Genesis 18

1Uda, yuk taruda, Abrahamdi bura mutu dinin, nimi si Mamre, er taleamu ipuk co dam ke mapmau taruda, Allah er si Yahwehdi belepra tengyaupa, Abrahamdi epu. Angeda ukuprap kupu. Tenpu tumi keteng dukduk neitamaida, Abraham er ati, opkal bol di ke tep deipu tenda ati buplan dam bungmaupa, nimi weneri epu. 2Mankau kange doupra tali bukmaupane, aneng weneri yakanmaipa, epu. Epudi, ‘Gisal dopkun’ tenen, tekropudi, sun yakanmai bisi sepdara beudi, giso geneprapudi, “Telepe,” pepu.

3Upepu dingeda, aupu ton pepu. “Ne nai yapu, sunda ne deiyo neng utopu kunerume. Sun kange telepe tenepnetumtoda, acapu bepe peiktume. 4Karen mutu di yanmarumpa, bental bapmasera tep, nedi peipnepa, ne pel melimna nengdi me gwepra deipmengedi, sun yan me kweipkusenge. 5Tonda, sun puto kemdina tep, jen keca gapra karepsenepa, jepmumnyopda, kange di ton cap teleppu kunkamarume. Atep, sun benkamarum bisi kapul benkurum taruda, acapu yambulanun ton kikiman kunkupe,” pepra Abrahamdi moropu. Upepra moropupa, sundi, “Telepe, apepmaseremtopu kupkureme,” pepmai.

6Upepmaipa, Abrahamdi sepdaro benmaudi, er opkal tenda ati dam tamupra benmaudi, Sarah tep upepu. “Nero, roti dana deiyo keca, er sida tepung, pio telep ngeda, 18 liter dopra menmena keteneipkurume. Nun nimi bo neng tep, roti ketenepra daepserume,” pepu. 7Upepu dingeda, er pel melimna nengdi, er sapi bisam peingmaiyai sepdara benmaudi, sapi bisam mi tenpu, nong weiknge wepudi, aneng tep upepu. “Sunda menmena, asapi mi popra galepmemdi, tu dopra daepnerume,” pepu.

8Erdi pepmautopu, sun yuma konum kupmai pangeda, jen keca ketenepmaiya di, sapi bisam moum teyung susu cap, sun dapmai tu cap, jen keca keju cap doprapudi, animi bo neng weneri tep karepu. Karepupa, sun jenmai taruda, Abrahamdi aco deiyo dam bukra dinapu kunmau. 9Tali bukra kunmaupa, anengdi er tep asipetepi. “Kan ner dan do?” pepra asipetepipa, “Ne opkal bol di ke tep deipsi tenda ati neitamai bungmare,” pepu.

10Upepupa, animi weneri neng neitamai, tenpu ngebodi upepu. “Aketeng tamun konum kuprepa, awareto dinin, orketeng tamun neitamai tamupra yanyopda, kan ner Sarahdi sal mi deipkamkere,” pepu. Uda, angebodi aupu penmau tarada, Sarahdi oropkal tenda ati mening dam bukmauai di aupu gekepu. 11Abraham cap, Sarah cap, sun butene pio wisi konum deipreia tep, tonda Sarahda nyapu ton cap men deipmanto taru konum wisi kupka tep, Sarahdi aupu gekepudi, er dipru neitamaipu autupu.

12Ada, ‘Neda pio wisi weik ner kununa utopu, nerapudi nyapu men derinunga cadi, ware kuprap nedi mi deiptene do? Tonda, ne dopneu ngebo peda, pio wisi ngebo cadi, angeda men kupmanto,’ tenepudi, autupu. 13Autupu pangeda, Allah er si Yahwehdi Abraham tep pepu. “Kan ner Sarahda, warya tep autupmau do?” pepra asipetepu.

14Asipetepudi, aupu ton pepu. “Ware yala keca do yuma, wareto keca ikin weik kuptupa, Allah er si Yahwehdi teneretopu bisbisa kaptudi men kuptu do? Ikin men kuptene. Angeda men kupmanto. Arup pepmakentopu, orketeng tamun neitamai, aware utopu tamupra yanyopda, kan ner Sarahdi sal mi deipkamkere,” pepu. 15Upepupa, Sarah gekepudi, kware kupupa, “Gume, ne men autupmanue,” pepra inipu dinin, angebodi, “Gume, apepmaneremada mok pepreme. Tek sisi autupmaume,” pepra wenepu.

‘Allahdi Sodom mutu nesala tep wenepra poptapkur’ tenen, Abrahamdi moropu upu

16Animi wenerida, sun jen keca jepmaidi, gawal dakmai dingeda, tekrapidi, ‘Sodom mutu ortara benkup’ tenen, benmai. Sun bisi banmai taruda, Abraham cap yambulanun kikiman banmai. 17Bisi banmai taruda, Allah er si Yahwehdi tenepu. Nedi, ‘Ukupkamne,’ tenemsi kecada, ware keca deiyo tep, ‘Abraham gekepkur’ tenen, inipman do?

18Gume, ne puto di meliamnepane, Abrahamdi deiprepa, dadeipdanen kunkameng nesala yala-yala weik kunkamenge. Erda, sun apu bo utopu kunkamre. Er nyapsilip, er yala nesalada, puto weik nesala kunkamenge. Sun tep melimamnepane, sun kunkamenga deiki di, yuk mutu nesala ban-ban yuma tep, telep kupra deipkamsene. Ada Abraham kunkamrenge deiki ja.

