Ezr 10 | XteSC | STEP | Ataruda, Allah er si eremna ati urasin tara damai bena geipdongopra bukudi, Ezradi, “Uo, tek sisi nunda pio mali kunupe,” pepra, engepudi Allah tep lap pepra moropu. Israel nesala neitamaida, nimi pe, nerapu pe, tonda sun nyapu pe, sun yumada, weika di bulupra, Ezra akunmauai, akati dam yana wekmai cadi, sun yuma akati dampu yana ongopdongopra wekmai nesala yumada, ‘Uo, ware kupkup do?’ tenen, ila puto di engenmai.

Ezra 10

“Yuk mutu nerapu donupada, tapkamepe,” pepi upu

1 Ataruda, Allah er si eremna ati urasin tara damai bena geipdongopra bukudi, Ezradi, “Uo, tek sisi nunda pio mali kunupe,” pepra, engepudi Allah tep lap pepra moropu. Israel nesala neitamaida, nimi pe, nerapu pe, tonda sun nyapu pe, sun yumada, weika di bulupra, Ezra akunmauai, akati dam yana wekmai cadi, sun yuma akati dampu yana ongopdongopra wekmai nesala yumada, ‘Uo, ware kupkup do?’ tenen, ila puto di engenmai. 2 Ukunmai taruda, Elam yala ngebo, er si Yehiel dinin, er mi Sekanyadi Ezra tep upepu. “Nunda akunmap mutu neitamai kurami nesaladi deriami nerapu dopra donupa deiki di, konuma nun nai bo Allah tep, tapmepudi, er damai konum mali kudidanupe. Tek sisi ange konum kunupa peda, nun Israel tep ngeda go ton tupa akupkamsera cadi, nun malinge tapmepedi, nai bo Allah, er damai tamupra yatepe.

3 Atep nengeda, nun yumadi Allah er damai yana, ‘Kan upupu gekepra dombankamnupe,’ pepra, pedina upu peipmepedi, nundi yuk mutu nerapu dopmupudi, nyapu deipmupu ngeda, sun cap, sundi deiamsei nyapu cap yumada, adipapu tapmepedi, anesala yukai enepronkamepe. Ada, nun deiyo ngebo Ezra, kandi, ‘Ukupkamrume,’ pepsemem upu cap, tonda Allahdi, ‘Angeda kunkurume, angeda pio men kunkamrume,’ pepra deipseu upu moupra talengedi, kware kuprepa, moupra dombange nengdi pesenge upu capda, aupu yuma gekepmepedi, dombanapu kunkamepe. Tonda, Allahdi, ‘Sunda ange-angepu talepra kunkamrume,’ pepra deipseu mem upu akwamaretopu, angepu talepmepedi, moupra kunkamepe. 4 Naio, Ezra kanda, nun deiyo ngebo kurema cadi, kandi deiyo talepra tekmemdi, ‘Angeda adipapu kupkurume,’ pepsememtopu kupkamepe. Kandi upepsemempa, nunda tek sisi, apepsememtopu kupkamnupe. Nundi dukdongopra melipkamkepe. Naie, ange yumada, kan puto di adipapu kupra, gawal dakamrume,” Sekanyadi Ezra tep pepu.

5 Upepupa, Ezradi gonga kepra, Sekanyadi pepu utopu kupu. Atep, Ezradi, imam-imam neng yuma, sun ila deiyo neng cap, sun pel melimna neng, Lewi yala neng cap, tonda yuk dakurami Israel nesala yuma cap tep, upepu. “Tek sisi sun yumadi, upepkurume. Ada, ‘Nun yumada, Sekanyadi pepmasertopu, tek sisi kupkamepe. Allah er upu peseretopu, gekepmepedi, angepu talepra kunkamepe,’ pepra, ne gekenmasenai di pedina upu deiki di pepkurume,” pepra, Ezradi upepra deipu. Ukupra peiputopu, sun yumadi angepu kupi.

6 Sun anesala yumadi, “Tek sisi angeda kupkamepe,” pepra, pedina upu deiki di konum pepyopda, Ezrada, Allah er si eremna ati dam di tapra, Elyasib er mi Yohanan, er kuramnyai beudi, er ati bena mapmau. Abenmapu taruda, ‘Uo, nun Israel nesala mali kuramepu’ tenen, engenapu kunmau. Ada, menop taru Babel mutu jen talena nengdi, Israel nesala popbisipidi, ateng koupra sun pe mutu neitamai bena deiamipa, dakuramipanen, amenda taru tamupra Yehuda tara yanami nesala, sundi Allah er upu tapra, mali kuraminge tep, ‘Uo, warya tep kunung do?’ tenen, tupa tenenmaudi, jen cap, me cap, pio ton men jenmaudi, si tepra mapmau.

