Gen 12 | XteSC | STEP | Amendada, Allah er si Yahwehdi Abram tep upepu. “Abramo, kan kurum mutu cap, kan yala neng cap, kan nai sisa ati kunge neng cap, sun nyapsilip yuma tapra, nedi benbenepkamken mutu benkurume,” pepu.

Genesis 12

1 Amendada, Allah er si Yahwehdi Abram tep upepu. “Abramo, kan kurum mutu cap, kan yala neng cap, kan nai sisa ati kunge neng cap, sun nyapsilip yuma tapra, nedi benbenepkamken mutu benkurume,” pepu. 2 Upepu dingeda, apedina upu ton cap dukdongopra pepu. Allahdi, ‘Angebo telep kweipkamne’ tenen, Abram tep pepu upuda ake. “Nedi kan tep, pio telep kweipkenedi, ne melimkenepa, kandi deipmempa, dadeipdanen baramenganen, deipkameng nesala, pio weik kupbankamenge. Anesala yumada, sun apu bo kunkamreme. Ne puto deiki di, kan si ila di ereipkenepa, nimi yumadi kan tep gekenkamenge. Nedi melimkenepa, kan deiki di yuk nesala weika di telep kupra deipkamne.

3 Ware nesala do yuma, sundi kan tep, ‘Angebo telep kunkamre’ tenen, telep upu pepkengedi, telep kupra deipkengopda, nedi tamupra aneng teppu, telep upu pepnedi, telep kweipkamne. Ange utopu, ware nesala do, sundi kan tep mali upu pepra, kan nong deiki ikin keca deipmengedi, kan tep wipkengopda, nedi aneng teppu, tamupra sun nong deiki ikin keca derinkamne. Anesala sun wenemna tep wipkamne. Nedi melimkenepa, kan deiki di yuk nesala nimi tuai nesala mutu ban-ban yuma tep, telep kupra deipkamne.” Allahdi Abram tep pedina upu pepra deipu.

4 Allah er si Yahwehdi Abram tep, aupu pepka tep nengeda, Abramdi Haran mutu tapra beu. Ada Allahdi Abram tep, ‘Ukupkamrume,’ pepra deiputopu, Abram er nai er weit bodi deipu mi, Lot dopra Haran mutu tapra bisi banmai. Abram beu tarada, erda keteng tamun 75 tahun wisi konum deipu.

5 Tonda, Abramdi er ner Sarai cap, sun Haran mutu neitamai taleami keca yuma cap, Haran mutu neitamai kikiman kuramidi, sun tep meliami neng cap, ange-ange yuma dopra, ‘Kanaan mutu bena kunkamep’ tenen, bisi banmai. Bisi banmaiyanen, pio banmaiyanen, Kanaan mutu bei. 6 Abram Kanaan mutu neitamai embanmauanen, tenpu mutu sida, Sekem mutu dinin, ada ila weik tekamu mutu, More mutu beu. Abram amutu neitamai embaramu taruda, Kanaan yala nesala weik amutu tupa kurami.

7 Abramda, More mutu beupa, Allah er si Yahwehdi Abram damai belepra tekudi, aupu pepu. “Abramo, kandi deipmempa, dadeipdanen baramenganen, dadeipkameng nyapu atep, amutu yuma karepkamne,” pepu. Amutuda, Allahdi Abram damai belepra tekudi, aupu pepka tep, Abramdi, Allah er si Yahweh ^{▼▼Yahweh – Allah er si, tek sisi ngeda, Yahweh kurure. Ibrani upu penge nesaladi, ‘Allah er si sisada, katuai men peptepe’ tenen, kware kununga cadi, sundi huruf YHWH angepu sengnunge. Dinino, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} tep, er gispal dona cap, er karena cap tep, pala gel doprapudi, pala gel taplakra yakeipu. 8 Ukupudi, adinenda bisi banmauanen, Betel mutu dinin, keteng yakan tarada, mutu gon welepkaida bena tenda ati deipu. Betel mutuda, keteng ban tara, Ai mutuda keteng yakan tara daneitamaida, er tenda ati deipu. Aca ton Allah er si Yahweh tep, er gispal dona cap, er karena cap tep, gel pala doprapudi, pala gel taplakra yakeipudi, Allah er si Yahweh peprapudi moropu.

