Gen 19 | XteSC | STEP | Atumi dinin, keteng wengbenkou taruda, sun butene neng, ada im deiki pel don neng malaikat butene di, Sodom mutu ongomgenepra wiami beilya buplan dam yarei. Buplan dam yanmarei taruda, Lot abukmauai di epdapi. Lotdi abutene neng epu dingeda, ‘Gisal dopkun’ tenen, tekra sun damai benmaudi, giso genepmau. Ukupmaudi, buru karepra, “Telepe,” pepu.

Genesis 19

Allahdi Sodom mutu cap, Gomora mutu cap gum kupra deipua tep upu

1 Atumi dinin, keteng wengbenkou taruda, sun butene neng, ada im deiki pel don neng malaikat butene di, Sodom mutu ongomgenepra wiami beilya buplan dam yarei. Buplan dam yanmarei taruda, Lot abukmauai di epdapi. Lotdi abutene neng epu dingeda, ‘Gisal dopkun’ tenen, tekra sun damai benmaudi, giso genepmau. Ukupmaudi, buru karepra, “Telepe,” pepu.

2 “Ne nai yape, karen mutu di yakanmarumpa, bental bapmasera cadi, nati yarerumpa, sun yan me kweipkusene. Sunda nimi bo neng cadi, nati kikiman mapkamepe. Mapmepya, berekyopda, sun tenepmarerumtopu, ipna sisa do, keteng komuni do, bisi benkamarerume,” pepu. Upepu dinin, aneng butene di, “Telep pepserem dinino, nunda sun ati dam dinin, tali bura tara manada telepe pua,” peprei.

3 Upeprei dinin, Lotdi, “Gume, nati pumbonpu kikiman mapkamepe,” pepra puto di pepka cadi, er cap er ati banmai. Beidi, ati wekmaipa, Lotdi sun jen keca yala-yala weik ketenepra deipmau. Tonda, jen keca er sida roti, nena deiyo keca gumnge dapra deipmaupa, jeprei. 4 Jepreipa, sun yuma Lot er ati pum mapkunge taruda, Sodom mutu neitamai kunmai nimi, wisi neng cap, kaber neng cap, dana-dana tara yumadi bulupra yanmai. Yanmaidi, Lot er ati dam ongopgenepra tekmai.

5 Gung weik bulupra er ati dana-dana tara tekmaidi, upu puto di pepi. “Loto, ‘Akati mapkunem’ tenen, arup yanmarung neng dan do? Aneng butene dopra, kan ati bura tara deipsetumopda, nundi aneng butene dopra tali upula nyangdanapu kupkupe,” pepi. 6 Upepmaipa, Lot gekepudi, ‘Anesala cap upu talerbankun’ tenen, er ati pum di bura tara tengbenmaudi, er ati buplan dekdongopu.

7 Sun kan-kan tengbenmaudi, aupu pepu. “Uo, ne kayape. Apio mali ngeda yapkurume. ‘Aneng butene tep tali upula nyangdankupe’ tenen, ketenepmarum ngeda, pio mali kuna cadi yapso,” pepra moropu. 8 Upepudi, aupu ton pepu. “Gume, anengo, animi bo neng buteneda, nati yana mapkurenga cadi, ne sun tep kalengkune. Dinino, sun namna tep, ne ner nyapu buteneda, nimi kapul men dopreiya tep, aner nyapu butene doproprumdi, sun tenipmarumtopu kupkurume,” pepra moropu.

9 Upepra moropu dinin, Sodom mutu nengdi balila weik kupupa, yu weika di upepi. “Kanda warya tep aupu pepmaserem do? Pumun taru di yamumpa, nundi, ‘Telepe, nun mutu neitamai kunkamremada telepe pua,’ pepmupupa, nun mutu neitamai kikiman kunup dinin, ukutaruda kandi nun tep, ‘Ukupso, ukupso, angeda men kupkurume,’ pepra upu men seksetume. Kanda wareto ila ngebo tenepdaremdi, pepmaserem do? Kanpudi gopropo. Gum dingeda, kan nimi bo neng butene tep, yambul mali kweipkup dinin, kan men dimpepmemnyopda, nundi kan tep ila mali kweipkukepe,” pepi. Upepipnen, adipapu, ‘Er buplan puto di paktapra, tali lupra wengbenkup’ tenen, Lot er ati buplan bongonmai.

10 ‘Buplan daksakeipkup’ tenen, bongonmaipane, sun malaikat butene di Lot er ati pum dadi, buplan berbera paktapreidi, Lot er nong talepra ati pum dongopmareidi, buplan selok deipdongopipa, aneng men wekmanto kupi. 11 Malaikat nengdi upuprei dingeda, sun Sodom mutu mali neng tep, asuru pun keca karepreipa, epetepmai dinin, ‘Buplanda aca’ tenen, men epmanto kupi.

