Ezr 7 | XteSC | STEP | Ange yuma konum kupu pangeda, amenda taru tekamu ngebo, Persia mutu ila nimi deiyo ngebo, er si Artasastadi Persia mutu taleamu taru neitamai di, ton ngebo er si Esra, propinsi Babel tapra Yerusalem mutupu tamupra yau. Esrada, tali ngebo gume. Erda, Allahdi peramupa, Musadi sekeiamu upu weika di kael keamu ngebo kuramu. Esrada, Persia tara dinin, propinsi Babel neitamai kuramu dinin, amutu tapra, Yerusalem mutu tamupra yau. Esrada, Harun yala nengdi deipipa dadeipdanen, yakaramyanen, deipi ngebo kuramu. Esra er apu yapu sun sida ake. Esra er nai bo sida Seraya. Seraya er nai bo sida Asarya. Asarya er nai bo sida Hilkia.

Ezra 7

Allah peramu upu, lap pena deiyo ngebo Esra, Yerusalem mutu yau upu

1 Ange yuma konum kupu pangeda, amenda taru tekamu ngebo, Persia mutu ila nimi deiyo ngebo, er si Artasastadi Persia mutu taleamu taru neitamai di, ton ngebo er si Esra, propinsi Babel tapra Yerusalem mutupu tamupra yau. Esrada, tali ngebo gume. Erda, Allahdi peramupa, Musadi sekeiamu upu weika di kael keamu ngebo kuramu. Esrada, Persia tara dinin, propinsi Babel neitamai kuramu dinin, amutu tapra, Yerusalem mutu tamupra yau. Esrada, Harun yala nengdi deipipa dadeipdanen, yakaramyanen, deipi ngebo kuramu. Esra er apu yapu sun sida ake.

Esra er nai bo sida Seraya. Seraya er nai bo sida Asarya. Asarya er nai bo sida Hilkia.
2 Hilkia er nai bo sida Salum. Salum er nai bo sida Sadok. Sadok er nai bo sida Ahitub,
3 Ahitub er nai bo sida Amarya. Amarya er nai bo sida Asarya. Asarya er nai sida Merayot.
4 Merayot er nai bo sida Serahya. Serahya er nai sida Uzi. Uzi er nai sida, Buhki.

5 Buhki er nai bo sida Abisua. Abisua er nai sida Pinehas. Pinehas er nai sida Eleasar. Eleasar er nai sida Harun. Harun erda, Allah er si eremna ati pumbon pel dona neng, sun ila deiyo ngebo kuramu. Aneng yumada, Esra er apu yapu neng kurami.

6 Uda, Allah er si Yahwehdi Israel nesala tep bicau teneramudi, melimamu. Pumun taruda, Allahdi Musa tep, ‘Ukunkamrume, angeda ton men kunkamrume,’ pepra peramupa Musadi sekeiamu. Musadi sekeiamu upu yumada, Esra ila di kael keamnga cadi, Allah upu peteremna deiyo ngebo kuramu. Erda Persia tara dinin, propinsi Babel kuramnganen, Yerusalem mutu ka di tamupra yau. Allah er si Yahwehdi er puto weika di Esra tep karepudi weika di meliamupa, pio telep ngebo kuramnga cadi, Persia ila nimi deiyo ngebo Raja Artasastadi, Esra mororamu keca yuma tali lupra kareramu.

7 Persia mutu ila nimi deiyo ngebo Raja Artasastadi, er mutu taleamu taru neitamai, keteng tamun yoneitam baringe kupu pangeda, atahun deiki di, Esra Babel mutu di Yerusalem mutu tamupra yau. Ataruda, yuk Israel yala neng ton tamupra yai. Ada, Allah er ati pumbon pel dona deiyo neng, imam neng cap, sun amutara melimna neng, Lewi yala neng cap, Allah er si eremna mut pena deiyo neng cap, Allah ati buplan damai teknedi kalengna neng cap, Allah er si eremna ati tep, melipra pel don neng yuma cap, kikiman tonpa Yerusalem yai. 8 Esra ^{▼▼Esra Angebo, er si tep nengeda, yuk buku neitamaida, er si Ezra sengnunge. Dinino, ‘Ahuruf penada iriwarye kupserur’ tenen, nundi ‘Esra’ sekmupke. Angebo tenpu ngebopu kuramu.} Yerusalem mutu yau taruda, Raja Artasastadi, Persia mutu taleamu taru neitamai, yoneitam bari keteng tamun neitamai dinin, pamu bari war deiki yau.

