Gen 24 | XteSC | STEP | Uda, Abrahamda pio dakuramnganen, pio wisi weik konum deipu. Er kuramu taru neitamai yuma, Allah er si Yahwehdi weika di meliamupa, er kuramu keca yuma cap, er taleamu keca yuma cap, pio teleppu kwamu.

Genesis 24

Abraham er mi Isakdi dopu ner, Ribka tep upu

1 Uda, Abrahamda pio dakuramnganen, pio wisi weik konum deipu. Er kuramu taru neitamai yuma, Allah er si Yahwehdi weika di meliamupa, er kuramu keca yuma cap, er taleamu keca yuma cap, pio teleppu kwamu. 2 Tenpu tumida, Abraham er ati pel don nesala, sun deiyo ngebo, tonda angebodi Abraham taleamu keca yuma kalekra dina deiyo ngebo, er tep Abrahamdi upepu. “Kao, ne abukmanpa, kan buru ne kail amutara deiprume. ^{▼▼kail amutara Aupu pepkada, sun Israel nesaladi, ‘Ne penkup upu tek sisi kupkamep’ tenen, pumun taru kuraminge tep pepu.} Ada ila mambul pedina upu pepkunerema tep, ange pepkene. 3 Nun nai bo Allah er si Yahwehda, akeca-keca yuma, im deiki cap, tuai mutu yuma cap talerure. Allah er tenpu kuredi, nun ila deiyo ngebo kurura cadi, er si deiki di pedina upu pepkunereme. Ada, ne mi Isakdi dopkamre nerda, sun Kanaan tara nesaladi deiamenge ner nyapu neitamai di, pio men dopropkamreme.

4 Uda, sun Kanaan tara nesala neitamai kunun dinin, ne mi Isakdi dopkamre ner morona tep nengeda, Kanaan tara gum dinin, ne pe mutupu tamupra bememdi, ne tara neng koripu mororbenkamrume. ‘Angeda tek sisi kupkamne,’ pepra pedina upu peipneo,” Abrahamdi pepu.

5 Upepupa, er pel melimna deiyo ngebodi tamupra asipetepu. “Atep naio, kan mutu ner moropetepnepa, karepnengopda, anerdi nun akunmap mutu tamupra yakarada, ‘Ne songe, amutu men benkamne,’ pepneryopda, ware kupkamne do? Ukupra pepnere dingeda, kan mi Isak dopra, kan menop taru kuramum mutu dubenkamne do, gum do?” pepra asipetepu. 6 Asipetepupa, Abrahamdi upepu. “Gume, ukuna meme. Ne mi dopra, ne kuramsi mutu dubana meme.

7 Nun nai bo Allah er si Yahweh, erda im deiki yuma talerur deiyo ngebodi, ne deiamnei mutu neitamai di dopropneudi, erdi pepneua deiki di, ne nai bo ati tapsidi, amutu Kanaan mutu yasi. Allah er si Yahwehdi pedina upu peipneuada, pepkukene. Ada, ‘Kandi deipmumpa, erdi deiprepa, dadeipdanen baramenganen, amenda taru kunkameng nesala tep, Kanaan tara ban-ban yuma karenkamne,’ pepra deipneue. Atep erdi, er im deiki pel don ngebo malaikat dokoteprepa, kan melimna tep mepra banmarpane, melipkerepa, ne kuramsi mutu neitamai di, ne mi Isak dopkamtu ner epkamreme.

8 Epmamemyane, anerdi, ‘Gume, neda Kanaan mutu orbanada ne songe, men benkamne,’ pepra upu sekuryopda, telepe pua. Ukupre dingeda, kandi ukutaru pepnerem pedina upu taptume. Men tenipkamrume. Ange yuma teleppu dinino, ne mi dopra dubememdi, ne menop kuramsi mutu dubana pio gume,” Abrahamdi pepu.