9 Ange yuma konum kupu dingeda, amutu tapra yuk mutu si Negeb ^{▼▼Negeb – Amutuda, Kanaan mutu dinin, utara mutu kurure} mutu ban bisi beu.

Abram Mesir mutu beu upu

10 Ataru neitamaida, Kanaan mutu neitamai jen keca yuma gum kupbaramupa, nimi yumadi tali jen si tepra, mesumpu kurami. Jenada pio gum kupupa, ikine weik kuramnga cadi, Abramdi, ‘Mesir mutu kwerepnedi, ke taru tep kunkamne’ tenen, bisi beu. 11 Bisi banmauanen, Mesir mutu wengbenkou taruda, er ner Sarai tep upepu. “Kanda urasin pio telep ner kurumada ne kaele.

12 Mesir mutu neitamai kunge nesala epkengedi, upepkamenge. ‘Gume, anerda angebo dopu ner adano,’ pepra tenepmengedi, ‘Angeboda poptapmeko. Anerpuda, gam kuna telepe,’ tenepkamenge. 13 Ange tep nengeda, kandi amutu nesala tep, ‘Gume, angeboda ne du bo pua,’ pepkamnereme. Ne tep upepnerumnyopda, sun gekepmengedi, ne tep telepe pepra napropkamnenge. Anengdi, ‘Angebo er mal ner telepe,’ tenepmengedi ne men poptapkamnenge.” Abramdi Sarai tep pepu.

14 Upepupa, sun bisi banmaiyanen, Mesir mutu tek sisi wekipa, sun Mesir mutu nengdi Sarai epetepidi, ‘Uo, anerda urasin pio telep ner,’ tenepidi, kange deipi. 15 Ange utopu, Mesir mutu taleamu Deiyo Ngebo Firaun, er pel deiyo nengdi Sarai epidi, sun deiyo ngebo Firaun tep lap perbei. “Anerda urasin pio telep ner kurure,” pepra lap pepipa, Firaundi peipupa, Sarai dopra, er ati yana deipipa, acapu kunmau.

16 Sarai dakunmaupane, ‘Abramda er mal ner kurure’ tenen, sun yumadi Abram tep, “Telepe,” pepra melimamidi, namami. Sundi Abram tep karenmai kecada weike. Ada, domba bisam cap, sapi bisam cap, unta bisam cap, keledai bisam gemnge cap, nernge cap tonda, ‘Abram er pel melimkameng’ tenen, pel don neng cap, nerapu cap, weik karepipa, Abram dopropu.

17 Ukupra dakunmaipane, Allah er si Yahwehdi, Firaunda Abram er ner Sarai upula dopropmara tep, Firaun er wenemna tep, ila mambul pu yala weik karepupa, Firaun cap, er nyapsilip cap yuma jenmau. 18 Pu jenmaupane, Firaundi Abram kongpepupa, yau. Yaupa, Firaundi upepu. “Kanda ware ikin keca ne nong deiki deipmanerem do? Ware deiyo tep inipmumdi, ‘Anerda ne dopsi ner,’ pepra, men lap pepnemum do?

19 Ware keca deiyo tep, ‘Anerda ne mal ner pua,’ pepnemum do? Mok pepnemumpa, teka tenipsa tep, ‘Aner dopkun’ tenen, konum dopropsi. Ukuda kael kepsi. Anerda, kandi dopmum ner adano. Aner dopra ne mutu tapra yan dopo!” Firaundi Abram tep pepu. 20 Upepu dingeda, er pel melimna neng tep upu peipmaupa, sundi Abram cap, er ner cap, sun bunga yuma cap tep, amutu bura tara dokotepupa, bendopi.