Gal 4 | XteSC | STEP | Uda, yuk upu ton pepkusene. Arup pepmasen upu, ‘Deiyo ake, tenepkameng’ tenen, ukupmanto upu ton pepkusene. Ada, tenpu ngebodi, er mi sisa tep, “Ne depnyopda, ne taleamsi keca yuma dopropkamrume,” peiptudi, konum depyopda, er midi er nai bo taleramu keca cap, taleramre keca cap yuma dopropkamre. Dinino, angebo er mi metek mi tupa kure taru yumada, tali ngebo utopu kuramredi, tali pel melimna ngebo utopu kunkamre. Metek mi tupa kure taru neitamaida, er nai bo deptua peda, er nai bodi taleramu keca yuma kapul men doproptue.

Galatians 4

1 Uda, yuk upu ton pepkusene. Arup pepmasen upu, ‘Deiyo ake, tenepkameng’ tenen, ukupmanto upu ton pepkusene. Ada, tenpu ngebodi, er mi sisa tep, “Ne depnyopda, ne taleamsi keca yuma dopropkamrume,” peiptudi, konum depyopda, er midi er nai bo taleramu keca cap, taleramre keca cap yuma dopropkamre. Dinino, angebo er mi metek mi tupa kure taru yumada, tali ngebo utopu kuramredi, tali pel melimna ngebo utopu kunkamre. Metek mi tupa kure taru neitamaida, er nai bo deptua peda, er nai bodi taleramu keca yuma kapul men doproptue.

2 Angebo er mi kapul men nemre taru neitamaida, er nai bo deptua peda, amida tupa metek mi kurura cadi, yuk neng sun amutarapu kunkamre. Ada, ami er du yapu do, er tara neng do, sun dipu ami er nai bo taleramu keca, ange mi melimna tep kalekra taleamengepane, ami konum nepyopda, tonda er nai bodi teneamu taru konum kupyopda, anengdi ami talenkamre keca konum karepmengopda, ami er pedi er nai bo taleamu keca dopra talenkamre. 3 Aupu ukupmantonge pepmasentopu, nun tuai mutu kunup nesala yumada, milo nyapu utopu kuramepu taruda, tuai mutu mem keca deiyongepu talepra, akeca amutara kuramepu. Tonda Kain Jen Ngebo er amutarapu kuramepu. Allahdi, “Ne tep teka tenenkameng nesalada, akeca karenkamne,” pepra pediramu ngeda, kapul men dopropmepu.

4 – 5 Isok-isok yuma, sun amutara kuramepudi, tuai mem kecapu talepra kuramepu dinin, Allahdi, ‘Ataru ake,’ teneamutopu konum kupu pangeda, Allahdi er Mi Sisa dopra deipseue. Allah er mi Yesus dokotepseupa, Allah er Lek Sambala puto deiki di tenpu nerdi ami deipu. Anerdi Allah er Mi Sisa deipu taruda, nun Yahudi yala nesala yuma, Allahdi, “Ange kunkamrume, angeda men kunkamrume,” pepra deipupa, Musadi sekeiamseu upu talepra kuramepudi, amem upu amutara utopu kuramepu. Angetopu, ami Yesus peda, Musa sekeiamu upu amutara kuramu.

Musa sekeiamu mem upu amutara bukra kuramepu dinin, Allahdi er mi dokotepupa, ataru yaua deiyoda ake. Ada, Allahdi nun tep, ‘Musa sekamu mem upu amutara kunge nesalada, kunupkamne.’ Ne Mi Sisadi anesala kunupredi, mem keca amutara kunungai di loptapra lyepnedi, ‘Ne nyapu sisa kunkameng’ tenen, teka tenenge nesalada, telep kupra deipkamne. ‘Ukupnyopda, nedi ne nyapu sisa tep keteneiamsi keca yuma karepnepa, sundi akeca yuma dopropkamenge,’ teneamseudi, er mi Yesus dopra kareamseu.

6 Allahdi ange konum kupseua cadi, Yesus tep teka teneamrumpa, ukutaruda, Allah er nyapu sisapu konum kurume. Er nyapu kuruma tep, er Mi Sisa Yesus, er Lek Sambala dokotepseupa, sun dipru wekseudi tupa akurure. Er Lek Sambaladi, Allah tep, nun dipru neitamai di, “Ne Nai bo Allah,” perure. 7 Ange tep nengeda, arup ukupmanto upu deiki di pepmasentopu, ukutaruda, sunda tali pel melimna neng utopu men kurume. Angeda gum dinin, Allah er nyapu sisapu kurume. Allah er nyapu sisapu kuruma cadi, Allahdi sun tep, ‘Ne nyapu tep karenkamne kecada, aneng peda doronkamenge,’ teneserure.