9 Esra yau taruda, menmena war, tanggal satu tumi dipapu, gonga kepra bisi yakaramnganen, Babel mutu di Yerusalem mutu yau tumida, tanggal satu, war pamu bari kupu pangeda, Yerusalem mutu yau. Ada Allahdi er tep bicau tenepra meliamudi, er dipru kwa dipupa, telep kupra Yerusalem mutu yau. 10 Allahdi Esra meliamnga deiyoda, Esrada, ‘Allahdi ukunkamrume, peiamseu upu yuma, ila di kael kepkamne’ tenen, yuk keca tenena gum di, aupupu moupra kael kepudi, pio betapra taleprapudi, dombaramu. Ange konum kupu dingeda, Allahdi pepra deamu upu dopra, Israel nesala tep, “Tek sisi ukunkamrume,” peprapudi, peteremamu. Ukupra kuramnga tep, Allahdi Esra tep weika di melimamu.

Babel mutu ila nimi deiyo ngebo, Artasastadi, pio telep keca dopra, Esra tep karepudi, surat sekeipu upu

11 Uda, Persia tara yuma talepra ila nimi deiyo ngebo Artasastadi Esra tep karepu surat neitamai sekra pepu upuda ake. Esrada Allahdi Israel nesala tep, “Angeda kunkamrume, angeda ton men kunkamrume,” peiamupa, Musadi sekeiamu upu weika di kael keamu. Tonda erdi Allah er si eremna ati pumbon pel doramu. Raja Artasastadi surat seku upuda ake.

12 Telepe, neda, Raja Artasastadi, asurat sekeipkene. Yuk mutu yuma talenge Raja deiyo neng dakunung dinin, ne puto weik cadi, sun deiki tara kunune. Neda, ila puto weik Raja deiyo ngebo kunune. Nedi, kan Esra tep, asurat sekeipkene. Im deiki talepra kurur Allahda, erdi, “Ukunkamrume,” peramu upu yumada, Esra kandi Allah er upu peteremnapu kurum ngebo, tonda Allah er ati pumbon pel dorum ngebo tep, “Telepe,” pepkene.

13 Nedi konum pepra deipne. Ware Israel nesala do yuma, ne talenun mutu neitamai kunge Israel nesala yuma tep pepne. Sundi, ‘Persia mutu tapra, Yerusalem mutu ka di tamupra benkupe,’ tenepmum dingeda telepe pua. Ada sun Allah si eremna ati pumbon pel dona deiyo neng, imam neng cap, sun amutara pel melimna neng, Lewi yala neng yuma cap, tonda yuk tali Israel nesala yuma cap, ‘Yerusalem benkupe,’ pepmumdi, sun kayapu yuma cap bana telepe pepsene.

14 Ange tep nengeda, ne Raja ngebo cap, ne amutara yoneitam bari neng, upu lepsisikrap ‘Ukunkamrume,’ pepra melimna deiyo neng cap, nun yumadi, ‘Telepe’ pepmepedi, sun tep dokotepsepe. Ada, Yehuda tara yuma cap, Yerusalem mutu cap, ‘Wareto kurur do, telep kurur do, gum do?’ tenen, ‘Moupra dirbenkamrum’ tenen, dokotepsepe. Tonda, Allahdi, ‘Ukunkamrume,’ pepra deiamu upu, kandi talepmum upu peda, ‘Ware kunkamep do?’ tenen, moupra tenepkamrume. Tenepra dirbemumdi, er upu gekepra dombankamrume.

15 Angepu gum dinin, tonda, ne ila ngebo Raja cap, ne amutara yoneitam bari upu bongdina deiyo neng capdi, karepmasep keca dopra dubenkamrume. Ada, kunumna weik keca, emas cap, perak cap, akeca yuma buluprapmepudi, sun Israel nesala kalekra melimrur Allah tep karepmapupa, sundi akeca dopdara Yerusalem mutu duberume pepkene. Sun si eremrum Allahda Yerusalem mutu kurure.

