Ezr 9 | XteSC | STEP | Sun Israel nengdi, Allah karena tep, ange yuma konum kupra seng pepi dingeda, Israel mutu neitamai taleami nimi deiyo-deiyo nengdi ne Ezra damai yai. Yai dingeda, aupu pepnei. “Naio, nun Israel yala nesala, tali dakunup neng cap, tonda imam-imam neng cap, tonda Lewi yala neng capda, nun yumadi, mali kunmape. Ada, nun dana-dana tara kunge nesalada, Yahudi yala neng gum cadi, sundi tali-tali lupra mali kununge. Allahdi, ‘Angeda ne pio songe, angeda pio men kunkamrume. Ada meme,’ pepra deiamseu keca dinin, nun cap, anesala cap, yuk-yuk mutu men kunupa tep, sundi mali kunge kecada, nun peda ange ton konum kunupe. Nun mutu dana-dana tara kunge nesalada, ake. Ada, Amon yala neng cap, Moab yala neng cap, Mesir mutu neng cap, Kanaan tara neitamai menop taru dipra ataru tupa kunge nesala cap, Het yala neng cap, Feris yala neng cap, Yebusi yala neng cap, tonda Amori yala neng cap tep pepmepe. Sun amutu nesaladi mali pel dopra kungetopu, nun peda apelpu talepra donupe,” pepi.

Ezra 9

Yahudi yala neng cap, Yahudi yala gum neng cap ner dodaraminge tep, lap pepipa, Ezradi pepu upu

1 Sun Israel nengdi, Allah karena tep, ange yuma konum kupra seng pepi dingeda, Israel mutu neitamai taleami nimi deiyo-deiyo nengdi ne Ezra damai yai. Yai dingeda, aupu pepnei.

“Naio, nun Israel yala nesala, tali dakunup neng cap, tonda imam-imam neng cap, tonda Lewi yala neng capda, nun yumadi, mali kunmape. Ada, nun dana-dana tara kunge nesalada, Yahudi yala neng gum cadi, sundi tali-tali lupra mali kununge. Allahdi, ‘Angeda ne pio songe, angeda pio men kunkamrume. Ada meme,’ pepra deiamseu keca dinin, nun cap, anesala cap, yuk-yuk mutu men kunupa tep, sundi mali kunge kecada, nun peda ange ton konum kunupe. Nun mutu dana-dana tara kunge nesalada, ake. Ada, Amon yala neng cap, Moab yala neng cap, Mesir mutu neng cap, Kanaan tara neitamai menop taru dipra ataru tupa kunge nesala cap, Het yala neng cap, Feris yala neng cap, Yebusi yala neng cap, tonda Amori yala neng cap tep pepmepe. Sun amutu nesaladi mali pel dopra kungetopu, nun peda apelpu talepra donupe,” pepi.

2 Angepu gum dinin, nun Israel yala nengdi, nun dana-dana tara kunge nesala, Yahudi yala gum nesala dinin, nundi, sun mutu nerapu dodaramepu. Angetopu sun yuk mutu nerapu dopra, nun nyapu sisa tep kareamepupa, dodarami. Ange yuma ukuramepuya deiki di, Allah Yahweh er nyapu sisa, nun Israel neng, er mawa nesala cap, sun yuk mutu neng, mali kunge nesala cap tapakra kunupe. Ukupmupka deiki di mali kudidaramepu. Tonda, amali kunange menmena gonga kepi nengda, nun Israel nimi deiyo-deiyo nengdi gonga kepmepudi, sun tali Israel nesala peda epidi, sun peda amalinge kuramepu. Atep, nun yumadi, Allah peipseu upu moupra men talenupe. Ange konum tapmepudi, yuk mali bisi konum banmape,” sun deiyo nengdi ne Ezra tep upepnei.

3 Akuraminge yuma lap pepipa, ne Ezradi gekepsi dingeda, adipapu ne mambul kange doupsidi, ‘Uo, pio mali kupmupka cadi, ware kupkup do?’ tenen, ne kenengamsi deiki opkal cap, ne pe amu kenengamsi opkal cap peda, gwelepra tapsi. Tonda, ange tep, ‘Uo,’ tenepsidi, kange mun kange doupra, ne giso potong cap, bana potong capda, kwenepra tapsi. Ukupsidi, ange tep ne dipru buluksakneupa, tuai buknapu kupsi.

4 Adeiyo nengdi, aupu lap pepneipa, yuk neng ton gekepya cadi, ware kuprap neng do, weika di yana, ne damai ton ongopdopnei. Sun ukupneidi, utenepi. ‘Uo, uo. Gume Israel yala nesala tep, pio kalekra melimamseu Allahdi, ‘Angeda kunkamrume, angeda pio men kunkamrume,’ pepra deiamseu upuda, ila mambul telep upu kurur dinin, Babel mutu dakuramipanen, ka tamupra amutu yakanmapu nesala kan-kan neitamai di, Allah er upu yanitamya deiki di, pio mali weik kuramya cadi, ikin kange dounmape,’ tenenmaidi, kware weik kupu.

