Gen 26 | XteSC | STEP | Abrahamda, Kanaan tara kuramu taruda, sun jen yuma gum kupbaramupa, si tepra, jen jena gum talipu kuramipa, ikin weik kupu. Ange utopu, Isak amutu neitamaipu tupa kuramu taru neitamai, sun jen gum kupbaramupa, tali jen si tepra kurami. Ange tep nengeda, Isakdi Abimelek damai beu. Abimelekda, Gerar mutu kuramudi, Filistin yala nesala, sun ila nimi deiyo ngebo kuramu.

Genesis 26

Isak cap, Filistin nesala sun ila nimi deiyo ngebo Abimelek cap tep upu

1 Abrahamda, Kanaan tara kuramu taruda, sun jen yuma gum kupbaramupa, si tepra, jen jena gum talipu kuramipa, ikin weik kupu. Ange utopu, Isak amutu neitamaipu tupa kuramu taru neitamai, sun jen gum kupbaramupa, tali jen si tepra kurami. Ange tep nengeda, Isakdi Abimelek damai beu. Abimelekda, Gerar mutu kuramudi, Filistin yala nesala, sun ila nimi deiyo ngebo kuramu. 2 Isak beu dinin, Isak kene mapmaua deiki di, Allah er si Yahweh yaudi upepu. “Kanda, ‘Mesir mutu benkun,’ tenepmaremada yaprume. Mesir mutu men benkurem dinin, nedi kan tep, ‘Amutu kunkamrum,’ pepkene mutupu kunkamrume.

3 Atep, Gerar mutu, aca kunmaremaipu yambulanun ton tupa kunkamrume. Nedi melimkeneya deiki di, telep-teleppu kunkamrume. Deiyoda, nedi kan nai bo Abraham tep, ‘Tek sisi ukupkamkene,’ pepra pedina upu pepmemesitopu, tek sisi kupkamne. Ada, kan cap, kandi deipmempa, dadeipdanen baramenganen, dordi kunkameng nesala cap tep, amutu-amutu yuma karepkamsene.

4 Tonda, kandi deipmempa, dadeipdanen dordi deipkameng nesala, kan yala nesalada, nedi meliamsenepa, nesala denge pio weik kupbankamenge. Ada lukunda neitamai kwirye pio men nukmanto tekamretopu, kan yala nesala denge pio weik kupbankamenge. Amutu ban-ban yuma karepsenepa, kan yala nesaladi talenkamenge. Kan yala nesala ila mambul keca kupkamenga deiki di, ^{▼▼Mambul keca kupkamenga deiki di pepunge deiyoda ake. Ada amenda doryankamre taru, er yala nengdi, Yesus deipkamenga tep pepu.} tuai mutu ban-ban yuma kunge nesala yuma tep, telep kupra deipkamne.

5 ‘Ange-ange kunkamsene,’ pepmaken upu yumada, tali tep men kunkamne. Deiyoda nedi, ‘Ange ukupkamrume, angeda men kupkamrume,’ pepra deiamsi upu cap, ‘Ukuna meme, ukuna telep,’ pepra deriramsi upu yuma cap, kan nai bo Abrahamda, aupu yuma betapra gekeramudi, talepra dombaramu. Ne upuda men yaniptapneue. Atep nengeda, er mi kan tep weika di melimkamkene,” Allahdi Isak tep pepu. 6 Upepka cadi, Isakda yuk mutu men beu. Acapu Gerar mutu neitamaipu kuramu.

7 Isak cap, er ner Ribka cap, amutu neitamai kuramrei taruda, Gerar mutu nengdi er ner Ribka epidi, “Ware ner do,” pepra asimpeteramipa, Isakdi, “Gume, anerda, ne mal ner pua,” peamu. Uperamnga deiyoda, ‘Ribkada urasin pio telep ner cadi, aner doptepe,’ tenepmengedi, ‘Amutu nengdi ne ner tep popnenung,’ tenepudi, ‘Anerda ne dopsi ner, men peptene’ tenen, kware kupupa, aupu inipra peamu. 8 Uda, ukupra kuramudi, sun yuma kikiman dakuramipane, tenpu tumida sun Filistin yala nesala, sun ila deiyo ngebo Abimelekdi, er alau ati kunmauai di, yuk ati dutara dipetepupa, Isakdi er ner Ribka iripmaupa, epu.

9 Epka cadi, amendada Abimelekdi Isak tep, “Ne damai yarume,” pepupa yaupa, aupu pepra wenepu. “Aner Ribkada, tek sisi kan nerpu kurura cadi, kandi ware keca deiyo tep, ‘Anerda ne mal ner pua,’ peramumdi, iniamsemum do?” pepra wenepu. Wenepupa, Isakdi tamupra pepu. “Gume, ne teneramsada, ‘Amutu nengdi, aner doptepe,’ tenepmengedi, ‘Ne tep popnenung’ tenen, aupu peramsi,” Isakdi pepu.

