Gen 27 | XteSC | STEP | Isakda pio wisi konum deipupa, er asuru mali kupupa, telep kupra men epmanto kuramu. Er asuru konum pupka cadi nimi urasin men epmanto kuramu taru, erdi menmena deipu mi Esau tep, upupupa, Esau yaupa, “Ne mio,” pepupa Esaudi, “Naio, ne akunmane,” pepu.

Genesis 27

1 Isakda pio wisi konum deipupa, er asuru mali kupupa, telep kupra men epmanto kuramu. Er asuru konum pupka cadi nimi urasin men epmanto kuramu taru, erdi menmena deipu mi Esau tep, upupupa, Esau yaupa, “Ne mio,” pepupa Esaudi, “Naio, ne akunmane,” pepu. 2 Upepupa, Isakdi upepu. “Uo, ukutaruda ne pio wisi konum deipsa tep, ne depkamne taru, ne walwale.

3 Ange tep, kanda bura kalengna kael ngebo kurum cadi, kan jen cap, mar cap doupmemdi, bura kalengbemem dingeda, bura kure keca kapang do, yuk keca do, popra denerume. 4 Ne jene tep, kange derinerur keca, kan kaele cadi, kandi poipkamnerem keca galupra, ne putaneretopu daepneremdi, denkamnerume. Ada ne jepkamna tepa. Konum jepnyopda, ne depkamne taru di dopropkamrem keca tep, lape pepkenedi, ‘Teleppu kunkamrem’ tenen, telep upu ton deipkamkene,” Isakdi Esau tep pepu.

5 Uda, Isakdi er mi Esau tep aupu penmau taruda, Ribka mening dam tekmaua di gekenmau. Esaudi, ‘Ne nai bo er putana tep, bura kalengbenmanyane, bura gam kure keca popra, ne nai tep tamupra denkamane’ tenen, bura tara benmau. 6 Benmau pangeda, Ribkadi er mi Yakub tep upepu. “Ne mio. Adi, kan nai bodi kan du bo Esau tep pepmau upu gekepmanue.

7 Ada, Isakdi, ‘Bura tara kure keca popnememdi, duyarumnyopda, ne putaneretopu, telep kupra daepnememdi, karepkamnerume. Ukupmemnyopda, ne kapul men depmane taru, Allah er si Yahwehdi dinmaserpa, telep upu pepra deipkamkene,’ pepmaupa, gekepmanue. 8 Atep ne mio, ne pepkuken upu moupra gekepmemdi, ne pepkenetopu kupkurume.

9 Ada ake. Nun kambing bisam derinupai bememdi, kambing nyapu, pio telepnge butene nukra dopra denerume. Ada, kan nai bo ila di kange deipra putarurtopu, ‘Akambing tu dapnedi, kan nai bo tep karepkaneme’ tenen, tep pepkene. 10 ‘Kan nai bodi telep upu pepra, kan deiki dipu deipketu’ tenen, ajen keca dopra, kan nai damai karerberumpa, jepkamare. Erda wisi weik kurura cadi, berbera depkamara tep, menmena apepmantopu kupkurume.” Ribkadi Yakub tep pepu.

11 Upepupa, Yakubdi er nin tep upepu. “Nanino, ukuptene dinino, ne du bo Esauda, er nong bol deikida potong weik kurure. Ne puda, nong bol deiki potong pio gum ngebo cadi, ange deiki di ne nai kael kepnerure. 12 Ada, ne naidi ne nong talepneryopda, erdi utenepnerure. ‘Gume, ne mi Yakubdi ajen keca karepmanerada, inimna di karepmanere,’ tenepneredi, telep upu pepra men deipkamner dinin, mali upu pepneredi, wipdongopkamner do? Wipdogopnerdi, mali kupra deipnerepa, ikin keca weik ne nong deiki kunkamnere.” Yakubdi er nin Ribka tep pepu.

13 Upepupa, er nindi tamupra pepu. “Ne mio utenena yaprume. Isakdi kan tep mali upu pepredi, kan tep wipkeryopda, ikin keca ne nong deikipu kunkamnere. Kan tep wipkeryopda, ne deikipu kunkamnere. ‘Angeda telepe pua,’ tenenuna cadi, nedi pepmakentopu, kambing nyapu butene popmemdi, dopra duyanerume,” pepu.

14 Upepupa, erdi pepmautopu, Yakubdi kambing nyapu butene dopra karepupa, Ribkadi Isak putaramudi, kange deriamutopu, atu doprapudi, dapra keteneipu. 15 Tu deipra keteneprapudi, er menmena deipu mi Esau, er pio telep opkal akati kupmaua di dopra, er amenda deipu mi Yakub nong deiki keneiku. 16 Ukupu dingeda, arup popmau kambing bol kouptapmaunge dopra, Yakub er buru tang deiki cap, er kum damai cap getepdongopu. (Ada, Esau er nong bol deiki potong weik kwamu ngebo tep kupu).

