Gal 5 | XteSC | STEP | Ateng kouamseu keca neitamai di, Kristus lyepseudi loptapseue. Lyepra loptapseua deiyoda, ‘Musa sekeiamu upu mem upu amutara bukmengedi, aupupu talepra pio dombankameng’ tenen, men lyepseue. Ange gum dinin, ada, ‘Lyepnedi, mem pel dona gum di, tali kange doupra dumsisipu kunkameng’ tenen, Kristusdi loptapra lyepseue. Ange tep nengeda, yuk-yuk keca, mem upu utopu keca tapakra kuna gum di, dimpeprap puto di kunkamrume. Yuk nengdi, “Akeca-keca pel dopmumya deiki dipu, Allah er kange deipkamsere,” pesenge upuda, gekena gume. Ada, ‘Ateng koupra deriramenga utopu kusengedi, nun nong deiki ikin keca tapakra derisenunga’ tenen, moupra kalengkamrume. Aupu utopu upuda gekepra dombana gume.

Galatians 5

“Yesusdi lyepra loptapseu ngeda, tapra yuk mem keca talepra kuna gume,” pepu upu

1 Ateng kouamseu keca neitamai di, Kristus lyepseudi loptapseue. Lyepra loptapseua deiyoda, ‘Musa sekeiamu upu mem upu amutara bukmengedi, aupupu talepra pio dombankameng’ tenen, men lyepseue. Ange gum dinin, ada, ‘Lyepnedi, mem pel dona gum di, tali kange doupra dumsisipu kunkameng’ tenen, Kristusdi loptapra lyepseue.

Ange tep nengeda, yuk-yuk keca, mem upu utopu keca tapakra kuna gum di, dimpeprap puto di kunkamrume. Yuk nengdi, “Akeca-keca pel dopmumya deiki dipu, Allah er kange deipkamsere,” pesenge upuda, gekena gume. Ada, ‘Ateng koupra deriramenga utopu kusengedi, nun nong deiki ikin keca tapakra derisenunga’ tenen, moupra kalengkamrume. Aupu utopu upuda gekepra dombana gume.

2 Ne Paulusdi pepkusen upuda, moupra gekeprume. Yuk nengdi pepsenga deiki di, ‘Den bam bol deiki tarange seksenga deiki dipu, Allah er kange deipseredi lyepkamsere’ tenen, teka teneprumupa, sun den bam bol seksengopda, Kristusdi lyepseuada, sun tep nong men kupkamre. Talipu kuptue. Ada, ‘Den bam bol deiki tarange sengna deiki di lyepsetue,’ teneruma tep pepsene. 3 Tonda, aupu ton pepsene. Ware ngebo do yuma, Musa sekamu mem upu deiki peseretopu, ‘Den bam bol deikinge sengna deiki di, Allah lyepkamnere’ tenen, teka tenepredi, akeca deikipu er kange derirur ngeboda, adipapu Musa sekeiamu upu yuma talepra dombankamre. Amem upu yuma talepra dombankamre. Ton upu talepra, ton upuda tapra men kuptue.

4 Sunda, ‘Musa sekeiamu upu dombanupa deiki dipu, Allahdi nun tep, “Sunda dumsisi kun nesala,” pepra, telep kudinkamsere’ tenen, kurume. Ange tenena deiki di, sunda, ‘Kristusdi pel dopseuada dakwapye’ tenen, tamameng nesala kuramengtopu, konum kurume. Sunda pio yuk kurume. Ukumumnya deiki di, Kristus er kange dipapu bicau tenepseudi, lyepseuada, konum taprumdi, amnyo karikra, yuk bisi konum banmarume.