12 Ukuprei dingeda, Lot tep asipeteprei. “Amutu neitamaida, kan nyapsilip ton akunung do? Ada, kan nyapu cap, kan ner nyapu cap, uda, aner nyapu dopi nengda, kan nyapsilip yuma dopra, amutu tapra benkureme. 13 Deiyoda, nun butene di amutu yuma wenepra, gum kupra deipnemedi, gawal dakaneme. Lyun keca tong weleramrepa, nesala gekeramengtopu, amutu kunge nesaladi pio mali-malipu kungepa, Allah er si Yahwehdi kael kepudi, dabal weik kupka cadi erdi, ‘Amalaikat butene nengdi, amutu gum kupra deipkamrenge’ tenen, dokotepmaserpa, yanmanereme,” pepra lap peprei.

14 Anengdi wepreipa, Lotdi sepdaro beudi, er ner nyapudi mun perami neng tep, “Amutu tapra bura bendopso. Allah er si Yahwehdi amutu yuma wenepra gum kupra deipredi, gawal dakamare,” pepu. Upepu dinin, aneng sun kaber neng cadi, ‘Gume, nun kabo Lotda, tali esu dipu pepmasere,’ teneprei.

15 Dakunmaipane, mapmaipa, berekupa, sun malaikat butene di Lot tep puto weika di peprei. “Loto, kandi kan ner cap, kan ner nyapu cap dopropmemdi, bendoprume. Deiyo ada, Allahdi menmena amutu tapra gawal dakura tep, tupa akupmemnyopda, sun peda popkamasere,” pepmarei.

16 Aupuda puto di pepmareipunen, Lotda, ‘Benkun do, gum do?’ tenen, tenimtonapu kupmaupa, sun malaikat nengdi Lot cap, er ner cap, er ner nyapu butene cap, sun buru taleprapreidi, akati tapra amutu bura tara dopra duberei. Ada, Allah er si Yahwehdi Lot cap, er nyapsilip cap tep, ‘Berbera men poptapkun’ tenen, go karepka cadi dopra duberei.

17 Duberei dingeda, aupu pepmarei. “Sun yumada, ‘Nun pe tep popserur’ tenen, sepdara berumdi lyepdankurume. Amutu ban neitamai yuma beipye peingna gume, pio sepdara banapu kunkurume. Tonda, ‘Nun mutu ton cap epkup’ tenen, ortara banmarumnya di, ka tamupra amutu tara dina pio meme. Mutu dup mutupu sepdara bankurume. Gum dingeda, sun peda depkamarum ja,” peprei.

18 Sundi upeprei dinin, Lotdi tamupra moropu. “Uo, ne nai yapu, ne deiyo neng kunerume. ‘Ne tenepmanetopu kuptene’ tenen, moropsene. 19 Sundi ne tep tali lupra popmanetum dinin, bicau tenepmanerumdi, ne cap, ne nyapsilip cap konum lyepmasererume. Dinino, mutu dup mutu welepra benyopda, ikin weik kupnerepa, ne menmena depkamane tenepne.

20 Atep sun ton dipetepreso. Ortarada nimi ati yambul ati arum dopyaida, ‘Betepe’ tenen, moropsene. Amutuda metek mutupu cadi, ortarapu betenetoda telepe pua. Ortarapu kunyopda, Allahdi kalekra lyepnetue,” pepra moropu. 21 Moropupa, tenpu im deiki pel don ngebodi pepu. “Uda, telepe. Ange moropmaneremtopu gekepkene. Ormetek ati arum dopyaida, men gum kupra deipkune.

22 Dinino, ormutu bana tep menmena sepdara beso. Sun bisi neitamai tupa benkurum taruda, Sodom mutu wenepra men poptaptene. Ati orberumnyopda, gonga kepkune,” pepu. (Ange tep, ataru dinin dipra ukutaru peda, Lotdi pepu mutu sida, Soar mutu perameng. Ada Ibrani upu deikida, ‘metek mutu’ tenena tep penunge). 23 Lot cap, er nyapsilip cap, sun yuma sepdara banmaiyane, atumi neitamai yuma bisi banmaiyanen, ipropupa, tupa banmaipane, bereng tara yau. Ormetek nimi ati arum dam benmai taruda, keteng deipu.

