Ezr 3 | XteSC | STEP | Uda Israel nesala Babel mutu neitamai di tapra, sun pe mutu Yudea tara tamupra bei dingeda, Israel nesala sun pe yuk-yuk kurami mutupu tamupra beidi, ati dopra dakurami. Ukuramipane, ware yoneitam bari konum kupu pangeda, awarpu tanggal satu konum kupu pangeda, sun yuma bulupra kikiman Yerusalem mutu bena wekidi, “Ukutaruda, Allah er si eremkamepe,” pepi.

Ezra 3

Allah er gispal dona tep, gonga kepra sun gam keca popra, uku dongorami keca, ka di dopya tep upu

1 Uda Israel nesala Babel mutu neitamai di tapra, sun pe mutu Yudea tara tamupra bei dingeda, Israel nesala sun pe yuk-yuk kurami mutupu tamupra beidi, ati dopra dakurami. Ukuramipane, ware yoneitam bari konum kupu pangeda, awarpu tanggal satu konum kupu pangeda, sun yuma bulupra kikiman Yerusalem mutu bena wekidi, “Ukutaruda, Allah er si eremkamepe,” pepi.

2 Ange tep nengeda, konum gonga kepkoi atep, Yosadak er mi Yesuada, Allah er ati pumbon pel dona deiyo ngebo kuramnga cadi, er cap, er kayapu neng cap, tonda Sealtiel er mi Zerubabel cap, er kayapu neng yuma cap, sun yumadi pel dona gonga kepi. Sun menmena dopi pelda, Israel nesala tep bicau tenepra pio meliamu Allah, er si eremna tep, pala gel taplakra yakeipi.

Akeca deiyoda, ‘Allah tep gispal dopmepepa, nun mali kun keca kaukepkamser’ tenen, gam keca popra, apala gel taplakra yakra deiaminge deiki, uku sekra dongonkamyai tep keteneipidi, ka tamupra dopi. Apala gel taplakra yakeipinge cap, agel deiki uku sekra gam keca popra dongopinge capda, pumun taru Allah er pel doramu ngebo Musadi, “Allah er gispal dopra karena tep, pala gel taplakra yakeipmumdi, er karen keca ange, ange karenkamrume. Tonda Allah er karena tep, ukupra-ukupra karenkamrume,” pepra sekeiamudi, er buku neitamai deiamutopu kupi.

3 Uda ataruda, amutu dana-dana tara kurami nesala, yuk-yuk mutu nesala tep nengeda, Israel nengdi kware weik kuramupapu, apel dopi. Ada sun mali kun keca kaukemna tep, gam keca popra uku dongonkamyai tep, apala gel taplakra yakeipi. Apala gel taplakra yakeipyai ada, pumun taru kwamngaipu deipra dopi. Konum dopi dingeda, sun peirami keca, gam keca doprapidi, Allah er ati pel dona deiyo neng karepipa, anengdi akeca popra, agel deiki uku dongorami.

Ukuramya deiyoda, ‘Nun mali kunup keca tep, Allah wenepseredi, popserura cadi, nun yo pununa tep, akeca popmepedi, Allah er gispal dona tep, uku dongopmepepa uku jeryopda, Allahdi ange epra men popkamsere,’ tenena tep kurami. Ange yumada, Allahdi, “Ukunkamrume,” peramutopu, ipna taru cap, sintara taru cap yuma, ange utopu kurami.

4 Tonda, Musadi, “Ataru konum kupyopda, ukupkamrume,” pepra, Allah upu neitamai sekeiamutopu, Allah er gispal dona tep, yambul bura ati dopidi, ke taru tep akati pumbon kuramidi, kailya kalemami. Ataruda Musadi, “Atumi-atumi yuma Allah er karena tep, gam keca ukupra popmumdi, uku dongonkamrume,” pepra deiamutopu, angepu kupbarami. Atumi damai kupnepa, akeca popra uku dongorami.

5 Aila kalemna taru konum kupne pangeda, ange konum kupbarami dingeda, amenda taru, ‘Nun mali kuna tep wenepra popserur’ tenen, ‘Nun yo pununa tep, gam keca popra Allah er karenkamepe’ tenen, uku dongorami. Tonda, Allahdi “Ukunkamrume,” pepra deiamutopu, ila tumi war tengdongon taru kupne pangeda, ‘Atumida mambul tumi,’ tenepra, Allah tep si erepra gispal dona tep, gam keca popra er tep karerami. Tonda, Allah er si Yahwehdi, er upu neitamai, “Ataru ukunkamrume, ataru ton ukupra kunkamrume,” pepra, ila tumi wepra deiamutopu, yuk ila tumi yumada, utopu kupra kupbarami. Tonda, sun Israel nesaladi, ‘Allah tep, gispal dopra, telepe penkamep’ tenen, telep keca talipu dopropnedi, Allah er si Yahweh tep, si eremamidi karerami.

6 Uda, Allah er si eremna ati tamupra gonga kepra, ayomnya co kapul men ikra dopi taru dinin, yoneitam war tanggal satu kupkopda, anesala yumadi, ka di ton cap, gonga kepra, Allah er gispal dona cap, tonda sun yo pununa cap tep, sun gam keca popra karepipa, apel dona deiyo nengdi uku dongopbarami. Allah er si eremna ati, tu pumbon gel weik yakra deipkoi ngeda, kapul men deipi taruda, er karen keca gonga kepra karepbarami.