9 Upepupa, sun amutu nesala kuramitopu, er ati pel melimna deiyo ngebodi, er buru Abraham er kail amutara dongopudi, “Apepneremtopu tamna gum di, tek sisi kupkamne, yuk gume,” pepra deipu. 10 Upepra deipu dingeda, angebodi Abraham karepmemeu unta bisam cap, pio telep keca yala-yala yuma cap dopra, bisi banmau. Ada mutu si, ‘Aram Naharaim mutu benkaman’ tenen, bisi banmauanen, abisi neitamaida, nimi ati arum sida, Nahor mutu beu.

11 Beu taruda, ada idona taru, amutu nerapudi, ‘Me bungna di me gwepkup’ tenen, yakarami keteng cadi, tenpu me bungna damai bungbeu. Nimi ati yambul ortara, erda bura tara me bungna damaida, er dekanmau unta bisam 10 ton, acapu bukeipmau.

12 Ukupudi, Allah er si Yahweh tep moropu. “Ne nai Allah, kan si Yahweh tep moropkene. Kanda ne deiyo ngebo Abrahamdi si eremkerur Allaho, kandi melipnetumpa, ‘Isak dopkamtu ner eptene’ tenen, moropkene. Tonda, ne deiyo ngebo Abraham tep, ‘Bicau tenepra meliptume’ tenen, moropkene. 13 Kandi dinmanerempa, ame bungna damai bukmanpa, amutu nengdi deiami ner nyapu, ‘Me gwepkup’ tenen, yakankunge.

14 Ange tep ukupra moropkene, naio. Ne tenipmanada ake. Nedi amutu ner tep, ‘Kan me mau di me gwepra karepnetumpa, jeptene,’ pepnyopda, ne nai Allah kandi meliptumpa, anerdi ne tep, ‘Telepe, agwepman me jepmayo. Tonda, kan duyanmarum unta bisam pe tep, me gweipkukene,’ pepnetue. Naio, aupu utopu upu pepnetutoda, nedi kael keptene. Ada, ‘E, aner tenpu, Allahdi Isak er ner dona tep, konum wepu ner ake’ tenen, betapra teneptene. Ne nai Allah, apepmantopu kupnetumtoda, adeiki di, ‘E, ne deiyo ngebo Abraham tep, bicau tenepmardi, melipmare’ tenen, kael kepketene.” Abraham er ati pel dona deiyo ngebodi Allah tep, aupu pepra moropu.

15 Abraham er ati pel dona deiyo ngebodi Allah tep, aupu pepra tupa penmau taruda, tenpu ner er sida Ribka yanmau. Ada amutu nesaladi, me gwerami me mau ila ngeda, er morokyo deiki topra yanmau. Aner Ribkada, Abraham er weit bo Nahordi dopu ner, Milkadi deiamu mi, er sida Betuel, angebodi deipu ner mi ake. 16 Uda, Ribkada urasin pio telep ner kuramudi, nimi kapul men dopka cadi, er cap, nimi cap kapul men mapmarei. Kaber ner tupa kuramu. Ribkadi, amelimna ngebo bukmauai kirikra benmaudi, me bungnadam bena me gwepmaudi, ka tamupra welepmau.

17 Welepmaupa, apel melimna ngebodi menmena orbena antapmareipa, upepu. “Ka nero, kandi gwepmarem me meteka di karepnetumpa, jeptene do?” pepra moropu. 18 Moropupa, anerdi upepu. “Telepe, naio. Dajepmayo,” pepmaudi, er ila me mau er morokyo deiki topmaua di dopra, er buru di talepmaudi, angebo tep me karepu.

19 Karepmau dingeda, aupu ton dukdongopra pepu. “Naio, kan duyanmarem unta bisam, sun jena tep, me ton cap gweipnedi karepnepa, sun putaretopu jeptenge,” pepu. 20 Upepudi, adipapu er ila me mau dopra, unta bisam jepkungai, mokon deipmantoai dinikdongopu. Ukupudi, ka tamupra me bungnadam sepdara benmaudi, ‘Unta bisam yuma weika di jeptenge’ tenen, me weik ton cap gwepra yakanmau.

