Gen 17 | XteSC | STEP | Sun yuma dakuramipane, amenda taru Abramda, keteng tamun weik, 99 tahun nukra wisi konum deipu taruda, Allah er si Yahwehdi Abram er damai yana belepudi, er tep aupu pepu. “Neda Allah Yahweh, akeca-keca yuma talepra, pio deiki tara kunedi, pio Ila Puto Deiyo Ngebo kunune. Kanda, tamna pio gum dipapu, ne upu moupra talememdi, domyakanememyane, mali kuna pio gum, telep-teleppu kunkamrume.

Genesis 17

Allahdi Abram er si pununa tep, yuk ukupu si karepu upu

1 Sun yuma dakuramipane, amenda taru Abramda, keteng tamun weik, 99 tahun nukra wisi konum deipu taruda, Allah er si Yahwehdi Abram er damai yana belepudi, er tep aupu pepu. “Neda Allah ^{▼▼Allah – Acada, Ibrani upu deiki di, Allah er si tep, ‘Yahweh, Allah Shadday’ pepra seki. Aupu ‘Shadday’ deiyoda, sundi, ‘Allahda akeca-keca yuma talepra, pio deiki tara kuredi, pio Ila Puto Deiyo Ngebo kurure,’ tenena tep, ‘Shadday’ pepra seki. Sun kael kemna tep, angeda konum jenek kupra sekmepu.} Yahweh, akeca-keca yuma talepra, pio deiki tara kunedi, pio Ila Puto Deiyo Ngebo kunune. Kanda, tamna pio gum dipapu, ne upu moupra talememdi, domyakanememyane, mali kuna pio gum, telep-teleppu kunkamrume. 2 Neda Allahdi, kan tep pedina upu pepkene. Ada, ne puto deiki melimkenepa, kandi deipmempa, dadeipdanen, kunkameng nyapu yumada, denge pio weike kunkamenge. Kan yala nesalada, puto weik kunkamenge.” Allahdi Abram tep pepu.

3 Upepupa, Abram gekepudi, ‘Uo, ne nai Allah tep, gispal dopkun’ tenen, tu deiki saka mapmaudi, giso genepu. Ukupupa, Allahdi aupu ton dukdongopra pepu. 4 Nedi, ‘Ukupkamkene,’ pepra, pedina upu pepkukenada ake. Ada, nedi melimkenepa, kandi deipmempa, dadeipdanen kunkameng nesalada, tenpu weik yalapu gume. Nesala yala-yala pio weik kunkamenge.

5 Tonda, nedi kan si tep, yuknge pepra deipkenedi, si punupkukene. Pumun taru di Abram peramkei dinin, ukutaru di dipra, oryankamre taru yumada, kan si tep ‘Abraham,’ penkamkenge. Deiyoda, kandi deipmempa, dadeipdanen kunkameng nesalada, yala pio weik kunkamenga tep, ukupu si Abraham pepkene. (Ibrani upu deikida, Abraham deiyoda, ‘Erdi deiamu nyapsilipdi deiami yala-yalada pio weik kununge’ tenen, penunge). 6 Nedi melimkenepa, kandi deipmempa, dadeipdanen kupbankameng nimi yala-yalada, pio weike kunkamenge. Anesala yumada, denge pio weike men nukmanto, milyar kunkamenge. Tonda, anesala kan-kan neitamaida, ila nimi deiyo neng, Raja neng ton kupkamenge.

7 Aupu pepra deipmaken upuda, ada kan kunkamrem tarupu tep, men pepra deipkene. Ada orketeng tamun, orketeng tamun weike, pio doryankamre keteng tamun neitamai yumada men tapkamne. Nedi pedina upu pepmaken ngeda, pio upu tep pepkene. Nedi kan tep talekenepa, ne si pio eremneremtopu, kandi deipmempa, dadeipdanen kunkameng nesala yala-yala yuma, pio talenepa, sundi ne sipu eremkamnenge. Sun yumadi ne tep, “Nun nai bo Allahda kan pua,” penenengpa, anesala pio talenkamne. 8 Atep, pio tek sisi pepkene. Kanaan mutu yumada, ne karepnepa, kandi deipmempa, dadeipdanen kunkameng nesalada, amutu pio talenkamenge. Nedi kan tep karepkenetopu, karepnepa, sun amenda taru kunkameng nesala peda talenkamenge,” Allahdi Abram tep pepu.

‘Nun nai boda, Allah er tenpua, tenenkamneng’ tenen, peten kemdina pel, sal nyapu den bam bol sengna pel karepu upu

9 Allahdi Abraham tep upepu. “Nedi kunkamken keca konum lap pepmaken dinin, kan dingeda kunkamrem keca pepkukene. Ada kan cap, kan nyapsilip cap, kandi deipmempa, dadeipdanen kunkameng yala nesala yuma cap, ne gispal dona tep, pio kunkamrum ngeda pepkukene. 10 Sundi pio kunkamrum ngeda ake. Nimi yuma cap, sal nyapu yuma capda, sun den bam bol deiki tarange sengtamkamenge. Tenpunge peda, men tapkamenge. Ukupmum pangeda, ada peten kemdina keca kupkamsere.

11 Ada, yuk nesala yumadi, “Gume, Abraham cap, er nyapsilip yuma cap, er tara nesala yuma capda, sun yumadi Allah tep, ‘Ukunkamepe, kandi teneserumtopu kunkamepe,’ pepra, pedina upu konum pepra deipye,” tenepra kael kemkamsenge.

