Gal 2 | XteSC | STEP | Uda, Ne Paulusdi Sirya mutu cap, Kilikia mutu cap neitamai kuramsanen, keteng tamun denge weik 14 tahun konum kupupa, Yerusalem mutu ka tamupra besi. Ataruda, Barnabas cap, Titus cap doprapsidi, kikiman welepmepu.

Galatians 2

Allah upu peteremna tep gonga kemna deiyo neng, Yerusalem nengdi, Paulus tep, “Telepe,” pepra, Paulus napra dopropi upu

1 Uda, Ne Paulusdi Sirya mutu cap, Kilikia mutu cap neitamai kuramsanen, keteng tamun denge weik 14 tahun konum kupupa, Yerusalem mutu ka tamupra besi. Ataruda, Barnabas cap, Titus cap doprapsidi, kikiman welepmepu. 2 Yerusalem mutu besinge deiyoda, Allahdi ne dipru neitamai, “Ukupkamrum, ukupkamrum,” pepra pel dopneua deiki di, besi. Tonda, ‘Nimi lyemna upu, Yesus er kai telep upu, Yahudi yala gum nesala kunungai yuma peteremnun upu lap pepnepa, sun Yerusalem deiyo neng ton gekepkameng’ tenen, besi.

Dinino, Yerusalem mutu deiyo neng damai bena, ne peteremnun upu lap peramsi ngeda, ‘Amutu tali dakunge nesala yuma epnengedi, ne upu gekepkameng’ tenen, katuaipu men besi. Sun deiyo neng, sun damaipu bena lape peramsi. Tonda, men di ne pel doramsinge cap, ukutaru pel donenge capda, ‘Nong men kupkamre do?’ tenen, lap perbesi. 3 Aneng damai Yerusalem mutu besi taruda, ne cap benemu ngebo, er sida Titus. Titusda, Yahudi yala gum ngebo cadi, den bam bol men sengnung nesala, Yunani ngebo kurur dinino, er pe tep, sun Yahudi yala teka teneami nengdi, “Nun Yahudi yala neng kuramnuptopu, angeboda Allah teka konum tenepka cadi, ‘Katuai kuptu’ tenen, er den bam bol adipapu sekrume,” pepra upu men deipsei.

4 Uda, angeda, Allah er nyapu katuai kuna tep, den bam bol sengameng upu belepseuada, deiyo pepkusene. Deiyoda, yuk neng, sun tek sisi Yesus tep teka tenena gum nengdi, nun Yesus Kristus tep teka tenenup neng tep, ukupra teneamsei. ‘E, sun Yesus tep teka tenenge nengda, Musa sekeiamu mem upu cap, mem pel cap talepra men kunungada, warya tep do? Anengda, ware kupra kunung do?’ tenen, nun kankan inipra diryasei. Nun Kristus tep teka tenepmupka deiki di, konum lyepseudi, telep kupra deipseua cadi, ‘Mem pel dona cap, mem upu cap gekepra dombanupa deiki di, Allahdi lyepkamsere’ tenen, teka men tenenupe.

Atep sun inipra diryasei nengdi, ‘Gume mem pel cap, mem upu cap, sun nong deiki deipmepyopda, aneng tep ateng kouna utopu keiptepepa, nun tara keprosetenge,’ tenepsei. 5 Ukupra tenepseidi, nun kankan inipra yai dinin, sundi, “Uda, ‘Allah er kange deipsetua’ tenen, den bam bol sengna cap, yuk mem pel dona capda ila mambule,” peramsei ngeda, tenpunge pe men gekepmupke. Sun perami upu sengamupkada, ‘Nimi lyemna tep, Allah er kai telep upu, tek sisingepu, sun Galatia tara nesaladi, yuk tali upu tapangna gum di, tek sisingepu tupa talenkameng’ tenen, sun inipra diryasei neng perami upu sengamupke.

6 Uda, ne peteremamsi upu, Allah er kai telep upu, konum dekpepra dinipua cadi, men suktalepneue. Atep, sun mambul neng, Yerusalem mutu peteremna deiyo nengda, yuk upu cap tapakra men peterepnei. Tonda, ‘Anengda, ila neng do, gum do?’ men tenenune. Ne kangeda, atenena utopu kecada mambul gume. Allahdi nimi kuramenge keca nong bol deikingepu epredi, ‘Anengda ila mambul neng, anengda mambul gum neng’ tenen, upu men bongdiserure. Allahdi nimi yuma tep dipru men wilimdarure.