16 Tonda propinsi Babel neitamai kurameng nesala yumadi, sun tep, emas cap, perak cap, tali buluprapidi sun tep deipi keca yumada, sun Israel nesaladi akeca dopdara Yerusalem mutu dubana telepe pua. Ange utopu, sun tali Israel nesala cap, Allah er ati pumbon pel dona deiyo neng capdi, ‘Nun nai Allah, er gispal dona tep, tali lupra karepmepepa, Allah er ati dopmengepa, akati pumbon derirbenkamenge,’ tenepmengedi, kange deipra karepmenge keca yuma cap, Yerusalem mutu dubana telepe pua.

17 Akarepinge kunumna kecada, kandi pio moupra tenepmemdi doronkamrume. Ukupmemdi sun nai bo Allah karena tep, akeca-keca weik kunupkamrume. Ada, jem sapi cap, jem domba cap, domba bisam metek gemnge cap, tonda gandum do, jagung do, ato keca cap, Allah karena tep anggur tapu du me cap, keteneipmemdi, Yerusalem mutu dubenkamrume. Yerusalem bememdi, sun nai bo Allah, er si eremna ati damai pala gel taplakra yakeipinge deiki di, acapu Allah tep karerbankamrume. 18 Allah tep konum karepmem dingeda, emas cap, perak cap, tupa akapyopda, kan cap, sun Israel yala neng yuma cap, doropmum dingeda, telep tenepmumtopu, kunkamrume. Ada, sun nai bo Allahdi, ‘Ange telepe,’ tenere ngepu kunkamrume.

19 Akunumna weik keca karepsepe keca yuma, dopdara Yerusalem mutu dubemumdi, sun nai bo Allah er si eremna ati pumbon deipmumdi, er si eremkamrume. 20 Tonda, ‘Allah er si eremna ati neitamai deipmanto keca ton, telep keca yuma suktalepsere,’ tenepmumnyopda, kandi akeca ton moropmem pangeda, adipapu amutu kunumna keca deriramnup ati, nedi talenun ati neitamai di, dopropmepedi karepkamsepe.

21 Ange tep nengeda, Ne Persia mutu ila nimi deiyo ngebo, Raja Artasastadi, pepra deipne. Ne talenun mutu neitamai yuma, Efrat me damai di, ortara keteng dangban tara talepra kunge ila deiyo neng yuma tep pepne. Esrada, im deiki kurur Allahdi, ‘Ukunkamrume,’ pepra deiamu upu peteremna ngeboda, er putapre keca tep, moropseryopda, ‘Yuk taru,’ tenena gum dipapu, sun kunumna keca derimum ati yuma neitamai di dopra, Esra tep menmena karenkamemerume. Esrada, Allah er si eremna ati pumbon pel dorur ngebo tep karenkamrume, pepsene.

22 Esra moropseryopda, akeca karepkamrumnge tep, ‘Ukupra karepkamrume’ tenen, pepkusene. Ada, uang emas dengeda, tiga ribu empat ratus kilo (3.400) karena telepe. Tonda roti dana deiyo keca, gandum atau jagung dengeda, sepuluh ribu kilo (10.000) karena telepe. Ange utopu anggur mokonda dua ribu liter (2.000), tonda zaitun co du mokon dua ribu liter (2.000) karena telepe. Garam puda putaprepa, Esradi moropretopu, tenpu ton tamna gume. Weika di karena telepe.

23 Uda Allah erda im deiki kuredi, akeca-keca yuma talepra kurur ngebodi, “Ne ati dona tep, ukupra dopkamrume,” pepra deiputopu, angepu kupkamenge. Atep nengeda, er si eremna ati dona tep, sun Israel nesala putaprepa mororamengtopu, ange yuma gekepmepedi, adipapu kunkamepe. Tenpunge peda men tapkamepe. Ada, akeca yuma men karepmepepa, Allah erda im deiki kure ngebo cadi, nundi er upu gekepra tapmepe pangeda, erdi nun tep yu tenepseryopda, ‘Ne Raja cap, nedi deipsi nyapu cap, nun talenup mutu cap, talenup nesala cap yuma tep, ila di wenepserura’ tenena tep, pepsene. Angeda warya tep do? Ange men putapsera tep, sun Israel neng putaramre keca yuma, Allah er ati dona tep, adipapu karenkamepe.

