Ezr 6 | XteSC | STEP | Uda ataruda, nimi ereipipa, tekrapudi Persia tara yuma taleamu nimi deiyo ngebo, er si Dariusdi peipupa, pumun taru Raja Koresdi upu peipupa, sekra deiami buku, er sida gulungan, ‘Dan kunmar do?’ tenen, propinsi Babel kunumna weik keca derin ati pumbon di, deiamyai yuma moupra dipetepra embei.

Ezra 6

Pumun taru Persia mutu yuma talepra ila deiyo ngebo Raja Koresdi, “Ukunkamrume,” pepra deiamu upu

1 Uda ataruda, nimi ereipipa, tekrapudi Persia tara yuma taleamu nimi deiyo ngebo, er si Dariusdi peipupa, pumun taru Raja Koresdi upu peipupa, sekra deiami buku, er sida gulungan, ^{▼▼gulungan – Pumun taruda, surat cap, buku cap sengami ngeda, ataru sengnup buku kamo utopu gume. Gambar dinkurume.} ‘Dan kunmar do?’ tenen, propinsi Babel kunumna weik keca derin ati pumbon di, deiamyai yuma moupra dipetepra embei. 2 Dinin asekra deiami upuda, Babel mutu tepapu men deiamya tep, pio dipetepipa, Media tara, mutu si Ameta mutu deiamyai epi. Epi dingeda, asekeiami upu neitamaida, aupu Raja Koresdi peipupa, sekra deiamipa, akwamu ngeda ake.

3 Ne Raja Koresdi pepsene. Persia tara yuma talepra ila nimi deiyo ngebo ne si Raja Koresdi, gonga kepra taleamsi taru keteng tamun tenpunge konum kupka cadi, mambul upu pepra deipsenepa, tek sisi adipapu angeda kupkamrume. Aupu deiyoda, Allah Yahweh, er si eremna ati, Yerusalem mutu dopkameng atida, pumun taru yu nengdi uruptapi dinin, ‘Ukutaruda, kange di tamupra dopkamenge’ tenen, pepsi.

Tonda upepsi. Allah er si eremna ati dopkamengai, ayumnya tep, ila gel yakra ayumnya co deipkamenge. Ada, Israel nengdi, sun Allah er si Yahweh gispal dona cap, sun mali kun keca gum kupra derina cap tep, sun gam keca popra uku dongopmengedi, Allah tep karenkamenge. Atep nengeda, akati dorbenkamenge. Akati er lyomda, tuai udi iwelenada, dua puluh tujuh (27) meter nukra dopkamenge. Ange utopu, akati er pala peda utopu, dua puluh tujuh (27) meter nukra pala kepra dopkamenge.

4 Akati er dela ila pala gel dopra yakra deipmengedi, adinor tara weneri lelepra deipkamenge. Tonda akati pumbon dinin, agel deikida, ila co lase dopropmengedi, ati pum tara deipra dopkamenge. Ada gel lelimdongona tepa. Akeca-keca yuma kunumna keca tep nengeda, ne Raja Koresdi talenun keca neitamai di bokra karepnepa, akati dona deiyo keca kunupkamenge. 5 Tonda pumun taru Allah er ati neitamai derirami kecada, Raja Nebukadnezardi upula doprapudi, Yerusalem mutu di dopra, Persia tara dinin, propinsi Babel dubenamu keca yumada, tamupra karepmepepa, Israel nesaladi, ka tamupra Yerusalem mutu dubengedi, akati neitamai deipkamenge.

Ada pumun taru akeca yuma, Allah er si eremna ati pumbon kuramu keca, emas cap, perak capdi ketekepra derirami keca tep pepne. Ada mesum tep gume, akeca yumada, Allah ernge kurura tepa. Israel nengdi, akeca Allah er ati deipkamenge. Ne Raja Koresdi, ‘Ukunkamrume,’ pepra deipsene.