5 Sundi ukupra kunmarum dinin, nunpuda ange men kunupe. Nunda, Allah er Lek Sambala puto di melimserepa, Yesus tep teka tenenupa deiki di, ‘Allahdi nun tep, “Sunda dumsisi nesala kununge,” pepra telep kupra deipkamsere’ tenen, teka tenenupe. ‘Ukupra tek sisi kunkamsere’ tenen, teka tenepedi, ‘Dumsisi kupra deipkamsere ngeda, dan taru kupkamser do?’ tenen, kange deipra pio dinapu kunupe.

6 Yesus Kristus cap dipru dukdongopra kikiman kunupa neitamaida, Allah diseredi er kangeda, ‘Den bam bol deiki tarange sengna pe, sengna gum peda, mambule pio gume. Ange pe, ange pe nong men kupkamre keca tepa,’ tenerure. Allah diseredi, kange derinkamser kecada, tenpu kecapu kurure. Ada ake. Yesus tep teka tenenupa deiki di, yuk nesala tep, ‘Bicau’ tenen, makunapu kupepane, Allah diseredi, adeikipu kange deriserure. Mambul ngeda, apua. Yuk ton gume.

7 Uda, kamet perameng nengdi, ‘Bisbisa kapra sepra bisipropepa, menenga keca karepkuseng’ tenen, yuk keca tenena gum di, puto di sepdaro baramengtopu, menop taruda sundi Allah er tek sisi upu gekepra, telep kupra baramrum dinin, ware nengdi yuk upu peteremamseiya deiki di, upu seksei do? Sundi, Allah teka tenenange puda, warya tep tapmarum do? 8 “Mem upu talena cap, den bam bol deiki tarange sengna capda pio mambule,” pepra peteremenge upu utopu ngeda, pio yuk kurure. Aupuda, Allahdi, ‘Aneng lyepkamne’ tenen, upupseu ngebodi peipupa, men peteremsenunge. Aupuda, Allahdi men peserure. Gume, yuk mok upu penge nesaladi, sun kange dipapu aupu peteremnunge.

9 Aupu tapakra peteremsengepa, ‘Mali kupberum’ tenen, adomon upu ton cap pepsene. Lumdongona gume. Roti kwaneng nena deiyo keca, er sida ragi, metekanunpu roti bun pumbon dongomenge dinin, nepbanmaryanen, amendada, aroti kwaneng bun neitamai yuma embaryopda, weika di nerure. 10 Uda, nun Deiyo Ngebo Yesus cap dipru dukdongopra kunupa cadi, nedi, ‘Mali upu metekanun peterepsenga peda, yuma mali kudiserure,’ tenenune. Utenenetopu, ne kange bongtona gum di, ‘Sun Galatia tara nesala peda, utopu tenenkamenge,’ tenesenune. Tonda, mali upu pesere ngeboda, ne walwal dinino, ne kangeda, akeca peteremserepa, kange wang-wang pena cap, kange tenimtona cap kudinmaser ngeboda, Allahdi wenepkamre. Erdi peteremsere upu deiki di, kange wang-wang kuserya tep nengeda, Allahdi angebo tep amenda wenepra, dokoteprepa, ikin kunkamre.

11 Ne kayapu, sun ton tenipetepso. “Den bam bol deiki tarange sengna deiki dipu, Allahdi kange deipra lyepkamsere,” pepra, tupa peteremamtene teptoda, warya tep akeca teka tenepra, talenge nengdi, ikin keca ne nong deiki tupa derinenung do? Sun penge upu utopu peramtenetoda, ikin keca ne nong deiki men deipnetenge. Angeda yaptenge. Dinino, nedi, “Yesus sengdin co deiki popipa, depseua deiki dipu lyemserure,” pepra peteremne pangeda, adeiyo tep, anengdi yu kuprepa, ne nong deiki ikin keca derinenunga cadi, aupu tapra den bam bol deiki tarange sengne upu dopra petereptene teptoda, tulum derinenunga deiyo keca gum kuptue. Deiyo gum kuptuopda, ne nong deiki ikin keca derinenung keca peda, gum kwamtue. Dinino, tupa mali kudinenunga cadi, ‘Den bam bol deiki tarange sengne upu men peteremrure’ tenen, kael kemnerume.