24 Keteng deipupa, Allah er si Yahwehdi im deiki di uku bu cap, uku jeramre gel cap pio weik dokotepmaupa, mo cemamretopu sangmaupa, Sodom mutu cap, Gomora mutu cap deiki di sangmau. 25 Sangmaupane, uku bu di amutu-amutu yuma jepropupa, gum kupu. Ada amutu butenepu gum dinin, amutu ban neitamai domi nimi ati arum yuma cap, nesala cap, sun peirami gam kun keca, bisam do, ayam do, sapi do yuma cap, uda, tali tuai di paramu keca co do, manmaneng do, akeca-keca yala-yala yuma gum kupra deipu.

26 Sun malaikat butene di, “Ortara berumdi, atara ka tamupra dina meme,” pepmarei dinin, Lot er nerdi, ‘Dinkun’ tenen, amnyo karekra, Sodom mutu tara dipetepmaupa, ua (garam gel) dau. Ada, gat gel utopu dinin ua gel dau.

27 Sun yuma mapmaiya, berekupa, Abraham bukudi, er ati tapra Allah er si Yahweh ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} cap, upu talepmareiai bena tekudi, ortara dipetepu.

28 Ada er kunmau mutu gon deiki tekmauai di, ila ban neitamai kupupa, ortara Sodom mutu cap, Gomora mutu cap dipetepu. Dipetepmau dinin, akeca-keca katuai men kupupa, ila ketpu welenmaupa, epu. Ada ila wa imamengepa, ket weik, weleramretopu kupmaupa, epu. 29 Allahdi akeca-keca yuma wenepudi, gum kupra deipu dinin, Abrahamdi moropmemeutopu, Lot lyepu. Ada aila ban mutu neitamai kuramu nimi ati arum yuma, poptapra gum kupra deipu taru, Lot ton men jepropu.

Lot er ner nyapudi mali kuprei upu

30 Lot cap, er ner nyapu butene cap, yambul nimi ati arum domyai Soar mutu tapra, yuk mutu dam mutu bena kurami. Ukupu benmai taruda, Lot cap, er ner nyapu cap ila gel imir neitamai kunmai. 31 Dakuramyane tenpu tumida, du nerdi er weit ner tep upepu. “Gume, weit nero, tuai mutu ban-ban yuma neitamaida, nimidi nerapu dopmengedi, nyakdaramengpane, nyapu ton derinunge. Nunpuda nimi gumai kunupe. Tonda, nun nai boda wisi konum deipke. Atep ware ngebodi dopsetupa, nyapu deipteneme do?

32 Ange tep nengeda, ‘Nun butene di nyapu deiptenemepa, amenda taru orketeng tamun yuma neitamaida, nun yala neng men gum kupkamenge’ tenen, nundi anggur me kange yawaramrenge gwepra, nun nai bo karepnemempa, weik jeryopda, er kange yawaramrepa, betapra men tenepre pangeda, nun bodi nyaksetupa, mundu doupkamneme,” pepu.

33 Du nerdi upepupa, alukundapu sun butene di, sun nai bo Lot tep kange yawaramne me, anggur me gwepra karepmareipa, weik jepmau pangeda, er kange yawarapmau. Ukupmaupa, du nerdi er nai bo mapmauai bena nyaku. Anerdi er nai bo cap mapmarei taru pe, aner bukra benmau taru peda, Lotdi men tenepmau. Erda tali mangkau kange doupra mapmau. Ada, anggur me di kange yawarapmaua tepa.

34 Sun mapmaiya, berekupa, du nerdi, er weit ner tep upepu. “Ambutumi lukundada, nun nai bo cap, ne cap mapmanemue. Alukunda peda utopu, anggur me karepnemempa, weika di jeryopda, er kange yawaramne taru neitamai di, kan pe ton nyakdaretumpa, mundu douptumtoda, amenda taru nun yala men gum kupkamre,” pepu. 35 Upepka tep, ange utopu sun butene di sun nai bo Lot tep, anggur me kange yawaramrenge karepmareipa, weik jepmaupa, kange douna gum taruda, weit nerdi er nai damai benmaudi, sun kikiman mapmarei. Alukunda peda, sun kikiman mapmarei taru pe, aner midi bukra bura benmau taru peda, er nai bo Lotdi betapra men tenepu. Ada kange yawarapmaua dia. 36 Aner nyapu butene peda, sun nai bo Lot nyakdanmaia deiki di mundu douprei.

37 Amenda taru, du nerdi sal mi deipudi, er si tep Moab si sipepu. Ami nepudi, nyapu deiamupa, sundi dadeipdanen baramenganen deiami nesala tep nengeda, sun si Moabit yala nesala peramitopu, tupa penupe. 38 Aner, er weit ner peda, sal mi deipudi, er si tep Ben-Ami pepra si sipepu. Amidi nepudi, deiamu nesala tep nengeda, sun yala si Amon nesala peramitopu tupa penupe.