Ezr 4 | XteSC | STEP | Uda, Yerusalem mutu neitamai dinin, Allah er si eremna ati dona tep, lepsisikra dona pel gonga kepi pangeda, Yehuda yala neng cap, Benyamin yala neng cap, sun podan nengdi mali kange doupi. Ada, yuk nengdi, “Gume pumun taru Persia mutu nengdi Israel nesala popbisipidi, aneng dopra Persia mutu dubenamipa, dakuramipane, ukutaru ka tamupra yanmangdi, Allah Yahweh, er si eremna ati donmange. Ada Israel nesala kalekra meliamu Allah er si eremna tep akati gonga kepmange,” pepipa, sun podan neng gekepidi mali kange doupi.

Ezra 4

Israel neng, Allah er si eremna ati lepsisikra donmai taruda, sun podan nengdi, ‘Gume, apelda adipapu yapso,’ pepi upu

1 Uda, Yerusalem mutu neitamai dinin, Allah er si eremna ati dona tep, lepsisikra dona pel gonga kepi pangeda, Yehuda yala neng cap, Benyamin yala neng cap, sun podan nengdi mali kange doupi. Ada, yuk nengdi, “Gume pumun taru Persia mutu nengdi Israel nesala popbisipidi, aneng dopra Persia mutu dubenamipa, dakuramipane, ukutaru ka tamupra yanmangdi, Allah Yahweh, er si eremna ati donmange. Ada Israel nesala kalekra meliamu Allah er si eremna tep akati gonga kepmange,” pepipa, sun podan neng gekepidi mali kange doupi.

2 Gekepi dingeda, akati dona deiyo neng damai yan pepi. Ada, Zerubabel cap, Israel nesala sun yala-yala yuma deiyo neng cap, sun damai yan pepi. “Sundi nun tep, ‘Telepe,’ pepsemumpa, akati pel donmarumada, nun ton melipra donkamepe. Deiyoda, pumun taru Asyur tara taleamu ngebo, er si Raja Esarhadondi, nun yala nesala doupra amutu duyana deiamseu taru di gonga kepra, aneitam taru dinin ukutaru peda, nundi, ‘Israel nesala sun nai bo Allah melipsetu’ tenen, er tep gam keca popra kareramepu. Ange tep nengeda, nun ton melipra apel kikiman donkamepe,” upepra moropi.

3 Upepra moropi dinin, Allah er ati pumbon pel dona deiyo ngebo Yesua cap, Zerubabel cap, tonda Israel nesala yala-yala yuma deiyo neng capdi, tamupra pepi. “Gume, sun cap melipra akati kikiman men pel donkamepe. Nun nai bo Allah er si eremna ati donada, sun men melipsetume. Nun nai bo Allah, er si Yahwehda, nun Israel nesala tep pio kalekra melimserura cadi, nun pedipapu er si eremna ati donkamepe. Sun cap gume. Persia mutu ila deiyo ngebo Raja Koresdi, pumun taru, ‘Dapel dorbeso,’ peipseutopu, apel donkamepe,” pepi.

4 Upepya tep, Israel nesala, sun dan-dana tara kurami neng, yuk yala nengdi, ‘Kware kuprepa, apel tapkameng’ tenen, ataru di gonga kepra ikin keca weik sun nong deiki derirami. 5 Tonda, Persia mutu ila nimi deiyo ngebo er si Koresdi amutu yuma taleamu taru neitamaida, sun Yerusalem mutu dan-dana tara kurami neng, yuk yala nengdi, ‘Israel nesala sun upu sektepepa, apel tep dabal kupre pangeda, taptenge,’ teneramidi nimi ton co bo karepra doproipidi, “‘Israel nesaladi akati pel donmangada taptenge,’ tenenmapa cadi, sun mawa di mali upu pepmumpa, Israel nesala mangkau kange di gekepmengedi, angepu kupmengopda, apel gawal men dakmanto kupkamre,” peipipa, anengdi mali upu perbarami. Ukuramyane, tupa ukuramipane, Raja Kores depupa, er yo punupu ngebo er si Dariusdi, Persia mutu taleamu. Ataru neitamai yuma ukurami.

