Gen 25 | XteSC | STEP | Abraham er ner Sarah konum depupa, dakuramnganen, tenpu ner ton, er sida Ketura dopu.

Genesis 25

Abraham depu taru tep upu

1 Abraham er ner Sarah konum depupa, dakuramnganen, tenpu ner ton, er sida Ketura dopu. 2 Dopudi, dakuramreianen, aner deiamu nyapu sida ake. Menmenada Simran deipu, adinenda, Yoksan cap, Medan cap, Midian cap, Isbak cap, deiamudi, siryada Suyah deipu.

3 Butene taru deipu mi Yoksan nepudi, amenda taru er nyapu Seba cap, Dedan cap deipu. Dedandi deipupa, dordi deiami nesala sida, Asyur yala neng cap, Letus yala neng cap, Leum yala nesala cap kurami. 4 Keturadi deipu mi Midiandi, amenda taru nepudi, deiamu nyapu sun sida, Efa cap, Efer cap, Henok cap, Abida cap, Elda cap kurami. Animi si cap, yala si cap yumada, sun nau nerda Ketura kuramu.

5 – 6 Abrahamda, gam tupa kuramu taru neitamai di, erdi doamu nerapu, sundi deiami nyapu yuma tep, erdi taleamu keca ton bokrapudi, sun yuk-yuk tep tali kareramu. Kareramu dingeda, anyapu yuma tep, “Sunda amutu tapra, ortara keteng yakan tara bena kunkamrume,” pepra dokotemamu. Ada, ‘Ne mi Isakdi talenkamre mutu neitamai, kikiman men kunkameng’ tenen, dokotepnapu kuramudi, sun yuma bendoprapu yukai kurami.

7 Abraham gam kuramu taruda, keteng tamun denge weik, 175 tahun kuramu. 8 Ukupra kuramu dinin, pio wisi deipka cadi depu. Er depu taruda, pio wisi konum kupke. Depu pangeda, Allahdi Abraham er sambala dopra, er apu yapu damai dubeu. 9 Abraham depupa, er nyapu butene di, Isak cap, Ismael cap er nong peirberei. Ada, Mamre tara dinin, nimi si Efron taleamu wa neitamai kwamu gel imir, er sida Makpela gel imir pumbon dongoprei. Efronda, ada Het yala ngebo, er sida Zohardi deipu mi tepa.

10 Gel imir kwamu wada, Abrahamdi, ‘Ne ner Sarah depmarpa, er nong dopra dongopkaman’ tenen, kunupupa, sun Het yala nesaladi karepmemei wa ake. Isak cap, Ismael capdi, sun nai bo Abraham depupa, er nong dopra dubereidi, agel imir, Sarah dongopkaipu, dongorberei. 11 Abraham konum depu pangeda, Allahdi Abraham er mi Isak tep, kange deiamudi, telep-telep kupra melimamupa, teleppu kuramudi, mutu si Ber-Lahai-Roi mutu damai kuramu.

Abraham er mi Ismaeldi deiamu nyapu tep upu

12 Uda, apuda, Sarah er melimna ner, Mesir mutu ner, er sida Hagardi deipu mi Ismael tep pepne. Ada Abraham cap, Hagar capdi deiprei mi tepa. 13 Ismael nepudi, amenda taru deiamu nyapu, erdi deipbaramutopu sun si ake. Ismaeldi menmena deipu mi, er sida Nebaiyot deipu. Adinenda, sun si Kedar cap, Adebel cap, Mipsan cap, 14 Misma cap, Duma cap, Masa cap, 15 Hadad cap, Tema cap, Yetur cap, Napis cap, anyapu yuma tenpu-tenpu deipbaramudi, siryada er mi Kedema deipu.

16 Animi si sipepmasen ngeda, ada Ismaeldi deiamu nyapu tepa. Anyapu yumada, ila nimi yala deiyo neng kuramidi, sun ati arum cap, sun mutu cap yuk-yuk talepra kurami. 17 Ismaelda keteng tamun denge weik, 137 tahun gam kuramudi, pio wisi konum deipupa, depu. Depupa, Allahdi Ismael er sambala dopra, er apu yapu damai dubeu.

18 Ismaeldi deiamupa, dadeipdanen baramyanen kurami nesala, er nyapsilipda, Mesir mutu pirman dinin, mutu sida atara Hawila mutu, ortara Asyur mutu, daneitamai kurami. Ada Asyur mutu bana tep, abisi baramengai di dinup mutu tepa. Sunda keteng yakan tara kurami dinin, sun du yape do, sun yala dinin, sun yuk neng yumada, keteng baramre tara kuramidi, ‘Songe,’ tenedanapu kudarami.

Isakdi deipu nyapu butene, sun sida Yakub cap, Esau cap tep upu

19 Uda, apepkusen upuda, Abrahamdi deipu mi Isak, erdi deipu nyapu tep nukusene. 20 Abrahamdi Isak deipupa, Isak nepbaramupane, keteng tamun 40 tahun wisi konum deipu pangeda, er ner Ribka dopu. Ribkada, Aram tara ngebo er sida, Betueldi deipu ner mi. Erda Aram yala ngebo dinin, mutu si Padan-Aram kuramu. Ribka er du bo sida, Laban kuramu.