10 Upepupa, Abimelekdi upepu. “Uo, angeda warya tep iniamumdi, mokpu peamsemum do? Nun mutu nengdi kan ner tep dopmatengedi, nyakdanmatengepa, pio mali kupmatenge. Mankau kange doupra mali kupmatengepa, nun ikin weik kupsetu. Angeda mambul weike,” pepu. 11 Upepu dingeda, ‘Ne mutu nengdi mangkau kange doupra mali kupnung’ tenen, aupu pepra, sun yuma tep upeipu. “Ware ngebo do yuma, angebo do, er ner do, utotopu, sundi sun butene tep mali kuprumnyopda, nedi pepnepa, ne nyapsilipdi popkamenge. Atep sun kange moupso,” pepu.

12 Upepupa, sun dakunmaipane, aketeng tamun neitamaipu, Isakdi wa peprapudi, koun keca cap, yal keca cap yala-yala weik koupupane, nepbaramnganen, denge pio weik nepudi, pio telep kupra nong deipu. Tonda du weik moupu. Ada, erdi koupka utopupu gum dinin, seratus kali weik ton cap nong deipu. Ada tali tep gum dinin deiyoda, Allah er si Yahwehdi weik meliamnga deiki di, er wa yuma pio telep kupra moupu. 13 Ukupupane, Isakdi taleamu keca yala-yala yuma weik kupbaramupa, ila isomka ngebo kuramu.

14 Isakda, pio isomka ngebo kuramnga cadi, sun Filistin yala nesaladi er tep, ‘Uo, er kuretopu, nunpuda kupsetue’ tenen, dipru wiliamemeidi, er tep mali kange douami. Ada, er domba bisam cap, er sapi bisam cap, er pel melimna nerapu cap, nimi cap, pio weik kuramnga tep nengeda, sundi er tep mali kange douami.

15 Sundi Isak tep, ‘Nun song’ tenen, Isak er nai bo Abraham, er pel dona nengdi, ‘Mokon deipsetue’ tenen, tu paliramipa, mokon deiamupa, me gweramyai yuma tep mali kupra deipi. Ada, sun Filistin nesaladi, tu palipra, abon yuma pumbon dongopipa, singipdongopipa, me men gwepmanto kupu. 16 Sundi ukupipa, sun deiyo ngebo Abimelekdi, Isak tep upepu. “Kao, ukutaruda, kanda ila isomka cap, puto weik cap kupmarem dinin, nunda, yambul mambul nengto kunupa cadi, nun mening dampu kuremai tapra, yukai bena kunkamrume,” pepu.

17 Upepka cadi, Isakdi er keca yuma dopra, sun kikiman kunmai mutu tapra, yukai bena mutu si Gerar ban mutu kuramu. 18 Amutu neitamai bena kuramu taruda, er nai bo Abrahamdi menop taru paliramu me mokon gwenai yuma, kange di ton cap paliprapudi, acapu me gweramu. Ada, Abraham konum deipu taru, sun Filistin nesaladi Isak tep tulum kupupa, tu palipra abon-abon yuma dongopipa, tu singipdongopi ngeda, Isakdi kange di ton cap palipupa, mokon deipupa, me gwerbaramu. Ukupudi, er nai bo Abrahamdi menop taru, “Amokon si aca, amokon si aca,” pepra, si sipepra deriramutopu, Isakdi, amokon sipu peramu.

19 Tonda, Isak er pel melimna nengdi, Gerar ban mutu neitamai tu palipetepipa, pio jen telep me mokon epi. 20 Epidi, ame gwerami dinin, sun Gerar ban mutu domba bisam pein nengdi, Isak er domba bisam pein neng tep, yu kupupa, upu weika di pangdanami. Pangdanmaidi, sun Gerar ban nengdi upepi. “Gume, ame mokonda, nun ngepu kurure. Sundi ton ame gwena meme,” perami. Uperami atep, Isakdi ame mokon si tep, “Esek mokon,” pepra si deipu. Ada, amutu nengdi, er nyapsilip tep upu pedanmaiya tep, asi pepra deipu. (Ibrani upu deiki di, Esek deiyoda, ‘Upu pangdana’ tenen, penunge).

21 Uda, amenda taruda, Isak er domba pein nesaladi, me mokon ton palipi dinin, ange pe tep nengeda, sun Gerar neng cap, er nyapsilip cap, upu pangdanapu kurami. Ukuramya cadi, ame mokon sida, “Sinta mokon,” pepra si deipu. (Ibrani upu deiki di, Sinta deiyoda, ‘Podana’ tenen, perami).

22 Pangdanapu kudaramya cadi, Isakdi amutu tapra yukai beudi, er melimna nengdi, ‘Me ton gwepkup’ tenen, tu palipipa, me mokon ton deipu. Mokon deipupa, me gweramipa, er nyapsilip cap, Gerar ban nesala cap, kange di ton cap amokon tep, upu men pangdaramya cadi, amokon sida, “Rehobot mokon,” pepra si deipu. (Ibrani upu deiki di, Rehobot deiyoda, ‘Go kururai’ tenen, perami). Asi pepra tenepkada ake. Ada, ‘E, ukuda nun nai bo Allah er si Yahwehdi, go telepai konum karepmasera tep, acapu telep kupra kunkamape’ tenen, asi pepi.