‘Mok upu peteremna nengdi, Galatia nesala dopra, yuk mali bisi dubenung’ tenen, pepu upu

8 Uda, ne kayapu, menop taru Allah kapul men kael keamrum taruda, isok-isok weik ateng kouamseia deiki di, sun upupu gekeramrumdi, sun amutarapu kuramrume. 9 Ukuramrum dinino, ukutaruda, Allah er si konum kael keamrume. Uda, erdi sun tep konum lyepra dopropseudi, er nyapu keipseue. Allah er kure keca konum kael keamrum dinino, er upu taprumudi, menop taru taleamrum puto gum keca, pio mali kuramrum kecada, kange di ton cap talepbanmarumada, ware keca deiyo tep kurum do? Ukumum ngeda, ada, ‘Amali keca yuma tapmepu dinin, men di taleamsei isok, kange di ton cap ateng koupra talepsetenge’ tenen, kunmarumdi, Allah er tek sisi upu taprum do?

10 Allah er telep upu tek sisi peseretopu gum dinin, yuk bisi banmaruma di, ‘Ila mambul tumi ake, ila mambul war ake, ila mambul li taru ake, ila mambul keteng tamun ake’ tenen, tali keca tep si erepra kunmarumada, pio mali weik kurume. 11 Uo, nedi sun tep kware kupmaner kecada, ‘Yuk bisi lerekra banmanga cadi, ne Galatia tara nesala tep peterepsidi pel doramsinge yumada, mesum tep pel doramsi do? Apel doramsada, nong men kupkamre do, ange yuma tapkameng do?’ tenen, kware kunmanera tep, pepsene.

12 Uo, ne kayapu, sun damai yana peteremamsisi taruda, ‘Ne upu gekenkamneng’ tenen, sun kuramrum keca utopu ne ton talepra kuramsi. Ukupra kuramsa cadi, ukutaruda nedi moropsene. ‘Neda mem upu amutara kuna gum dipapu, ange yuma tapra, ukutaru dumsisi kun kecapu talepra kunetopu, sun peda utopu kunkamrume. Ada, mem upu amutara kuna gum di, ange yuma tapra, dumsisi kun kecapu talepra kunkamrum’ tenen, moropsene. Sundi mali keca dopra, ne nong deiki men deipmanerume. 13 Uda, sun kaele. Sun damai menmena yasa deiyoda, ila pu jeramneupa, bisi men benmanto kuramsa tep, sun damai yana, Allah er kai telep nimi lyemna upu peteremamsisi.

14 Ne pu jeramneupa, adeiki di ikin kuramseu dinino, ikin kupseua peda, sundi ne tep, ‘Angeboda tali ngebo cadi, erda nun songe’ tenen, men tamnerume. Ange gum dinin, nedi sun damai yasi taruda, sundi ne tep weika di meliamnerume. Ada, ukupmanto, Allah er im deiki pel melimna ngebo malaikatdi, sun damai yatuopda, tonda, Yesus Kristus er peda sun damai yatupa, er tep, “Telepe,” pepra, buru karepra meliamtuma utopu, sundi ne tep ange utopu pio telep kupra meliamnerume.

15 Ukuramnerum dinin, ukutaruda, sun men di kange deipra pingpinga di telep kuramrumada, ware keca deiyo tep ange konum gum kupseu do? Ne peteremamsisipa, kange deiprap pingpinga di, telep kupra meliamnerume. Ukuramneruma deiki di, ne kael kepsi. Ne melimna tep, sun pe asuru lukra karepnetumtoda, tek sisi karepmanetum dinino, angeda men kupmanto keca. 16 Peteremamsisi taruda, ukupra ila di kange deiamnerum dinino, ukutaruda, sun mali kupmarumnge tep, tek sisi upu di wenepra pepmasena tep nengeda, sundi, ‘Angeboda, nun songe,’ tenenkamnerum do, gum do?

17 Ukutaruda, “Allahdi, ‘Angeda ukunkamrume, angeda men kunkamrume,’ peipupa, Musadi sekamu mem upu talepra dombanupa deiki dipu, Allahdi lyepkamsere,” pepra, peteremsenge nesalada, ukupra tenenunge. ‘Galatia tara kunge nesalada, nun upu gekepsengedi, nun tara keprongedi, nun tep domyankamseng’ tenen, kange deipra peteremsenung dinino, ukununga deiyoda, telep kun keca tep gume. Gume, sun tenenungada, ake. ‘Galatia tara kunge nesaladi Paulus cap, er kikiman kungedi, peteremnung neng cap tep taptengedi, dipru wilipmengopda, nun tarapu keprongedi, nun domyankamsenge. Nun teppu kange deipra, nun pelpu pio pe deipra donkamsenge’ tenen, anengdi kange deipra sun tep peteremnunge.

