Galatians 1

Paulusdi gonga kepra, Galatia tara nesala tep, pepu upu

1– 2Telepe, ne kayapu. Ne Paulus cap, uda, sun yuk neng teka teneamidi, ne cap kikiman kupedi, nun weitapsilip utopu kunup nesaladi, sun tep asurat sekeipsepe. Sunda, nun weitapsilip utopu kurum nesala, sun Galatia tara teka tenerum nesala tep, asurat sekeipsepe. Nun yumadi sun tep, “Telepe,” pepsepe. Ne Paulusda, Allah er upu dopra peterembana tep, gonga kemna deiyo ngebo, Rasul ngebo kunune. Tali nengdi sun kange dipu, ‘Peterep embenkamre’ tenen, wepra men deipnei. Tonda, tali neng dipu, ‘Erda pel donkamre’ tenen, men dokotepnei. Ange gum dinin, nun Deiyo Ngebo Yesus Kristus cap, Yesus depupa, er tep gam bukeipu ngebo, nun nai bo Allah cap, sun butene dipu wepra dokotepnereipa, apelpu donune.

3Nun nai bo Allah cap, nun Deiyo Ngebo Yesus Kristus cap, sun butene di, sun Galatia tara teka tenerum nesala tep, bicau teneserengedi, sun kange dipapu melimserenge keca cap, ‘Yu tenedana gum di, kange deipra teleppu kikiman kunkameng’ tenen, kareserenge deiyo keca cap, kareserunge. ‘Ange yumada, tupa-tupa weika di tapakra karenkamsereng’ tenen, Allah morosenune. 4Nun Deiyo Ngebo Yesus Kristusdi, ‘Ataru mali-mali kunge nesalada, sun mali kunge keca cap, mali tenenge keca cap deiki di, ne nyapu mali kupra deipnung’ tenen, ‘Sun mali kunge keca neitamai di loptapra lyepkamne,’ teneamudi, nun mali kunup keca daemna tep, er pedi er pe nong karepseue.

Yesusdi nun kunumna tep, er nong karepseupa, mali nengdi popipa, nun yo pununa tep depu. Ada nun mali kunup keca wenemna tep, Allahdi tali lupra poptapsetu dinin, ‘Anesala wenepra men poptapkamne,’ teneamudi, Yesus karepseupa, nun yo pununa tep depseue. Ange yumada, nun nai bo Allahdi Yesus tep ‘Ukunkamre’ tenen, wepra deiamutopu, Yesus kupka deiki di kunupseu. 5Atep, ‘Nesala ban-ban yumadi, nun nai bo Allah tep, er sipu erepra, “Erda pio telepe,” penkameng’ tenen, Allah moronune. Tonda, ‘Dorkunkamre taru yuma peda, Allah er sipu pio eremkameng’ tenen, putanerepa, Allah moronune. ‘Ukunkamre’ tenen, amin pepne.

“Tek sisi Allah er kai telep upu, Nimi Lyemna Upuda tenpupu kurure,” pepu upu

6Uo, ne kayapu, sun Galatia tara neitamai kurum nesaladi kurum keca tep, ne mali kange doupra lukdanmandi, ‘Sun Galatia tara nesala mali kupnung’ tenen, ne kware kunmanere. Ada tali tep gume. Yesus er kange dipu meliamseunge deiki di, ‘Anesala lyepkamne’ tenen, upupseu ngeboda, teka tenepra er upu gekeramrum dinin, ukutaruda, angebo menmena taprumudi, yuk upu teka tenepbanmaruma tep nengeda, ne lukdanmandi, ‘Sun Galatia tara nesala mali kupnung’ tenen, ne kware kunmanere. Sun yuk mok upu peteremna nengdi, sun upu peteremsengepa, sun Galatia tara nesaladi aupu gekeprumdi, sun tara kepronmaruma tep pepsene.

7Allah er kai telep upu, nimi lyemna upuda, tek sisi tenpungepu kurur dinin, sundi ange tapra, yuk upu gekepra, yuk bisi banmaruma tep, aupu pepmasene. Uda, ne walwal dinin, yuk nengdi sun damai yakangedi, sun pedi tenenge keca peteremsenga deiki di, kange wang-wang peprepa, tenimtonapu kurum do, gum do? Ada, sun yuk upu peteremna nengda, Kristusdi nimi lyemna tep, er kai telep upu dopra, yuk upu cap wisipra peteremsengepa, ‘Kange wang-wang penmasere,’ tenepsene.