21 Me gwepra dikra yakanmau taru yumada, angebodi upu pena gum, tali dimpepra bukmaudi, aner tep dinmau. Ada, ‘Ne nai bo Allah er si Yahwehdi melipmanerpa, anerda Abraham er mi Isak dopmanto ner akonum do?’ tenen, dinmau.

22 Dinmaupane, er unta bisam yumadi, sun putana utopu konum jepmai pangeda, ‘Aner karepkun’ tenen, pio telep karena keca, kunumna weiknge, emas di petupra ketkepi ngeda dopra talepu. Ada, aner tep karepnepa, ‘Er u damai dekdongopkamre’ tenen, ketenepra doupu. 23 Doupudi, aner tep asipetepu. “Kanda ware ngebo ner mi deipkeupa, kurem do? Tonda moropkuken do? Kan nai bo ati pumda, go akapmaryopda, ne maptene do, gum do? Tonda, ne unta bisam gerekteneai ton akapmar do?” pepra asipetepu.

24 Asipetepupa, Ribkadi upepu. “Gume, Nahor dopu ner, Milkadi deiamu mi Betuel, ne nai kurure,” pepu. 25 Upepudi, aupu ton dukdongopra pepu. “Ne nai er ati pumda, go akapmara cadi, kanda er ati marbana telepe. Tonda, kan unta bisam gerekmantoai cap, sun jen keca cap weik akapmara cadi, ange peda telep pua,” pepu.

26 Upepu pangeda, Abraham er ati pel melimna deiyo ngebodi, er giso genepudi, Allah er si Yahweh tep, er si erepra gispal dopu. 27 Ukupudi, aupu pepu. “Ne nai Allah, kan si Yahweh ereipkene. Kanda ne deiyo ngebo Abrahamda, kan dipu talerumpa, kan si eremkerure. Kandi Abraham tep, ‘Ukupkamne,’ peipmumtopu, pio telep kupra konum kupmareme. Tonda, Abraham tep, bicau tenepmemdi, er tep tupa telep kudirume. Tonda naio, kanda Yahwehdi melipmanerema deiki di, ne deiyo ngebo Abraham, er tara nesala, sun ati konum yanmane. Ange yumada kan dia,” pepra, Allah er si Yahweh ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} tep, er si ereipu.

28 Angebodi Allah si eremau taruda, Ribka sepdaro er nin ati benmaudi, akati nesala yuma tep, akupmaunge yuma lap pepu. 29 Uda, Ribka er du bo sida, Laban kuramu. Labandi, angebo me bungna dam bukmauai sepdaro benmau. 30 Ada, angebodi arup taru Ribka tep karepmaunge, er u damai dekdongopmaunge cap, er buru dongopmau emas bukep cap, epmau dingeda, tonda Ribkadi lape pepmau upu ton gekepmaudi, ‘Angebo antapkun’ tenen, berbera er bukmauaipu beu. Beudi, angebo er unta bisam damai tengmaupa, epudi, aupu pepu.

31 “Kao, kanda Allah er si Yahwehdi telep kemdikerur ngebo kureme. Ware keca deiyo tep, acapu tupa tengmarem do? Nun ati kikiman mapkamarema cadi, nati konum keteneipmakene. Tonda, kan duyanmarem unta bisam gerektumai ton keteneipmakene,” pepu.

32 Labandi upepka tep, Abraham er pel melimna ngebo sun ati benmaupa, er cap yanmai nengdi, bung keca getepra unta bisam bali tara koupdongopinge yuma loptapmaidi, deipmaipa, akati nengdi sun unta bisam manai tep, manmaneng dopra deipmai. Tonda, unta bisam sun jen keca ton kipra duyanmaidi, deipmai. Uda, angebo cap, er melimna neng cap, bisi weik yakanmaiya tep, akati nengdi, ‘Sun yan bental bapmaunge me kupkuseng’ tenen, me ton gwepra karepmai.

33 Ange yuma konum kupi dingeda, aneng sun jena tep, jen keca duyanmaidi, sun urasinaipu ketenepra deipmai. Deipmai dinino, Abraham er pel melimna ngebodi upepu. “Gume, ne kayape. Menmena ne upu konum pepnyopda, amendapu jene jeptene,” pepupnen, sundi, “Telepe, atep kan tenepmarem upuda, pepsemempa gekepkupe,” pepi.