7 Arup pepmasentopu, Yerusalem mutu peteremna deiyo nengdi, ne tep, “Nun tenepmepe upu ton cap tapakra peteremkamrume,” pepra men deipnei. Ange gum dinin, ne peteremne upu lap peramsipa, sun ton kael kepnei. Ada, ‘Gume, Allah er kai telep upu, nimi lyemna upu dopra, Yahudi yala nesala gekenkameng’ tenen, Allahdi Peterus tep wepra deiamutopu, Allahdi Paulus peda wepra deiamu. Tonda, sun Yerusalem deiyo nengda, ‘Allahdi Paulus tep, gonga kemna tep peteremna deiyo ngebo keipmemeu’ tenen, kael kepnei. Tonda, Allahdi Paulus tep nengeda, ‘Yahudi yala gum nesalada, nimi lyemna upu gekenkameng’ tenena tep, ‘Peteremna deiyo ngebo konum deipmemeu,’ tenepneidi kael kepnei.

8 Ange kael kepneiya deiyoda akapmare. Ada, Peterusdi, ‘Yahudi yala nesala teka tenenkameng’ tenen, Allah upu peterepra pel doramunge neitamai di, Allah weika di melimamutopu, ne Paulusda yuk yala nesala, Yahudi yala gum nesala tep, peteremna gonga kemna deiyo ngebo kweipneudi, weika di melimamneu. Akuramsinge yuma, sun Yerusalem mutu kungedi, Yesus tep teka tenepra, deiyo kunge neng gekeramidi, kael kepnei.

9 Kael kepnei dingeda, yuk nengdi, “Anengda, ila deiyo neng,” peramipa, kurami neng, sun sida Yakobus cap, Peterus cap, Yohanes cap, sun yumadi, ne cap, Barnabas cap tep, dumsisi buru karepseidi gispal dopsei. Ada, sundi nun tep, ‘Anengda nun pel doramnuptopu, sun peda utopu pel donunge’ tenen, dumsisi buru karepseidi, gispal dopsei. Buri karepseiyada, ne lap peramsi upu gekepidi, ‘E, Allahdi Paulus tep bicau teneamudi, er kange dipapu Paulus tep weika di meliamupa, Paulusdi Allah er pel telep kupra dorure’ tenen, kael kepneidi, buru karepsei taruda, sun Yerusalem mutu kunge deiyo neng yuma epi.

Ukupseidi, upu talepmepu dingeda, upepnei. “Uda, nunda, ‘Yahudi yala nesala teka tenenkameng’ tenen, peterem benkamep dinino, Paulus cap, er kikiman kunge neng capdi, yuk yala nesala yuma, Yahudi yala gum nesala yuma tep, peterem benkamenge,” pepra, upu pepdapu. ‘Angeda telepe,’ tenen, kikiman utopu tenepmepu. Ne Paulusdi lap pepsene. 10 Sun anengdi, nun tep, “Sun peterem benkamrum taru yuma neitamai di, akeca-keca yuma men talenge nesala, tali kankan kunge nesala lumdongona gum di, makunapu kunkamrume,” pepsei. Upepsei dinino, ne peda utopu, ‘Kankan nesala tep, kange deipra melimkamepe,’ konum teneamsi.

Paulusdi Peterus tep, wenepu upu

11 Uda, yuk upu ton pepkusene. Yerusalem mutu tapra yuk tara konum bena kuramsanen, Antiokia mutu kuramsi taruda, Peterus ton nun damai yaue. Nun damai yau taruda, mali kupka cadi, nedi er damai teksidi, inimna gum katuai di wenepsi. 12 Peterusda, Yahudi yala ngebo kurur dinin, nun damai yaudi, nun cap, yuk yala nesala, Yahudi yala gum nesala cap, kikiman kuramepu taruda, Peterusdi, ‘Aneng cap kikiman jenada mali gume’ tenepudi, tali lupra Yahudi yala gum nesala cap, kikiman wisipra jen jerami. Aneng cap jen keca kikiman jeramu dinin, amendada yuk Yahudi yala neng, Yerusalem mutu kure ngebo, er si Yakobus damai di yai taruda, Peterusdi, ‘Uo, anengdi ne tep, “Erda Yahudi yala gum nesala cap kikiman jenmarada, pio mali kurure,” pepra, mali tenepnenung’ tenen, Peterusdi Yahudi yala gum nesala damai tapra yuk beipra beu.

