Ezr 8 | XteSC | STEP | Ezradi upepu. “Anesala yumada, sun Babel mutu dabena kuramyanen, dakuramipanen, tapseipa, nun pe mutu tamupra Yerusalem tamupra yamepu neng ada, sun nimi deiyo kepra, tenpu bungsilip taleami neng cap, tonda amutu bena kuramidi, deiamipa, dadeipdanen barami yala neng cap, ne Ezra cap, kikiman tamupra yapu. Babel mutu tapra, Yerusalem mutu tamupra yapu taruda, Babel mutu yuma taleramu nimi deiyo ngebo, er si Artasasta kuramu. Erdi Babel mutu taleamudi, kuramu tarupu yapu. Yerusalem mutu neitamai yapu neng, sun sida ake.

Ezra 8

Babel mutu neitamai bena dakuramyanen, amenda taru Ezra cap tamupra, Yehuda tara yai neng tep, pepu upu

1 Ezradi upepu. “Anesala yumada, sun Babel mutu dabena kuramyanen, dakuramipanen, tapseipa, nun pe mutu tamupra Yerusalem tamupra yamepu neng ada, sun nimi deiyo kepra, tenpu bungsilip taleami neng cap, tonda amutu bena kuramidi, deiamipa, dadeipdanen barami yala neng cap, ne Ezra cap, kikiman tamupra yapu. Babel mutu tapra, Yerusalem mutu tamupra yapu taruda, Babel mutu yuma taleramu nimi deiyo ngebo, er si Artasasta kuramu. Erdi Babel mutu taleamudi, kuramu tarupu yapu. Yerusalem mutu neitamai yapu neng, sun sida ake.

2 Pinehasdi deiamupa, dadeipdanen yakarami nengdi deipi ngebo Gersomda kuramu. Itamardi deiamupa, dadeipdanen yakarami nengdi deipi ngebo Daniel kuramu. Dauddi deiamupa, dadeipdanen yakarami nengdi deipi ngebo Sekanya dinin, erdi deiamupa, dadeipdanen yakarami nengdi deipi ngebo Hatus yau. Erda Daud yala ngebo kuramu. 3 Tonda, Parosdi deiamupa, dadeipdanen yakarami nengdi deipi ngebo Zakaria kuramu. Tonda er cap, er yala neng, sun dordi deipdanen, yakarami ngeda, aneng yuma cap, er cap kikiman yaipa, sun si sekami. Sun dengeda, 150 neng cap kikiman yana kurami. 4 Angetopu, Pahat-Moabdi deiamupa, dadeipdanen yakarami nengdi deipi ngebo Serahya, erdi deiamu mi Elyoenaida yana kuramu. Angebo cap, er yala cap nimipu, 200 neng kikiman yana kurami.

5 Angetopu, Zatudi deiamupa, dadeipdanen yakarami nengdi deipi ngebo Yahasiel, erdi deiamu mi Sekahnya cap, tonda, er yala neng cap, 300 neng kikiman yana kurami. 6 Angetopu, Adindi deiamupa, dadeipdanen yakarami nengdi deipi ngebo Yonatan, erdi deiamu mi Ebed cap, tonda, er yala neng cap, 50 neng kikiman yana kurami. 7 Tonda, Elamdi deiamupa, dadeipdanen yakarami nengdi deipi ngebo Atalya, erdi deiamu mi Yesaya cap, tonda, er yala neng cap, 70 neng kikiman yana kurami. 8 Tonda, Sefacadi deiamupa, dadeipdanen yakarami nengdi deipi ngebo Mikhael, erdi deiamu mi Zebaja cap, tonda, er yala neng cap, 80 neng kikiman yana kurami.