6 Upepnedi, aupu ton pepsene. “Israel nengdi Allah er si eremna ati dopkamenga tep, sun nimi deiyo neng, Gubernur Tatnai, Efrat me damai kuru propinsi talerum ngebo cap, tonda, Seyetar-Bozenai cap, tonda sun amutara pel donge deiyo neng yuma capdi, Israel nesala tep mali kudina pio meme. Yerusalem mutu damai bana meme. Ada sun Efrat me damai ortara propinsi talerum neng yuma tep pepsene,” Raja Koresdi pepra deipu. 7 Upepudi, aupu ton pepu.

Sun apepmasen neng yumada, Israel nesala Allah er si eremna ati donkamengai ton, pio men kurpeterbankamrume. Israel neng tep, ikin keca sun nong deiki derina meme. Yehuda yala neng sun Gubernurdi gonga kepra, Israel nesala sun deiyo neng yumadi, Allah er si eremna ati ka di tamupra dopkamenge. Menop taru akati domyai apu, ka di ton cap dopkamenge.

8 Tonda, apepmasen upuda, ‘Akonuma,’ tenena gume. Angepu gum dinin, nedi sun ne amutara deiyo neng tep pepnepa, sundi Israel nesala sun putapre keca tep, melipra karenkamrum keca tep pepkusene. Ada, Yahudi yala nesala, sun deiyo neng, wisi nengdi Allah er ati pel donkamenga tep, melipra karepkamrum kecada, pepkusene. Ne talenun mutu neitamai bulupra derinung co bo, pajak bokra karenkamepe. Ada, sun kurum mutu neitamai di, Efrat me damai mutu dine, ortara mutu keteng wengban tara derinung co bopu doprapmumdi, aco bo bokra, sun Israel deiyo neng tep karenkamrume. Akeca karenkamepa deiyoda, mesum tep gume. Ada, sun donkameng pel tamna gum di, ‘Tupa pel dopbankameng’ tenen, akeca bulupra karenkamepe.

9 Ange utopu, Allah er ati pumbon pel dona deiyo neng, sun imam-imam neng putankamre keca ton karenkamrume. Ada, Allah er ati pumbon pel don neng, Yerusalem mutu kunkameng taru putankamre kecada, jem sapi ukupu weninge cap, jem domba cap, domba mi cap, karenkamrume. Ada mesum tep gume. Akeca dopropmengedi, poprapmengedi Allah im deiki kure ngebo, er karena tep uku dongonkamenge.

Tonda, sun imam nengdi moronkamsengtopu, sundi gandum cap, garam cap, anggur du yu mokon cap, minyak zaitun cap, karenkamrume. Karepmum pangeda, sun Israel yala nengdi, sun nai bo Allah im deiki kure ngebo karepmengepa, ‘Kange deipkamre’ tenen, kunkamrume. Akati pel donkameng taru neitamai yumada, sun tep melipra karenkamrum ngeda, pio men tamkamrume. Tumi-tumi yuma pio karenkamrume.

10 Deiyoda, akeca-keca yuma dopra sun tep karepmepyopda, sundi, akeca dopra Allah im deiki kure ngebo karena tep, karepmengopda, erdi kange deipkamre. Tonda ukupmenge dingeda, sundi ne Raja Kores cap, nedi deiamsi nyapu cap tep, sun nai bo Allah moronkamsenge. ‘Allah melipsetudi, telep kweipsetupa, nun kunkamep keca yuma teleppu kunkamsere’ tenen, pepne.

11 Ange tep nengeda, nedi upu ton cap dukdongopra pepsene. Tek sisi pepsene. Ware ngebo do yuma, apeipsen upu yanipre ngebo do, apeipsen upu tapra yuk upu pepre ngebo peda, er kuramre ati ayumnya co kwenepra takke lupmengedi, er nong lukrapmengedi, katuaipu erepra deipkamenge. Ukupmengedi, er ati peda dakra uruptapkamenge.

12 Ange tep nengeda, Yerusalem mutuda Allahdi wepra deiamudi, ‘Amutu kunepa, ne si erepra gispal donkamnenge,’ teneramu mutu cadi, ne putapnere ngeda pepkune. Ada, nimi deiyo neng, Raja neng do, ware mutu nengdi do, ware yala nengdi balila deipra aupu yaniptapmengedi, yuk upu pepmengopda, Allahdi wenepra popkamre. Ange utopu, ‘Yerusalem mutu Allah er si eremna ati bena urupetepmengopda, Allahdi aneng yuma poptapra gawal dakamre’ tenen, pepsene. Ne Raja Koresdi pepsene.

