Ezr 1 | XteSC | STEP | Uda Persia mutu ila nimi deiyo ngebo, Raja talepra kuramu ngebo, er sida Kores. Raja Koresdi, amutu gonga kepra taleamu keteng tamun menmenange neitamai di, mambul upu ton peipu. Ada, Allah er si Yahwehdi, Persia mutu deiyo ngebo Raja Kores damai yana er dipru tamupupa, er dipru neitamai di upu peipupa, Raja Kores gekepudi, aupu doprapudi seku. Konum seku dingeda, er amutara neng tep, “Aupu yuma dopropmumdi, ne talenun mutu neitamai yuma nukra lap perbankamrume,” peipu. Raja Koresdi akupunge yuma deiyoda pumun taru Allah er si Yahwehdi, er upu lap peramu ngebo Yeremia tep, upu peipupa, gekepudi sekeipu ngeda, ‘Nong kupkamre’ tenen, kupu. Akeca yuma deiyo ngeboda, Allah er pua.

Ezra 1

Persia mutu taleamnga ila nimi deiyo ngebo, Koresdi, “Yahudi yala nesala sun mutu sisa tamupra benkunge,” pepupa tamupra bei upu

1 Uda Persia mutu ila nimi deiyo ngebo, Raja talepra kuramu ngebo, er sida Kores. Raja Koresdi, amutu gonga kepra taleamu keteng tamun menmenange neitamai di, mambul upu ton peipu. Ada, Allah er si Yahwehdi, Persia mutu deiyo ngebo Raja Kores damai yana er dipru tamupupa, er dipru neitamai di upu peipupa, Raja Kores gekepudi, aupu doprapudi seku. Konum seku dingeda, er amutara neng tep, “Aupu yuma dopropmumdi, ne talenun mutu neitamai yuma nukra lap perbankamrume,” peipu. Raja Koresdi akupunge yuma deiyoda pumun taru Allah er si Yahwehdi, er upu lap peramu ngebo Yeremia tep, upu peipupa, gekepudi sekeipu ngeda, ‘Nong kupkamre’ tenen, kupu. Akeca yuma deiyo ngeboda, Allah er pua.

2 Persia mutu ila nimi deiyo ngebo, Raja Koresdi sekeipu upuda ake.

Gume im deiki cap, tuai cap yuma talepra kurur Allah, er si Yahwehdi upepneu. “Pemerintah Raja Persia mutu talepra kurum ngebo, kandi aupu kael kepkurume. Ware mutu do yuma, tuai mutu neitamai kunge nimi deiyo neng yuma cap, sundi talenge keca yuma cap, kan buru deiki deipkene. Nedi kan tep konum wepra deipkene. Deiyoda, Yehuda yala nesala sun tara neitamai dinin, Yerusalem mutu neitamaida, Allah ne si eremna ati dopkamnerume.

3 Atep nengeda, kandi talerum mutu neitamai kunge dinin, Allah er nyapu kunge nesala yuma tep kandi, ‘Telepe,’ pepra, ‘Sun nai bo Allah melipserepa, sundi er si eremna ati dopkamrume,’ pepmem pangeda, aneng yumadi Yehuda tara neitamai, Yerusalem mutu benkamenge. Yerusalem mutu bengedi, Allah ne si eremna ati dopkamnenge. Neda Allah, Israel yala nesala tep, bicau tenepra pio melimnune. Neda Yerusalem mutu neitamai kunune. Nedi aupu pepkena tep, kandi, ‘Telepe daberume,’ pepmempa benkamenge,” Allahdi pepneu.

4 Raja Koresdi aupu pepudi aupu ton pepu. “Tonda, ware neng do yuma, podarami taru men deramidi, tupa gam kunge nesalada, Allahdi weamu nesala tep, ukutaru nun cap kikiman kunung dinin, Yerusalem benkameng neng yuma tep nengeda, sun damai kurumu nesaladi makupkamrume. Ada, Israel nesala konum sun pe mutu tamupra benkamenga tep, sun Persia mutu kumum nesala yuma talepra kurumu keca, kunumna weik keca dopra, aneng tep karepkamrume. Ada, emas cap, perak cap, nimidi peirameng keca cap, telep bunga cap dopra, Yerusalem benkameng neng tep karepkurume.