Peterusdi aneng tapra, yuk beipra beunge deiyoda, sun Yahudi yala nesaladi den bam bol sengnung ^{▼▼den bam bol sengna – Aupu deiyo kael kemna tep, lap pena upu nomor 19 dirume.} nesala cadi, ‘Sun den bam bol deiki tarange sengna gum nesalada, mali neng,’ tenengedi, kikiman men kununge. Tonda, kikiman men jenunge. Atep Peterusdi utenepu. Uo, ne cap, Yahudi gum nesala cap kikiman wisipra jepnyopda, sun Yahudi yala nesala, nun damai ukupu yanmaseng nengdi ne tep, ‘Erda mali kun ngebo, tenepnenung’ tenen, kware kupupa, Yahudi yala gum neng tapra yuk beipra beu.

13 Ataruda, Peterusdi gonga kepra ukupu pangeda, nun cap kikiman kunmapu nesala, Yahudi yala neng yuma epidi, sun peda utopu, Yunani nesala tapra yuk beipra banmai. Sun aneng yumada, ‘Allahdi, Yahudi yala gum nesala cap kikiman kunada, mali men tenerure’ tenen, konum kael kepi dinin, ‘Nun damai ukupu yai nengdi, mali neng tenepsenung’ tenen, kware kupupa, nong bol deiki kecapu tenepidi, mali kunmai. Ukunmaiya deiki di, ne kabo Barnabas peda, ‘Uo,’ tenepupa, anengdi Barnabas dopra, sun tarapu dubei.

14 Sun yumadi ukupra kupmaiya deiki di, Allah er kai telep upu peseretopu kuna gum dinin, aupu yaniptapmaipa, nedi epra kael kepsi dingeda, sun yuma gekenmaiyaipu, Peterus tep upepra wenepsi.

“Peterus kao, kanda Yahudi yala nengdi deipkeipa, Yahudi yala ngebo kurum dinino, kan kumem kecada, Musa sekeiamu upu cap, yuk mem upu cap, sun Yahudi yala nesaladi teka tenepra kuramengtopu men kurume. Kanda, yuk yala nesala, Yahudi yala gum nesaladi, akeca yuma tenena gum di, tali lupra kuramengtopu kurume. Ukupra kuruma cadi, kanda warya tep Yahudi yala nengdi teka tenepra kunge keca dopra, yuk yala nesala, Yahudi yala gum nesala sun nong deiki derirum do? ‘Yahudi yala gum nesala cap kikiman wisipra men jepkune’ tenen, beipra benmaruma deiki di, mali kunmarume. Ukunmarema tep wenepkene.” Ne Paulusdi Peterus tep upepra wenepsi.

15 Uda, ne kayapu. Ton nengdi, Yahudi yala gum neng tep, “Sunda, pio mali kun neng,” penunge. Uda nunda, Yahudi yala nengdi deipseipa, Yahudi yala nesala kunupa cadi, Yahudi yala nesaladi kunup kecada, nun kaele. 16 Dinino, nunda Yesus tep teka tenenup neng kunupa cadi, nun kaele. Musa sekeiamu upu gekepmepedi, angepu moupra talepmepedi, dumsisi kupra dombanupa deiki, Allahdi nun tep, “Anengda telep nesala,” pepra, pio dumsisi nesala men kemdiserure. Musa sekeiamu upu dombanupa deiki di gum dinino, Yesus Kristus teka tenepmepya deiki dipu, Allahdi nun tep, ‘Anengda dumsisi nesala,’ teneseredi, telep kudiserure.