34 Upepipa, angebodi aupu pepu.

Gume, ne kayape, neda Abraham er ati pel melimna ngebo kunune. 35 Allah er si Yahwehdi, ne deiyo ngebo Abraham tep, pio weika di meliamupane, telep kupra deiamnga di, ukutaruda Abrahamdi akeca-keca weike talerure. Erda isomka ngebo kurure. Allahdi er tep kareramu kecada ake. Domba bisam cap, sapi bisam cap, kunumna weik keca perak cap, emas cap, pel melimna neng cap, nerapu cap, unta bisam cap, keledai bisam cap, weike kareramu.

36 Ne deiyo ngebodi doamu nerdi, pio wisi deipu dinin, sal mi tenpu deipu. Abrahamdi taleamu keca yala-yala yuma, er mi tenpu tep karepu. 37 Tonda ne deiyo ngebodi ne tep upepneu. “Pedina upu pepkunerume. Ada ake. ‘Ne mi dopkamre ner mororbenkurum dinin, ne Kanaan mutu neitamai kununai, Kanaan nengdi deipi ner nyapu neitamai di men mororbetume. 38 Ange gum dinin, ne mi dopkamre ner tep mororbenkamremaida, ne nai er tara neng, tonda, ne pe yala neng sun tara mororbenkamrume,’ pepneudi, ‘Tek sisi ukupkamne,’ pepra peipnerume,” pepneupa, nedi upepsi.

39 “Naio, kan midi dopmanto ner moropnepa, telep pepnengepane, anerdi, ‘Gume, kan Kanaan mutu men benkamneme,’ pepneryopda, ware kupkamne do?” pepra asipetepsipa, Abrahamdi upepneu. 40 “Ne nai bo Allah er si Yahweh, er upu moupra kael keamsidi, er upu talepra dombaramsi Allahda, er im deiki pel dona ngebo, malaikat dokoteprepa, kan cap melipra benkamruma cadi, amalaikatdi melimkerepa, ne mi er ner mororbenkamrum ngeda, teleppu kupkamkere. Ada, kandi ne pe yala neng cap, ne nai er tara neng cap tep, ner moropmemnyopda, malaikatdi melipkerepa, teleppu kupkamre.

41 Apepmakentopu, ne tara neng damai bememdi, moropmempa sundi, ‘Gume ner men karepkusepe,’ peptenga peda, telepe. Nedi, ‘Ukupkamrum,’ pepmakentopu, konum piripetepmema cadi, angeda telepe pua. Ukupra pepkengopda, pedina upu peipmanerem ngeda, tenena gume, dakwapye.” Abrahamdi upepneu.

42 Uda, atumida sun me gwerumai, me bungnadam yanmanudi, ne nai Allah er si Yahweh tep upepmanue. Ukupudi, Allah tep moropu. “Ne nai Allaho, kanda ne deiyo ngebo Abrahamdi si eremkerur Allaho, kandi melipnetumpa, ‘Isak dopkamtu ner eptene’ tenen, moropkene. 43 Kandi dinmanerempa, ame bungna damai tekmanpa, amutu nengdi deiami ner nyapu, ‘Me gwepkup’ tenen, yakankunge. Ange tep ukupra moropkene, naio. Ne tenipmanada ake. Nedi amutu ner tep, ‘Kan me mau di me gwepra karepnetumpa, jeptene,’ pepnyopda, ne nai Allah, kan si Yahwehdi meliptumpa, anerdi ne tep, ‘Telepe, agwepman me jepmayo. Tonda, kan duyanmarum unta bisam pe tep, me gweipkukene,’ pepnetue.