Ukupra peipudi surat sekeiamu ngeda pepi. Aupu konum nukra pepi dingeda, Raja Dariusdi pepu. “Ne Raja Dariusdi pepmasen upupu gekepra kupmum pangeda, angeda telepe pua. Atep adipapu pio pe deipra kange deipmumdi, aupu gekepra, pel moupra dopbankamrume pepsene. Ne Raja Dariusdi pepsene,” pepra deipu.

Allah er si eremna ati, ka di tamupra dopidi, ila tumi kailya kalemna tep, keteneipi upu

13 Uda ataruda, Persia tara ila nimi deiyo ngebo Raja Dariusdi, “Ukupkamrume,” pepra deipua tep, Efrat me damai di ortara keteng dangban tara talepra kuramu nimi deiyo ngebo Gubenor Tatanai cap, tonda deiyo ngebo Seyetar-Bozenai cap, tonda sun kayapu neng yuma tep, Dariusdi peiputopu, aupupu gekepra kurami. 14 Uda, sundi meliamipa, Israel yala wisi-wisi neng cap, sun amutara pel dorami neng cap, sun yumadi pio dukdongopra dopbanapu kuramyane, Allah er si eremna ati yuma adipapu dopra gawal daki.

Ada Allahdi Israel nesala tep, “Ukupkamrume,” peipunge cap, tonda Persia mutu nimi deiyo neng Raja Kores cap, tonda amenda taru Raja Darius cap, adinen amenda taru Raja Artasasta capdi, sun tara neng tep, “Ukupra melimkamrume,” pepra deiamitopu melimami. Tonda, Allah er upu lap peramrei neng, nabi Hagai cap, Ido yala nengdi deipi ngebo nabi Zakaria capdi, Allah er upu deiki di, “Ukupra kunkamrume,” pepra peteremamreiya deiki di, sun Israel yala nesala, sun keca yuma telep kupbarami.

15 Allah er si eremna ati dopra gawal daki taruda ake. Ada ila nimi deiyo ngebo Raja Dariusdi, Persia mutu taleamu taru, keteng tamun ngantan baringe neitamai dinin, awar sida Hadar, tanggal 3 deiki di gawal daki. 16 Allah er ukupu ati dona pel gawal daki dingeda, Allah er ati pumbon pel dorami neng, imam neng cap, sun pel melimna neng, Lewi yala neng cap, tonda pumun taru Babel mutu dubenamipa, dakurami dinin, ka di tamupra Yerusalem mutu yai neng, wisi neng yuma cap, sun yuma ila di kange deipidi, Allah er si eremna ati wengkoi taru tep, mut peprapidi, gam keca popra, Allah tep karenmaidi, er si eremai.

17 Ataruda, ‘Allah er ati ka di tamupra dopmapdi, buplan pakra wekronkup tumida, ila tumi kepkure,’ tenepidi, sun Yahudi yala nesaladi, Allah tep gam keca popra weika di karepi. Ada, jem sapi seratus cap, jem domba dua ratus cap, domba nyapu empat ratus cap, poprapidi, Allah tep karepi. Tonda, sun Israel nengdi, ‘Nun mali kun keca yuma Allahdi kaukepseredi, daepkamsere,’ tenepidi, jem kambing dua belas poprapidi, uku dongopi. Ada, Israel nesala sun yalada yuk-yuk dua belas kuramitopu, sun mali kun keca daemna tep, jem kambing dua belas yuk-yuk doprapidi, popra, Allah karena tep uku dongopi.

18 Ange konum kupi dingeda, Allahdi peramupa, Musadi sekeiamu buku neitamai peputopu, Allah er ati pumbon pel dona deiyo neng, sun imam neng wepra gung yuk-yuk bokra si sekeipi. Ange utopu sun melimna neng tep, Lewi yala neng ton wepra, gung yuk-yuk bokra si sekeipi. Akupinge deiyoda, amenda taru Allah er si eremna ati neitamai pel donkamenge nge tep, konum keteneipi. Ange yumada pumun taru Musadi, “Ukunkamrume,” peiputopu kupi.

