Ezr 5 | XteSC | STEP | Uda ila ati arum, Yerusalem mutu neitamai kurami nesala cap, tonda, akati arum dan-dana tara kurami Israel neng, yuk yala neng dakurami nesala yuma tep, Allah er upu lap pena deiyo neng, sun nabi neng butenedi upu penmai. Ada, Allah er upu lap pena deiyo neng, nabi neng Hagai cap, Zakaria capdi, sun Israel nesala tep, “Israel nesala talepra melimserur Allah, er si deiki di pepneme,” pepra, upu weik peramrei pangeda, Israel nesala gekepidi, ton cap Allah er si eremna ati pel gonga kepra dopbarami. Ada Yehuda tara cap, Yerusalem mutu neitamai cap kurami neng tep peprei. Tonda, Zakariada, er nai bo sisa sida Ido, kuramu.

Ezra 5

Israel nesaladi, Allah er si eremna ati lepsisikra dona tep, ka di ton cap gonga kepi upu

1 Uda ila ati arum, Yerusalem mutu neitamai kurami nesala cap, tonda, akati arum dan-dana tara kurami Israel neng, yuk yala neng dakurami nesala yuma tep, Allah er upu lap pena deiyo neng, sun nabi neng butenedi upu penmai. Ada, Allah er upu lap pena deiyo neng, nabi neng Hagai cap, Zakaria capdi, sun Israel nesala tep, “Israel nesala talepra melimserur Allah, er si deiki di pepneme,” pepra, upu weik peramrei pangeda, Israel nesala gekepidi, ton cap Allah er si eremna ati pel gonga kepra dopbarami. Ada Yehuda tara cap, Yerusalem mutu neitamai cap kurami neng tep peprei. Tonda, Zakariada, er nai bo sisa sida Ido, kuramu.

2 Aupu pepreipa, nimi si Sealtiel er mi Zerubabel cap, tonda Yosadak er mi Yesua capdi, Allah er si eremna ati lepsikra pel dona tep, gonga kemna deiyo neng kepreipa, sun cap, yuk neng capdi, Allah er si eremna ati Yerusalem mutu neitamai pel ka di ton cap dopbarami. Tonda, Allah er upu lap pena deiyo neng, nabi-nabi neng cap, sun yumadi, akati dona tep, melipra pel dopbarami.

3 Ukuramipa, Efrates me atara, ortara keteng dangbaramre tara taleramu deiyo ngebo, Gubenor Tatenai cap, er amutara dinin, yuk ila ngebo er si Syetar-Boznai cap, tonda yuk deiyo-deiyo neng capdi, mali kange doupidi, Yerusalem mutu yai dingeda, ‘Ware deiyo ngebodi, ‘Telepe,’ peipseu upu deiki di, akati lepsikra don pel donmarum do?’ asipterepra wenepi. 4 Tonda asipetepi. “Akati lepsikra donmarum nengda, ware nengdi donunge do? Sun si dano? Animi si, sipepsemumpa, kael kepkupe,” pepi.

5 Upepra asipitepidi, wenepi dinin, Allahdi sun Israel yala nesala tep, deiyo kepra kurami neng tep, ‘Yuk nengdi mali kupnung’ tenen, melipra kalengnapu kuramnga cadi, sun Israel yala deiyo nengdi, sun pepi upu gekepi dinin, kware tenena gum dipapu, akati lepsikra dona pel tupa dopnapu kurami. Ukunmaiya tep nengeda, sun damai yana wenepmai nengdi, Persia tara ila deiyo ngebo, er si Raja Darius tep, akeca yuma lap pena tep, surat sekra dokotepidi upepi. “Gume naio, nunda Yehuda tara neitamai Yerusalem mutu dirbepupa, sun Israel nengdi, sun nai bo Allah tep, er si eremna ati ka di ton cap lepsisikra donmange. Ukunmanga cadi, ‘Nunda, ware kupkamep do?’ tenen, asipetepkepe,” pepra surat sekra dokotepi. Asurat dokotepipa, ila deiyo ngebo Dariusdi, surat ton sekrapudi, ka tamupra sun damai dokotepu.

6 Sun anengda, Gubenor Tatenai cap, er amutara deiyo ngebo er si Syetar-Boznai cap, tonda sun amutu yuk deiyo-deiyo neng capdi, Babel tara ila deiyo ngebo, Raja Darius tep, surat sekra dokotepi ngeda ake. 7 Aseki surat neitamaida upepi. “Telepe nun deiyo ngebo Raja Darius. Nun kangeda, ‘Akeca-keca yuma teleppu kupketupa, kanda tali kange deipra teleppu kutume,’ tenenupe. 8 Nun Rajao, nundi ukupu kupmepu ngeda lap pepkukepe. Yehuda tara bepudi, Israel nesaladi si eremnung puto weik kurur Allah, er si eremna ati damai bepudi dipetepmepu. Nundi epmupudi kael kepmepuada, sun Israel yala nengdi, akati kange di ton cap lepsikra donmange. Ada, ila gel ‘Urasin telep kuna tep, besi keca di gel urasin petupra ketenepmengedi derinunge. Tonda, akati dela neitamaida, ila gat co cap tekra deipmengedi, akati lepsikra donmange. Apel yumada, pio pe deipra, puto di pel donmangepa, telep kupra dopbanunge.