23 Uda, amendada Isakdi Gerar ban mutu tapra, Bersyeba mutu welerbeu. Amutu bena mapmau. 24 Alukunda neitamaida, kene mapmaua deiki di, Allah er si Yahwehdi yan pepu. “Kanda kwar dangna gume. Neda, kan nai bo Abrahamdi si erepra gispal doramneu Allah kunune. Ne pel doramneu ngebo Abraham tep, kange deipsidi, pedina upu peramsa tep, nedi meliamkenepa, kandi deipmempa, dadeipdanen baramenganen, amenda dordi kunkameng nesala, kan nyapsilip pio weik kunkamenge. Tonda, kan tep telep-telep kupra deipkenepa, teleppu kunkamrume,” Allahdi Isak tep pepu.

25 Allahdi upepupa, Isakdi, ‘Acapu Allah er si erepra gispal dopnedi, er karena tep gam keca popra, uku dongopkamane’ tenen, gel pala dopropudi, pala gel taplakra yakeipudi, Allah er si Yahweh tep, er si eremau. Tonda amutupu, Isakdi er tenda opkal bol di, keana tep deipu dodin atida, acapu erepra deipu. Er melimna nengdi, ‘Mokon me gwepkamep’ tenen, amutupu tu palipipa, mokon deipu.

26 Uda, amenda taru, Abimelek yukai dinin, Gerar mutu di Isak damai yau. Ada, Abimelek cap, er pel doramunge yuma tep upu taledaramreidi, “Ukuna telep, ukuna mali,” pepra, upu melimna ngebo erda Ahusat cap, Abimelek er jen talen neng sun deiyo ngebo Pikol cap, sun yuma Isak damai yai. 27 Yaipa, Isakdi asipetepu. “Menop taruda, sundi ne tep tulum kupupa, ‘Nun mutu tapra, yukai berume,’ pepra dokotepneruma cadi, ukutaruda, ware keca deiyo tep, ne damai yanmarum do?” pepra asipetepu.

28 Asipetepupa, sundi tamupra pepi.

“Gume, nundi kan kurum keca yuma dipetenupa, Allah er si Yahwehdi weika di melimkerurpa, dipra kael kemapa tep, ukupra tenepmape. ‘Gume, telep ngeda, angebo Isak cap, nun tara neng cap, upu talepdapedi, pedina upu pepdatepe,’ tenimnupe. Ada, ‘Nun tara nesala cap, kan tara nesala cap, podana pio gum dipapu, teleppu kudankamepe,’ pepra, ‘Pedina upu pepdapedi, deiptepe,’ tenenmape.

29 Kan tara nengdi nun tara neng tep, pio mali men kudinkamserume. Kanda nun tara neitamai kuramrum taru yumada, nundi kan yala nesala tep, mali kupra men deipsepu dinin, teleppu kikiman kuramepudi, siryada, ‘Telepe, kange deiprap benkamrume,’ pepkepu. Nundi sun tep ukuramseputopu, ‘Isak, kan yala nengdi nun tep kunkamserum’ tenen, pepkepe. Ukutaruda, Allah er si Yahwehdi pio telep-telep kupra melimkerurpa, teleppu kurume,” Abimelek cap, er nyapsilip cadi, Isak tep pepi.

30 Upepipa Isakdi, ‘Aneng gispal dopnedi, sun pepmanengtopu kunkamepe’ tenen, ila kalemna kaleprapudi, karepupa, sun yumadi kikiman jepi. 31 Jepipa, mapmaiya berekupa, sun yumadi, “Telep kudanapu kunkamepe,” pepra, pedina upu pepdanmaipa, Isakdi aneng tep, “Telepe, telep kange doupra dabeso,” pepudi, buru karepupa, sundi er damai tapra sun pe mutu tamupra bendopi.

32 Sun kalepmai tumi dipu, Isak domba pein nengdi, er damai yana pepmai. “Naio, nun me jena tep, ukupu mokon ton palipmappa, me mokon deipmasere,” pepra lap pepmaipa, 33 Isakdi ame mokon tep, “Er si Siba,” pepra deipu. Ataru dinin, ukutaru peda, amutu ati arumda Bersyeba mutu penunge.

34 Uda, Isak er mi Esauda, keteng tamun 40 tahun konum kupupa, ner dopu. Ada Het yala ngebo er sida Beri, erdi deipu ner mi er sida Yudit, Esaudi dopu. Tonda, er ner butene ngeda, Het ngebo er si Elon, erdi deipu ner mi er si Basemat, Esaudi dopu. 35 Sun yumada, sun mali kuramya deiki di, Isak cap, er ner Ribka cap, ikin kange weik doupra kuramrei.