8“Sun anengdi, yuk upu peteremsengepa, kange wang-wang penmasere,” pepmasene. Dinino, ware neng do yuma, nun Allah upu peteremna deiyo neng pe, uda, Allah er im deiki melimna neng malaikat peda, sundi yuk upu cap wisipra doproptengedi, sun damai yana peterepsengopda, angeda pio mali kununge, pepsene. Ada, nundi peteremamsepu upu, tek sisi Allahdi nimi lyemna tep, er kai telep upu gum dinin, yuk nengdi yuk upu ton wisipra peterepsengopda, ne kangeda, Allahdi aneng tep ila di wenepra, uku jen ban dokoteptupa, pio kunkamtenge, pepne. Ada tali tep men pepsene. Sundi pio mali weik kununga tep pepsene.

9Nun pumun taru di konum lap peiamseputopu, nedi ukutaru ton cap pepkusene. Nundi peteremamsepupa, teka konum teneramrum upuda, tek sisi Allah er kai telep Nimi Lyemna Upupu peteremamsepu. Ada, Allahdi nimi lyemna tep peamseu kai telep upu. Atep, ware neng do yuma, aupu gum dinin, yuk upu ton dopra, tapakmengedi peterepsengopda, ne kangeda, Allahdi aneng tep ila di wenepra uku jen ban dokoteptupa, pio kunkamtenge pepmasene.

10Uda, sun ton tenipetepso. Aupu pepmasena deiki di, yuk nengdi, ne tep, “Erda telep ngebo,” pepra, ‘Ne tep kange deipnetengedi, ne si ereipkamnenge’ tenen, pepmasen do? Ange gum dinin, ‘Allah er dipu kange deipkamner’ tenen, pepmasen do? Gume, nedi yuk neng tep, ‘Uda, sun kange deipmanto upupu pepnepa, gekepnengedi, ne tep kange derinkamnenge’ tenen, upu men penune. Ato upu, tali upu peptenyopda, Kristus er pel melimna ngebo tek sisi men kutene. Atep, tali nengdi kange deipnetengedi, ‘Erda pio telep ngebo tenepnetenge’ tenen, aupu men pesenune. Ne Paulusdi pepsene.

Paulusdi, “Allahdi, ‘Paulus erda, ne pel donkamnere’ tenen, upupneu,” pepu upu

11Uda, ne weit yapu utopu nesalao. ‘Sun moupra kael kepkung’ tenen, aupu ton pepkusene. Nedi sun tep peteremamsisi upuda, nimi lyemna upu, Allah er kai telep upuda, tali neng sun kange tenena deiki dipu peramipa, men gekeramupu. 12Tali nengdi aupu men karepnei. Tonda, nimidi peteremamneipa, men kael keamsi. Angeda gum dinino, Yesus Kristus er dipapu ne tep, jenek kupra lap peramneupa, aupu gekeramsidi kael keamsi.

13Uda, ne kayapu, ne tali men pepsene. Sun kaele. Yahudi yala nesaladi, teka tenepra talengedi kunge kecada, agama Yahudi ngeda, ne peda akecapu teka tenepra taleamsi. Akeca tep teka tenepra, kuramsi keca yumada, yuk nengdi lap peramseipa, aupu sun konum gekeramrumdi, kael keamrume. Ada, ‘Yesus tep teka tenenge nesala yuma, gum kupra deipnedi gawal dakronkamne’ tenen, yu weik kuramneupa, nedi pe deipra pio piripeteramsidi, sun nong deiki ikin keca weika di deriramsi. Ukuramsi ngeda, ‘Anesala yuma popra gawal dakamne’ tenen, kuramsi.

14Tonda, ne kayapu nengda, yambula dipu agama Yahudi keca kael kepbarami dinino, nepuda ila di kael kepbaramsidi, nun apu yapudi, ▼

▼Yahudi yala neng, sun apu yapu tep, lap pena upu nomor 20 dirume.

“Angeda kunkamrum, ange ton ukunkamrum,” pepra peteremamseipa, gekepra taleamepu kecada, ‘Akecada, ila mambule’ tenen, weika di kael keamsidi, akecapu talepra kuramsi. Yuk neng yumada, yambula dipu kael kepra kurami dinin, neda weika di akeca yuma kael kepra taleamsidi dombaramsi.