9 Angetopu, Yoabdi deiamupa, dadeipdanen yakarami nengdi deipi ngebo Yehiel, erdi deiamu mi Obaja cap, tonda, er yala neng cap, 218 neng kikiman yana kurami. 10 Tonda, Banidi deiamupa, dadeipdanen yakarami nengdi deipi ngebo Yosifya, erdi deiamu mi Selomit cap, tonda, er yala neng cap, 160 neng kikiman yana kurami. 11 Tonda, Bebaidi deiamupa, dadeipdanen yakarami nengdi deipi ngebo Zakaria cap, tonda, er yala neng cap, 28 neng kikiman yana kurami. 12 Tonda, Azgatdi deiamupa, dadeipdanen yakarami nengdi deipi ngebo Hakatan, erdi deiamu mi Yohanan cap, tonda, er yala neng cap, 110 neng kikiman yana kurami.

13 Tonda, Adonikamdi deiamupa, dadeipdanen yakarami nengdi deiami neng ton sun si, Elifelet cap, Yehiel cap, Semaya cap, sun weneri nengda amenda taru yai dinin, sun yala neng cap tapakra yai neng ton, 60 neng kikiman yana kurami. 14 Tonda, Bigwaidi deiamupa, dadeipdanen yakarami nengdi deipi neng buteneda, Utai cap Zebud cap yarei dinin, sun cap kikiman yai neng ton, sun yala neng, 70 neng cap kikiman yana kurami.

‘Allah er si eremna ati melipra pel donkameng’ tenen, Ezradi bulupra deipu neng tep upu

15 Sun animi gung yuma Ahawa mutu neitamai embenamu me pirmanai bulupra deipsi dingeda, aceipu keana dodin ati dopra tumi weneri deiki kunmapu. Ukunmapu taru dipapu, nedi aIsrael yala neng yuma wepra dipetepsiada, sun akunmai nengda, tali neng cap, tonda imam neng cap nukraptonun ton akupmaipa epsi dinino, sun Lewi yala neng, tali nengda pio tenpu pe ton men epsi. 16 Allah si eremna ati damai pel melipmanto tali Lewi yala neng ton men epsa tep, ataru dipapu sun anesala talepra kurami deiyo-deiyo nengda sembilan neng tep kong pepsi. Aneng sun sida ake. Ada, Elieser cap, Ariel cap, Zemaya cap, Elnatan cap, Yarib cap, Elnatan cap, Natan cap, Zakaria cap, Mesulam cap, tonda ‘Ukuna telepe, ange mali cadi, men kupkamepe’ tenen, ila kael neng ton butene neng ada, Yoyarib cap, Elnatan cap, kongpepsi.

17 Ukupsidi, ‘Nun kap Ido, Lewi yala nengdi deiamipa, dadeipdanen yakarami neng, ataru gam kunge neng, sun deiyo ngebo kurura cadi, er damai bena moropkurume,’ pepra, sun aneng tep wepra dokotepsipa, Ido damai antamna tep bei. Uda, Ido cap, tonda er kayapu neng capda, Kasifya mutu kurami dinin, men di Allah er si eremna ati dana-dana tara pel doramya cadi, sun damai bei. Deiyoda ake. Ada, Ido cap, er tara neng cap, sun kayapu neng capdi, menop taru Allah er si eremna ati pel melipra doramya cadi, sun anengdi, apelpu konum kael keamidi, pel dorami neng ton, wepra deipmengedi, doproipmengepa, ‘Nun damai yangedi, nun donmap Allah si eremna ati neitamai, pel melipra dopkamsetenge’ tenen, ‘Upepra mororbenkurume,’ pepra, deipsipa, bei.

18 Ukupra konum moropsipa, gekepi dingeda, ange tep Allah er pe kange dipru neitamai di, ‘Anengda, kange deipra melipkamne,’ tenepka deiki di, sun amutu neng damai pel dopupa, sundi nimi tenpu wepra dokotepsei. Awepra doproipsei ngeboda ake. Er sida, Serebya, erda Lewi yala ngebo dinin, pio moupra tenepnedi, ‘Ukupkamepe, bouna dipapu kupkamepe,’ pepra, pio ila kael keamu ngebo kuramu. Tonda, angeboda, Israeldi Lewi deiamupa, Lewi yala nengdi, Mahli yala neng ton deiamipa, deipdanen ayala nengdi deiami ngebo kuramupa, sundi er wepra dokotepsei. Tonda er cap yai nengda, erdi deiamu nyapu cap, er kayapu neng cap, sun yuma kikiman yai neng yumada 18 neng yai.