7 Uda dakunmauanen, amenda taruda, erdi kai upu ton pepra, sekeipupa, Yudea tara neitamai yuma cap, Yerusalem ila ati arum neitamai cap yuma, doupra dubenmaidi lap penmai. Ada, ‘Ukutaruda, sun Israel nesala yuma, sun apu yapu karen mutu, Babel mutu derirbenamidi ikin pel dimamipa, pel dorami nesala yumadi deiamipa, dadeipdanen yakaramyanen, tapipa, tamupra nun pe mutu, Yerusalem mutu yana kunmarum nesala cap, Yehuda tara yana kunmarum nesala cap yuma tep pepsene. Sun yumada, ue weneri tumi neitamai di, menmena aca yana, ne damaipu, Yerusalem mutupu bulupkurume,” pepra, upu karepu.

8 Tonda, aupu neitamai di, aupu ton pepu. “Tali men pepsene. ‘Sika dipapu yankamepe,’ tenena gume. Ware ngebo do yuma, komuni weneri neitamai di, Yerusalem mutu bupra yakana tep go karepmapepane acei men yamenge nesalada, sun kuramre keca cap, sun tu cap, sundi talemenge keca yala-yala yuma capda, dalupra doropkamepe. Tonda, sun aneng tep nengeda, ‘Sunda, Yerusalem mutu neitamaida, pio men kunkamrume. Nun Israel yala nesala kunkamnupai di enepropmepepa, sun cap, kikiman pio men kunkamepe,’ pepra, deipkamsepe. Angeda, nun Israel yala nesala tep, deiyo talepra, nimi deiyo kepra kunup nengdi, ‘Konuma, ukupkamepe,’ peipmeputopu kupkamepe.” Ezradi upepupa, akai upu doupra lap pepra banmaipa, atara nesala yuma gekepi.

9 Sun yuma gekepya tep, komuni weneri konum kupyopda, sun Yehuda yala tara nimi cap, Benjamin yala tara nimi capda, adipapu bupra Yerusalem mutu neitamai dinin, Allah er si eremna ati damaipu yana bukmai. Ada ware toupne ngeda, tanggal dua puluh (20) deikida, Allah er si eremna ati urasin tara bulupra bukmai. Atumida, ila mo cemaua cadi, sun anesala yumada pio bul kunmaupapu, ‘Uo, upu talepkamapnge cap, mali kuramepunge capda, mambule’ tenen, ikin kange doupra kunmai. 10 Ukupyopda, Ezradi sun anesala kan-kan tekrapudi, sun yuma tep upepu. “Sunda konum mali kurume. Nun nai bo Allahdi, ‘Ukunkamrume, angeda pio men kunkamrume,’ pepra deiamseu upu cap, er pe cap tep, yanitamnapu kurume. Ada, sundi Israel mutu neitamaida, yuk mali kun kecap ton, kurum dinin, sundi yuk dana-dana tara mutu nerapu dopra doruma deiki di, pio mali kun keca ton tapakra kupmarume. Atep, sun mali kurumnyada, pio weik kupbaramrepa, akeca tep deiyo akapmarepa, Allahdi weika di wenepsetue.

11 Atep nengeda, mali kumum ngeda, inimna gum dinin, katuai dipapu, lap penkamrume. Nun apu yapu, sundi si eremami Allah, er si Yahweh damai dipapu, ‘Uo, tek sisi nun mali kunupe,’ pepra, lap pepkurume. Angepu gum dinin, ukupmum dingeda, Allah erdi, ‘Ukupkamenge,’ tenesere kecapu, er kange derina pelpu talepra donkamrume. Ada nun dana-dana tara kunge nesala cap, nun mutu neitamai kunung nimi bo neng cap, sun Israel yala nengdi, yuk mutu nerapu dopra dorumudi, kikiman kurumu nerapu yuma capda, ayuma enepra yukai donokurume. Anesala yuma enepronkurume,” Ezradi pepu.