12 Atep, nedi aupu men peteremnun dinino, yuk nengdi sun Galatia mutu nesala tep, aupu peteremsenga deiki di, kange wang-wang pena cap, koudana cap kemdisenunge. Anesala tep nengeda, aupu ton yu di pepkusene. Ne kangeda, sundi, “Den bam bol deiki tarange sengnada mambule,” pepra peteremnunga cadi, den bam bol urup tarangepu gum dinin, sun pedi sun penge tep, den deiyo tara yuma sektapdatengopda, ne kange deiptene.

“Allah er Lek Sambala puto deiki melimserepa, dumsisi kunkamrume,” pepu upu

13 Uda, ne weit yapu utopu nesalao, Allahdi upupseua deiyoda, ‘Ateng kouamu keca loptapnepa, mem pel dona gum di, tali kange doupra dumsisipu kunkameng’ tenen, loptapra lyepseue. ‘Ukunkameng’ tenen, loptapra lyepseu dinino, apepkusen upu utopu men tenenkamrume.

Ada, ‘E, ukuda Yesusdi konum lyepseua cadi, nun kange dipu tenenup keca cap, nun nong putare keca cap, angepu tenepra tali lupra mali kunkamepe’ tenen, men kunkamrume. Ange pio gum dinino, sun yumadi, yuk nesala yuma tep, bicau tenedamumdi, makudanapu kunkamrume. 14 Musa sekamu mem upu weike akapmar dinin, aupu yuma dukdongopra, ila mambul deiyoda tenpungepu kurure. Allahdi amambul upu peipseu ngeda ake.
‘Sun pedi, sun pe putan keca tep, ‘Angeda mambule’ tenen, kumumtopu, sun cap kikiman kurum nesala yuma tep, bicau tenepra makudanapu kunkamrume.’ (Imamat 19:18)

15 Kange moupkamrume. Ukutaru kunmarumtopu, kange yuk-yuk tenepmumdi, yu kuprepa, upu deiki di pangdana weik tupa-tupa kupmumyopda, sun pedi, sun pe tep, pio mali kudidankamrume. Atep, amali kunmarum keca yumada, tapkurume.

“Allah er Lek Sambala puto kareserya deiki di, dumsisipu kunkamepe,” pepu upu

16 ‘Sun pedi sun pe tep mali kweipdarum’ tenen, aupu ton pepkusene. Allah er Lek Sambala melimserya deiki di, er puto kareserepa, adeiki di kuprumyopda, tuai nesala kupedi, nun kange dipru neitamai mali keca kurya di, dipru gidoserepa, mali keca putaserenge akaptua peda, ange gekepra men kunkamrume. 17 Nunda nimi tuai nesalapu kunupa cadi, nun kange dipru neitamai mali keca akamserya di, dipru gidoserepa, mali keca putasere ngeda, pio yuke. Allah er Lek Sambaladi, nun dipru taleserepa, telep kecapu putasere ngeda pio yuke. Aputana-aputana pio yuk-yuk tep, nun nimi kange dipru cap, Allah er Lek Sambala cap, podana utopu kumepe pangeda, nun kange tenena di, ‘Uo, telep kun keca kuptene’ tenen, putaramsetu ngeda, tek sisi men kuptepe. 18 Dinino, ware neng do yuma, Allah er Lek Sambala er puto di talerepa, telep kunge nesalada, Musa er sekeiamu mem upu amutara bukra men kununge.