19 Tonda Merari yala nengdi deiamipa, dadeipdanen yakarami nengdi deipi neng, sun sida, Hasabya cap, Yesaya cap yarei. Sun kayapu neng cap, sundi deiamrei nyapu cap yuma peda, dua puluh (20) neng wepra, nun damai dokotepipa yai. 20 Idodi adokotemu taru dipapu, yuk pel melimna neng ton, sun dengeda 220 neng ton wepra dokotepsei. Ada, ‘Sun anengda, Yerusalem mutu neitamai, Allah er si eremna ati pel melipra dona tep neng kunkameng’ tenen, aneng sun si sekra dokotepsei. Menop taru, nimi deiyo ngebo Raja Dauddi sun apu yapu neng, dordi deiami nengda, aneng sun si ketenepra deiamu. Ukupka deiyoda, ‘Anengda, sun kayapu neng, Lewi yala nengdi, Allah er si eremna ati pumbon pel donkameng neng tep, sun amutara kungedi, sun pel tep melipra donkamenge’ tenen, apel talepra melimna nengpu wepra deipu. Idodi, apel melimna neng ton doproipseupa, ne Ezradi, animi yuma, sun si yuk-yuk seksi.

Ezra cap, Allah er si eremna ati pel donkameng neng capdi, ‘Allahdi nun tep kalekra melimkamsere’ tenen, bisi neitamai di Allah tep, moropi upu

21 Ne Ezradi, Ahawa me pirman tara kunmapu taru dipapu, nedi pepsi. “Uda, ne cap, sun amutu yanmarum neng capdi, jen jena gum di, si tepra Allah damai tep, dipru amu kepra kupmepedi, Allah tep, ‘Nun kalekra melipseo,’ pepra, moronkamepe. Moropmepepa, Allahdi bisi embankamepaida, melipra embaseredi makunkamsere. Ada, nun cap, nun nyapu cap, nun yumadi talenup keca yuma capda, er dipapu kalekra melimkamsere. 22 Tonda, nunda Raja Artasastane damai tupa kunmasi taruda, ali weik kupsa tep, ‘Nedi angebo Raja Artasastane tep, ‘Naio, kandi kan jen talena neng cap, tonda kuda bisam bukra nimi porbana tep jen talen neng cap, wepra deipsetumpa, sundi nun bisi embankamep taruda, melipra kaleksetenge,’ pepra men moroptene, tenepsi.

Deiyoda, nundi aRaja tep men di konum pepmepu. Nundi, ‘Gume, nun nai bo Allahdi, er upu moupra gekenung nengda, erdi kange dipapu pio telep kupra melimserure. Dinino, er upu moupra men gekengedi, er cap tapmengedi, er tep yaninung nesala tep nengeda, yu weik kuprepa, ‘Sunda ne dabale,’ tenepredi er ila puto deiki di sun tep wenepra portamrure,” pepsi. Atep nengeda, ware kuprap di, aRaja tep moroptene do? Gume ange men kupmatene. 23 Atep nengeda, nun adipapu jen si tepra, nun nai bo Allah tep, pio moropmepudi, “Naio kan dipapu, nun tep kalekra melimserume,” pepra moropmepu. Upepra moropmepu pangeda, nun nai Allah, erdi gekepseudi, nun moropmepunge utopu melipseue.

