Gen 15 | XteSC | STEP | Amenda taruda, Allahdi Abram tep karepupa, kene mapka deiki di aupu pepupa, gekepu. Allah er si Yahwehdi upu peipupa, Abram gekepu upuda, ake. “Abramo, kwar dangnada pio gume. Neda kan ila nimi deiyo ngebo kununa cadi, pio kalengkamkene. Kan pio ila isomka kemdikerur kecada, bunga gume, ada ne tepa. Kan menenga utopu keca dopropkamrem ngeda, ne pua.” Allahdi Abram tep pepu.

Genesis 15

Allahdi Abram tep, “Ukupkamkene,” pepra pediramu upu

1 Amenda taruda, Allahdi Abram tep karepupa, kene mapka deiki di aupu pepupa, gekepu. Allah er si Yahwehdi upu peipupa, Abram gekepu upuda, ake. “Abramo, kwar dangnada pio gume. Neda kan ila nimi deiyo ngebo kununa cadi, pio kalengkamkene. Kan pio ila isomka kemdikerur kecada, bunga gume, ada ne tepa. Kan menenga utopu keca dopropkamrem ngeda, ne pua.” Allahdi Abram tep pepu. 2 Upepupa, Abram tamupra pepu. “Uo, ne nai Allah Yahweh. Kanda akeca-keca yuma talememdi, ila puto weik ngebo kurema cadi, kandi, ‘Ukupkamne,’ tenerumtopu kumemdi, akeca yuma bisbisa kamna deiyo ngebo kunerem dinino, nedi mi kapul men deiamsa tep, ne depnepa, Damsyik mutu ngebo er sida Eleasardi, ne talenun keca yuma dopropkamre. Atep, ware keca karepnetum do, naio,” pepu.

3 Upepudi, aupu ton pepu. “Kandi men meliamnemumpa, ne nyapu tenpu peda kapul men deipsa tep, ne depnyopda, ne ati pel tali melimnere ngebodi, ne talenun keca yumada, dopra talenkamre,” pepu. 4 Upepupa, Allah Yahwehdi Abram tep aupu pepu. “Gume. ‘Ne si eremna ati pel melimna ngebo Elieserdi, ne talenun keca dopropkamre,’ pepnerem ngebodi gum dinin, kan pedi deipkamrem mi, erdi kan talerum keca yuma dopra talenkamre,” pepu.

5 Upepu dingeda, alukundapu Allahdi Abram dopra, ati bura tara dubeudi, upepu. “Im dipetepo. Im neitamai dipetepra kwiri tekmarya yuma nuktumtoda, nukterepo. Akwiri denge pio weik akuretopu, kandi deipmempa, dadeipdanen benkameng nyapu peda, utopu denge pio weik kupkamenge. Men nuktume.” Allah er si Yahwehdi Abram tep pepu. 6 Allah er si Yahwehdi upepupa, Abramdi Allah peipmau upu tep, adipapu teka tenepu. Teka tenepka deiki di, Allahdi Abram tep, er mali kuramu keca yuma gum kupra deipudi, “Angeboda pio dumsisi ngebopu kurure,” pepra, Abram tep telep kupra deipmemeu.

7 Abram tep, telep kupra deipu dingeda, Allah er si Yahwehdi aupu ton dukdongopra pepu. “Neda kan ila Deiyo Ngebo kukenune. Sun Kaldea nesala kurami mutu di, Ur mutu neitamai di dopra, ukutaru kurem mutu duyanmaker ngeboda, yuk ngebo gume. Ada ne pua. Ukutaru kumem mutuda, ‘Amutu karepmemenepa, talenkamre’ teneramkesa tep, Ur mutu neitamai di dopra, amutu neitamai duyana deipkesi.” Allahdi Abram tep pepu. 8 Upepu dinin, Abramdi Allah er si Yahweh tep upepu. “Naio, akeca-keca yuma talememdi, deiki tara, Ila Eremna Ngebo kurume. Kanda, ila puto weik ngebo kuruma cadi, kandi, ‘Ukupkamne,’ tenerumtopu angepu kurume. Dinino ne nai Allah, ‘Nedi amutu yuma dopra pio talenkamne’ tenen, ware ka di pio betapra kael keptenedi, kange tenimtona men kupkamner do?” Abramdi pepu.