Yesus tep teka tenenupa deiki dipu lyemserurada, konum kael kepmupka cadi, nun peda Yesus Kristus tep teka tenepmepudi, nun kange er deikipu deipmepu. Ware nesala do yuma, Allahdi, ‘Angeda kunkamrume, angeda men kunkamrume,’ peiamupa, Musadi sekeiamseu upu gekepmengedi, moupra talengedi, telep kupra dombanunga deiki di, Allahdi anesala tep, “Sunda dumsisi nesala kununge,” pepra, telep men kudinkamre. Aupu yuma moupra taleptepeya peda, dumsisipu men kuptepe. Angeda men kupmanto cadi, Allahdi nun tep, “Sunda Yesus teka tenepya deiki di, dumsisi nesala tenenkamsene,” pepra, dumsisi nesala kupra kudiserure. Nun yumada, ‘Allahdi telep kudinkamser’ tenen, nun pedi Yesus Kristus tep teka tenepmepu.

17 Yesus Kristus teka tenenupa deikida, Allahdi nun tep, “Sunda dumsisi nesala kununge,” pepra, ‘Telep kudinkamser’ tenen, kupe taru neitamaida, mali kun keca kange di ton cap kupmepyopda, akunupa deiki di yuk neng epsengedi, nun tep, “Atep Kristusda, mali kun keca tep kange derirure,” pepsetenge do? Angeda gume, aupuda tek sisi men pepsetenge. Yesus Kristusdi, mali kun keca yuma tep, kange men derirure.

18 Gume, nedi uruptapra tapsi kecada, kange di ton cap dopropnedi, angepu talepra kunyopda, ange kuptenya deiki di, yuk nengdi ne tep, “Angeboda, Allah upu yanitamrure,” pepnetenge. “Musadi sekeiamseu upu moupra talepmepya deiki dipu dumsisi nesala kunkamepe,” pepra kange di ton cap petereptenyopda, mali kuptene. Menop taruda, ange teka teneamsidi taleamsi dinin, Yesus er kai telep upu peteremnuna deiki di, menop taru taleamsi ngeda, konum tapsi. Atep nengeda, akeca kange di ton cap men talenkamne.

19 Ukupsa deiyoda, ‘Musa sekeiamu upu talepra dombankamne,’ tenepsidi, pio pe deipra piripeteramsi dinino, adeikida, konum depu ngebo utopu kupsi. ‘Aupu yumada men kupmanto kuramsa tep, adeiki di Allahdi ne tep kange men deipnetudi, dumsisi ngebo kupra men deipnetue’ tenen, kael keamsi. Musa sekeiamseu upu tapsidi, ukutaruda, ‘Allah er tepapu teka tenepra kunkamne’ tenen, kunune.

20 Tek sisada, Yesus Kristus sengdin co deiki popya deiki di, Yesusdi ne yo punupneua cadi, ukupmantoda ne cap, Yesus cap dukdongopra popneipa, depsi. Ada, Yesus depka deiki di, ne peda dena utopu kupsa tep pepsene. Ukupmantoda, Kristus cap dukdongopra popneiya tep, ukutaruda, ne pe yuk men kunun dinino, Kristusda ne dipru neitamai kurure. Ne cap, Yesus cap dipru dukdongopra kunume. Atep, nimi nong utopu kupra tupa kune taru yumada, Allah er Mi Sisa Yesus tep teka tenenuna deiki dipu gam kunune. Allah er Mi Sisadi ne tep bicau tenepneudi, ne pununa tep, er pedi er pe nongpu karepupa, yu nengdi popipa, ne tep depu.

21 Ukupneua tep nengeda, Allahdi nun tep bicau tenepseudi, er kange dipapu meliamseu keca, Yesusdi nun pununa tep depseuada, ‘Dakwapye’ tenen, men taptene. Angeda tali tep men pepsene. Musa sekeiamu upu gekepmepedi, telep kupra dombaramtepya deikida, Allahdi nun tep, “Sunda dumsisi kun nesala,” pepra telep kudiramsetu teptoda, Kristusdi nun pununa tep depu ngeda, nong men kuptue. Talipu deptue. Dinino, mem upu dombanupa deiki di, Allah men lyepkamsere. Kristusdi pel dopseua deiki dipu lyepkamsere. Ne Paulusdi pepsene.