Gal 6 | XteSC | STEP | Ukuda yuk upu ton pepkusene. Ne weit yapu utopu nesala, sun kayapu nengdi mali kupmengepa, epmumyopda, Allah er Lek Sambaladi, sun dipru talere nesala kuruma cadi, sun bouna di mali kupmange nesala tep wenepmumdi, lepsikra peteremkamrume. Yu upu deiki di men wenemkamrume. Mali kunge nesala tep, bouna di wenemkurum dinino, sun pe dipru neitamai mali keca gidoserepa, ‘Mali kupnup’ tenen, sun pedi sun pe tep, pio moupra kalengdankamrume.

Galatians 6

“Yuk nesala yuma tep, teleppu kudidankamrume,” pepu upu

1 Ukuda yuk upu ton pepkusene. Ne weit yapu utopu nesala, sun kayapu nengdi mali kupmengepa, epmumyopda, Allah er Lek Sambaladi, sun dipru talere nesala kuruma cadi, sun bouna di mali kupmange nesala tep wenepmumdi, lepsikra peteremkamrume. Yu upu deiki di men wenemkamrume. Mali kunge nesala tep, bouna di wenemkurum dinino, sun pe dipru neitamai mali keca gidoserepa, ‘Mali kupnup’ tenen, sun pedi sun pe tep, pio moupra kalengdankamrume. 2 Sun ikin kusere keca tep nengeda, sundi sun kayapu neng tep, kikiman talepra melimdankamrume. Yuk nesala ikin kunge taruda, sundi melimkamrume. Ukuprumyopda, adeiki Kristusdi, “Ukunkamrume. Yuk nesala tep bicau tenepra makunkamrume,” pepra deipseu upu utopu, tek sisi kunkamrume.

3 Ware ngebo do yuma, er mambul ngebo kepra men kure taru dinin, er pedi er pe tep, ‘Neda ila ngebo kunune,’ tenepre ngeboda, er pedi er pe tep mok upu pepdaredi, mok upupu teka tenerure. Tek sisi erda tali ngebopu kurure. 4 Sun yuma, yuk-yuk dinin, sun pe kurum keca tep nengeda, ‘Telep kunun do, mali kunun do?’ tenen, kurpetedankamrume. Ukupra kupmum dingeda, sun pedi kumumdi, sun telep kun keca tep, ‘Ange telepe’ tenen, kange deipkamrume. Ada yuk neng, sun kunge keca dipetepra, ‘Ange telep, ange mali. Angeda ne kunetopu kupmaue. Angeda, nenge utopu gum dinin, erda pio yuk kupmare,’ tenena gum dipapu, sun pedi, sun pe kun keca teppu, dipetepdamumdi, moupra kunkamrume. 5 Apepmasen upu deiyoda ake. Sun yuma yuk-yuk dinin, sun pe pelpu dopra telep kunkamrume. Yuk neng deikipu kuna gume.

6 Tonda, ware neng do yuma, yuk nengdi Allah upu peterepmengepa, gekepredi kael kemre ngeboda, apeteremna nengdi, pel donga deiki di, akeca kael kemrura cadi, erdi er talere keca neitamai bokra, er peteremna deiyo neng tep, telep keca melipra karenkamrure. Ange utopu, sun yumadi, sun peteremna deiyo neng tep, telep keca melipra karenkamrume. 7 Mok upu gekepra, teka men tenenkamrume. Allahdi akeca-keca yuma diserur ngebo cadi, ‘Epseredi wenepserur’ tenen, men iniptepe. “Yal keca bolokmengepa, akecapu bolokmare pangeda, kiramenge,” perameptopu, sun kumum keca utopu, amenda taru ayala kecapu, nong kupbankamsere. Malipu kuprumnyopda, mali kecapu kupbankamsere. Telep kuprumnyopda, amenda taru telepngepu kupbankamsere.

8 Apepmasen upu tep ngeda ake. Ware ngebo do yuma, er kange dipru neitamai mali kure kecapu tenepra, pel dopbaramre pangeda, amenda taru Allahdi angebo tep, wenepredi poptapkamre. Er dipruaida, mali kecapu kuramupa, mali kunapu kuramnga deiki di, amenda taru peda, wenemna kecapu dopropkamre. Dinino, ware ngebo do yuma, ‘Allah er Lek Sambaladi kange deipkamner’ tenen, Allah er Lek Sambaladi pere upupu gekepra, pel dopbaramre ngeboda, amenda taruda, gam kuna deiyo keca dopropredi, pio gam kunkamre. Ada, Allah er Lek Sambaladi, gam pio kun keca kareprepa, dopra pio gam kunkamre.

9 Nun yumadi, ‘Gume, dumsisi kuna cap, yuk nesala tep telep kupra makudana capda, nun dabale’ tenen, men yamdongonkamepe. Telep kunada men tamkamepe. Telep kunada, dabal kupserepa, ‘Nun song’ tenen, men tapmepedi, pio teleppu kupmepyopda, amendada, Allah er teneamu taru konum kupyopda, akeca yuma nong kupkamra tep, men yamdongonkamepe. Allahdi keteneiamseudi karenkamser keca, amenda taru dopropkamepe. 10 Ange tep nengeda, go tupa kapsere taru yumada, yuk neng sun putan keca do, ikin kupre taru do, epmepe dingeda, anesala tep bicau tenepra makunkamepe. Nesala yuma tep bicau tenepra makunkamep dinin, pio weika di bicau tenepra makunkamep nesalada, Yesus tep teka tenengepa, nun weitapsilip utopu keipseu nesala tep, bicau tenepra makunkamepe.

