Gal 3 | XteSC | STEP | Uo, sun Galatia nesalao, sunda pio walwal neng utopu kunmarume. Ware nengdi, mok upu peteremamseiya deiki di, upu tek sisinge moupra men kael keamrum do? Gume, nedi peteremamsisipa, diramnerum taruda, “Yesus Kristus sengdin co deiki popipa, depseua deiki di lyemserure,” pepra katuai lap pepra peteremamsisi.

Galatians 3

“Allahdi telep kupra deriseryada, Kristus er pel dopseua deiki dipu kuserure,” pepra lap pepu upu

1 Uo, sun Galatia nesalao, sunda pio walwal neng utopu kunmarume. Ware nengdi, mok upu peteremamseiya deiki di, upu tek sisinge moupra men kael keamrum do? Gume, nedi peteremamsisipa, diramnerum taruda, “Yesus Kristus sengdin co deiki popipa, depseua deiki di lyemserure,” pepra katuai lap pepra peteremamsisi. 2 ‘Sundi lap pepnemumpa, gekepra kael kepkune’ tenen, asipetepkusene. Allahdi er Lek Sambala karepseupa, sun dipru wekseuada, warya di do? Musa sekeiamu mem upu, gekepra dombaramruma deiki di, er Sambala karepseupa, doproprum do? Agum dingeda, Allah er kai telep upu peteremamupupa, teka tenepruma deiki dipu, Allahdi er Lek Sambala karepseupa, doproprum do?

3 Sunda, pio walwal neng utopu kumumdi, ukutaru yuk bisi lerekra gwekdanen bankurum do? Allah er dumsisi kun bisi bana tep, er Lek Sambala karepseupa, melimserya deiki di gonga kepra banmarum dinin, bisi neitamai di, ange tapra, ‘Nun nimi puto deiki dipapu, Allah er bisi banmapyanen gawal dakamepe’ tenen, kupetepmarum do?

4 Teka tenena gum nesaladi, sun nong deiki ikin keca weik deriramseinge cap, kange mun kange douamrumnge capda, nong men kupkamre do? Ayuma kuramseuada, talipu kuramseu do? Nong men kupkamre do? Sun ton tenipetepso. Gume, ange yumada, talipu men kuramseue. 5 Sun ton tenipetepso. Allahdi er Lek Sambala kareamseunge cap, tonda, erdi kunupsek pen pel, nimi men kuptenge pel dosererunge capda, ange yuma kareserya deiyoda, ada Musa sekeiamu upu ^{▼▼Musa sengamu upu lap pena upuda, nomor 35 dirume.} moupra dombaramruma deiki di kareamseu do? Agum dingeda, nundi peteremamepupa, gekeramrumdi, teka teneamruma deiki di, kareserepa dororum do? Gume, yuk deiyo ton gume. Sundi teka teneramruma deiki dipu, Allah er Lek Sambala kareserure. Tonda teka teneramruma deiki dipu, Allahdi nimi men kupmanto pel doserure.

6 Ange tep nengeda, Abrahamdi kuramunge ton tenipetepso. Allah upu deiki sekami ngeda, aupu ton akapmare.
‘Abrahamdi Allah pediramu upu tep, teka tenepka deiki di, Allahdi, “Erda dumsisi ngebo,” pepra, Abraham tep telep kupra deipu.’ (Kejadian 15:6)

7 Aupuda, akapka cadi, adeiki di kael kepkurume. Ware nesala do yuma, Allah upu gekepmengedi, teka tenepmengopda, tek sisi Abraham er nyapu utopu kununge. 8 Allahdi Yahudi yala gum nesala tep teneamu. ‘Sundi teka tenepnenga deiki di, “Anesalada, dumsisi nesala kununge,” pepra, telep kupra deipkamne,’ teneamudi, ‘Angeda katuai kupkamre’ tenen, Allahdi menop taru Allah upu sekeiami neng tep, sun dipru tamupudi, aupu pediramupa, anengdi sekeiami upu deiki di katuai kupu. Yesus kapul men yanamu taru di Abraham tep, Allah er kai telep upu pediramu. Aupuda ake.
‘Allahdi Abraham tep upepu. “Abraham kandi deipmempa, dadeipdanen yakaramenganen, deipkameng mi deiki di, nesala ban-ban yuma tep telep kudinkamne,” Allahdi pepu.’ (Kejadian 12:3)