6 Tonda, dakuramipanen, amenda taru, Raja Darius ton konum depupa, er yo pununa tep, er mi Ahasyewerosdi, nimi deiyo ngebo Raja keamudi Persia tara yuma talemu. Ada, Persia mutu yuma taleamu taruda, sun Yerusalem mutu cap, Yehuda tara cap, daneitamai kurami neng tep, ‘Nunda pio songe,’ tenerami neng dipapu, sengna keca surat ton sekra, Raja Ahasyeweros damai dokotepipa, mali weik pepi. Ada Yehuda tara kurami nesala cap, aca neitam dinin, Yerusalem ila ati arum, amutu neitamai kurami nesala cap tep, “Aneng pel donung ngeda, nun songe. Nun kangeda, ‘Angeda, mali,’ tenenupa cadi, kandi upu pepra bokeiptumpa, sun anengdi apel donmangada, adipapu tapkamenge,” pepra, surat dokotepi.

7 Dakuramipanen, ange utopu, Raja Ahasyeweros depupa, er yo punupra teku ngebo er sida, Raja Artasastadi ^{▼▼Artasasta – Angebo er si ton Asnapar sengnunge. Tonda er si tep, ‘Artazerses’ tonda, ‘Artaxerxes’ sengnunge. Dinino, angebo tenpua} Persia mutu taleamu. Dinino, angebodi Persia mutu taleamu taru neitamai ton, Yerusalem mutu dan-dana dinin, yuk yala neng, sun deiyo nengdi, surat ton cap dokotepidi, upepi. “Gume, sun Israel nesaladi donung pelda, nun song cadi, kange mun kupsere. Yerusalem mutu ila ati arum lepsisikra dopmengopda, kan Raja cap, nun pe capda, mali kweipsenunga cadi, ‘Akati pel donada, taptenge’ tenen, pepmakepe,” pepra, mali weik pepi.

Menmena taru surat sekidi, mali upu pepya deiyo neng, sun sida ake. Ada, Bislam cap, Miteredat cap, Tabeel cap, sun kayapu neng cap yumadi, Raja Artasasta tep, surat sekra dokotepi. Asekra dokotepi suratda, aneng sun pe mutu upu sisa, Aram upu deiki di seki. Ukupra sekya tep, Persia mutu ila nimi deiyo ngebo Raja, asurat er damai konum yauopda, aupu pena tep, Aram upu punupidi, ‘Persia mutu nimi deiyo ngebodi telep kupra gekenkamre’ tenen, erdi peramu upu deiki di nukra pepi.

8 – 9 Persia mutu taleamu ngebo, er si Raja Artahasta, yuk nengdi ton, surat butenenge ton sekra dokotepipa, angebodi dopropu. Asurat neitamai peda, “Yerusalem mutu neitamai, ila ati arum lepsisikra donmangada, nun songe,” pepra mali pepi. Asurat sekya deiyo neng sida ake. Ada, Gubenur Rehum cap, er Sekretaris Provinsi deiyo ngebo Simsai cap, sun kayapu neng cap, amutu upu bongdina deiyo neng, hakim-hakim cap, Pemerintah Persia tara deiyo-deiyo neng cap, tenpu kange doupra asurat seki. Adeiyo-deiyo nengda, Erek mutu cap, Babel mutu cap, Susan mutu cap, amutu-amutu neitamai yumada, Elam tara kurami deiyo nengdi, tenpu kange doupra asurat kikiman sekidi, Raja Artasasta damai dokotepi.

10 Tonda, yuk-yuk mutu dakunge neng peda, ada ila embaramre me, er sida Efrat me damai dinin, keteng dangban tara mutu cap, Samaria ila ati arum dopra kuramyai cap neitamai dakurami nengdi, asurat sengna tep, tenpu kange doupra, kange deipidi, “Telepe, asurat dokotepkamrume,” pepra, amutu-amutu neng yumada, Asyur tara ila nimi deiyo ngebo, pio ila mambul, si eremami ngebo, er damai dokotepi. ARaja ngebo er sida Asnapar, menop taru anesala sun mutu poprapudi, amutu nesala yuma ateng koupdongopra, dubenamudi, Efrat me damai dinin, keteng dangban tara dabena deiamupa, dabena kurami.