19 Uda, nun yuma kaele. Nun nimi tuai nesala kupedi, nun kange dipru neitamai mali keca akamserya di, dipru gidoserepa, mali kuramep kecada katuai kuserure. Amali kun kecada ake. Tali-tali nyangdana cap, mali kun keca putarepa tenena cap, dipru mali kuprepa, pio mali-mali kuna cap, 20 Yuk tali keca tep, ‘Nun Nai Bo’ tenen, isok si eremna cap, yuk neng tep gereng dona cap, yu kuprepa, yuk neng tep, ‘Nun pio song,’ tenena cap, kange yuk-yuk tenengedi, tulum kudana cap, ‘Ne kabo kure keca, nepu kuptene’ tenena cap, yu weik kuprepra upu ila di pena cap, ‘Nepuda ereipnetengepa, ila ngebo kuptene’ tenen, putana cap, deiyo nengdi, “Ukunkamepe,” penge upu yanipra, “Angeda gume. Nun yuk kunkamepe,” pepra kuna cap, dipru wilimdangedi, ‘Sun yuk, nun yuk’ tenen, yuk-yuk kuna cap, 21 tonda, ‘Uo, ne kabo talere kecada, nedipu taleptene’ tenena cap, putana cap, yu me weika di jengepa, kange yawaramamrepa kuna cap, nesala weik bulupmengedi, tali-tali nyangdaramengenge cap, uda, apepmasen keca utopu kun keca yumada akapmare.

Ne kayapu, men di, “Kange moupso, ukuna meme,” pepra wenemamsisitopu, kange di ton cap wenepsene. Apepmasen keca kunge nesalada, Allahdi nun tep lyepra talenkamserenge cap, ataruda karenkamserenge cap, tek sisi men dopropkamenge. Ukupra mali-mali tupa kunge nesalada, Allahdi men talenkamre.

“Allah er Lek Sambaladi kareserepa, telep kun kecada ake,” pepu upu

22 Uda, amali weik kuna gum dinin, telep co di, telep co du mouramretopu, Allah er Lek Sambala, er puto di melimserepa, kunkamep kecada pepkusene. Atelep kun kecada, ake. Ada yuk neng tep bicau tenepra makudana cap, kange deipra pingpinga kuna cap, kange tenimtona gum di kange deipra kuna cap, yuk nengdi nun tep mali kupsenga peda, dipru bouna di kuna cap, yuk neng putapre keca tep melimna cap, dumsisi kuna cap, ikin kupserya peda pel tamna gum di, pe deipra pio pel dona cap,

23 Yuk nengda, ‘Uo, tenepnung’ tenen, bouna di telep upu pena cap, ‘Mali kupnun’ tenen, dipru kalekdana kuna cap, ange yumada, Allah er Lek Sambala er puto di melimserepa, teleppu kunupe. Akun keca yuma tep nengeda, pio telep kun keca cadi, ‘Nesala ban-ban yumadi, ukupnung’ tenen, nimi yumadi upu men sengnunge. ‘Ukunada telepe pua,’ tenenunge.

24 Yesus Kristus tep teka tenepmepedi, er cap dipru dukdongopra kupepa, erdi nun dipru taleserur nesalada, ukunupe. Tali tuai nesala kupedi, nun kange dipru neitam mali keca kurya di, dipru gidoserepa, mali keca putasere ngeda, akapmar dinin, amali kun keca men kunupe. Deiyoda, Yesus Kristus sengdin co deiki depu taruda, nun cap dukdongopseua cadi, er depka deiki di, nun ton depmepu. Ada, nun cap, Yesus cap dipru dukdongopseua deiki di, nun mali putasere ngeda popra, yanitamna utopu kupmupke.

25 Nun teka tenenup nesalada, Allah er Lek Sambala melimserya deiki di kunupa cadi, Allah er Lek Sambaladi dumsisi kupbarepa, nunda dombanapu kunkamepe. Er kuretopu, nun peda utopu kunkamepe. 26 Nunda, kange dipru erepmepedi, ‘Nunda pio telep nesala’ tenena cap, ‘Ne kabo talere kecada, nepuda taleptene’ tenena cap, yu kupserepa, mali kudidana cap men kunkamepe.