9 Allahdi Abraham tep aupu peipka cadi, Abrahamdi Allah tep, ila teka teneamu. Ukupka deiki di, Allahdi Abraham tep, telep kupra deiamudi, dumsisi keiputopu, ukutaru peda ware nesala do yuma, Allah tep teka tenenge nesala yumada, Allahdi telep kudiserure. Allah er kange dipapu, nun teka tenenup nesala tep, dumsisi nesala kemdiserure. 10 Ukuserur dinino, ware nesala do yuma, sundi, ‘Gume, Musa sekeiamu mem upu, gekepmepedi, aupu moupra talepmepedi, telep kupra dombanupa deiki dipu, Allahdi kange deipkamsere,’ tenenge nesala yumada, sunpuda bicaue. Allahdi aneng tep dumsisi kupra men kudinkamre. Anesalada wenepkamre. Ange deiyoda ake. Allah upu sekeiami upu neitamaida aupu ton akapu.
‘Musa sekamu buku neitamai, mem upu yumada, tenpunge pe tamna gum di, pio telep kupra gekepmengedi, men dombange nesala yumada, Allahdi wenepra poptapkamre. Allahdi pepu.’ (Ulangan 27:26)

Allahdi upepka tep, ‘Musa upu gekepra dumsisipu dombapya deiki di, Allah lyepkamsere,’ tenenge nesalada, sun bicaue. Ada, amem upu yuma moupra talepnedi, tenpunge peda tamna gum di, dumsisi kunada men kupmanto tep, Allahdi akecapu talenge nesala tep wenepra poptapkamre. 11 Gume, ne kayapu, angeda katuai kupsere. Allah upu neitamai di aupu ton sekeiamu. Aupuda ake.
‘Allahdi nimi tep kange deipredi, dumsisi kupra kudirepa, teleppu kunkameng nesalada, teka tenepmenga deiki dipu gam pio kunkamenge.’ (Habakuk 2:4)

Allahdi peipupa, Habakukdi aupu sekeiamnga cadi, adeiki di katuai konum kuserure. Ware nesala do yuma, Musa sekeiamu mem upu, gekepra dumsisipu dombanunga deiki di, Allahdi, “Anesalada, dumsisi nesala konum kununge,” pepra, telep kun nesala men kudinkamre. Sun pe puto deiki dipu, pe deipra piripetenunga cadi, anesalada pio tupa-tupa malipu kunkamenge. 12 Musadi sekeiamseu mem upu moupra talenung nesalada, teka tenena deiki di men kununge. Sunda pio pe deipra, pel dona deiki di kununge. Sundi utenenunge. ‘Gume, amem upupu moupra gekepmepedi, pio pe deipra dombanupa deiki di, gam kunkamepe,’ tenengedi pio piripetepra kununge dinino, men kuptenge. Allah upu sekami upu neitamaida, aupu ton akapu.
‘Ware ngebo do yuma, Musadi sekeiamseu upu, mem upu gekepredi, tenpunge peda men tamredi, aupu yuma tek sisi domberyopda, aupu deiki dipu gam kunkamre. Dinino, aupu neitamaida, tenpunge peda tapyopda, gam pio men kunkamre.’ (Imamat 18:5)

Aupu akapka cadi, adeiki di kael kemnupe. Musa sekamu mem upu talepra kunge nesalada, utenenune. ‘Aupu gekepmepedi, pio pe deipra dombape pangeda, akunupa deiki di Allahdi lyepkamsere,’ tenenunge. Mem upu talepra dombange nesalada, teka tenena deiki di men kununge. Sun pe puto deiki dipu kununge.

13 Allahdi peiamupa, Musadi sekeiamseu upu, mem upu yuma moupra talepmengedi, dumsisi kupra men dombange nesalada, “Allah wenepredi, poptapkamre,” peamu upu akapmare. Dinino, Kristusdi nun tuai nesala tep, er pe nong karepdaupa, yu nengdi popipa, nun yo pununa tep depka deiki di, loptapseudi lyepseue. Pumun taruda, mem upu amutara kuramepupa, amem upu di ateng kouramseu dinin, Yesusdi pel dopseua deiki di konum loptapseue. Apepmasen upuda, tali tep men pepsene. Ada, Allah upu sekami upu neitamai akapu upu deiki di kael kemnupe. Aupuda ake.
‘Sengdin co deiki deipra poramenge nesalada, Allahdi anesala tep wiprapredi, wenepra poptapkamre.’ (Ulangan 21:23)

Ange tep nengeda, kael kemnupe. Nun mali kuna tep, Allahdi tali lupra poptapsetu dinin, Kristus sengdin co deiki popipa, depkada, tali tep gume. Nun mali kunup nesala yo pununa tep, depudi lyepseue.