Kware weik kupseupa, mambul kange doupra kunmapudi, neda, ataru yumada, aceipu bukmasipanen, atumi konum ipkou ketengda, yapi keca popnedi, Allah tep karen keca popra, uku dongon keteng damai kupu. 5 Yapi keca popra, Allah karena tep uku dongomne taru, idona konum kepu pangeda, ne dipru popmaneupa, bukmasia di, ne kenekmasi deiki opkal cap, ne pe amu kenekmasi opkal cap, arup gwelepmasi ngepu kepra, ne gutam tu deiki buksidi, ‘Uo, ware kupkup do?’ tenen, ne buru erepra, ne nai bo Allah Yahweh tep moropsi.

6 Nedi upepra moropsi.

“Uo, ne nai Allaho. Teka ne nai Allah, neda tek sisi mambul kange doupnedi, ali weik kunmanere. Kan morona tep nengeda, ne giso erepra kan damai dinada, ne pio kware tep, men kuptene. Deiyoda, nun mali kunup ngeda, pio weika di taplakbaserepa, ila di nepbaseredi weik kusere. Ukupmantoda, nun mali kunange tep, adipapu wenepra poptapsetum deiyo ngeda, nun giso banapra, im deiki bepmanto konum kurure,’ tenepne. 7 Pumun taru nun apu yapudi mali weik kupmaiyanen, dipdongopra, yakaramyanen, ukutaru peda, nun ataru kunup nesala peda, kan nyapu sisadi, pio kan tep mali kupra derikenupe. Ukupmantoda, nun mali kunange tep, adipapu wenepra poptapsetum deiyo ngeda, pio ikin weik kuserure. Nun apu yapu cap, nun cap, mali weik kuramupka tep nengeda, nun Israel nesala nimi deiyo neng, Raja-Raja neng cap, nun imam-imam neng cap yumada, yuk mutu nimi deiyo-deiyo Raja nengdi, mar cap, parang ya cap di popbisiamsei.

Atep nengeda, yuk karen mutu nimi deiyo Raja nengdi, nun poramseidi, nundi taleamepu bung keca yumada, upula dalupra dopromsei. Ukupseidi, tonda tomopseidi, ateng koupra, sun pe mutu dubena wenemnai derirbaramsei. Tonda, nimi ila di wekmana kan-kan di, ‘Anengda, nun songe. Sunda mambul nesala gume,’ tenepra mali upu weik peramseia tep, nun ali weik dakseua utopu, ataru, atumi peda tupa kupmasere.

8 Dinino ukutaruda, nun nai bo Allah Yahweh, tek sisi nun mali kunange tep, adipapu poptapsetum dinin, kan pe kange dipapu, nun tep, bicau tenepsememdi, telep kupra melipmasereme. Ukupmasemumdi, nun tara neng ton kange munai Babel mutu kurami taru ikin weik kuramipane, nimi weik deiami dinin, kandi nun tara neng yambulanun loptapra lyepropmaseremdi, acei duyanmaserempa, ukutaruda telep kange doupra, nun tep keteneipsemum mutu yana kunmape. Amutuda kan dipapu wepra deiamsemuma cadi, amutu yumada kan mawange, pio teleppu kurure. Acapu kan si eremkamkenupe. Ukupsemumnya deiki di, ukupmantoda nun asuru kunungnapu kuramseu dinin, ukutaruda, konum telep kweipsemempa, nun asuru di dirine dinupe.

9 Yuk karen mutu nengdi, popbisipseidi, sun mutu dubenamseidi, ikin pel dimamseipane, ateng koudongon neng utopu kunup dinin, kan sipu tupa eremkenupa cadi, kanda, nun nai bo Allah kuserema cadi, kandi pio men tamsemume. Ange gum dinin, sun Persia tara nimi deiyo neng Raja-Rajadi diramsei taru neitamai di, kandi nun tep ila di bicau teneramsemumdi meliamsemumpa, sun Persia mutu nimi deiyo Raja neng ton epra kael keami. Kandi sun dipru neitamai pel dopmumpa, sundi go karepseidi, loptapsei pangeda, amutu neitamai tamupra yanmape. Ayanmapa deiyoda, Allah kan tep si eremne ati menop taru urupra sikke buktami ngeda, kange di ton cap lepsikra donmape. Ukupmantoda, nimidi ila ati arum dopmengedi, ‘Nun podan neng yana wekmengedi popsenung’ tenen, akati arum dana-dana tara yuma lyom gel beilya ongopgenepra wiramengtopu, kandi konum Yehuda tara yuma cap, ila ati arum Yerusalem mutu kunmap neng yuma cap tep, konum kalekra melimserume.