44 Naio, aupu utopu upu pepnetutoda, nedi kael keptene. Ada, ‘E, aner tenpu, Allah er si Yahwehdi Isak er ner dona tep, konum wepu ner ake’ tenen, betapra teneptene. 45 Allah tep ne dipru neitamai tupa moronmanu taruda, sun ner mi Ribkadi, er ila me mau morokyo deiki topra yanmau. Yanmaudi, me damai kwerepudi, me gwepra tamupra yanmaupa, nedi, “Jen me karepneo,” pepra moropmanue.

46 Moropmanupa, anerdi upepu. “Telepe, naio. Dajepmayo,” pepmaudi, er ila me mau, er morokyo deiki topmaua di dopra, er buru di talepmaudi, angebo tep me karepneu. Karepmanu dingeda, aupu ton dukdongopra pepu. “Naio, kan duyanmarem unta bisam, sun jena tep, me ton cap gweipnedi, karepnepa, sun putaretopu jeptenge,” pepu. Atep nedi me jepmanu. Tonda ne unta bisam yumadi jepmangue. 47 Amendada, nedi er tep asipetepmanu. “Kanda ware ngebo ner mi deipkeupa, kurum do?” pepra asipetepmanu. Asipetepmanupa, Ribkadi upepneu. “Gume, Nahor dopu ner Milkadi deiamu mi Betuel, ne nai kurure,” pepneu. Ukupra pepneua tep nengeda, kandi karepnemum emas keca, u damai derin keca cap, buru koudongon keca cap, aner tep karepsi.

48 Upepneupa nedi, ‘Allah Yahweh, er si erepra gispal dopkun’ tenen, giso genepmanudi, ne deiyo ngebo Abrahamdi si eremrur Allah er si Yahweh tep, ‘Telepe’ pepra, gispal dopmanue. Ada, Yahwehdi melipmanupa, Abraham er weit bodi deiamupa, deiami ner mi antapsipa, ukuda Abraham er midi aner dopkamre tep, ne kange deipnere. 49 Atep nengeda, sundi ne deiyo ngebo Abraham tep, ‘Telepe, er putaretopu bicau tenepmepedi, aner karepkukepe,’ teneprumnyopda, angepu lap pepneso. Agum dingeda, ‘Gume, nun ner mi men karepkukepe,’ tenepnerumnyopda, angepu pepneso. Upepnerumnyopda, kange di ton cap tenepnedi, ‘Abisi benkaman do? Yuk bisipu benkaman do?’ tenenkamna tepa,” pepu.

50 Abraham er pel melimna ngebodi upepupa, Ribka er du bo Laban cap, er nai bo Betuel capdi upeprei. “Gume, nun kangeda, ange lap pepmaserem yumada, tek sisi Allah er si Yahwehdi melipmakerpa, er teneramutopu konum kupsera tep, nundi ware pepteneme do? ‘Ange telep, ange mali’ tenen, men wepra pepkuneme. Allah er kange ja. 51 Nun ner mi Ribka akunmar adano. Allah er si Yahwehdi teneramutopu, kandi dopra dubememdi, karepmempa, Isakdi dopkamre. Angeda telepe pua pepneme,” peprei.

52 Upepreipa, Abraham er pel melimna ngebodi, sun pepmarei upu gekepmaudi, adipapu, ‘Allah tep gispal dopkun’ tenen, er giso genepmaudi, Allah er si Yahweh tep, er si erepmau. 53 Ukupu dingeda, erdi getepra duyau keca neitamai di, sun tali karena tep nengeda, kunumna weik keca emas cap, perak cap, pio telep opkal cap doprapudi, Ribka tep mesumpu karepu. Karepudi, ange utopu Ribka er du bo cap, er nin cap tep, kunumna weik keca talipu karepu.

54 Karepupa, sun mutu di yai neng, er cap, er melimna neng capdi, jen me cap, jen keca cap deipmaidi, akatipu alukunda mapmai. Mapmaiya, berekupa, erdi akati neng tep, “Telepe, ‘Ne deiyo ngebo er ati tamupra benkun,’ tenepra ketenepmana cadi, ‘Telepe,’ peipnerumpa, benkune,” pepu.