12 Upepu pangeda, abulupra yanmai Israel nesala yumada, ila upu puto di upepi. “Uo, kandi pepserem upuda, tek pepreme. Nundi apepmaseremtopu adipapu kupkamepe. 13 Dinino, nun aca bupra yana wekmap nesalada, pio weike, tonda ukutaruda mo weik cemna li konum kupsera cadi, atumi peda ila mo cemara cadi, nunda bura tara acapu pio men tektepe. Tonda, amali kuramepu ngeda, ila ikin weik cadi, ue tenpu do, butene do, weneri tumi deiki dipapu do, ange yuma men lepsikra doptepe. Nun mali ngeda, menmena dipapu gum kupra men gawal daktepe. Deiyoda, nun yumada apepmaserem mali kunada, pio weik kunupa tepa.

14 Atep nengeda, nundi kan tep moropkepe, “Kandi nun deiyo-deiyo neng tep, ‘Ukupkurume,’ pepsemempa, sundi nun Israel yala nesala yuma tep, ‘Ukupkamrume,’ peipkamsenge. Ada Yerusalem mutu dana-dana tara neitamai yuma, ati arum dopmepudi, apepmaserem mali keca, yuk mutu nerapu dopra doamepudi, kikiman kupenge tep nengeda, nun deiyo-deiyo nengdi, ‘Atara nengda atumi yankurume, tonda sun yuk ati arum kurum nengda, atarupu sunda bulupra yarume,’ pepsengepa, gekepmepedi, apepsengetopu kupkamepe. Sundi upu pepmengeda, yana bulupmepyopda, nun mutu yuk-yukai dinin, sun deiyo nengdi upu lepsikra deipkamsenge.

Ukuptepyopda, nun deiyo-deiyo neng cap, upu bongdina deiyo neng, upu lepsikra dona deiyo neng capdi, ukupsengepanen, amenda taru nundi mali kuramepunge tep, Allah erdi nun tep, yu kupmarenge gum kupbaramrepanen, amenda taru tupa men derepkamsere.” Sun abulupra wekmai Israel yala nesala yumadi upepra moropmai. 15 Apepinge tep, yuk nengdi ton, “Gume, angeda pio men kupkamepe, angeda mali,” men pepi dinin, dumbari nengdipu, ‘Nunda, ange gume, tenepmepe,’ pepi. Ada, Asael er mi Yonatan cap, Tikwa er mi Yazeya cap, upepreipa, tonda butene neng ton, Mesulam cap, tenpu Lewi yala ngebo er sida, Sabetai cap, sun anengdipu, ‘Nunda gume, ange men kupkamepe,’ melipra peprei.

16 Dumbari nengdipu, ‘Nun gume,’ pepya cadi, menop taru Babel mutu jen nengdi, nun apu yapu bisbisa kapra, Israel neng ateng koupra, Babel mutu doupra derirbenamipa, dakuramipanen, tamupra yanami Israel nesala yumada, “Dyo, Ezradi upepra deipmasertopu, angepu kupkamepe,” pepi. Atep nengeda, imam Ezradi, Israel yala nesala deiyo kepra kurami nengpu, sun yala yuk-yuk dakuramitopu, ware kuprap neng ton, wepra deipudi, sun ayala-ayala deiyo neng ton, sun si yumada, si sengna buku neitamai di sekra deipu. Ukupupa, morokyo (10) war kepu taruda, tanggal satu keteng komuni yau tumi neitamai di, sun anesala yuma bupra yaidi, yuk mutu nerapu dodanange tep upu talepi. 17 Ukuramyanen, ware weneri konum mapidi doryau taruda, sun amutu neitamai kurami nengdi, yuk dana-dana tara mutu nerapu dopra dorami di, mali kurami ngeda, upu talepra lepsisikidi, telep kupra deipidi gawal daki.

Yuk mutu nerapu dorami neng tep, si seki upu

18 Ada, sun Israel yala nengdi yuk mutu nerapu dorami neng yuma tep, wepra si seki. Sun imam pel dorami neng neitamai di, ton bukra yuk mutu nerapu dorami nengda ake. Ada, Yozadakdi deiamu ngebo Yesua cap, er kayapu neng sun sida, Maaseya cap, Elieser cap, Yarib cap, tonda Gedalya cap, sun si yuma seki. 19 Sun aneng yumada, sun buru erepidi, pedina upu deiki di, “Teka, yuk mutu nesaladi deiami nerapu, nundi dopmepu nera, tapkamape,” pepra deipidi, sun yuk mutu nerapu doramidi, mali kuraminge yuma daepra telep kudina tep, domba bisam jemnge popra duyaidi, bena uku dongopidi, Allah tep karepi.