Allah Yahweh er si eremna ati doupra kareryakan keca tep, pepu upu

24 Sun imam neng yuma kankan neitamai di, pio telep kupra pel don neng, sun deiyo talepra kurami neng neitamai di, menmena gonga keprapsidi, 12 imam neng wepra deipsi. Aneng ake. Ada Serebya cap, Hasabya cap, tonda sun bungsilip neitamai di, yuk 10 neng ton cap wepra deipsi. 25 Ne Ezradi sun aneng ukupra weipsidi, Allah er karena tep nengeda, kunumna weik keca emas cap, perak cap, akati pumbon pel dona tep, yuk-yuk bung keca, alat-alat cap yuma dopra, sun awepra deipsi imam neng tep karepsi. Tonda, nimi deiyo ngebo Raja Artasasta cap, sundi, ‘Ukupkupe, ukunada telepe,’ pepra, upu ila di kael keami neng, er upu lap pena deiyo neng cap, tonda er amutara kunmai deiyo neng cap, yuk tali Israel yala neng cap, sun aneng yumadi, ‘Nun kange dipapu Allah gispal dona tep karepkupe,’ tenepmaidi karepmai keca yuma doprapsidi, deripra dipterepsidi, sun imam neng tep karepsi. Akeca yumada, bulupra doupra yakanmai telep karen keca yumada dopra deipsi.

Ange yumada, Allah er si eremna ati neitamai derina tep, duyakanmai keca yuma dopra, nedi wepra deipsi 12 imam-imam neng tep karepsi. 26 – 27 Akeca yumada, sun imam-imam neng tep karenmasi taru dipapu, ‘Angeda ware kuprap kilo kurur do?’ tenen, tenpu-tenpu timbang kepsidi, akeca ikin kael kepsi. Atep, sundi akeca doupra karenmainge, er ikinda ake. Perak er ikinda, 650 talenta ^{▼▼Talenta – Aupu ‘talenta’ deiyoda, pumun taru sun Ibrani upu perami nengdi aupu perami. Tenpu talenta er ikinda 34 kilogram (kg) kwamu. Atep, 650 talenta er ikinda, 22.000 kilogram kwamu.} 22.000 kilogram kupu. Tonda, akati pumbon pel dona tep, perak di ketenepra deiami alat-alat kecada, 100 karepneinge, aperak er ikinda, 70 kilo kupu. Tonda, kunumna weik keca er si emas, er ikinda 100 talenta (3.400 kg) kupu. Tonda, emas di ketenepra deiami gat me mau, er si mangkuk, 20 karepneinge, emas er ikinda, 8.4 kg kupu. Tonda, gat keca er si perunggu di keteneipi mangkuk, pio telepnge butene karepnei. Amankuk sun urasinda, emas mangkuk utopunge kupu.

28 Akunumna weik keca yala-yala yuma, sun imam neng tep konum karepsi dingeda, awepra deipsi imam neng tep upepsi. “Nun apu yapuda, Allah er si Yahweh si eremamitopu, nun peda tupa er sipu eremnupe. Sunda, ‘Allah er si eremna pelpu donkarum’ tenen, konum wepra deipsisa tep, sunda Allah er mawange kurume. Ange utopu, akunumna weik keca, sun Israel deiyo-deiyo nengdi konum karepsei ngeda, ‘Allah erngepu kupkamre’ tenen, karepya cadi, akeca yala-yala yuma peda, Allah erngepu kurure. Ange utopu, sun Israel nengdi, ‘Akecada, nun pe kange dipapu Allah tep karepkupe’ tenen, kentenepra deipsei keca yuma peda, Allah erngepu kurure.

29 Atep nengeda, akeca yumada pio moupra kalengkamrume. Ukuamumdi bisi baramumyane, Allah Yahweh er si eremna ati pumbonpu bemum dingeda, ataru dipapu, ‘Akeca yuma er ikin ware kuprap kurur do?’ tenen, kange di ton cap timbang kepkamrume. Akeca timbang kepkumum taruda, sun ila imam-imam deiyo neng cap, Lewi yala deiyo neng cap, tonda, Yerusalem mutu neitamai kunge Israel yala nesala talepra kunung nimi deiyo-deiyo neng cap, sun urasin damai bena timbang kepkamrume. Ne Ezradi sun deiyo-deiyo neng wepra deipsi neng yuma tep pepsipa, gekepi.

30 Ne pepsi upu gekepneiya cadi, imam-imam neng, sun deiyo neng cap, sun pel melimna Lewi yala neng capdi, nun mutu ila nimi deiyo nengdi karepnei kunumna weik keca emas cap, perak cap, Allah er si eremna ati pel dona tep keteiami alat-alat cap, akeca-keca yuma doupra, nun nai bo Allah, er si eremna ati dopmupu mutu, Yerusalem mutupu dubena mawa deipi.