Musadi sekeiamu upu talepra, dombanupa deiki di gum dinin, Allahdi pediramseu upu deiki dipu lyemserure

14 Kristus depka deiki di nun tep yo punupseudi, kunupra lyepseua deiyoda, Allahdi nun tep, ‘Telep kudinkamne’ tenen, kupseue. Ada, Allahdi Abraham tep, “Telep kudinkamkene,” peamu ngeda, ‘Yahudi yala gum nesala peda karenkamne,’ teneamudi keteneipseue. Ada, Allahdi, ‘Ne mi Yesus Kristusdi pel dopkamra deiki di, Yahudi yala gum nesala peda, telep kudinkamne,’ teneamu. Allahdi, ‘Abraham tep telep kudiramsitopu, anesala peda telep kudinkamne. Angeda dopropkamenge’ tenen, Yesus dopra deipseupa, Yesus depka deiki di kunupseudi, lyepseue. Ange peda, Yesusdi nun tep utenepseue. Anesaladi, ne Yesus Kristus tep, teka tenepkamnenga deiki dipu, Allahdi, “Ne Lek Sambala dopra tuai nesala karenkamsene,” pediramu ngeda, ‘Sun Yahudi yala gum nesala peda dopropkamenge,’ teneamseudi, er depka deiki di lyepseue.

Musa sekeiamu upu cap, Allahdi pediramu upu cap tep, pepu upu

15 Uda, ne kayapu, ‘Apepmasen upu moupra kael kepkurum’ tenen, tumi-tumi yuma kuramepe keca di, ukupmanto upu ton pepkusene. Ton tara nengdi ton tara neng tep, “Ukupra kunkamepe,” pepra pedidaramenge upu konum talepra sengpepmengopda, amenda taru, yuk nengdi sun pedidarameng upu tep, yuk upu cap men tapaktenge. Tonda, ‘Angeda, dakwapye’ tenen, “Men kupkamrume,” pepra upu men sektenge. Ange utopu, Allahdi, “Ukunkamne,” konum pediramnga cadi, ange tapra, yuk keca men kunkamre. Erdi konum peiamutopu kunkamre. Aupuda lape pepkusene.

16 Allahdi Abraham tep, “Ukunkamkene,” pepra pedina upu peamu ngeda, Abraham cap, erdi deipupa, dadeipdanen baramyanen, deipkami mi, Yesus tep, peamu. Allah upu neitamai sekami ngeda, Allahdi Abraham tep, “Kandi deipmempa, dordeipdanen benkameng nyapudi, dadeipkameng nyapudi tuai nesala ban-ban yuma neitamai di, nesala weika di telep kudinkamenge,” men perure. Gume, Allahdi peamu upuda, “Kandi deipmempa, dordeipdanen benkameng nengdi, deipkameng mida, er deiki di tuai nesala telep kudinkamne,” perure. Atep, apediramu upu neitamaida, “Nyapu,” peamtu teptoda, ada ‘Nesala weike tep peipseu,’ teneptepe dinin, aupu deikida, “Mi tenpu,” pepka cadi, adeikida, ‘Ada tenpu mi tep peipseu. Tenpu ngebo dipu telep kudinkamsere’ tenen, kael kemnupe. Allahdi Abraham tep, “Kandi deipmempa, dordeipdanen benkameng mi,” pediramu mida, ada yuk ngebo tep men pediramu. Gume, ada doryankamu keteng tamun neitamai di, Yesus Kristus deipkamunge tep aupu peipseu.

17 Uda, ange tep nengeda, aupu pepmasena deiyonge ton pepkusene. Menop taruda, Allahdi Abraham tep, “Ukunkamkene, kan deiki di nesala ban-ban yuma telep kudinkamne,” peamu. Ange konum pepra deipupane, sun yuma dakuramipane, keteng tamun denge pio weik, keteng tamun 430 tahun konum kupupa, Allahdi, ‘Ukunkamrum, angeda men kunkamrume,’ peipupa, Musa gekepudi, aupuda, mem upu sekra deipu.

18 Allahdi, Abraham tep, ‘Ukunkamkene,’ pepra pedina upu peiamu ngeda, menmena taru peipu dinin, amenda taruda Allahdi Musa tep, ‘Ukunkamrume, angeda men kunkamrume,’ pepra mem upu karepupa, Musadi seku. Musadi sekeiamseu upuda, amenda taru sekamnga cadi, aupu deiki di Allahdi menop taru konum pediramu ngeda, upu men sektue. Menmena taru pediramu upuda, amenda taru pepu upu deiki di, gum kupra men deiptue. Musa sekeiamu upuda, amenda taru sekeipseua cadi, Allahdi menmena taru pediramunge tep, upu men sektue.