15– 16Ukupra dakuramsi dinino, ataru neitamaida ange men teneramsi dinin, Allahda nanin deipneu taru di, ‘Angebo ne mawa ngebo,’ teneamneudi, wepra deipneue. Ukupneua cadi, erdi bicau teneamneudi, er kange dipapu upupneudi, lyepneue. Tonda, Allahdi ne tep, ‘Angeboda, ne upu dopra, Yahudi yala gum nesala tep peterembenkamre’ tenen, er Mi Sisa Yesus pel dopneua deiki di, ukupu kange dipru karepneue. Ukupneupa, er Mi Sisa Yesusdi kure kecada, lap peramneudi, ne dipru neitamai di pel doramneupa, ne kuramsi keca deiki di jenek kupra deipneu. Ukupneu pangeda, nedi, ‘Uo, wareto pel donkamne do? Tonda, wareto upu peteremkamne do?’ tenen, yuk neng damai bena men asimpeteramsi.

17Tonda, ataruda ange ton men teneamsi. Uo, Allahdi, ‘Ne upu peteremna deiyo neng, gonga kemna neng, Rasul neng kunkameng’ tenen, ‘Konum wepra deiamu nesala sun damai benedi sun tep asipetepkamne’ tenen, men asimbenamsi. Ada, Allahdi ne tep, kapul men wepneu taruda, sun aneng konum wepra deiamu dinin, ‘Aneng dipu lap pepnetengepa, apel dopnedi, sundi penkamneng upupu peterenkamne,’ men tenepsi. Ange tep nengeda, nedi, ‘Uo, ware upu peteremkamne do?’ tenen, sun damai Yerusalem mutu bena men asipetepsi. Sun damai men besi dinino, adipapu Arab mutu neitamai besidi, dakuramsanen, amenda taruda, ka tamupra Damsyik mutu yasi.

18Uda, Damsyik mutu tamupra yasidi, amutu neitamaipu dakuramsanen, keteng tamun weneri konum kupupa, Yerusalem mutu welerbesi. Ada, ‘Peterus cap antaptenemedi, kael kepdankamnem’ tenen, besidi, er cap tumi dengeda 15 tumi deiki di kikiman kuramneu. Er ati maramsi. 19Ataruda, nun Deiyo Ngebo Yesus er weit bo Yakobus cap antapnumu dinino, Allah er upu peteremna tep gonga kemna deiyo neng, Yesusdi wepra deiamu neng, sun sebelas nengda, aneng kankan tenpu ngebo peda, ton cap men antapmepu.

20Ne, tali men pepmasene. Allah dinmanera tep, apepmasen upuda, tek sisi upupu pepsene. Nedi pepra sengdisene upuda, pio tek sisi kurure. Mok upu gume.

21Uda, Yerusalem mutu bena kuramsanen, amenda taruda, Propinsi Siria tara cap, Propinsi Kilikia tara cap peterep embaramsi. 22Ataru neitamai yumada, sun teka tenepra Kristus cap dipru dukdongopra kunge nesala, ada Yudea tara neitamai kungedi, teka tenenge nesala yumada, ne cap kapul men antapmupka cadi, sundi men kael keamnei. 23Sun atara nesala yumada, yuk nengdi ne kune keca tep lap peramipa, gekenapu kurami. Sun gekerami upuda ake. “Gume, nun nong deiki ikin keca weik deriramseu ngeboda, menop taru di, ‘Sun Yesus tep teka tenenge kecada, gum kuptue,’ teneamudi, ‘Anesala cap, sun teka tenenge keca cap yumada, sikke bukra tapkamne’ tenen, pirirteramu dinino, ukutaruda ateka tenenup kecapu er pedipapu teka tenepudi, peteremrure,” pepra, yuk nengdi aupu lap perbaramipa, Yudea tara nesala gekerami. 24Aupu gekeramidi, ne tep kange deipra Allah er si eremamidi, “Allah kandi, ikin keca weik nun nong deiki deriramseu ngebo Paulusda, kandi konum lyepmumpa ukuda teleppu kurure. Kanda, pio telepe,” pepra, Allah er si eremami.