Gen 20 | XteSC | STEP | Uda, amenda taruda, Abrahamdi er kuramu mutu, Kanaan mutu tapra dutara mutu beudi, Negeb tara dinin, Kades mutu atara, Syur mutu ortara neitamaipu kunmau. Dakunmau dinin, ke taru tep, ila nimi ngebo Abimelekdi taleamu mutu, Gerar mutu bena kunmau.

Genesis 20

1 Uda, amenda taruda, Abrahamdi er kuramu mutu, Kanaan mutu tapra dutara mutu beudi, Negeb tara dinin, Kades mutu atara, Syur mutu ortara neitamaipu kunmau. Dakunmau dinin, ke taru tep, ila nimi ngebo Abimelekdi taleamu mutu, Gerar mutu bena kunmau. 2 Amutu neitamai kunmau taruda, Abrahamdi er ner Sarah tep, “Anerda, ne mal nerpu kurure,” penmaupa, amutu taleamu ngebo Abimelekdi, ‘Aner dopkun’ tenen, dopropu.

3 Dopropu dinin, tenpu lukunda neitamaida, er ken mapmau taruda, Allahdi er damai peryanmau. “Kandi dopropmarem nerda, yuk ngebodi konum dopka cadi, wenepkamken ja. Kanda depmanto ngebo utopu kupmareme,” pepra wenepu.

4 – 5 Uda, Allahdi Abimelek tep, aupu peryanmau taruda, Sarah konum dopu dinin, sun kikiman kapul men mapmareia cadi, Abimelekdi upepu. “Uo, ne nai, kanda ne deiyo ngebo kurume. Aner dopmanuada, ‘Mali kupnedi, yuk ngebo ner upula dopropkun’ tenen, men kupmanu. Agum dinin, tali mangkau kange doupra aner dopmanu. Uda, angebo Abrahamdi, ‘Anerda, ne mal nerpu kurure,’ pepneu. Tonda, aner Sarahdi, er tep, ‘Angebo ne du bo pua,’ pepra inipmanereia cadi, mambul kupnere. Ne mali kupmanunge deiyo tep, ne talenepa, amutu kunge nesala yuma, tali mangkau kange doupra kununga cadi, nun yuma tep tali lupra wenepsememdi, poptapkuserem do?” pepu.

6 Upepupa, er ken mapmau taru neitamaida, Allahdi Abimelek tep pepu. “Teka, ne kaele. Kanda tali mangkau kange doupmaumumdi, aner dopmaume. Nedi, ‘Mali kuprur’ tenen, kalekmakenupa, ne upu kapul men yaniptapmanereme. Ukupmanua deiki di, aner cap, kan cap kapul men mapmarerume.

7 Ukutaruda, angebo Abraham tep, er ner dopra kange di ton cap karepkurume. Erda, ne upu lap pena deiyo ngebo kurura cadi, erdi ne tep moropnerepa, men poptapkamakene. Tupa gam kunkureme. Dinino, kandi aner dopra, kange di ton cap er akengebo tep men karepmem pangeda, ne pio tek sisi pepkene. Nedi wenepra poptapsenepa, kan pe, kan nyapsilip peda, yuma depkamarume.” Allahdi Abimelek tep pepu.

8 Upepupa, sun mapmangua berekupa, Abimelekdi er amutara bukra nimi deiyo neng yuma kongpepupa yanmaipa, ange yuma lap pepmau pangeda, sun yumada ila kware weik dangmai. 9 Kware weik kunmaipa, Abimelekdi Abraham kongpepupa, er damai yanmaupa, Abimelekdi Abraham tep upepu. “Kanda, ware ila mali kun keca, nun nong deiki deipmaserem do? Nedi kan tep, wareto mali keca kupmakenpa, kandi tamupra mali kweipmaserempa, Allahdi ne cap, ne talenun nesala yuma cap tep, wenepkamser do? Kandi nun tep, mali kweipmaserem ngeda, ila mambule. Pio mem keca utopu di mali kweipmasereme.

10 Ukupmaserema deiyoda, ware keca deiyo tep, ange mali kupmaserem do, asipetepkene,” pepu. 11 Upepupa, Abrahamdi tamupra pepu. Gume, ne tenipmanu ngeda lape pepkusene. Nedi sun tep tenepmasenada ake. Gume, amutu nesaladi ne nai bo Allah tep, er si erepra, er gispal dopmengedi, er tep kware pio men kununge. Ukupra men kunung nesala cadi, sundi ne ner tep, ‘Anerda urasin telep ner cadi, dopkupe,’ tenepmengedi, ‘Ne tep popkamneng ja,’ tenepsisi.

12 Tonda, ‘Anerda ne mal ner,’ pepmasada, yambulanun utopu tek pepmasi. Ne nai bodi aner deipu dinin, nun nin tenpu gume. Er nin yuk, nanin yuk cadi, nun mutu kunupada, ange telepe pua cadi, aner dopsi. 13 Dopsipa, ne nai bo Allahdi, ‘Kan nai sisa kori, Ur mutu tapra, talipu bisi embanapu kunkamreme,’ pepneu taru di, ne ner tep upepsi. “Kanda, dipru karenerema cadi, ‘Yuk nengdi ne popnenung’ tenen, nun benkamnem mutu yuma neitamai di, yuk neng gekena tep upenkamrume.’ ‘Angeboda, ne du bo pua,’ penkamrume.” Abrahamdi pepu.

14 Upepu pangeda, Abimelekdi Sarah dopra, kange di tamupra Abraham tep karepu. Karepudi, Abraham er namna tep, domba bisam cap, sapi bisam cap, uda ‘Pel talipu dopkamneng’ tenen, co bodi kunupu nimi cap, nerapu cap dopra, ‘Abraham er pel melipra donkameng’ tenen, karepu. 15 Karepudi, aupu pepu. “Uda, ne talenun mutu yuma kan dinmaruma cadi, ‘Amutuda kuna telepe,’ tenepmaremtopu, tali lupra bememdi, kunkamrume. Telepe pua pepkene,” Abraham tep pepu.

16 Upepudi, Sarah tep aupu pepu. “Kan du bo tep nengeda, kunumna weik keca, er sida perak, 11.5 kilo talipu karepne. Akunumna weik keca dopra deipmanada tali tep gume. Ada, nedi kan tep mangkau kange doupra mali kupkesinge tep, karepmasene. Atep, kan cap, kan cap kikiman kurum nesala yuma capdi akeca dinmarume. Atep ngeda yuk nesala yumadi, ‘Aner mali kupke,’ men pepketenge. Akeca deiki di konum telep kweipkene,” Abimelekdi Sarah tep pepu.

17 – 18 Uda, Abimelekdi mangkau kange doupra, Sarah dopu taru neitamaida, Allah er si Yahwehdi er wenemna tep, ‘Abraham dopu ner dopmaua cadi, betaipkamre’ tenen, ikin keca karepu. Ada, Abimelek er ner cap, er pel melimna nerapu yuma cap, uda er nyapsilip dinin, er ati kunmai nerapu yuma tep, ‘Sun nyapu ton cap men deipkameng’ tenen, you nerapu deiyo keca karepra wipdongopupa, sun yuma you nerapu kunmai. Allahdi wenepupa, you nerapu kunmaiya tep nengeda, Abrahamdi Allah tep moropu. Ada, ‘Allahdi Abimelek er ati nerapu yuma kweteptupa, nyape ton deiptenge’ tenen, moropupa, Allahdi anerapu yuma kwetepu.