19 Atep, ton nengdi asipetenunge, “Allahdi, ‘Angeda ukunkamrume, angeda men kunkamrume,’ pepra peiamu upu, Musadi sekeiamseu mem upuda, ware keca deiyo tep, karepupa sekamu do?” pepra asimnunge. Atep, amem upu karepseua deiyoda pepkusene. Ada, ataru kurami nesala yuma mali-mali kuramya deiki di, Allah er upu yaninapu kuramya cadi, Allahdi mem upu peipupa, Musadi sekamu.

Allahdi utenepu. ‘Sun Israel nesalada dumsisi kun keca men kael kepmengedi, mali-malipu kupnung’ tenen, amem upu karepnyopda, aupu moupra talepmengedi, dombaramenganen, amenda taruda, Abrahamdi deiprepa, dadeipdanen baramenganen, deipkameng Mi, er konum yaryopda, amem upu yo pununa tep, amidi punupkamre.

Musa sekamu mem upuda, Allahdi peipupa, er im deiki melimna neng malaikatdi, Musa tep lap peipipa, Musa gekepra sekeiamu. Musa erda nimi dana-dana neitamai antapra telep kudina deiyo ngebo kuramua cadi, sun amalaikatdi aupu lap peramipa, Musadi aupu gekepudi, aupu dopra Israel nesala tep lap peramu. 20 Nesala dana-dana neitamai antapra telep kudina deiyo ngeboda, tenpu tara neng tepapu pel men dorure. Ada, atara nesala cap, ortara kunge nesala cap, antamdina tep pel dorure. Angetopu, Allah dana tara, ataru kurami nesala, sun Israel nesala dana tara kuramya tep, Musadi antapra telep kudina deiyo ngebo kuramu. Dinino, Allah erda tenpu ngebopu kurure.

21 Uda, menmena taruda, Allahdi Musa tep pedina upu karepu dinin, amenda taruda, Musa tep mem upu ton tapakra karepu. Ukupka cadi, Musa sekeiamu upu mem upuda, ‘Allahdi menmena taru pediramu upu tep, yanina utopu kurur do? Musa sekamu mem upuda, Allahdi pediramunge upu sengrur do?’ teneprum tenen, aupu ton lap pepkusene. Angeda, tenena gume. Musa sekeiamu mem upu, konum karepsen ngeda, ange moupra gekepmepedi, tenpunge peda tamna gum di, dombatepepa, adeiki di gam pio kuna deiyo keca konum dopropmatepe teptoda, pio dumsisi kun nesala konum kuramtepe. Dinino, nun kaele. Mem upu talepra dombanupa deiki di, dumsisi kun nesala men keipsetue. Tuai kunup nesala yumada, dumsisipu men kunupe.

22 Dumsisi kudiserur kecada, mem upu dombanupa deiki, dumsisi men kudiserur dinino, Allah upu neitamai sekaminge deiki di kael kemnupe. Kael kemnup upuda, ateng koupmengedi, wenemna ati dongopmengepa, men loptapdanmanto nesala kuramengetopu, nesala ban-ban yumada, mali kuna cap, mali tenena cap deiki di, ateng kouamseupa men lopdanmanto nesala kunupe. Allahdi aupu pepka deiyo dano? Ada, Allahdi, “Dumsisi kuna deiyo keca karenkamsene,” pepra, pediramu upuda, ake. Ada, Yesus tep teka tenepmepya deiki dipu, dumsisi kuna deiyo keca doproptepe. Tali kun nesala gum dinin, Yesus tep tek sisi teka tenenge nesalapu dopropkamenge. Ada, Allahdi nun teka tenenupa deiki di, ‘Anesalada, dumsisi nesala kununge,’ pepra, telep kupra kudiserure.

23 “Allahdi, ‘Yesus Kristus tep, teka teneruma deiki dipu, dumsisi nesala kudinkamsene,’ pepra, pedina upu karepseue,” pepra kapul men lap peiamseu taru, aupu men gekeramepu taruda, pio ikinpu kuramepu. Ada, Musa sekeiamu upu mem upu taleamupka deiki di, ateng koupra wenemna ati dongorameng nesala utopu kuramepu. Nundi men lopdanmanto kuramepu. Allahdi nun yuma tep uteneamseu. ‘Mem upu di ateng kouprepa, men lopdanmanto dakuramengepane, amenda taru teka tenena deiyo keca dopra katuai keipne pangeda, teka tenepkamnenga deiki di, anesala loptapnedi lyepkamne,’ teneamseu. Wenemna ati pumbon utopu kuramepu dinin, ukutaruda, nun Lyemna Deiyo Ngebo ^{▼▼Lyemna Deiyo Ngebo – Alkitab neitamaida, Lyemna Deiyo Ngebo sengnungada, ton taru Allah tenena tep sengnunge. Ton taruda, Yesus tenena tep sengnunge, dinin deiyoda, Yesus er depseua deiki di Allahdi lyemserure. Paulusdi Yesus tep aupu pepu. Lap pena upu nomor 17 dirume.} Yesus Kristus konum yaua tep, er tep teka tenepmepyopda, loptapra lyemserure.

