aisok si eremna tep deiami keca, er sida patung berhala epsi. Adeiaminge tep nengeda, Allah er yu weik kwamupa, ‘Ne mawa nesalada, ne tepapu si erepnetenge. Yuk keca ton pio gume. Atep, akecada ne songe,’ teneramu.

6 Ange epsipa, Allahdi ne tep upepneu, “Uo, kanda nimi sisa dipapu deipkei ngebo kurume. Kandi dinmarempa, wareto keca kunmaupa epmarem do? Kanda sun Israel nesaladi pio mali weik keca kunmangepa dinmarem ngeda, pio mali-mali kun kecapu kununge. Ukununga deiki di, neda ne pe si eremna ati neitamai gopra yuk karenai benyopda, akati kange di ton cap men wektene! Angepu gum dinin, ne cap kan dubekenedi, sun yuk pio mali kunmange keca ton benbenepkenepa, epkurume. Aca di epmarem ngeda yambul mali kunmang dinin, amenda epkamrem kecada, pio ila mali weik kupmange keca epkamarume,” peipneupa, gekepsi.

7 Upepneudi ne adipapu doupra, Allah er si eremna ati bura tara dinin, akati damai buplan wengbanai, bura tara ati dam tara doupra dubeneupa epsi. Ukupneudi gel di taplakra deipra wiami beilya, dipetepsipa, yambul bon potokaminge epsi. ‘Abeilya ortara kwapmare keca epkun’ tenen, abeilya bisi bon tenpu potokmasidi, ortara dinmasi. Dinmasipa, ortara kwamu buplan bisi tenpu ton epsi. 8 Epsipa, Allahdi upepneu. “Uo kanda nimi sisa adipapu deipkei ngebo, apotokra deipi bisi bonda, kandi yambulanun ton cap potokurume,” pepneu. Upepneupa, nedi yambulanun ton abon neitamai potokmasidi, ortara kwamu keca epsi. 9 Epsipa, Allahdi upepneu. “Ukutaruda, kanda abuplan wekmemdi, sun Israel nesaladi pio mali weik kunge keca kunmangepa dinkureme. Angeda, pio mali-mali kun kecapu kunungada, nedi, ‘Angeda ne pio songe,’ tenenune.

10 Upepneupa, nedi abuplan bisi bena wekra epsi. Aceida, tenpu ati pumbonda, akati dela peaminge yumada, nimidi gambar petupra sekinge weik epsi. Epsi kecada, Allahdi, ‘Agam keca yala-yala yumada, ne pio songe,’ konum peiamseu dinin, nimidi akeca urasin utopu konum sekra deipi. Ada, ware keca do yuma, sun mundu cap, yan cap deiki di, tu buta neitamai di embaramre gam keca urasin utopu sekingeda, ada bal cap, tonda Allahdi, ‘Agam kecada, ne songe cadi, sundi angeda jena pio meme,’ peipseunge peda, epsi. Tonda, sun Israel nesaladi, ‘Nun nai bo ake’ tenen, tali isok-isok si eremna tep keca, akeca urasin utopu petupra, adela deiki sekra deiaminge ton epsi.

11 Tonda, sundi amali-mali keca urasin utopu sekra deiaminge damaida, Israel mutu neitamai talepra, nimi deiyo-deiyo kepra, sun taleami nengda, tujuh puluh neng acei tekmaipa epsi. Tonda, Safan erdi deiamu ngebo Yaazanya peda acei kupmau. Er cap, akunmai deiyo-deiyo neng yumadi siltong pio telep peramre keca doupmai mauda, uku jenmaudi kete welenmau ngeda, sun animi deiyo nengdi doupmaipa, nintong telep kete welenmaupa epsi.

12 Ange yuma epsi pangeda, Allahdi ne Yeheskiel tep pepneu. “Uo kanda nimi sisa dipapu deipkei ngebo kurume. Sun Israel mutu neitamai di talepra kunung nimi deiyo-deiyo nengdi kunungnai di inipra kunmangada dinmarem do? Sun akunmange keca yumada, kandi konum epmarume. Ada, sun anesala Allah si eremna ati pumbon neitamaida, isok-isok si eremnunge. Sun yuma yuk-yuk dinin, sun yumadi, sun isok si eremnung keca damai tekmengedi, atali keca tep moronunge. Ukupmengedi, sundi aupu ton pepnunge. ‘Gume, Allah Yahwehda, nun inipra kunmap keca men diserure. Gume, Allah Yahwehda, nun kunup mutu konum tapseua cadi, erdi men diserure,’ penunge.” Allahdi upeipneu. 13 Upeipneu dingeda, Allahdi aupu ton cap pepneu. “Ange konum epmarem ngeda, tek sisi mali kupmar dinin, amenda taruda, pio ila di mali kunung keca ton epkamarume. Ange peda ne pio songe,” Allahdi pepneu.