55 Upepu dinin, Ribka er du bo cap, er nin cap di, “Gume, nun ner mi cap, nun cap tumi sepuluhto, ton cap kikiman kunkamepe. Ataru konum kupre pangeda, sun banada telepe pua,” peprei. 56 Upepreipa, angebodi tamupra pepu. “Uo, ne kayape. ‘Ne nai bo damai adipapu benkun’ tenen, konum ketenepmana tep, tonda Allah er si Yahwehdi melipmanupa, er teneramutopu konum kupsera tep, ‘Telepe daberume,’ pepnetumtoda, adipapu benkune,” pepu.

57 Upepupa, Ribka er du bo cap, er nin capdi upeprei. “Uda, atep aner kongpepmepepa, yaryopda, erdi teneretopu telepe pua,” peprei. 58 Upepra kongpepreipa, yauopda, asipeteprei. “Nun ner mio, angebo cap benkamarem do?” pepra asipetepreipa, Ribkadi, “Telepe, ne cap nun banada telepe pua,” pepu. 59 Upepka cadi, sun amutu nengdi Ribka tep dokotepmaipa, er melimna ner cap, Abraham er pel dona melimna ngebo cap, er tep dipra yai neng cap kikiman bei.

60 “Telepe, daberume,” pepmai taruda, er Ribka tenpu tep, ‘Allahdi telep kupra deipkamre’ tenen, aupu pepmai. “Nun nero, nun kangeda, kandi deipmempa, dadeipdanen baramenganen, kunkameng nesala weik, beribu-ribu kunkamenge. Kan tep, ‘Nun nau ner,’ penkameng nesala weik kupbangedi, sun tep popetepkameng nesala yuma tep nengeda, ‘Bisbisa kapmengedi, sun ati arum yuma dopropkameng’ tenen, putaserure. Ada kan nyapsilipdi kunkamenge tep pepmepe,” pepra deipi. 61 Ribka er tara nengdi upepmai pangeda, Ribka cap, er melimna nerapu cap ketenepidi, sun unta bisam bali tara welepra bukmaidi, Abraham er pel melimna ngebo cap, bisi banmai. Atep angebodi Ribka dopra, ‘Abraham mutu benkup’ tenen, amutu tapra dubeu.

62 Uda, ataru neitamai, Isakda Negeb tara neitamai kuramnga cadi, er nai tara tamupra benmaudi, mutu si Ber-Lahai-Roi mutu tapra bisi yanmau. 63 Er nai damai yana kunmauanen, tenpu tumi idonada, ‘Ne dipapu Allah tep tenenkamne,’ tenepudi, tenpu wa neitamai bena bukmau. Bukmauanen, giso erepra ortara dipetepmaudi, unta bisam bisi neitamai yakanmaupa, epu.

64 Uda, atarupu dinin, Ribka peda unta bisam bali deiki bukra yakanmaua di, giso erepra Isak bukmau tara dindeupa, Isak epu. Epudi, er unta bisam deiki bukmaua di, kwerepu. 65 Kwerepudi, Abraham er pel melimna ngebo tep asipetepu. “Kao, orwa neitamai di, nun tara yakanmare ngeboda, ware ngebo do?” pepra asipetepupa, apel melimna ngebodi tamupra pepu. “Gume, angeboda tali ngebo gume. Erda, ne deiyo ngebo kunerure,” pepu. Upepra lap pepka cadi, amutu nerapudi kuramitopu, Ribkadi, ‘Ne dopkamner ngebodi, kapul dopner taru ne urasin epnerur’ tenen, Ribka er giso deiki getepmau opkal di, er urasin lelipdongopu.

66 Sun yuma konum antapmai pangeda, Abraham er pel melimna ngebodi Isak tep, ataru neitamai kupmaunge yuma lap pepu. 67 Amenda taruda, Isakdi Ribka dopudi, er nin ati ton kikiman bei. Isakdi Ribka dopka cadi, pio bicau tenepudi, dipru karenmau. Er nin Sarah depmaua tep nengeda, mambul kange dounmau dinin, Ribka dopka deiki di, er dipru kwa dipupa, Ribka tep bicau teneramudi, kange deriramu.