Tonda, Yerusalem mutu bengedi, Allah si eremna ati dopmengedi, er gispal dona tep karenkameng keca, sun Persia nengdi, akeca-keca yuma bulupra, er weamu nesala tep karepkamrume. Allah er si Yahwehdi aupu peipneupa, sun ne amutara neng tep pepsene,” Persia mutu nimi deiyo ngebo Koresdi pepu.

5 Upepu pangeda, sun Israel nesala dinin, yuk-yuk nimi deiyo kepra kuramitopu, Yehuda yala deiyo neng cap, Benyamin yala deiyo neng cap, Allah er ati pumbon pel dona deiyo neng cap, aneng sun melimna neng, Lewi yala neng cap, ‘Benkamep’ tenen, ketenepi. Ada, ware yala neng do yuma, Allahdi sun dipru tamupudi, sun dipru neitamai, puto kepra deipupa, kange deiprapidi, ‘Yerusalem mutu tamupra bepedi, Allah Yahweh, er si eremna ati dopkamepe,’ tenepidi ketenepi.

6 Ataruda, Perisa mutu nesala yuma, sun kikiman akuramitopu bulupra karepi kecada, emas cap, perak cap, nimidi peirameng keca cap, telep bunga cap dopra, Yerusalem benkami neng tep karepi. Tonda, Yerusalem mutu bengedi, Allah si eremna ati dopmengedi, Allah er gispal dona tep, kange deipra karenkameng keca, yuk telep-telep keca yuma, sun Persia nengdi, akeca-keca yuma bulupra karepi. Ada, sun kayapu bisi benkoi taruda, Israel nesala tep karepi.

7 Angepu gum dinin, Raja Koresdi, ‘Amambul keca ton dopra dubenkameng’ tenen, pumun taru Allah er Yahweh, ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} er si eremami ati pumbon deiami keca ton karepu. Angeda, pumun taru Yerusalem mutu Allah si eremna ati neitamai deiami dinin, Babel mutu ila nimi deiyo ngebo, Raja Nebukadnezardi Israel nesala popra bisbisa kapudi, upula dopramu keca ton, Raja Koresdi akeca dopra ka di tamupra Israel neng tep karepu. Pumun taruda, Raja Nebukadnezardi Israel nesala popra bisbisa kapudi, amambul keca yuma upula dopropudi, er mutu dubeudi, er isok si eremna ati pumbon bena deiamu.

8 Atep nengeda, Persia mutu ila nimi deiyo ngebo Koresdi peipupa, akeca yuma doprapidi, amutu neitamai Raja taleamu keca yuma, akeca si sengamudi Bendahara utopu kalekra pel doramu ngebo, er si Mitredat karepipa, erdi akeca yuma nukra dopropudi, Yehuda yala neng sun deiyo ngebo er si Sesbazar tep karepu. 9 Akeca si sekropudi karepu ngeda ake. Emas ongomdirami mau, piring tiga puluh (30) cap, tonda perak piring deriraminge seribu (1.000) cap, me gamne mau dua puluh sembilan (29) cap, karepu.

10 Tonda, jen keca lungne mau emas di keteneipinge tiga puluh (30) cap, amau utopunge dinin, perak di ketekepinge empat ratus sepuluh (410) cap, tonda, yuk kunumna weik, telep keca seribu (1.000) cap, akeca-keca yuma konum nukrapudi, Sesbazar tep karepu. 11 Ada emas cap, perak cap, yuk keca yala-yala denge yumada, lima ribu empat ratus (5.400) keca yuma nukrapudi, sun Yehuda yala nesala deiyo ngebo Sesbazar tep karepu. Ukupu pangeda, pumun taru Israel nesala popbisipidi, sun mutu neitamai di dalupra dopropidi, Persia tara dinin, propinsi Babel dubenamipa, sun amutara dakurami neng yuma, ataru Babel mutu tapra, sun pe mutu Yudea tara dinin, Yerusalem mutu ka di tamupra bei. Sun bei taruda, akeca-keca yuma kipra dubei.