9 Abramdi upepka cadi, Allah er si Yahwehdi tamupra pepu. “Kandi dopra duyankunerem kecada pepkukene. Ner sapi cap, ner kambing cap, jem kambing cap, ayuma keteng tamun weneripu nepi ngeda, dopra denerume. Tonda, yal mal utopu ma cap, yambul merpati ma cap, tenpu-tenpu dopra karepkunerume,” pepu. 10 Allahdi peipmautopu, Abramdi agam kure keca yuma doprapudi, popra neitamai di tekra, sun nong dana tara cap, dana tara cap lelepra deipmau. Ukupmau dinin, sun ma puda, sun nong neitamai men teku.

11 Abramdi Allah peipmau keca popra, Allah er karena tep katuai deipmaupa, tu keca jere ma epidi, yana akeca nong deiki amupupa, Abramdi, “Buse,” lelim pepudi, dokotepupa, lakra bendopi. 12 Abramdi akeca yuma deipmaudi, akunmaupane, amenda taru keteng orwengbenkou taruda, Abram udungna weik kupupa, mapu. Mapmaupa, kange douna pio gum kupupa, ila kunungna utopu cap, ila kwar dangna cap kupmemeu.

13 Ukupupa, Allah er si Yahwehdi Abram tep ken mapka deiki di upepu. “Kandi deipmempa, dadeipdanen bankameng nyapuda, sun pe mutu men kunkameng dinin, yuk mutu nengdi puto di dopropmengedi, ateng koupra sun nong deiki, ikin pel weik derinkamenge. Kandi deipmempa, dadeipdanen bankameng nyapu dinin, amutu neitamaida, nimi bo neng utopu kuramenganen, keteng tamun denge pio weik, 400 tahun deiki di ikin weik kunkamenge.

14 Yuk mutu nengdi, kan nyapu tep, ikin keca weik sun nong deiki deriramengepane, amenda taruda nedi kan nyapu talenkameng nesala tep weika di wenepnedi, kan nyapu loptapnepa, amutu tapra bendopkamenge. Ada tali dempu gume. Bung keca pio weik karepnepa, akeca yala-yala yuma dopra taleryankamenge.

15 Abram kan puda, yuk mutu nesaladi men dopra ateng koupkamkenge. Telep kangepu deipra, teleppu dakuramemyane, depmemnyopda, kan apu yapu damai dubenkamkune. Ada berbera gum dinin, teleppu dakuramemyane, wisi deipkeryopda, depkamrem ja, pepkene. 16 Sun Amori nesaladi, mali pio weik kunung dinin, sun go taru teneramsi ngeda, kapul kupmara tep, ton cap tupa malipu kunkamenge. Keteng tamun denge weik, 400 tahun konum kupyopda, kandi deipmempa, dadeipdanen kunkameng nyapuda, ukutaru akunmarem mutu tamupra yana kunkamenge.” Allahdi Abram tep, pedina upu pepu.

17 Uda, atumipu dinin, keteng konum wekupa, ipropu pangeda, Abramdi ken deiki epu keca ton belepu. Gamna mau urasin utopu mau, neitamai uku jenmaupa, kete welepmaunge cap, uku bu jenmau weica cap belepudi, arup taru Abramdi gam keca popra tekrapudi, dana-dana tara deipmaunge neitamai benmau. 18 Aket welenmau mau cap, aweica cap neitamai bisi benmau pangeda, atumi dipapu Allah er si Yahwehdi Abram tep, “Tek sisi ukupkamkene,” pepra, pedina upu pepra deipu. Allah er si Yahwehdi pedina upu pepu ngeda ake. “Abramo, kandi deipmempa, dadeipdanen benkameng nyapu, kan nyapu yuma tep nengeda, akunmarem mutu yuma karepkamsene. Ada Mesir mutu neitamai, ila embaramre me di dukdongopra, per ortara ila embare me er sida Efrat me capda, aneitam mutu yuma tep pepkene.

19 Ada sun si, Keni nesala cap, Kenas nesala cap, Kadmon nesala cap, 20 Het nesala cap, Feris nesala cap, Repaim nesala cap, 21 Amori nesala cap, Kanaan nesala cap, Girgasi nesala cap, Yebus nesala cap, anesala-anesala yuma sun kunge mutu ban-ban yuma dopropnedi, Abram kan nyapu tep karenkamne. Sundi amutu yuma pio talenkamenge.” Allahdi Abram tep pepu.