Allah er si eremna ati gonga kepra domi upu

7 Israel nesala yumadi, ati pel dona neng karena tep, uang moupra deipi. Ada gel deipra petumna neng cap, co cakrapmengedi, ati nong dona deiyo neng cap tep karepi. Tonda jen keca cap, me cap, zaitun co du mokon minyak me capda, buprapidi sun Sidon mutu neng cap, Tirus mutu neng cap tep karepi. Akarepinge deiyoda, ‘Amutu nengdi, akeca dopropmengedi, Libanon mutu bengedi, ila cemara co deiyo kunupmengedi, doupdaro laut mokon deiki Libanon mutu di, Yafo mutu duyankamenge’ tenen, karepi. Akupinge yumada, Persia mutu talepra, ila nimi deiyo ngebo kuramudi, er si Raja Koresdi, “Ukupkamrume,” pepra deiputopu kurami.

8 Uda Allah er si eremna ati dopkamyai, Yerusalem mutu tamupra bei pangeda, dakuramyane, keteng tamun butenenge neitamai dinin, war butene konum kupu. Konum bei dingeda, Yerusalem mutu Allah si eremna ati ka di tamupra dopkoi taruda, Sealtiel er mi Zerubabel cap, Yosadak er mi Yesua cap, sun kayapu neng yuma cap, ton yuk neng yuma cap, Yerusalem mutu beidi, akati dona tep, pel gonga kepi. Uda, aneng kan-kanda, Allah er ati pumbon pel dona deiyo neng kurami.

Tonda sun melimna neng, Lewi yala neng cap Yerusalem bei. Aneng yumada, pumun taru di sun Babel mutu nengdi, Israel nesala popbisipidi, aneng yuma doupra, Babel mutu dubenamipa, keteng tamun weika di dakurami dinin, ukutaruda Babel tapra, Yerusalem mutu ka di tamupra bei. Allah er si Yahweh, er ati pumbon pel dona deiyo nengdi, ‘Akati dona pel upu bongna deiyo neng kupmengedi, pel melipdankameng’ tenen, Lewi yala neng wepra deipi. Sundi wepra deipi nengda, keteng tamun dua puluh tahun deiki tara kurami nengpu wepi. Konum wepra deipipa, anengdi Allah Yahweh, er si eremna ati pel dorami taruda, deiyo neng kepra, ‘Pel telep kupra donung do?’ tenen, dipra embarami.

9 Atep, Yesua er weitapsilip cap, erdi deiamu nyapu cap, er kayapu neng yuma cap, tonda Hodawya yala ngebo Kadmiel cap, erdi deiamu nyapu cap, ton ngebo er si Henadad cap, erdi deiamu nyapu cap, tonda anengdi deiami nyapu cap, aneng yuma sun weitapsilip cap, kikiman pel dorami. Apenmap neng yumada Lewi yala neng kuramidi, Allah er ati pumbon pel deiyo neng tep melipra pel dorami. Yuk neng Allah er ati dorami taruda, apepmap nengdi deiyo neng kepra, ‘Yahweh er ati telep kupra donung do?’ tenen, dirpeterami. Sun yumadi Allah upu ati dona tep, Lewi yala neng melimamipa, apelpu dorami.

10 Ataruda, sun ati dona nengdi, Allah er si eremna ati dona tep, ila gel yakra Ayomnya co deipi taruda, Allah er ati pumbon pel doramya deiyo neng, sun pel don taru kenengami opkale, kenekrapidi, bung-bung pena keca, er si terompet dopropidi, pung pepi. Tonda, sun Lewi yala neng dinin, nimi si Asaf, erdi deiamu nyapudi, sundi doupmai kecada, piring pala utopu kupra, gat keca di doamya di, bongonmaidi lelim pepi. Sun yuma yana akati dopkamya damai tekra, Allah er si Yahweh tep, gispal dopra mut perami. Ange kupinge yumada, Raja Daud, Israel nesala sun ila nimi deiyo ngebo kuramu taru di, “Ukunkamrume,” pepra deiamutopu kupi.

11 Ukupi dingeda, Allah er si Yahweh tep kange deiprapidi, “Allahda pio telep kurura cadi, ‘Telepe’ pepmepe,” pepra, er si erepra mut penmai. Amut neitamai penmai upuda ake. “Nun nai Allah, kanda pio telep kurume. Kandi nun Israel nesala tep, pio men tamsememdi, bicau tenepra melimserum ngebo,” pepra mut penmai.

Mut konum pepi dingeda, Allah er si eremna ati ayumnya tep, ila pala gel yakra tu pumbon ayumnya co deipi. Akonum deipya tep nengeda, aca bulupra kunmai Israel nesala yumadi, sun nai bo Allah, er si Yahweh tep, ila upu di er si erepidi gudimai.

12 Abulupra wekmai neng weika di, sun dipru neitamai ila kange deipidi, ila upu di, ‘Telepe,’ pepi. Dinino, Allah er ati pum pel dona deiyo neng, wisi neng cap, tonda Lewi yala neng, wisi neng cap, tonda Israel yala yuk-yuk dinin, sun yala deiyo neng, wisi neng cap yumadi, mambul kange doupra engepi. Akupinge deiyoda ake. Ada, Allah si eremami ati pumun taru dominge dirami nengdi, ukupu ayomnya co deipmaipa, dinmaidi ikin kange doupra, mali pepra engepi. Ada menop taru domi ati utopu men kupupa epi atep, engepi.

13 Ange tep nengeda, sundi yuk-yuk ton gum, tenpu kange douprapidi, sun kange dipru neitamai di tenepra, ton neng engepipa, ton nengdi, ‘Telepe’ pepra Allah si eremai. Tenpu taru dipu kikiman upu ila di penmaiya tep, yuk karen mutu di gekenmai. Anengda, engenmai dinin, yuk karenai kunmai nengdi, ‘Engenmang do, mut penmang do?’ tenen, kael men kepmanto kupi. Ada, lelim pio weik penmaiya tepa.