Eze 9 | XteSC | STEP | Allahdi, “Yerusalem mutu nesala tep, bicau men tenepkamne,’ peipneu dingeda, aupu ton dukdongopra pepu. Ne Yeheskieldi gekenmasipa, Allahdi ila upu deiki di pepu, “Sunda, Yerusalem mutu ila ati arum dominge tep, kalengna deiyo neng upupmumdi, ajen neng dopra acei duyankurume. Akati arum kalengnung jen talen nengda, yuk-yuk dinin, sun yumada, sun buru di jen do, yuk nimi pon keca ton do, ange dopmengedi, yankunge,” pepupa gekepmasi.

Ezekiel 9

Allahdi Yerusalem mutu wenepkamrenge tep, pepu upu

1 Allahdi, “Yerusalem mutu nesala tep, bicau men tenepkamne,’ peipneu dingeda, aupu ton dukdongopra pepu. Ne Yeheskieldi gekenmasipa, Allahdi ila upu deiki di pepu, “Sunda, Yerusalem mutu ila ati arum dominge tep, kalengna deiyo neng upupmumdi, ajen neng dopra acei duyankurume. Akati arum kalengnung jen talen nengda, yuk-yuk dinin, sun yumada, sun buru di jen do, yuk nimi pon keca ton do, ange dopmengedi, yankunge,” pepupa gekepmasi. 2 Upepupa, ken mapsa deiki di dinmasi taruda, sun amutu kalengna deiyo neng yumadi, adipapu kunupsek pepra ngangtan bari (6) neng Allah Yahweh er si eremna ati damai yakan bisi buplan tara, dapu tara arah utara di kepra yanmaipa epsi. Sun aneng yai taruda, sun yuk-yuk jen dourami ngeda, adipapu sun buru deiki di doupra yai. Sun ayaiya kan-kan di, nimi tenpu ngebo ton, opkal pio telep boun nge, er si kain lenan keamu ngeboda, upu sengna tep keca cap doupra yau. Ukupi dingeda, sun aneng yumadi adipapu, Allah si eremna ati urasin tara, gam keca popnedi uku dongonai, er si mesba, pio telepnge gat keca er si perunggu deiki di ketenepra deiamyai, aceipu wekra bena tekmai.

3 Mesba damai tekmai taruda, Israel nesaladi si eremami Allah, er si Yahweh, er pio telep kuna cap, puto cap kururya deiki di, peten kemna tep, er ila dirin kuramngai di welepra yana teku. Ada, Allah si eremna ati pio pumbon tara, Pio Telep Lengna Ati neitamai di deiami keca, er si Peti Perjanjian deiki tara, Malaikat urasin utopu kupra, gat keca emas di petupra deiaminge, er si Kerub butene kurerungai di, adirinda men di akupmaua di gopda pepra, aca di welepra, Allah si eremna ati wengna bisi buplan wengbarami tara bena teku. Adirinda, acapu yana tekupa, Allah Yahwehdi upupmaupa, telep boun opkal, er si kain lenan kenekamodi, upu sengna keca kipmau ngebo tep, kongpepudi, aupu ton pepu.

4 “Kanda, Yerusalem mutu ila ati arum neitamai dana-dana tara yumada, benkurume. Ukupmem dingeda, akati arum neitamai kunge nesala yuma dipetepmemdi, ware nesala do yuma, Israel yala nesala pio mali-mali weik kunge keca cap, ne Allahdi, ‘Angeda ne pio songe,’ tenenun keca dinin, amutu nesaladi pio mem keca kungepa, epmengedi, sun kange dipru neitamai di, ‘Uo, angeda men kuptenge, angeda pio mali kununge’ tenen, dipru pu jeprepa, engenung nesala yumada, sun damai benkurume. Bemem dingeda, anesala sun urasin tara dinin, sun asuru deiki tarada, peten kemna tep, tanda sekra derirbenkurume.” Allahdi kain lenan kenekmau ngebo, sengna keca kipmau ngebo tep pepu.

5 Upenmaupanen, ne Yeheskieldi gekenmasipa, Allahdi sun yuk-yuk neng, sun Yerusalem kalengna tep yanmai jen neng yuma tep aupu ton pepu. Ada, “Asengna keca kipmare ngebo, Yerusalem ila ati arum neitamai embenkure taruda, sunda erpu melipra amutu neitamai yuma dombemumdi, Yerusalem mutu ila ati arum neitamai kunge nesala yumada moupra dipeteprumudi, angebodi sun urasin deiki petenkemna tep, sengna keca men sekmare nesalada, adipapu poptapkurume. Tonda anesala yuma tep nengeda, sundi ‘Uo, bicaue, anesala men popkupe,’ pio men tenepkamrume. Amutu kunge nesala yumada popnapu kupkamarume.