Pumun taru Mesir mutu neitamai kuramipane, Allahdi Israel nesala sun weni nyapu men popka tep, Kaplemna Kalemna kalepinge tep upu

19 Uda sun yuma Yerusalem mutu neitamai dakuramipane, keteng tamun tenpu ton konum kupu pangeda, war tenpunge neitamai dinin, tanggal empat belas deiki di, ila tumi kupkopda kailya kalepi. Ada, pumun taru Persia tara nengdi, Israel nesala bisbisa kapidi, dopra dubenami neng dinin, ka di tamupra Yerusalem konum tamupra yai nengdi kailya kalepi. Akailya deiyoda, Allahdi Mesir nesala sun weni nyapu poamu taruda, Israel nesala sun weni nyapu men popu. Deiyoda, sun yo pununa tep domba bisam poprapidi, buplan dam dana-dana tara cap, deiki tara cap, yapi likeipinge epka tep, sun weni nyapu pona gum dipapu, sun ati kaplepra beu. Ukupka tep, akalemna sida, Kaplemna Kailya perami.

20 ‘Kaplemna Kailya kalepkamepe’ tenena tep nengeda, sun imam neng cap, sun amutara pel melimna neng, Lewi yala neng capdi, ‘Allah damai yatepedi, er si ereptepe’ tenen, tonda, ‘Nun mali kun keca yuma, Allahdi daepseredi gum kupra deipkamser’ tenen, Musadi peramutopu dipru cap, nong cap telep kudina pel dopi. Konum kupi dingeda, sun Lewi yala nengdi domba bisam mi popi. Ada, menop taru sun Babel mutu nengdi, Israel neng bisbisa kaprapidi, Babel mutu dubenami dinin, ka di tamupra Yerusalem yai neng yuma tep, Kaplemna Kailya kalepkoiya tep domba mi popi.

Tonda, sun Lewi yala neng cap, sun pe yala neng cap, sun kayapu neng, Allah er ati pumbon pel dona deiyo neng, imam neng cap tep, Kaplemna Kailya domba mi popi. Konum popipa, Allah upu ati pel dona deiyo neng tep karepinge deiyoda ake. Ada, akeca karepmepyopda, ‘Allahdi nun mali kun keca yumada, kaukepseredi, daepkamsere’ tenen, Allah tep karepi.

21 Uda, menop taru, Persia mutu nengdi, Israel yala nesala popbisipidi, Israel nesala yuma Persia mutu dopra bena deipipa dakuramyane, ka di tamupra yai nengdi, Kaplemna Kailya domba mi popmainge dopra jepi. Tonda, yuk tali Israel nesala yumadi, ‘Nun meliamseu ngebo, nun nai bo Allah er si Yahwehda, er sipu eremkamepe,’ tenepi nengdi ton, Kaplemna Kailya domba mi popmainge jepi.

Anengda, ‘Nun dana-dana tara yala yuk-yuk kunge nesala, Allah tep teka men tenengedi, mali-mali kuramenge keca men kunkamepe,’ tenerami. Tonda ‘Allahdi, “Angeda ne songe, angeda men kunkamrume,” peiamseunge men kunkamepe’ tenen, konum tapi. Akeca tapi nesala yumada, sun yumadi Kaplemna Kailya domba mi popmainge jepi.

22 Ataruda, ue yoneitam taru neitamai yuma, sun yumadi kange deipra, aila tumi Kailya, er si Nena Gum Roti Kwaneng Kailya ketenepra deipnedi kalemami. Akailya kalepinge deiyoda, ake. Ada, ‘Nun nai bo Allah, er si Yahwehdi, Asyur mutu ila nimi deiyo neng Raja Kores tep, er dipru tamupu pangeda, angebo weika di melimamseupa, Allah er ati dopmepu,’ tenepi. Ada, Allah er si eremna ati kange di tamupra domi taru, Asyur mutu Raja ngebo weika di melimamupa, akati ka di ton capra doamyane, gawal dakra dopi. Ange tep nengeda, kange deipra, ‘Nun Israel nesala talepra kuserur Allah tep, er si erepkupe’ tenen, ila kailya kalepi.