“Ila mambul kecada, Allahdi ukupu kange dipru kareserya deiki di, dumsisi kunupe, ange pua,” pepu upu

11 Uda, sun yuma asurat nong deiki dipetepso. Paulus ne pe buru dipu asurat sekeipmasena cadi, huruf ilange di sekmasene. 12 Sun yuk nengdi, “Gume, sun den bam bol deiki tara ngeda, adipapu sekrumpa, adeiki di, Allahdi, kange deipkamsere,” pepra peteremsenge nesalada, sun nong bol deiki kecapu tenengedi penunge. Anengda utenenunge. ‘Den bam bol urup tarange sekmepyopda, yuk nengdi, anengda telep neng, tenenkamsenge’ tenen, aupu peteremnunge. Den bam bol urup tarange sengnunga deiyoda, tenpupu kurure. Ada ake. “Gume, Yesus Kristus sengdin co deiki popipa, depseua deiki dipu, teka tenepmepepa, Allahdi lyepkamsere,” pepra peterepmepyopda, ‘Sun Yahudi yala deiyo nengdi wenepsengedi, nun nong deiki ikin keca derisenunge’ tenen, kununge. Ange tep, “Den bam bol deiki tarange sengnada tupa mambule,” penunge.

13 Upenung dinino, ange ton tenipetepso. Sun den bam bol deiki tarange konum seki neng peda, Musa sekeiamu mem upu, ton tapakra sekamu ngeda, aupu yuma talepra men dombanunge. Aupu yuma talepra men dombanung dinin, anengdi sun Galatia tara neng tep, “Sun den bam bol deiki tarange adipapu sekrume,” pesenunge. Aupu pesenunga deiyoda, sun nong bol deiki pel domumpa, sun tara neng gekepmengopda, adeiki di sun Galatia nesala tep, kange deipra gemepmengedi, sal nong-nong kunkamenge. Atep, aupu pesenunge. Deiyo yuk di gume.

14 Nedi ware keca do yuma tep, kange deipnedi markapang men kunkamne. Dinino, tenpu keca teppu, si erepra kange deipnedi, markapang kunkamne. Ada, nun Deiyo Ngebo Yesus Kristus sengdin co deiki popipa, nun lyemna tep depseunga tep nengeda, kange deipra, pingpinga di markapang kunkamne. Yuk keca yuma tep pio gume. Yesus Kristus sengdin co deiki popipa, ne tep depneu tarada, ne cap dukdongopneudi, ne yo pununa tep depneue. Ne lyemna tep konum depka cadi, adeiki di ne kangeda ake. ‘Tuai mutu kure keca, mali keca yumada, ne tep nengeda, akeca yuma konum gum kupmare cadi, ne dipru gipropnetudi, mali kupra men deipnetue,’ tenenune. Tonda, ‘Ne tenenunada, tuai kure keca, mali keca yuma tep nengeda, pio men putankamnere’ tenen, kunune. Neda, konum deami nesala akeca yuma men putaretopu kunune.

15 Uda, kange di ton cap pepkusene. Den bam bol urup tarange sengmenge keca pe, men sengmenge keca peda, mambule pio gume. Akecada tali kecapu kurura cadi, nong men kupkamre. Ila mambul kure kecada tenpu pua. Ada, Allah er kangeda, erdi ukupu kange tenenange cap, ukupu dipru cap kareserepa, dumsisi kunup ngeda, angepu mambul kurure. Akonuma. Yuk ton gume. 16 Aupu pepmasentopu, teka tenepra dombankameng nesala tep nengeda, ‘Allahdi anesala tep, kange tenimtona gum, pio kange deipra telep kuna cap, uda, nun mali kupetopu adipapu wenepra men poserur dinin, bicau teneseredi, er kange dipapu melimsere keca cap karenkamsere’ tenen, sun tep Allah morosenune. Tonda, Allahdi, ‘Anesala yumada, ne weamsi nesala Israel nesala utopu kununge,’ tenesere nesala yuma tep, ‘Er kange dipapu melimsere kecapu karenkamser’ tenen, sun tep Allah moronune.

17 Uda, asurat gawal dangna tep upepne. Yesus er kai telep upu, nimi lyemna upu peteremamsipa, mali nengdi, ‘Aupuda nun song’ tenen, bongopra poramnei pangeda, ne nong bol deikida, dila weik tupa kapmanera cadi, yuk nengdi ne tep, ‘Erda tali ngebo’ tenen, ne nong deiki ikin keca derina gume.

18 Uda, nun Deiyo Ngebo Yesus Kristusdi, bicau tenepra er kange dipapu melimserepane, ‘Sun kange dipru yuma telep kupra deipkamser’ tenen, sun tep Allah moronune.

Atep ne weit yapu utopu nesalao, ‘Apepmasen upu tek sisi kunkamre’ tenen, ne Paulusdi “Amin,” pepsene.

Telepe akonuma, acapu deipne.