14 Upepneu dingeda, Allahdi ne dopra yukai dubenue. Ada, Yerusalem mutu neitamai dinin, Allah Yahweh er si eremna ati damai wengna tep bisi buplan dubeneuaida, akatida dapu tara, arah utara pirman potokra deiami bisi buplan damai deipneupa epsi. Aceida, sun amutu neitamai kurami nerapu-nerapu, tenpu gung bulupmaidi, Babel mutu isok si eremami dinin, sundi aisok si eremami ngeda, er sida Dewa ^{▼▼Dewa – Aupu deiyoda, ake. Dewa peramengada, isok si eremna keca tep penunge.} Tamus deamupa engenmaipa epsi. 15 Epsipa, Allah Yahwehdi ne tep asipterepneu. “Uo kanda nimi sisadi deipkei ngebo, kanda angeda moupra dinmarem do? “Ange konum epmarem ngeda, tek sisi mali kupmar dinin, amenda taruda, pio ila di mali kunung keca ton cap epkamarume. Ange peda ne pio songe,” Allahdi ne Yeheskiel tep pepneu.

16 Upepneudi, adipapu Allahdi ne doupra, Allah Yahweh er si eremna ati domi ngeda, pirmanai dubeneu. Ada akati damai wengna bisi buplan potokeiaminge damai dubeneuaida ake. Ada, Allah er si eremna tep, gam keca popnedi, uku dongona tep ketenepra deiami keca, er si mesbada, ortara kupmaupa, epsi. Atarada akati kumunai kupmaupa epsi. Aceida, nimi dengeda, dua puluh lima neng kupmaipa, epsi. Sun akupmai nengda, Allah er si eremna ati, Pio Telep Lengna Ati, sun amnyo tara kupmaupa, sundi acei wekmaidi, keteng yakan tara urasin dipra, sun gutam tu dipra, keteng yakan tara kupmauai di dipra, keteng tep gisal donmaidi, sundi keteng si eremaipa, epsi.

17 Allah Yahwehdi ne Yeheskiel tep pepneu. “Uo kanda nimi sisa dipapu deipkei ngebo kurume. Sun akunmai ngeda, kandi moupra dinmarem do? Ada sun Yehuda yala nengdi, pio mali weik kunung keca tep nengeda, ‘Angeda mambul gume. Dakwapye,’ tenen, kau keptene do? Gume, akunmang ngeda, tek sisi mali kunmange. Dinino, angepu gum dinin, sunda amutu-amutu neitamai yumada, sundi pio mali-mali kuna keca weikanun ton tapakra kupbanunge. Ada, ton nengdi yuk neng tep, podana cap, pangdana cap, puto weik cap, yu kudana cap weik kupbanunge. Ukununga deiki di, ne yu pio weik kunerure. Yu kunerur dinin, sundi, ange tenena gum dipapu, nintong telep co teru sun ubon bisi damai talepmengedi, anintong gekepmengopda, isok-isok sipu eremnunge. Ukununga cadi, angeda ne pio song cadi, nedi sun tep tulum weik kunerure, pepkene.

18 Ukununga tep nengeda, neda ne yu weik tupa kunerya tep, sun nong deiki ila ikin keca deipkamne. Tonda, nedi sun anesala tep, ‘Uo sunda bicaue, ne mawa nesala kununga cadi, sun mali kunungada dakwapye, tali lupra kaukepkamne,’ men pepkamne. Tonda, nedi sun anesala tep nengeda, men kaukepkamne. Sun tep ila di wenepkamsene. Tenpu ngebo peda, men tapkamne, sun yuma tep pio ila ikin keca, sun deiki deipnedi wenepkamsene. Wenepra popsenyopda, sun Israel nesaladi, upu ila di ne tep moronkamneng taruda, puto di meiyal gapra penkamnenga peda, tek sisi ne pio men gekepkamne!

Allahdi ne Yeheskiel tep pepneupa, gekepsi.