Gen 23 | XteSC | STEP | Sarahda keteng tamun denge weik, 127 tahun gam kuramu dinin, depu.

Genesis 23

Abraham er ner Sarah depu upu

1 Sarahda keteng tamun denge weik, 127 tahun gam kuramu dinin, depu. 2 Er depu mutu sida, Kanaan tara neitamai dinin, Kiriat-Arba mutu, tonda amutupu dinin si ton Hebron mutu ton perami. Depupa, Abrahamdi, ‘Uo, ne ner depmanere,’ tenepudi, kange mun kange doupra, engenmaudi, malye penmau. 3 Malye pepra engenmauanen, konum kupu dingeda, Abrahamdi er kuramu mutu taleami nesala, sun si Het nesala tep upepu.

4 “Gume, ne kayape, sun mutu neitamai kunun dinin, neda yuk mutu ngebo, nimi bopu kununa cadi, ne tu gume. ‘Ne ner tu palipkaman’ tenena tep, sundi, “Aca telepe,” pepnetumpa, sun tu kunuptenedi, ne ner tu palipkamane,” pepra moropu.

5 – 6 Upepra moropu pangeda, sun Het nesaladi tamupra pepi. “Gume, nun naio, kanda nun kan-kan kikiman kurumada, ‘Erda ila deiyo ngebo utopu kurure,’ tenekenupe. Atep, nun nimi tu palinai do, gel imir pumbon nimi nong derinupai do, pio telepnge peda, ‘Angeda telepe,’ tenepmaremtopu, tali lupra doproptume. Kan ner depmaua palipkamrema tep nengeda, nun akunup nesala neitamai yuma, tenpu ngebo peda kan tep, ‘Gume,’ men pepketepe. Kandi tenipmaremaipu dopropkurume, ada telepe pua,” pepi. 7 Upepipa, Abraham tekudi, aHet nesala sun gispal dona tep, er giso genepudi, aupu pepu.

8 “Sundi ne tep, ‘Er depmau ner, er nong peinada, nun mutu neitamai telepe pua,’ tenepnerumnyopda, ne pepkusen upu gekepneso. Ada, Sohar er mi Efron tep moroptum pangeda, ne tenepsaida, atu kunupnetupa doproptene. 9 Ada Efrondi talerur wa siryada, tenpu gel imir er sida Makpela gel imir akurur. Agel imir tenipsa tep, sundi, “Efrono, kandi co bo ukupra-ukupra tenepmaremtopu, peiptumpa, Abrahamdi karepkamkere. Metekanunpu men tapkamare, yuma karepkamker ja,” pepra, “Ne melimna tep mororbetume,” pepra, Abrahamdi sun Het nesala tep moropu.

10 Upepra moropupa, sun yuma Efron er mutu beidi, moropipa, Efronda, sun mutu beilya buplan dam, er cap er mutu neng cap, kikiman bukmaiya di pepu. Ada sun Het nesala gekenmaiyai di, aupu tamupra pepu. 11 “Gume, ne naio. Kandi tenepmum gel imir cap, uda ataleamsi wa yuma cap, talipu karepkene. Apepmakenada, ne mutu neng yuma peda, sun ton gekenmanenga cadi, kan tenipmaremtopu, kan ner dongorbenkurume,” pepu.

12 Upepu dinin, Abrahamdi kange di ton cap, ‘Amutu nesala gispal dopkun’ tenen, giso genepudi, aupu pepu. 13 Ada amutu nesala yuma gekenmaiyaipu, erdi Efron tep upepu. “Gume, ne kabo. Ne pepkun upu gekepnetum do? Awa tu yuma er kunumna akapmaretopu karepketenedi, kunuptene. Ne karepkuken co bo doproptumopda, nedi ne ner depmaua, agel imir pumbon dongorbenkamane,” pepra moropu.

14 – 15 Upepupa, Efrondi tamupra pepu. “Naio, ne pepkuken upu gekepneo. Awa tu er kunumnada, kunumna weik keca perak, 4.5 kilo nukrap karepnetenge dinino, ne cap kan capda dipru karedana nengpu kunumna cadi, akunumna keca tep nengeda, ‘Mambule,’ men tenepkuneme. Ange karepnememdi, atu dopropmemdi, kan depmakeu ner dongorbana telepe pua,” pepu.

16 Upepupa, Abrahamdi, Efron pepmautopu, kunumna weik keca, er sida perak erepterepudi, 4.5 kilo karepu. Ada sun gekenmai nesala yumadi gekepmaitopu, tonda ataru, amutu kunumna deiyo nengdi nukra deriramitopu, 4.5 kilo nukrapudi, kipra Efron tep karepu.

17 Ukupra karepka tep nengeda, Mamre mutu neitamai dinin, Efrondi taleamu wa cap, awa neitamai kwamu gel imir cap, awa pirman tekamu co yuma capda, ‘Ange yuma Abraham ernge tenenkamep’ tenen, sundi surat sekra Abraham tep karepi. 18 Asurat deiki Abraham er si cap sekra deipi ngeda, inimna gum dinin, amutu ongopgenepra wiami beilya buplan dam bukupmaidi, gekenmai nesala yumadi asuru di epi.

19 Ayuma konum kupi pangeda, Abrahamdi er ner Sarah, er nong dopra Makpela mutu neitamai kwamu wa, awa neitamai kwamu gel imir pumbon dongopu. Amutuda, Kanaan tara neitamai dinin, mutu sida Mamre mutu, tonda Hebron mutu si penunge. 20 Ayuma kupka cadi, sun Het nesaladi Abraham tep, awa cap, agel imir cap karepidi, ‘Abraham er ner peina tep talerur mutu’ tenen, surat (akte hak) karepidi, er si ton sekra deipi.