12 Ukupkamrum ngeda ake. Kan yala nengdi derinkameng sal nyapu yumada, dadeipmengepa, tumi ban bari konum kupyopda, sun den bam bol deiki tarange sektapkamenge. Tonda, kan pe nyapsilippu gume. Kan pel melimna nesaladi derinkameng sal nyapu cap, utopu kunkamenge. Tonda, ‘Nun pel donkamseng’ tenen, yuk mutu neng dinin, co bo di kunupra dekarumdi, sun ati derirum neng cap, sundi derinkameng sal nyapu cap, sun den bam bol deiki tarange sektapkamenge.

13 Ukupmumnyopda, sun nong bol deikida, peten kemdina utopu keca kupkamre. Ada, sun pe, yuk mutu nesala peda, den bam bol deiki tarange sekmumnge epmengedi, ‘E, anesala cap, Allah cap pedina upu pedaramidi, pio taledanunge’ tenen, kael kepkamsenge. 14 Uda, ware ngebo do yuma, sundi, “Gume, ne den bam bol deiki tara ngeda, men sekeipnetume,” pepre ngeboda, ne nyapsilip neitamai di tapra donokamrume. Neda Allahdi pepra deipsene. Allahdi Abraham tep pepu.

Allahdi Sarai er si pununa tep, Sarah pepra deipu upu

15 Allahdi upepu dingeda, aupu ton dukdongopra pepu. “Abrahamo, kan ner Sarai tep nengeda, er si Sarai tupa men penkamrume. Ukutaru di dipra oryankamre taru yumada, er si tep Sarah penkamrume. (Ibrani upu deikida, Sarah deiyoda, ila nimi deiyo ngebo, er ner tep perami). 16 Nedi Sarah tep, pio telep kupra deipnedi melipnepa, Sarahdi kan mi deipkamkere. Er tep pio telep kupra deipkamemene. Nimi yala-yala weike tep, sun nin utopu kunkamre. Erdi deiprepa, dadeipdanen deipkameng nesala neitamai di, ila nimi deiyo neng, Raja neng ton tekamenge. Ne Allahdi pepkene,” pepra, Allahdi Abraham tep pedina upu pepra deipu.

17 Allahdi Abram tep upepupa, Abrahamdi, ‘Ne nai bo tep gispal dopkun’ tenen, giso genepu dinin, utenepu. ‘Gume, neda keteng tamun denge weik, 100 tahun nukrap wisi konum deipsa tep, ware kuprap di mi deiptene do? Angeda men kuptene,’ tenepudi, teka men tenepka deiki di, er dipru neitamai autupu. Tonda, utenepu. ‘Gume, ne dopsi ner Saraida, keteng tamun denge weik, 90 tahun wisi konum deipka cadi, ware kuprap anerdi mi deiptu do? Mi men deiptue’ tenen, teka men tenepu. 18 Abrahamdi utenepu dinin, inipudi, Allah tep upepu. “Jo naio, apepmanerem ngeda, ukupkamnere. Ne mi Ismael tep, telep-telep kweipkamemereme,” pepu.

19 Upepupa, Allahdi tamupra pepu. “Gume, ami Ismael tep men pepkene. Kandi dopmum ner Sarahdi, sal mi tek sisi deipkamkere. Deipkerepa, ami er si tep, Isak penkamrume. Nedi kan tep, ‘Ukupkamkene, ukupkamkene,’ pepmaken upu, pio pedina upuda, kan mi sisa Isak cap, Isakdi deiprepa, dadeipdanen kupkameng nesala tep kupkamne. 20 Kan mi Ismael tep nengeda, kandi moropmaneremtopu, ami tep telep kupra deipkamne. Telep kupra melimamnepane, amenda er tara nesalada, denge pio weik kupbankamenge. Ismaeldi deiprepa, dadeipdanen kunkameng nesala neitamai di, nimi deiyo neng 12 tekamenge.

21 Ukupkameng dinino, nedi pedina upu pepra deipmaken ngeda, aupuda kan mi sisa Isak tep peipmakene. Ada atumi, aware akupmanemtopu, aketeng tamun konum kuprepa, orketeng tamun tenpu ton neitamaida, kan cap, kan ner Sarah cap, kikiman kuprerumpa, sal mi tenpu deipkamrerume.” Allahdi Abraham tep pepu.

22 Upepu dingeda, Allahdi Abraham damai tapra yukai bendopu. 23 Uda, atumi dipapu, Abrahamdi er mi Ismael cap, er ati kunmai nimi cap, er nyapsilip neitamai kunmai sal nyapu cap, yuma dopropudi, sun den bam bol deiki tarange sektapu. Ada, Allahdi, ‘Ukupkamrume,’ pepra deiputopu, angepu kupu.

24 – 25 Atumida, Abraham keteng tamun denge weik, 99 tahun wisi kuramu. Abraham er mi Ismaelda, keteng tamun 13 tahunpu wisi deiamu. 26 Abraham er mi Ismaelda utopu, atumi deiki dipu yuk nengdi dopra, sun den bam bol deiki tarange sektapi. 27 Ange utopu, Abraham er ati kurami neng cap, nyapu cap, er yala neng cap, sun nyapu cap, er pel melimna neng cap, sun nyapu cap yumada, sun den bam bol deiki tarange sektapi.