Genesis 22

Allahdi Abraham tep, ‘Pio teka tenenerur do, gum do?’ tenen, kurpetepu upu

1Abrahamda amutu pio dakuramnganen, amenda taruda, Allahdi, ‘Abrahamdi tek sisi pio teka tenenkamner do? Ne pepnetopu, angepu kupkamar do, gum do?’ tenen, kurpetepu. Kurpetepu taru di kongpepu. “Abraham, Abrahamo,” pepra kongpepupa, Abrahamdi, “Naio, ne akunmane,” pepu. 2Upepupa, Allahdi pepu. “Uda, kandi deipmumdi, ‘Ne mi sisa’ tenen, pio bicau tenerum mi, kan mi tenpu Isak dopra, Moria mutu neitamai dubenkurume. Dubemempane, nedi, ‘Amutu dup acapu,’ pepkamkeneyaipu, ne gispal dona cap, ne karena cap tep, ami poipneremdi, karepkamnerume,” pepra deipu.

3Upepra deipupa, Abraham mapmaua, berekupa, ‘Abisam deiki buknedi, mutue benkaman’ tenen, er keledai bisam bali tara bungna keca deipudi, ketenepu. Ketenepudi, er pel melimna neng butene cap, er mi tenpu Isak cap doupra banmai. Tonda, ‘Ne mi popnyopda, Allah er karena tep, uku sekrapnedi, ne mi er nong uku dongopnepa, uku di jepropkamare’ tenen, uku dongon co ton bongopra koupra deipu. Co koupra ketenepu dingeda, ‘Allahdi pepmanerai benkamep’ tenen, er cap, er melimna neng cap, Isak cap kikiman bisi banmai.

4Bisi mapbanmaiyane, mapbanmaiyane, tumi weneringe neitamai di, Abraham dipetepudi, Allah pepmanaipu epu. Ortara yambul karenai di epu. 5Epu dingeda, er pel melimna neng butene tep upepu. “Sunda, ne keledai bisam kalekra acapu kunmarerumpane, ne cap, ne mi cap, nun yuk ormutu bena welepkuneme. Orbenemedi, Allah er si erepra gispal dopneme dingeda, ka tamupra acapu yankamaneme,” pepu.

6Abrahamdi upepudi, er ketenepmaudi, duyanmai co karepupa, Isakdi topdarap banmau. Er Abraham dingeda, tema cap, uku cap doupra banmau. Sun butene di bisi banmareipa, Isakdi er nai tep asipetepu. 7“Naio, nun uku cap, co cap doupra banmanem dinin, Allah er gispal dona tep, popra galepkamanem domba mida dan do? Uku sekra uku dongopkanem domba mi tep pepne,” pepra asipetepu.

8Asipetepupa, Abrahamdi tamupra pepu. “Jo, ne mio, Allah er gispal dona tep, uku dongopkanem domba mida, nun nai bo Allah, er pedi karepkamasere. Angeda tenena gume, ne mio,” Abrahamdi Isak tep pepudi, sun tupa bisi banmarei.

9Allahdi Abraham tep, “Acapu benkamarume,” pepra, lap pepmanai berei pangeda, Abrahamdi, ‘Allah er karen keca adeiki deipkamane’ tenen, gel pala dopra, pala gel taplakra yakeipudi, ketenepu. Ketenepra deipudi, sun duyanmarei co ton dopra, agel deiki deipudi, er mi Isak dopra, tapu di ateng kouprapudi, Isak peda agel pala yakra deipmaunge deiki maipra deipu. 10Ukupudi, ‘Ne mi Isak popkun’ tenen, tema dopra, buru erepu.

11Buru ereipu dinino, Allah er si Yahwehdi dokotepu im deiki pel dona ngebo, tenpu malaikatdi, im deiki di Abraham tep upupu. “Abraham, Abrahamo,” pepra upupupa, Abrahamdi tamupra, “Ne akunman adano,” pepu. 12Upepupa, Allahdi Abraham tep pepu. “Kan mi pona gume. Kan mida tenpupu kurur dinin, kandi, ‘Gume, erda ne mawapu tep, Allahdi pepnerya peda men kareptene’ tenen, upu men sekmaneremadi, ‘Allahdi pepmanertopu ne mi popkun’ tenen, ketenepmarema deiki di, pio betapra kael kepmakene. Kanda, ‘Allahda ila mambul ngebo cadi, er sipu erepra, er penere upu yuma gekenkamne,’ tenenerum ngebo kurumpa, kael kepkene,” Allahdi Abraham tep pepu.