24 Atep, Allahdi, “Ukunkamrume, angeda men kunkamrume,” pepra deipupa, Musadi sekeiamseu upu, mem upuda, nun telep kuna tep bisi lap pena deiyo ngebo, tonda peteremna deiyo ngebo utopu kuramseu. Tonda, nun wenemna deiyo ngebo utopu kuramseu. Dinino, Yesus konum yaua cadi, ukutaruda, Allahdi nun tep, ‘Yesus tep teka tenepmengopda, ne kange deiki di, “Anesala dumsisi kununge,” pepra, telep kupra deipkamne’ teneserure.

Dinino, menmenada, Musa sekeiamu upuda, “Sun dumsisi bisi ake,” pepra, lap pena deiyo ngebo utopu, kuramseupane, amenda taruda, Allahdi Kristus dokotepseudi, er tep teka tenepmepyopda, adeiki di telep kudiserure. 25 Allahdi Musa sekeiamu mem upu, kareamseupa, aupu talepra dombaramepu dinin, ukutaruda, Yesus tep teka tenena deiyo keca konum yanmasera tep, Musa sekeiamu mem upu, amutara tupa men kunupe. Menop taruda, amem upuda, nun bisi lap pena deiyo ngebo, tonda nun peteremna deiyo ngebo utopu kuramseu dinin, ukutaruda gume. Aupu amutarapu tupa men kunupe.

Allahdi nun teka tenenup nesala tep, “Ne nyapu kudisenune,” pepra, telep kudiserura tep, pepu upu

26 Uda, ne kayapu, ukutaruda, sundi Yesus Kristus tep teka tenepruma deiki di, Allahdi er nyapu konum kweipseu. Ukutaruda, tek sisi er nyapu kurume. 27 Sun yuma teka teneamruma deiki di, me dongopseipa, Allahdi Kristus cap dipru dukdongopseua deiki di, ukutaruda, Kristus cap dukdongopra kuruma cadi, Allah er nyapu kurume. 28 Ukupseua tep nengeda, ukutaruda, sun yuma yala yuk-yuk nesala kurum dinino, Yesus Kristus cap dipru dukdongopra kuruma deiki di, sun yumada, nong tenpu utopu kupra, er cap kikiman kurume. Atep ukutaruda, Allahdi nun teka tenenup nesala tep teneserurada ake. ‘Sun Yahudi neng ake, Yunani neng ake, nimi ake, nerapu ake, sun pe kange dipu kunge nesala ake, tali pel dopra kunge nesala ake, yuk nengdi co bo deiki kunupidi, ^{▼▼Co bo deiki kunumami nesalada, isomka nengdi, pio kankan kurami nesala tep, co bo deiki di kunuamipa, akankan kurami nesaladi, sun isomka nesala tep, sun pel talipu pel dorami. Co bo dorona pio gume. Tonda, lap pena upuda, nomor 36 dirume.} talengepa, mesumpu pel donge nesala ake,’ men teneserure.

Ange gum dinin, nun teka tenenup nesalada, Allahdi Yesus Kristus cap dipru dukdongopseua cadi, er cap tonpua kikiman utopu kunupe. Nun yumada tenpu nong utopu kunupe. 29 Kristus tep teka teneprumpa, ‘Ne mawa nesala’ tenen, konum dopropseu nesala yumada, Allahdi nun tep ukupra teneserure. Er kangeda, ‘Abrahamdi deipupa, dadeipdanen yakarami nyapu utopu nesala kununga cadi, anesala peda, nedi Abraham tep pediramsi keca dopropkamenge,’ teneserure. Tonda, “Abrahamdi deiprepa dadeipdanen bankameng nesala tep, telep kudinkamne. Er gerekdanen kunkameng nyapu tep, telep keca karenkamne,” pepra pedina upu deiki di peamu ngeda, ‘Ukutaru teka tenenge nesalada, sun peda utopu karenkamne,’ Allahdi teneserure. Ne Paulusdi lap pepsene.