11 Sun aneng-aneng yumadi, asurat neitamai lap pepra sekeipi upuda ake.

Uo, kanda Persia tara yuma talepra ila puto weik nimi deiyo ngebo Raja Artasasta, nun yumadi kan tep, ‘Telepe nun nai bo,’ pepra, gispal dokenupe. Nun yumada, kan amututarapu kupedi, kan pel dona tep, tali melimna nengpu kunupe. Nun yumada, ila di embaramre me, Efrat me damai di, ortara keteng dangban tara kunupe. 12 Nun nai bo, nundi kan tep, mambul upu pepkukepe. Ada ake. Kan pumun taru di nun mutu neitamai dokotepsemum nesala, sun Israel yala nesalada, nun mutu neitamai dakuramipanen, ukutaruda, sun anesala weika di Yerusalem mutu damai konum tamupra bena kunmange.

Ada tali tep gum dinin, Yerusalem mutu ila ati arum, yuk mutu nengdi popra, sikki buktami mutuda, sun Israel yala nengdi, ‘Tamupra kange di telep kupra, lepsisikra dopkamepe’ tenen, amutu konum bena kununge. Amutu kunmange taruda, sundi, ‘Akati-akati yumada, kange di lepsisikra dopkamep’ tenen, akati yuma amutara ayumnya utopu keca, er sida fondasi, ila gel pala di ikra derinmange. Tonda, Yerusalem mutu dana-dana tara, ongopgenepra taplakra deiami lyom gel beilya peda, kan tara neng di uruptami dinin, ukutaru anengdi kange di lepsisikra derinmange. Dinino nun naio, amutu neitamai kurami nesalada, kan upu cap, yuk nimi deiyo neng capdi perami upu capda, ‘Nun songe,’ pepra, yanitamna nengpu kununge. Ange tep nengeda, sun yumada, pio mali kuna nengpu kununge naio.

13 Ange tep nengeda, sun Israel yala nengdi, Yerusalem mutu ila ati arumda, kange di ton cap lepsisikra dopmengedi, alyom gel beilya ton konum lepsiskmengedi, ongopgenepra dopmengopda, sun amutu kunkameng nengdi, kan Raja ngebo tep, gispal dona tep co bo cap, nimi pel dona tep co bo cap, sun tu talena tep co bo cap, ange yumada, er si pajak co bo, ton cap pio men karenkamkenge. Anesala yumadi, aco bo bulupra, kan damai men kareryakankamenge. Tonda, nun nai Raja, kandi doroprum co bo metek kupbankamkere. ‘Angeda, pio mali,’ tenenupa cadi, akeca yuma lap pepkepe. 14 Uda naio, nun amutu kunup nesala yumadi, ‘Angebo Raja Artasasta, erda nun nai bo kuredi, nun yuma tep taleserura cadi, er tepapu gispal donupe. Tonda kanda teleppu kumemnyopda, nun peda telep kutepe,’ tenenupe. Ange tep nengeda, kandi talerum mutu do, kandi dororum co bo do, mali kuprepa, metekanun kupbaryopda, nun yumadi, ‘Uo, angeda pio mali,’ tenenkamepe. Ange tep nengeda, nun yumadi, tenpu kange doupra, kan tep, aupu pepkusepe.

15 Ada ake. Kandi peiptuma deiki di, akeca-keca yuma dirterena deiyo neng wepra deiptumpa, sundi, kan apu yapu neng kurami taru tep sengami keca, abuku-buku neitamai dipetepmengedi, kael kepkamenge. Ada, Yerusalem mutu neitamai kurami nesala yumada, kanto deiyo neng yuma tep, sun perum upu tapra pio men gekenunge. Sundi, ‘Nun song’ tenen, yanitamnapu kununge. Tonda, sundi, ‘Gume, ila nimi deiyo nengdi talesenungada, nun songe’ tenepmengedi, yanitamna cap, ‘Nun yuk kunkamtepe’ pena capda, tupa-tupa kununge. Ukunga deiki di, kanda Raja kepmemdi, kandi talenkamrem pala mutu, er sida provinsi-provinsi yuma cap tep, malipu kudikenunge. Ukupra pio kununga cadi, sun menop taru amutu yuma talepra kurami deiyo neng, Raja-Raja nengdi, Yerusalem mutu damai bena, poprapidi, amutu yuma sikki bungtamamipa, walangyopu kuramu.