19Tonda, ‘Angebodi er deipkamre nyapu yuma cap, sundi deipkameng nyapu yuma cap tep, “Allah er si Yahwehdi pesere upu pio moupra taleprumdi, er upupu dombankamrume. Dumsisipu kunkamrume,” ‘Penkamre’ tenen, neda Allah, ne si Yahwehdi Abraham konum wepra deipsi. Abrahamdi upeprepa, er tara nesala yumadi, ange utopu kupmengopda, ne Yahwehdi er tep, ‘Ukupkamkene,’ pepra, deipsi upu yuma tek sisi kupkamemene. Allah er si Yahwehdi Abraham tep tenepudi, aupu pepu.

20Tonda, Allah er si Yahwehdi Abraham tep pepu. “Abrahamo, ne gekepsi ngeda pepkukene. Ada, ‘Sun Sodom mutu nesala cap, Gomora mutu nesala cap, pio mali weik kununge amutu nesala, sun kurameng keca yumada pio malipu kununge,’ peramneipa, gekeramsi. 21Aupu peramneipa, gekeramsa tep, ‘Angeda tek do, telel do?’ tenen, sun damai kwererbenedi, epetepkamane. Ne asuru di epnyopda, tek sisi kael kepkamane.” Allahdi Abraham tep pepu.

22Allah er si Yahweh cap, Abraham cap, acapu tekra akunmarei taruda, sun yuk neng buteneda, mepra banmareidi, Sodom mutu bisi tupa banmarei. 23Banmareipa, Abrahamdi Allah tep asipetepu. “Naio, ormutu kunge nesala neitamaida, mali kunge nesala pe, telep kunge nesala peda, utotopu wenepra poptapkamarem do?

24Ne walwal dinin, amutu neitamaida, telep kunge nesala denge weik 50 kuptenge teptoda, aneng mangkau kange doupra, telep kunge nesala tep, ‘Amutu gum kupra deipkune,’ tenepmarem ngeda men yaptum do? Gum do? 25Uo, ne naio, sun telep kunge nesala cap, mali kunge nesala cap, wilimdana gum di, tali lupra poptapnada, men kupkurem darape. Ware deiyo tep, telep nesala cap, mali nesala cap utotopu kupkamareme, tenepne. Tuai mutu ban-ban yuma kunge nesala tep, Upu Bongdina Deiyo Ngebodi, dumsisipu men kupkurem do? Ne kangeda, teleppu kupkureme,” pepu.

26Abrahamdi upepra asipetepupa, Allah er si Yahwehdi tamupra pepu. “Uda, Sodom mutu kunge nesala dipetepnepa, mangkau kange doupra, telep kunge nesala 50 kuptengetoda, sun lyemna tep amutu yuma gum kupra men deipkamane,” pepu. 27Allahdi upepupa, Abrahamdi pepu. “Uo, ne deiyo ngebo. Ne naio, neda tuai di ketekepnemume, tali uku sikke utopu, mambul gum ngebo kunun dinino, aupu gonga kepra konum pepbanmana cadi, aupu ton dukdongopra pepkukene.

28Sodom mutu nesala dipetepmempa, telep kun nesala 45 pua kuptenge teptoda, tali lupra poptapkamarem do? Lima puluh (50) pepmanu dinin, pamu bari suktalepseryopda, adipapu poptapra gawal dakamarem do?” pepra moropupa, Allahdi, “Jo telepe. Telep kun nesala 45 epnyopda, amutu yuma gum kupra men deipkamane,” pepu.

29Upepupa, Abrahamdi, ‘Ton cap puto di pepkun’ tenen, dukdongopra pepu. “Naio, telep kun nesala 40 pu kuptenge teptoda, ange dano?” pepra moropupa, Allahdi tamupra, “Telepe, 40 telep kun nesala kuptengetoda, sun yuma wenepra men poptapkamane,” pepu. 30Upepupnen, Abrahamdi, “Uo ne deiyo ngebo, ne naio, ‘Yu kupkerepa, wenepkuner’ tenen, kware kupner dinin, upu ton pepkun do? Dipetepmempa, telep kun nesala 30 pu kuptenge teptoda, yaptum do?” pepra moropupa, Allahdi, “Telepe, 30 telep kun nesala kuptengetoda, sun yuma wenepra men poptapkamane,” pepu.

31Upepupnen, Abrahamdi, “Uo, ne deiyo ngebo, ne naio, balila di konum pepra moropmakenua cadi, ange ton pepkukene. Sodom mutu neitamai 20 telep kun nesalapu kungopda, ange dano?” pepupa, Allahdi, “Telepe, 20 telep nesala epnyopda men poptapkamane,” pepu.

32Upepu pangeda, Abrahamdi sirya dangna tep upepu. “Ne naio, kanda ne deiyo ngebo kurume. ‘Ne tep tulum kupkerepa, derepnerem’ tenen, ne kware kupner dinin, upu tenpu ton cap pepkukene. Sodom mutu neitamai, telep kun nesala 10 pu kuptenge teptoda, ‘Amutu yuma gum kupra deipkune’ tenepmaremada, yaptum do?” pepra moropu. Upepra moropupa, Allahdi, “Telepe, telep kun nesala epetenepa, 10 nesalapuda kuptengetoda, amutu yuma wenepra men poptapkamane,” pepu.

33Allah er si Yahwehdi aupu pepu dingeda, ‘Sodom mutu orbenkun’ tenen, bisi benmaudi, Abraham tep upu ton men pepu. Abrahamda, tamupra er opkal bol di ke tep tenda ati deipmauaipu tamupra beu.