10 Dinino, ukutaruda, nun nai Allah Yahweh, ange-ange yumada konum kupmaserem dinin, nunda kandi, ‘Ukupkamrume, angeda pio men kupkamrume,’ pepra deiamsemum upu, gekena gum di tapmupka cadi, kan damai ware upu ton pepketepe do? Gume, nundi upu ton men pepketepe. 11 Kan upu cap, amenda kupkamu keca cap, lap pena deiyo neng, sun nabi-nabi nengdi, nun tep konum lap pepra kareamsei. Sun nabi nengdi nun tep peramsei upuda, ake. “Sun bena wekmumdi kunkamrum mutu yuma tep nengeda, moupra tenenkamrume. Amutu neitamai kunge nesala yumada, telep men kununge. Allahdi, ‘Angeda ne songe,’ tenerur kecapu talepra pio mali weik kununge. Mali-malipu kununga cadi, amutu yuma, ortara di dipra atara yuma peda, mali kun keca weik kuramya deiki di, pio malipu kurure.

12 Ange tep nengeda, amutu kunge neng cap, kikiman tali tapakra ner dodana pio gume. Sun Israel nesaladi derinkamrum ner nyapuda, amutu kunge nengdi derinkameng nyapu tep pio men karenkamrume.

Tonda, sun Israel nesaladi derinkamrum nyapuda, sun amutu kunge nesaladi derinkamenge ner nyapu dorona pio gume. Nun nyapu cap, ner nyapu cap, sun amutu kunge nyapsilip cap dodana pio meme. Tonda, sun Israel nesaladi, ‘E, amutu kunge nesala cap, nun cap, mar podana gum dipapu, telep kupra kikiman kuptepepa, pedina upu pepdatepe deiki di, nunda amenda taru tali kange deipra teleppu kupedi, nun puto weik nesala kunkamepe. Ukupmepyopda, amutu neitamai kure keca kipra jenkamepe,’ tenena pio gume. Tonda, sundi, ‘Gume, sun amutu anesala cap, nun cap, telep kupra kikiman kupmepyopda, amutu neitamai talenkamep keca akapseryopda, nundi nyape deipmepepa, dadeipdanen bankamenge neng yuma tep, akeca-keca weika di, kareptepepa, atupu talepdanen bankamenge,’ men tenenkamrume. Sun nabi-nabi nengdi upeiamsei.

13 Atep naio, nundi kan upu pepra deiamsemum upu konum yanipmepudi, mali weik kuramepupanen, kandi nun wenemna tep, konum ikin keca weik nun damai deiamsemume. Dinino, nun kaele nun nai bo Allah, nun mali kuramepu kecada pio weik akwamu dinin, kandi deipsemum kange mun kecada, yambulanun kareamsemume. Nun mali weik kurameputopu, kandi pio ila ikin keca men deipsemume. Ange gum dinin, nai kandi nun konum lyepropsemumpa, nun Israel nesalada yambulanun ton tupa gam kunupe. 14 Nunda yambulanun tupa gam kunupa tep nengeda, nundi kandi peiamsemum upuda, kange di ton cap yanitamnapu kunkamep do? Ada, kandi, ‘Angeda kunkamrume, angeda pio men kunkamrume,’ pepra deipsemum upu tep, ton cap tapmepedi, sun amutu neitamai kunge nesaladi, kanda ‘Ne pio songe,’ tenerum keca, mali-mali tupa kununga cadi, amutu nesaladi derinung nerapu dopdatepedi, kikiman telep kutepe do? Gume, nundi ange kuptepyopda, tek sisi kandi nun tep, yu weik kupketupa, wenepra popra gum kuipsetume. Tonda, nun neitamaida, tenpu ngebo ton tapsetumpa gam pio men kuptepe. Nun yuma poptapra gawal daksetume.

15 Uo, nun nai bo, Allah Yahweh, kanda pio tek sisi, dumsisi kuna ngebo kurume. Dumsisipu kuruma cadi, nunda, kan mawa nesala, nun Israel nesala yumada, men wenepra poptapsemumdi, yambulanun ton lyepropsemupa, nunda amutu neitamai yambulanun tupa gam kunupe. Kandi nun akunmap nengda, Babel mutu di doupra yana melipsemumpa, yambulanun ton tupa gam kunkamepe. Dinino, nundi nun mali kunmape kecada men inipkupe. Nun mali kupmap kecada, kan damai yana lap pepra deipmepe. Nun kaele, mali weik kupmepua tep, nunda kan damaida pio men yana tektepe.