13Upepu pangeda, Abraham epterepupa, tenpu jem domba bisam epu. Ada, jem dombadi, er giso deiki tekamre abolyakot, tepmeng kweiyong palpal neitamai dongopudi, gwarepdongopupa, men benmanto kupmaua epu. Ange epka cadi, orbena, agem domba dopra popupa, Allah er gispal dona tep, gel pala deiki deipra, uku sekupa, uku di jepropu. Er mi Isak puda loptapu. 14Ange yuma ukupka tep nengeda, Abrahamdi amutu si tep, “Allah er si Yahwehdi nun putaserur keca kareserure,” pepra si pepu. Abrahamdi upepra deiputopu, ukutaru peda anesaladi tupa penunge. Ada, “Nun nai bo Allah er si Yahweh, er mutuaida, nun putaserur keca kareserure,” tupa penunge.

15Uda, Abrahamdi amutu tupa pel donmau taru neitamaida, Allah er si Yahwehdi dokotepu im deiki pel dona ngebo, malaikatdi tenpu taru ton cap, Abraham tep kongpepudi, upepu. 16Neda Allah, ne si Yahwehdi upepkene. Ne pe nong cap, ne si cap deiki di pepkene. Kan mi tenpupu kurur dinin, kandi, ‘Ne mida ne mawapu’ tenen, ne upu sengtamna gum di, ne pepmakentopu konum kupmarema tep, aupu ton pepkene.

17Ada, pio tek sisi pepkene. Nedi kan tep pio telep kupra deipkenepa, kandi deipmumpa, amidi deiprepa, dadeipdanen, baramenganen, amenda taru kunkameng nesalada, gung pio weik kunkamenge. Ada, lukunda taru im deiki kuru pio men nukmanto tengamretopu, tonda ila laut mokon pirman me wenenga, pasir pio weik tenpu-tenpu men nukmanto kuramretopu, kan nyapsilip denge pio weik kupbankamenge. Kan nyapsilip, ada kan yala neng amenda taru kunkameng nesalada, yuk mutu nesala domi nimi ati arum bisbisa kapmengedi, dopropkamenge. Ada, yuk mutu nengdi, ‘Abraham er nyapsilipdi popbisipkamep,’ tenenkameng nesala tep, sun ati yuma, kandi deipmempa dadeipdanen bankameng nyapsilipdi dopropkamenga tep pepkene.

18Tonda, kandi deipmum midi deiprepa dadeipdanen, pio dordeipkameng nesala tep, nedi telep kweipne pangeda, anesaladi dordeipkameng ngebo deiki di, tuai mutu ban-ban yuma kunkameng nesala peda, sun tep telep kupra deipkamne. Deiyoda, nedi pepmakeneupa, ne upu gekepmaumdi, angepu kupmauma tep, aupu pepkene,” Allahdi Abraham tep pepu.

19Upepupa, Abraham gekepu dingeda, sun butene amutu tapra, Abraham er pel melimna neng butene, tali dakunmareiaipu tamupra bereipa, sun yumadi Bersyeba mutu tamupra banmai. Bei pangeda, Abrahamda Bersyeba mutu neitamaipu kuramu.

Abraham er weit bo Nahordi deipu nyapu tep upu

20Uda, sun dakuramipane, amenda taru neitamaida, yuk nengdi Abraham tep, er damai yana lap pepi. “Naio, kan basi ner, Milkadi nyapu konum deipu. Ada kan weit bo Nahor domu ner tepa. 21– 22Sun nyapu sida ake. Menmena deiamu mida, er si Us, adinenda, er weit bo Bus deipu. Adingeda, Kemuel (ada Aram deipkamu ngebo) cap, Kesed cap, Hazo cap, Pildas cap, Jitalap cap deriramudi, siryada Betuel deipu,” lap pepi.

23Uda, Milkadi Abraham er weit bo Nahor dopudi, kikiman kuramreiyanen, anyapu nukra, ban bari deiamu. Betuel nepudi, amenda taru er ner mi, er sida Ribka deipu. 24Tonda, Nahordi yuk ner ton dopupa, aner er sida Reumadi nyapu ton deiamu. Aner er nyapu sida ake. Teba cap, Gaham cap, Tahas cap, Maka cap deiamu.