18 ‘Nongda ukupra kunkamre’ tenen, deiyo keca telepngepu kuptuopda, “Yuk nengdi peteremsengepa, sun tep kange deipra, sun pel tep pe deipra donada telepe pua,” pepsetene. Ada, ne cap, sun cap kikiman kupe tarupu gum dinin, “Ataru-ataru yuma ukunada telep pua,” pepsetene. Dinino, yuk nengdi sun Galatia tara kurum nesala peteremsenge deiyo ngeda, mali kuptuopda, “Ayumada mali pua,” pepsetene. Ne kangeda, anengdi peteremsenunga deiyoda, mali kurure.

19 Uo, ne kayapu, sunda bicau tenesenuna cadi, ‘Ne nyapu utopu nesala kununge,’ tenesenune. Ukupmantoda, nerapudi sun nyapu deipkunge taru, mi deiyo pu jeramretopu, nedi sun tep, ‘Uo, Galatia tara nesalada, Yesus Kristus er kure keca yuma kael keptengedi, sun dipru wisiptue’ tenen, pio putanerepa, sun tep kange mun kange dounune. 20 Tonda, ‘Ukutaruda, ne cap sun cap kikiman buktepedi, wenemna upu utopu pena gum dinin, bouna dipu, telep upupu pepsetene’ tenen, pio putanerure. Ada, sun yuk bisi gonga kepra dombanmaruma tep nengeda, ‘Deiyo ware keca deiyo tep kunung do?’ tenen, kange wang-wang penerure.

Hagar cap, Sarah cap tep, pepu upu

21 Uda, yuk upu ton dukdongopra pepkusene. Sunda, ‘Gume, Allahdi, “Ukunkamrume, angeda pio men kunkamrume,” peipupa, Musadi sekeiamseu upu yumada, amem upu amutara bukmepedi, akecapu talepra kunkamepe,’ tenenmarum nesalada, tenipetepso. Musa sekeiamu upu neitamai akapu upu peseryada, moupra men tenenmarumdi, men kael kemarum do? 22 Atep moupra gekepkurume. Aupu neitamai sekami keca ton lape pepkusene. Abrahamdi er sal nyapu butene deipu. Ton mida erdi co bo deiki kunupudi ^{▼▼kunupudi Co bo deiki kunumami nesala kael kemna tep, lap pena upuda, nomor 36 dirume.} taleamu ner, ada er pel dona tep tali melimna ner, er sida Hagar, Abrahamdi Hagar dopudi, kikiman kuramreipa, mi tenpu deipu. Ton mi butene ngeda, ada Abraham men di domu ner, er sida Sara. Saradi, amenda taru mi tenpu deipu. Aner Sarada, yuk nengdi, “Nun pel mesum dipapu dopseo,” pepra, kunupidi pel dimamemei ner men kuramu. Sarada er kange dipapu kuramu nere. Yuk neng co bo deiki di aner men kunumami.

23 Abrahamdi co bo deiki kunupu ner, er pel melimna ner, Hagardi deipu mida, ada, nimi yumadi sun domenge nerapu kikiman kuramengepa, nyapu deriramengtopu deipu. Aner Hagarda wisi gum ner cadi, mi deipu. Dinino, Abraham er menop taru di domu ner Sarada, pio wisi ner cadi, Saradi deipu mida, tali nyangna dipu men deipke. Amida, Allahdi Abraham tep, ‘Mi karepkamkene,’ pepra pedina upu pediramnga deiki di, Allah er puto melipka deiki dipu, Saradi ami deipu.

24 Uda, amenop taru kuramu kecada, Allahdi, ‘Adeiki di amenda taru kunkameng nesala ange gekepmengedi, kael kepkamenge,’ teneamu. Atep, akeca yumada, ukupmanto upu utopu kurura cadi, deiyo ton akapmare. Anerapu buteneda, tek sisi kuramrei dinino, Allahdi anerapu butene kuramrei keca deiki di, ‘Amenda kunkameng nesaladi, mambul keca kael kepkameng’ tenen, peten kemdina utopu keipseue. Akeca nong neitamai ngeda pepkusene.

Anerapu buteneda, ada Allahdi, nimi lyemna tep, “Ukunkamsene,” pepra, pedina upu butene dinin, yuk-yuk pediramunge utopu kuramrei.