Babel mutu tapra bei Israel nesalada, Yerusalem mutu bei upu

31 Ware tenpunge deiki, tanggal 12 tumi kepu pangeda, nun yumada, Ahawa mekin dam keana kunmapuai di tapra, ‘Yerusalem mutu bena kunkamep’ tenen, bepu. Abisi baramepu taruda, nun nai bo Allahdi melipra kalengamseupa, bisi neitamai baramepu taruda, nun pona neng cap, inipmengai di nun keca upula dalupra dorona neng capda, men epmepu. Bisi banmapu taru neitamai di, aneng tenpu pe ton, men kwamipa, men epmepu. 32 Bisi embaramupkanen, konum Yerusalem mutu bepu taruda, nun beipe peingna tep, ue weneri tumi aceipu mapmepu.

33 Ukumepu dingeda, ue dumbari tumi deikida, nun adipapu Allah Yahweh er si eremna ati damai bepu. Bepu dingeda, akati wekmepudi, sun imam neng cap, Lewi yala neng capdi, akunumna weik gat keca er si perak cap, emas cap, akeca-keca yuma, ‘Er ikinda ware kupra kurur do?’ tenen, ikin derin keca timbangan deiki di deripmepu. Konum deripmepu dingeda, adipapu dopra imam ngebo Uria, er mi sisa Meremot karepmepu. Ataru dipapu, asuru epra kael kepi nengda, Pinehas, er mi Eliasar cap, tonda Lewi yala neng butene neng ada, Yesua er mi Yozabad cap, tonda Binui er mi Noaja cap, sun yuma dinmaiya di, akeca yuma dopra aneng tep karepmepu. 34 Adoupra benmapu keca yala-yala yumada, nukmepudi ikin derin keca timbangan deiki deriprapmepu dingeda, adipapu er ikin epmepudi, adipapu moupra sekmepu dingeda karepmepu.

35 Ataru dipapu, sun Israel yala nesala, yuk neng yuma, Babel mutu neitamai dakuramiyanen, amutu tapra Yerusalem mutu konum tamupra yai neng peda, ‘Nun ton, nun nai Allah tep, telep keca karepkupe’ tenen, Allah er si eremna ati damai yai. Ada, ‘Nun mali kunup keca tep, kau kepseredi, nun malinge gum kupra deipredi, lyepkamser’ tenena tep, gam keca popra imam neng karepipa, sun imam nengdi akeca uku dongopi.

Atep, sun Israel yala neng denge weika di, Allah karena tep, yapi keca duyana karepi. Ada, sun Israel mutu neitamai kunge nesala yuma tep, sapi bisam jem ngeda, 12 cap, jem domba bisamda, denge weik 96 cap, tonda domba bisam sun nyapuda 77 cap karepi. Tonda, yuk ngeda, kambing bisam 12 cap karepi. Ada, ‘Nun mali kuramnup keca yumada, nun nai bo Allahdi, kau kepseredi, lyepkamser’ tenen, petenkemna tep, ayapi keca yuma doupra, yakanmaidi, agam keca poprapipa, imam nengdi akeca dopra uku dongopidi, Allah Yahweh tep karepi.

36 Tonda, ataruda nimi deiyo ngebo Artasastadi pepudi, sekra deiamu surat ngeda, sun Israel deiyo nengdi, Raja er amutara deiyo-deiyo neng tep, bena karepi. Ada, ila embaramre me, Efrat me atara, ortara keteng dangban tara kuramidi, amutu talerami nimi deiyo-deiyo neng tep, sun damai bena karepi. Tonda, atara talerami nimi deiyo Gubenur neng cap, Bupati neng cap tep, asurat bokra karepi. Ange konum karepi pangeda, sun atara talerami nimi deiyo-deiyo nengdi, ‘Nun ton melipkupe’ tenen, telep karen keca ton weika di bulupra, Allah er si eremna ati lepsikra dona cap, akati pumbon pel dona cap, nun Israel yala nesala makuna cap tep, sun melimna keca karepsei.