6 Ukupkamarum taruda, wisi neng cap, wisi nerapu cap, kaber neng cap, kaber nerapu cap, metek nyapu cap, ner nyapu cap, sun yumada popnapu kupkamarume. Ukupkamrum dinino, ange moupra gekepneso. Ware nesala do yuma, akain lenan kenekmare ngebodi, nimi tenpu ngebo peda, sun urasin deiki petenkemna tep, sengna keca konum sekra deipmare nesalada, pio men bepkamrume. Sengna keca sun urasin deiki konum kwamre nesalada pona meme. Atep nengeda, ukutaru acei neitamai di, ne si eremna ati damai di gonga kepkurume,” Allahdi sun jen talena neng tep pepu. Upepu taru dipapu, sunda nimi pona pel tep, gonga keprapidi, Israel nesala nimi deiyo-deiyo neng, Allah er si eremna ati urasin dam tekmai neng kankan di gonga kepra wepmaidi popbanmaipa epsi.

7 Allahdi sun amutu kalengna tep deiyo jen talena neng yuma tep pepu. “Ne si eremna ati damai dinin bura tara halaman yumada konuma, adipapu sundi pio mali kupra deipkurume! Nedi, ‘Angeda ne pio songe,’ pemsi keca dinin, sundi popkurum nesala yuma, sun gemna doupra, ne si eremna ati damai doupra deriryankurume. Deipnapu kupmamumnyanen, akati damai bura tara halaman yumada dekpepkamre. Atep adipapu gonga kepkurume! Anesala porberume!” pepu. Upepu pangeda, sun ajen talena neng yumadi, adipapu gonga kepra, Yerusalem mutu ila ati arum dominge neitamai kurami nesala weika di popra banmmai. Ada petenkemna sengna keca, sun urasin deiki tara men kwamu nesala tep popnapu kunmaipa, ken deiki di epsi.

8 Animi tupa ponmai taruda, ne Yeheskielda tenpu ngebopu aceipu amutu neitamai tupa kunmasi. Ne yuk akunmasi taru di, ne kange mun kange doupra, ‘Uo’ tenenmasi di, Allah er gispal dona tep, tu deiki mapmasidi aupu pepmasi. ‘Uo, kanda ne si eremnun Allah Yahweh, kanda akeca-keca yuma talepra, pio deiki tara erepra, ila puto weik deiyo ngebo kuruma tep, asipetepkukene. Kandi Yerusalem mutu kunge nesala tep, ila yu kupkernge dopra, anesala nong deiki deipmemdi, ila di wenepra popkumem taruda, Israel yala nesala yuma popra gawal dakurum do, gum do? Ada, Babel mutu di tapra Yerusalem mutu tamupra yanmai nengda, yambulanunpu tamupra yanmai. Menop taruda, anesala weik tara ngeda, Babel mutu dakurami taruda konum deami. Atep, sun Israel yala nesala amutu neitamai, yambul tarapu tupa gam kunmang nesala yuma peda, poptapra gawal dakamrum do, gum do?” pepra asipetepsi.

9 Asipetepmasipa, Allahdi aupu ton tamupra pepneu. “Uo, sun Israel yala tupa kunge nesala cap, tonda Yehuda yala tupa kunge nesala cap, sun yumadi pio mali-mali keca talepra kuraminge cap, tupa mali kunge keca capda, pio weik kurure. Angeda men nukmanto. Sun tupa mali-malipu weika di kununga cadi, amutu-amutu neitamai yuma cap, Yerusalem mutu ila ati arum dominge neitamai cap, nimi pona weik kungepa, nimi yapi weik sangrure. Tonda, angetopu, Yerusalem mutu neitamai yuma peda, ataru kunge nesala yumadi, yuk neng tep, nimi upu bongdinung taruda dumsisipu men kununge.

Mok upu penunga deiki di, nimi upu bokmengedi, deiyo men kwapmarepapu, ikin keca dopra yuk nesala nong deiki deipmengedi, yaninunge. Tonda, sundi ne tep mok upu deiki penenungada, ake. ‘Gume, Allah Yahwehda puto weik kuredi akeca yuma talerur dinin, amutu neitamai tep nengeda, konum tapseu. Allah Yahwehdi konum tapseua cadi, nundi mali keca talepra kunup keca yumada, pio men dinkamsere,’ penenunge. 10 Anesaladi upenenunga tep nengeda, ne Allahdi sun anesala yuma tep, epne dingeda, sun tep bicau pio men tenenkamne. Gume, sun Israel nesala yumadi, yuk neng tep pio mali-mali weik kuramengetopu, nedi sun aneng tep, sun mali kunge ngeda, sun nong deiki deipkamsene. Pio wenepra popnapu kupkamsene,” Allahdi ne Yeheskiel tep, ken mapsa deiki di pepneu.

11 Upepneu pangeda, ataru dipapu, pio boun telep opkal, er si kain lenan kenekamu ngebodi tamupra yaudi, Allah tep yana lap pepu. Ada erdi, “Ne nai Allah, kandi, ‘Ukupkamrume, ange ton men kupkamrume,’ pepra deipnemumtopu, ange yumada adipapu konum kupra gawal dakmane. Tenpunge peda men tapsi,” pepupa gekepsi.