Allahdi, “Ukunkamsene,” pediramu upu tenpu ngeda, ada Sinai Mutu deiki Allahdi sun Israel yala nesala tep, “Ukunkamrume, angeda pio men kunkamrume,” pepra deipupa, Musa gekepudi mem upu sekeiamseu. Amem upu talepra dombaramenge nesalada, yuk nengdi co bo deiki kunupmengedi, pel weik dimamenge nesala utopu kununge. Musa sekamu mem upu amutara bukra kunge nesalada, sun nin utopu nerda, Hagar kuramu.

25 Atep Hagar tep nengeda, Arab mutu neitamai dinin, Sinai Mutu deiki Allahdi mem upu karepunge tep, ‘Ada Hagar utopu,’ tenenkamrume. Tonda, Hagarda, ila ati arum dominge Yerusalem mutu neitamai kunge nesala utopu kurure. Deiyoda, Yerusalem kunge nesalada, Hagar kuramu utopu kununge. Ada, yuk nengdi co bo deiki kunupmengedi, pel weik dimamenge nesala utopu kununge. Ange utopu, Hagar peda, menop taru Abrahamdi co bo deiki kunupupa, er amutara bukrap tali pelpu doramu. Hagar utopu kunge nesalada, mem upu talepra kununga cadi, ikin keca amutara tupa kununge.

26 Dinino, nundi Yesus tep teka tenenung nesalapuda, ange utopu men kunupe. Ada tali tep men pepsene. Deiyoda, Allahdi im deiki Yerusalem keteneipu ngeda, nun nin utopu kuserure. Ada ukupmanto upu utopu tep pepsene. Im deiki Yerusalem mutu kunge nesalada, yuk tali neng amutara bukra men kununge. Sun kange dipapu kununge. Mem upu talepra men kununga cadi, ikin keca amutara men kununge. Nun peda, mem upu talepra ikin keca amutara men kunupa cadi, im deiki kure Yerusalem mutuda, nun nin utopu kuserure.

27 Apepmasen upu deiyo ton akapmare. Ada, apepkusen upu deiki di kael kemnupe. Aupuda, ake.
‘Kanda, nyapu derina gum tep, you nerda, ila di kange deipra upu ila di penkamrume. Kanda mi deiyo pu men jeamkeu nerda, ukutaruda pingpinga di upu ila di penkamrume.
Ada tali tep gume. Deiyoda, nimi domu nerda, er nyapu yambula dipu deiprepa kunkameng dinino, you kuramu nerda, er nyapu pio weika di deiprepa, gung weika di kupbankamenge. Allahdi pepu.’ (Yesaya 54:1)

28 Uda ne kayapu, Allahdi Abraham tep, “Kan mi karepkamkene,” pepra pediramu upu deiki di, er ner Saradi, Isak deipupa kuramutopu, sunda, Allahdi pediramre upu deiki di gam kurume. 29 Pumun taruda, Abrahamdi Hagar dopudi, kikiman kuramreiya deiki di Hagar deipu mi er sida, Ismael deipu. Ton mida, Allahdi Abraham tep, “Kan mi karepkamkene,” pepra pediramnga deiki di, Allah er Lek Sambala puto deiki di melipupa, Saradi Isak deipu.

Tali pel melimna ner Hagar domudi deipu mi, Ismael kuramu. Ismaelda, nepbaramnganen, konum nepu dingeda, Saradi deipu mi Isak tep, er nong deiki ikin keca weika di deriramu. Ange menop taru kuramutopu, ukutaru peda, utopu kunupe. 30 Sun teka tenena gum, tali nengdi nun teka tenenup nesala tep, nun nong deiki ikin keca weik derisengepa, ikin kunup dinino, Allah upu neitamai sekaminge peserurada, tupa tenenmarum do? Aupu ake.
‘Gume. Co bo deiki kunupudi, er pel tep tali melimna ner cap, anerdi deipu mi cap, tapmemdi, bura dokotepo. Kan men di dopmum ner, er kange dipapu teneretopu kure ner, Saradi deipu mi, amenda dopropkamre kecada, tali melimna ner, Hagardi deipu mi ton, akeca pio men doproptue. Ada men kupmanto. Allahdi pepu.’ (Kejadian 21:10)

31 Apepmasen upu yuma akapmara tep nengeda, ne kayapu aupu ton pepsene. Nunda, co bo deiki kunupmengepa, pel weik dimamengepa, tali mesum dipu pel doramu ner, Hagardi deipu mi utopu men kunupe. Gume, nunda, co bo deiki kunumna gum dinin, er kange dipapu kuramu ner, Saradi deipu mi utopu kunupe. Ada, nunda mem upu talepra kuramupka deiki di, ikin keca amutara kuramepu dinin, Yesusdi nun tep loptapra lyepseua tep, ukutaruda, mem upu cap, ikin keca cap amutara men kunupa tep, aupu pepmasene.