24 Tonda, ne Raja deiyo ngebodi, ne amutara deiyo neng yuma tep pepsene. Sundi, Israel nesala yuma tep nengeda, co bo dorona gume. Ada sun deiyo neng gispal dona tep, tonda pemerintah co bo puruna tep, pajak perameng ngeda, ange yuma dorona gume pepsene. Ada Israel neng, Allah er ati pumbon pel dona deiyo neng, imam neng cap, sun amutara pel melimna neng, Lewi yala neng cap, Allah er si eremna mut pena deiyo neng cap, Allah ati buplan damai teknedi kalengna neng cap, Allah er si eremna ati tep, melipra pel don neng yuma cap, pajak co bo ton pio men doronkamrume.

25 Uda, ne Raja ngebodi, Esra kan tep nengeda, pepkene. Allahdi kael kemna deiyo keca weika di kareramkeua tep, akael kemna deiyo deiki di, kandi nimi deiyo neng wepkamrume. Ada upu bongdina deiyo neng wepra deipmempa, yuk nengdi mali kange doupra pedange taruda, sundi gekepmengedi, upu bokeipkamenge.

Ada ware neng do yuma, sun nai bo Allahdi, ‘Ukunkamrume,’ pepra deiamu upu kael keami neng, Efrat me damai di, ortara keteng dangban tara neitamai kunge neng yuma, talepmengedi upu bongdina deiyo neng kunkamenge. Ukupmengedi, ‘Ange telepe, ange mali. Tonda dumsisi kunada ake,’ pepra peteremkamenge. Tonda, ware neng do yuma, sun nai bo Allahdi peiamu upu kapul men kael keami neng tep nengeda, kan Esradi peteremkamrume.

26 Tonda, ware neng do yuma, sun nai bo Allah peiamu upu yaniptapmenge pangeda, anesala wenepkamrem ngeda, pepkukene. Mali kupmengopda, kandi aneng tep popkamrume. Gum dingeda, sun Israel nesala kunkamrumai neitamai di dokotepmumpa, aneng yuk kunkamenge. Ange gum dingeda, sun bunga cap, sun taleamenge keca yuma cap dopropkamrume.

Ange gum dingeda, aneng ateng kouprapmumdi, wenemna ati pumbon dongopkamrume. Ange utopu, ne Raja ngebodi pene upu ton men gekepmengedi, yanipmenge neng tep nengeda, akonum pepmasen keca utopu deiki di aneng tep wenemkamrume. Raja Artasastadi pepu.

Aupu yumada, Babel mutu ila nimi deiyo ngebo Raja Artasastadi, surat sekeipudi, Esra tep karepu.

Esradi Allah tep, “Telepe,” pepu upu

27 Esradi aupu pepu. “Ne nai bo Allah er si Yahweh tep, er si erepne. Allahdi nun apu yapu tep, bicau teneramudi weika di melimamu. Atep, er tep, “Telepe,” pepne. Allahdi Babel mutu ila nimi deiyo ngebo, Raja Artasasta, er dipru tamupudi, er dipru neitamai peipu pangeda, Raja ngebodi, nun Allah si eremna ati, Yerusalem mutu donkamepnge tep, weika di melimkamsere. Ukunkamra deiki di, Allah er ati cap, Allah er cap tep, nimi yumadi gispal dopra er si eremkamenge.

28 Ne nai Allah kandi melipnemuma deiki di, Raja Artasastadi, er amutara ila puto weik nimi deiyo neng cap, er melimna tep, ‘Ukunkamrume,’ pepra upu bongdina deiyo neng cap, gekepra dinmangai di, ne Esra tep, telep kweipnerdi, gispal dopnerpa, aneng yuma kael kepmange. Ne nai Allah kandi ne dipru neitamai puto kupra deipmanerema deiki di, ne kayapu Israel deiyo neng ton cap, wepra deipsidi, ne cap kikiman amutu Persia mutu tapra, Yerusalem mutu benkupa tep, telepe pepne.” Esradi pepu.