21 Uda, Isak er ner Ribkada you ner kuramnga cadi, ‘Ne nerdi nyapu deipnetu’ tenen, Isakdi er ner tep Allah mororamu. Mororamupa, Allah er si Yahweh gekepudi, Ribka tep melipupa, mundu doupu. 22 Ribka mundu douamu taru neitamaida, kwa nyapu mundu doupka cadi, akwa nyapu butene di, er mundu pumbon puto di pengepra dodaramrei. Ukudaramreipa, Ribkadi, ‘Uo, akupnere ngeda, ware deiyo di kupmaner do?’ tenen, Allah er si Yahweh tep moropudi, asipetepu.

23 Asipetepupa, Allah er si Yahwehdi upepu. “Gume, angeda tali tep gume. Kan mundu pumbonda, nimi yala butene sun gonga kemna deiyo neng kurunge. Deipmarempa, aneng buteneda, sundi deiprengepa, dadeipdanen baramenganen, yala yuk-yuk kunkameng nesala peda, bokra yuk-yukai kunkamenge. Ton ngebodi dordeipkamre yala nesalada, puto weik kunkameng dinin, ton ngebodi dordeipkamre yala nesalada, puto bounpu kunkamenge. Menmena deipkamrem midi, amenda deipkamrem mi tep, er amutara bukra, er melimna ngebo utopu kunkamre. Amenda taru deipkamrem mida, er du bo deiki tara, deiyo ngebo utopu kunkamre.” Allahdi Ribka tep aupu lap pepu.

24 Allahdi aupu peputopu, Ribkadi kwa nyapu deipu. 25 Anyapu butene deipmau taru, menmena taru deipmau mida, er nong bol deiki bi potong weik kupu. Ukupka cadi, er sida Esau pepra si sipepi. ^{▼▼Esau – Ibrani upu deiki di Esau deiyoda, ‘Nong bol potong weik’ tenen, perami.} 26 Ribkadi menmena deipmau mi, Esau deipmau taruda, er weit bo butene deipmau midi, Esau er yan talepmaupa, deipmau. Amenda deipmau midi, menmena deipmau mi er yan talepra yanmaua cadi, butene deipmau mi er si tep Yakub ^{▼▼Yakub – Ibrani upu deiki di Yakub deiyoda butene kurure. Tenpuda, ‘Yan talerur ngebo’ tenen, penunge. Butene ngeda, ‘Mawa di perur ngebo’ tenen, perami.} si pepi. Ribkadi akwa nyapu deipu taruda, Isakda keteng tamun denge weik, 60 tahun wisi konum deipu.

27 Uda, anyapu buteneda nepbaramreipane, Esauda, bura mutu embana cap, bura mutu gam kure keca pona cap, tamona cap ila kael kemna ngebo kuramu. Ukuramu dinin, Yakub puda, bura mutu embana gum ngebo, sun ati dam tali dimpeprappu kuramu. 28 Sun nai bo Isakda, bura mutu jena popra darami ngeda, pio kange deipra putaramnga cadi, er dingeda Esau tep, kange deiamudi, dipru kareramu. Ukuramu dinin, Ribka dingeda, er mi Yakub tep kange deiamudi, dipru kareramu.

29 Tenpu tumida, Yakubda sun ati pum kunmaudi, jen keca gapra ketenemaupa, er du bo Esauda, pio bura mutu kalengbenmaua di, ati yau. Esauda, jen pio putana weik kunmaua di ati yau. 30 Yau dingeda, Esaudi er weit bo Yakub tep upepu. “Uo, ne weito, jene pio putanmanera tep, kandi gapmarem ngeda lukra karepneo,” pepu. ^{▼▼gapmaunge – Yakubdi gapmau ngeda, bi kupka cadi, Esau er si ton Edom perami. Ada Ibrani upu deikida, Edom deiyoda, ‘Bi keca’ tenen, perami.} 31 Esauda, jen pio putana weik kupmaupa, moropu pangeda, Yakubdi tamupra pepu. “Jo, agapman keca karepketene dinin, menmenada nun nai bodi depkamre taru, bokra karepkamker kecada, ‘Karepkamkene,’ pepra, pedina upu pepnerempa, akeca kunumna tep, ne gapman jen keca lukra karepkukene,” pepu. 32 Upepupnen, Esaudi, “Weito, jen kecada ila di putanmanerpa, depmanto kupmanera tep, ne nai bodi amenda taru karepkamner kecada, mambule men tenepne. Depnyopda, men dopropkamtenya tepa,” pepu.

33 Upepu dinin, Yakubdi tamupra Esau tep upepu. “Akeca karepkuken dinin, kandi, ‘Tek sisi nun nai bodi bokra karepkamnere ngeda, kan dipapu doproptume,’ pepra, pedina upu pepnerem pangeda, adeiki dipu ajen keca karepkukene,” pepu. Yakubdi upepka tep, Esauda er weit bodi, ‘Upepkunerum’ pepmautopu, pedina upu pepra deipu.

34 Upepra deipupa, Yakubdi jen keca kacang merah gapmaunge cap, roti cap bokra, Esau tep karepmaupa, jen me cap, agapmaunge cap jepmaudi, akati tapra bura beu. Esaudi, ‘Ange tali karepkamkene,’ pepka deiki di, er nai bo depkamu taru karepkamemeu keca tep, ‘Ne song’ tenen, tapudi, mali kupu.