16 Ange yuma tep nengeda, nundi asurat sekra deipkepa deiki di, lap pepkepe. Nun tek sisi kaele. Sun Israel yala nesaladi, Yerusalem ila ati arum doraminge cap, amutu dana-dana tara ongopdongopra wiami lyom gel beilya cap, kange di lepsisikra dopmengopda, sun Israel yala neng dipapu amutu yuma talenkamenge. Ukupkamenga deiki di, aprovinsi neitamaida, kanda Raja Artasasta, kandi amutu neitamai yumada, tu tenpunge peda men talenkamrume. Ada ila embaramre me, Efrat me dinin keteng dangban tara neitamai yumada, kandi amutu neitamai tenpunge peda, men talenkamruma tep pepkepe naio.

17 Sun atara nimi deiyo-deiyo neng yumadi, aupu pepra seki surat dokotepipa, Raja Artasastadi gekepu dingeda, aupu ton tamupra pepu.

Telepe, sundi asurat sekra dokotepnerum deiyo neng yumada, Gubenur Rehum cap, er Sekretaris Provinsi deiyo ngebo Simsai cap, sun kayapu neng, Samaria tara kunge deiyo-deiyo neng cap yumadi, tenpu kange doupmarumdi, asurat sekra dokotepneruma cadi, telepe pepsene.

18 Sundi asurat dokotepnerum ngeda, ne mutu nengdi, ange dopra, nun mutu neitamai di penup upu sisa deiki di, punupra seki dingeda sundi, konum nukra ne damai lap pepmanenga cadi, konum gekepsi.

19 Aupu gekepsa tep, nedi, “Ukupkamrume,” pepra, puto deiki di peipsi upu konum pepra deipsopda, ne tara nengdi, menop taru sengami buku-buku neitamai dipetepmangupa, konum kael kepmape. Sundi lap peipmanerumtopu, tek sisi, Yerusalem mutu neitamaida, menop taru di dipra aneitamai taru yuma peda, amutu kunge nesaladi mali-mali weik tupa kununge. Ada, yuk mutu nimi deiyo nengdi, amutu popra tapmengedi, konum talepkamenge. Dinin, sun Israel yala neng, Yerusalem mutu neitamai kurami nengdi, ‘Gume, aRaja-Raja nengdi pesenge upu yumada, nundi pio men gekenkamepe. ARaja neng yuma tapmepedi, nun pe yukpu kunkamepe. Nun pe kange tenenupa deiki dipapu kunkamepe,’ pepra, tupa-tupa mali penunge.

20 Nun kaele. Pumun taruda, Yerusalem mutu cap, amutu dana-dana mutu capda, yuk-yuk dana-dana tara nimi deiyo neng yakaramidi, amutu nesala yuma popra, amutu yuma cap, amutu neitami tupa kurami nesala cap, talerami. ARaja-Raja nengda, ila puto weik kuramya tep, ila embaramu me, er sida, Efrat me dinin, ortara keteng dangban tara mutu yumada, puto di talerami. Sundi amutu ban-ban yuma taleramya tep, amutu neitamai kurami nesala yumadi, pajak co bo yala-yala yuma bulumamidi, sun nimi deiyo Raja nengpu karerami.

21 Sundi asurat deiki di peipmanerum upuda, tek sisi peipmanerume. Ange tep nengeda, ne Raja Artasastadi sun tep, puto upu deiki di pepsene.