20 Tonda angetopu, Imer yala nengda, Hanani cap, Zebaya cap, ukuprei. 21 Tonda, Iram yala nengda Maaseya cap, Elia cap, Semaya cap, Yehiel cap, tonda Uzia cap karepi. 22 Pasyur yala nengda, Elyoenai cap, Maaseya cap, Ismael cap, Netanel cap, Yozabad cap, tonda Elasa cap, karepi.

23 Tonda sun Lewi yala nengda ake. Ada, Yozabad cap, Simei cap, Kelaya cap, er si ton dinin, yuk sida Pethaya ton perami. Tonda, Yuda cap, tonda Elisa cap karepi. 24 Angetopu, Allah si eremna ati mut pena tep wepra deiami yala nengda, tenpu ngebo Elyasibdi yuk mutu ner dopka cadi, er ton karepu. Allah er si eremna ati wengbana tep, buplan dam kalengna nengda, Salum cap, Telem cap, tonda Uri cap, kuramya cadi, sun ton karepi.

25 Uda, sun Israel yala nengpu dinin, yuk neng ada, Parosdi deipupa, dadeipdanen yakaramyanen deiami yala neng sun sida ake. Ada, Ramya cap, Yezia cap, Malkia cap, Miyamin cap, Eliasar cap, Malkia cap, tonda Benaya capdi karepi. 26 Tonda, Elam yala nengdi deiami neng sun sida ake. Ada, Matanya cap, Zakaria cap, Yehiel cap, Abdi cap, Yeremot cap, Yehiel cap, Abdi cap, Yeremot cap, tonda Elia cap karepi. 27 Angetopu, Zatu yala nengdi deiami neng sun sida ake. Ada, Elyoenai cap, Elyasib cap, Matanya cap, Yeremot cap, Zabad cap, tonda Azazia cap karepi.

28 Tonda, Bebaidi deipupa, dadeipdanen yakaramyanen deiami yala neng, sun sida ake. Ada, Yohanan cap, Hananya cap, Zabai cap, tonda Atlai cap, sundi karepi. 29 Banidi deipupa, dadeipdanen yakaramyanen deiami yala neng, sun sida ake. Ada, Mesulam cap, Malukh cap, Adaya cap, Yasub cap, Seal cap, tonda Yeramot cap karepi. 30 Tonda, Pahat-Moabdi deipupa, dadeipdanen yakaramyanen deiami yala neng, sun sida ake. Ada, Adna cap, Kelal cap, Benaya cap, Maaseya cap, Matanaya cap, Bezaleel cap, Binui cap, tonda Manasye cap karepi.

31 – 32 Tonda, Hiramdi deipupa, dadeipdanen yakaramyanen deiami yala neng, sun sida ake. Ada, Elieser cap, Yisia cap, Malkia cap, Semaya cap, Simeon cap, Benjamin cap, Malukh cap, tonda Semarya cap karepi. 33 Tonda, Hasumdi deipupa, dadeipdanen yakaramyanen deiami yala neng, sun sida ake. Ada, Matnai cap, Matata cap, Zabad cap, Elifelet cap, Yeramai cap, Manasye cap, tonda Simei cap karepi. 34 – 35 – 36 – 37 Tonda, Banidi deipupa, dadeipdanen yakaramyanen deiami yala neng, sun sida ake. Ada, Madai cap, Hamram cap, Uel cap, Benaya cap, Bedeya cap, Keluhu cap, Wanya cap, Meremot cap, Eliyasib cap, Matanya cap, Matnai cap, Yaasai cap karepi.

38 – 39 – 40 – 41 – 42 Ange utopu, Binuidi deipupa, dadeipdanen yakaramyanen deiami yala neng, sun sida ake. Ada, Simei cap, Selemya cap, Natan cap, Adaya cap, Maknadbai cap, Sasai cap, Sarai cap, Azareel cap, Selemya cap, Semarya cap, Salum cap, Amarya cap, tonda Yusuf cap karepi. 43 Tonda, Nebodi deipupa, dadeipdanen yakaramyanen deiami yala neng, sun sida ake. Ada, Yeiel cap, Matica cap, Zabad cap, Zebina cap, Yadai cap, Yoel cap, tonda Benaya cap karepi.

44 Sun asi seki neng yumada, sundi yuk mutu dana-dana tara kurami nesaladi deiami nerapu dopra kikiman kurami. Ukupra mali kuramya cadi, sundi dorami nerapuda, adipapu tapi. Ukupidi, sun anerapu cap, sundi deiami nyapu cap tep, “Tamupra sun pe mutupu benkurume,” pepra eneproipa, bei neng tep, si seki.