9 Sundi, ukunmaipa, epmepu dingeda, atara deiyo neng tep, asipetepmepu. Nundi, ‘Ware deiyo ngebodi, ‘Telepe,’ peipseu upu deiki di, tamupra akati lepsikra don keca ketenepra deipmumdi, apel donmarum do?’ asipterepra wenepmepu. 10 Tonda, naio, kan kael kemna tep, nundi ton asipetepmepu. Ada, ‘Akati lepsikra donmarum nengda, ware nengdi donunge do? Sun si dano? Animi si yuma, sipepsemumpa, kael kepmepedi, asi sekeipkupe,” pepmepu. Ada, sun tara nengda, ware nengdi deiyo talepra, upu pepmengepa, apel donung do?’ tenen, kael kepmepedi, kan damai yana lap pepketepe,’ tenena tep asipetepmepu.

11 Asipetepmepupa, sun Israel yala deiyo nengdi tamupra upepsei.

Gume, tuai mutu ban-ban yuma cap, im deiki kure keca yuma cap, ketekepra deiamudi, talerur ngebo Allahda, er amutara kupedi, er pelpu melipra donupe. Pumun taruda, nun Israel yala nesala kuramepu tara, mutu-mutu yuma taleamu deiyo ngebo, nun puto weik Rajadi, Allah er si eremna ati domu. Telep kupra domu dinin, ukutaruda nundi akati ka di tamupra lepsikra doramepe. 12 Deiyoda, nun apu yapu mali-mali weik kuramipa, im deiki talepra puto weik kure deiyo ngebo Allahdi sun tep, mali kange doupra, yu weik kupu. Ukupka tep nengeda, sun wenemna tep, Allahdi ataru neitamai Babel tara yuma taleamu ngebo, Kasdim mutu nengdi deiamipa, dadeipdanen yakaramyanen, yana deiami ngebo, er si Raja Nebukadnezar tep, go karepupa, angebodi nun mutu yana mar popbisipseudi, Allah er si eremna ati yuma uruptaprapudi, sikke buktaprapu. Ukupu dingeda, nun apu yapu Israel yala nesala weika di tomoprapudi, ateng koupdongopudi, er pe mutu Babel mutu tamupra dubenamudi, ikin weik pel dimamupa, dakurami.

13 Ikinpu dakurami dinino, amenda taru yuk ila deiyo ngebo Raja Kores, deiyo talepudi Babel mutu yuma taleamu taru keteng tamun tenpunge neitamaida, Raja Koresdi, ‘Telepe, sun Allah si eremamrum atida, kange di lepsikra doptume,’ pepra deipseupa, apel donmape. 14 Angepu gum dinin, pumun taru Raja Nebukadnezardi, Yerusalem mutu kwamu Allah si eremna ati pumbon, nun apu yapudi deiami kunumna weik keca, emas cap, perak capda, ‘Akecada, Allah er si eremna ati pel dona tep deipmepe’ tenen, deiamipa akati kwamu ngeda, upula dopromudi, er pe mutu, Babel mutu tamupra duyana, er isok si eremamu keca tep, sun ati pumbon deiamu. Deiamupa dakuramnganen, amenda taru Raja Koresdi, akeca yuma douprapudi, tenpu ngebo er si Sesbazar tep karepu. Sesbazarda, Raja amutara dinin, deiyo ngebo Bupati utopu kuramu.

15 Raja Koresdi, akunumna weik keca dopra, Bupati Sesbazar tep karepu dingeda, aupu pepu. ‘Akeca yuma douprapmemdi, Yerusalem mutu bememdi, Israel nesala sun si eremnung Allah, er si eremna ati pumbon dubena dadeipkamrume. Tonda, kandi peipmempa, sun atara nengdi, Allah er si eremna ati kange di ton cap lepsikra dopkamenge. Ada, akati pumun taru kwamngai tu deikipu, dadopmengedi, akupkamre ja,’ pepra deipu. 16 Upeipka tep nengeda, angebo Bupati Sesbazardi Yerusalem mutu yaudi, ‘Israel nengdi, Allah er si eremna ati dopkameng’ tenen, er pedi akati amutara fondasi perameng gel ton betapra deipu. Agel konum ketenepra deipu taru di dipra, ataru neitamai yumada, nun Israel nengdi, Allah er si eremna ati ka di ton cap, lepsikra donmapkanen, tupa donmape dinin, kapul men gawal dakra donmape.

“Sun Israel yala nesala, sun deiyo nengdi upepye,” pepi. Ada, Gubenor Tatenai cap, er amutara deiyo ngebo, Syetar-Boznai cap, tonda sun amutu yuk deiyo-deiyo neng capdi, Babel tara ila deiyo ngebo, Raja Darius tep pepi.

17 Upepi dingeda, aupu ton pepi, “Atep nengeda, nun nai bo Raja Darius, kan tep moropkepe. Kandi, ‘Telepe,’ teneptumopda, Babel mutu neitamai, kan ila deiyo ngebo ati pumbon mambul keca sengna buku deriramengai dipetepkurume. Ada, pumun taru Raja Koresdi, ‘Allah si eremna ati lepsikra pel dopso,’ pepra, tek sisi upepra deipu do, gum do? Aupu peipudi surat sekeipu ngeda, ‘Akapmar do, gum do?’ tenen, ‘Dipetepkurum’ tenen, moropkepe nai. Dipetepmemdi, akaprepa epmemnyopda, surat ton nun damai dokotepsememdi, ‘Ukupso, ukupso,’ pepra, ‘Surat sekra dokotepkamserem’ tenen, moropkepe nai,” upepra moropi.

Ada Gubenor Tatenai cap, er amutara deiyo neng capdi, asurat sekra keteneipidi, Babel mutu taleamu ngebo, Raja Darius damai dokotepi.