Sun Efrat me dinin, ortara keteng dangban tara kurumu nimi deiyo nengdi, surat ton sekra, ataru sun Yerusalem mutu kunge nesala damai dokotepkamrume. Asurat neitamai di, aupu puto di peipkurume. Ada, ‘Sun Israel yala nesaladi Yerusalem mutu ila ati arum domumnyai cap, amutu lyom gel beilya deipra wimumnyai cap, lepsisikra donmarum pel yumada, adipapu tapso! Yerusalem mutu ila ati arum yumada, sundi lepsisikra men dopkamrume. Angeda adipapu yapso! Ne dipapu, Raja Artasastadi, ‘Telepe ukutaru akati arum kange di lepsisikra doptume,’ peptenyopda, telepe apel doptume. Dinino, ange kapul men pepsenyopda, sundi apel tek sisi pio men donkamrume.’ Upepra, surat sekra dokotepkamrume.

22 Tonda, nedi konum pepra deipmasen upuda, adipapu kupkurume. Sundi, ‘Dyo, amenda tarupu aupu lap perbenkamepe,’ tenena pio gume. Adipapu aupu dopra, menmena di lap perbenkamrume. Ware deiyo keca tep, tali dim pepra dakuramepepanen, ne talenun mutu neitamaida, sun anesaladi tali lupra mali kweipkameng do? Gume angeda, men kupmanto pepne. Atep, ne si deiki di, aupu lap perbenkurume.

Upepra nimi deiyo ngebo Raja Artasastadi aupu pepra surat deiki di upepra dokotepu.

Upeipu pangeda, asurat dopra, Efrat me dangban tara bena karepi pangeda, nimi deiyo ngebo, er sida Gubenur Rehum cap, er Sekretaris pel dona ngebo Simsai cap, sun kayapu neng yuma cap, konum gekepi dingeda, adipapu sundi Yerusalem ila ati arum damai sepdaro bei. Yerusalem mutu neitamai kurami Israel yala nesala tep, aupu lap perbei. “Persia mutu talerur nimi deiyo ngebo, Raja Artasasta, er si deiki di pepsepe. Sun adipapu akati arum lepsisikra dona pel tapso!” Aupu upepra, puto di peipi pangeda, Israel yala nengdi, ‘Uo’ tenen, Yerusalem mutu neitamai domi ati arum lepsisikra donmai pelda, adipapu tapi.

23 Upeipu pangeda, asurat dopra, Efrat me dangban tara bena karepi pangeda, nimi deiyo ngebo, er sida Gubenur Rehum cap, er Sekretaris pel dona ngebo Simsai cap, sun kayapu neng yuma cap, konum gekepi dingeda, adipapu sundi Yerusalem ila ati arum damai sepdaro bei. Yerusalem mutu neitamai kurami Israel yala nesala tep, aupu lap perbei. “Persia ^{▼▼Persia – Amutu tenpu dinin, amutu si ton, Babel mutu ton penunge.} mutu talerur nimi deiyo ngebo, Raja Artasasta, er si deiki di pepsepe. Sun adipapu akati arum lepsisikra dona pel tapso!” Aupu upepra, puto di peipi pangeda, Israel yala nengdi, ‘Uo’ tenen, Yerusalem mutu neitamai domi ati arum lepsisikra donmai pelda, adipapu tapi.

24 Israel nengdi apel tapi pangeda, Allah er si eremna ati lepsisikra dona pel peda, adipapu tapi. Ada, pumun taru yuk mutu yu nengdi uruptapra sikki bungtamami ngeda, tupa lepsisikra dona pel men domi. Keteng tamun ^{▼▼keteng tamun – Ada, keteng tamun delapan belas (18) deiki di, Yerusalem mutu neitamai ati arum domi ngeda, lepsisikra dona pelda, pio men doramidi, talipu kurami. Dinin, amenda taru, Raja Dariusdi, ‘Telepe,’ pepupa, aketeng tamun deiki di, kange di dukdongopra gonga kepidi, apel ton cap dorami.} denge weik, tali dakuramipane, amenda taruda, Persia mutu nimi deiyo ngebo, Raja Artasasta depupa, er yo punupu ngebo, er sida Raja Darius, nimi deiyo ngebo kepra tekudi, Persia mutu yuma taleamnganen, keteng tamun butene konum kupu pangeda, Raja Dariusdi, “Telepe, Yerusalem mutu kange di ton cap lepsisikra dorbenkamrume,” pepu pangeda, sun Israel yala nengdi, Allah er si eremna ati kange di ton cap gonga kepra, lepsisikra dona pel ton cap dorami.