17 Ayuma konum kupudi, er Yakub tep, akambing tu dapmaunge cap, ukupu dapmau roti cap karepu. 18 Karepupa, Yakubdi akeca dopra, er nai bo damai beudi, “Naio, akunmane,” pepupa, Isakdi, “E, ne mio, ayanmarem dinin, kanda dan midi yanmanerem do?” pepra asipetepu. 19 Asipetepupa, Yakub inipudi, “Neda kandi menmena deipnemum mi Esau kunune,” pepra mok pepu. Upepu dingeda aupu ton pepu. “Naio, kandi peipmanemumtopu, bura kalengbenmanudi, kan putakeretopu keca keteneipmakene. Atep bukmemdi, akeca jepmemnyopda, ne amenda taru dopropkamne keca cap, telep upu pepra, telep kupra deipkamnerem upu cap, pepra deipnetume,” pepu.

20 Yakubdi upepupa, Isakdi pepu. “Ne mio, abura gam kure kecada, ware kuprap di pio menmena kalekbenmaumdi, akeca epmaumum do?” pepu. Upepupnen Yakubdi, “Gume, naio, kandi pio si eremrum Allah, er si Yahwehdi melipmanupa, menmena akeca epra popmanudi, daepra duyanmakene,” pepu. 21 Upepupa, Isakdi pepu. “Ne mio, mening damai yanerempa, kan nong talepkukene. Ne asuru pupmanera cadi, talepterepketenedi, ‘E, ada ne mi Esau ace. Agum dingeda, angeboda ne mi Esau gume’ tenen, kael kepkuna tep pepkene,” pepu.

22 Upepupa, Yakubda Isak bukmauaipu mening dam benmaupa, er nai bodi er nong talepterepudi, pepu. “Kandi penmanerempa, gekepmakenada, Yakub er upu utopu gekenman dinino, kan buru talepmakenada, ne mi Esau buru utopu talepkene,” pepu. Isakdi aupu pepmaua deiyoda, ‘Angeboda ne mi Esau gume, Yakub adano’ tenen, betapra men kael kepmaudi pepmau. 23 Ada, Yakub er buru deiki kambing bol getepmaua cadi, Esau er buru deiki potong weik kuramutopu kupmau. Isakdi, betapra men kael kepmaudi, men tenipka tep, tali lupra telep upu peprapudi, Yakub deiki deipu.

24 Isakdi upepu. “Kanda tek sisi ne mi Esau kurem do?” pepra pendeupa, Yakubdi, “Teka ne akunmane,” pepra mok pepu. 25 Upepupnen, Isakdi, “Atep ne mio, bura kalekra poipmanerem keca dapra keteneipmanerem ngeda, bokra karepnemempa, jepkune. Jepnyopda, telep upu kan deiki pepnedi, telep kweipkukene,” pepu. Upeputopu, Yakubdi akambing tu dopra karepupa, jepu. Tonda anggur me ton gwepra karepupa, ange peda jepu.

26 Jepu dingeda, er nai bo Isakdi upepu. “Ne mio, ne damai yamemdi, mutupneo,” pepu. 27 Upepupa, Yakubdi er nai damai benmaupa, Isakda Yakubdi Esau er opkal kenekmaunge nintong gupetepudi, telep upu pepu. Ada, ‘Allahdi ne mi Yakub tep melipra telep kupra deipkamre’ tenen, aupu pepra deipu.

E, ne kange deipkene. Allah er si Yahwehdi ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} bura tara neitamai wa tu telep kupra deiprepa, nintong telep peramretopu, ne mi er opkal deikida, anintongpu belepmarpa, gupmane. 28 Allahdi kan tep melimkamkerada, im neitamai di tuai tara mo puru sangamretopu, erdi melimkerepa, kan wa penkamremai yumada, pio telep tu kupkamra deiki di, kan koupkamrem keca weika di bongorepa, weika di kinkamreme. Tonda anggur tapu du weik mouramrepa, du purupmempa, anggur jen me weik kunkamker ja.

29 Tonda, Allahdi melimkerepa, nimi yala-yala weika di, kan gispal dona tep, kan damai genepdongopmengedi, kan amutara kupra kan pelpu melipra donkamkenge. Kan nin sisa di deiamu nyapu yumadi, kan weitap duap kunung dinin, kan amutara kungepa, kandi sun nimi deiyo ngebo kunkamreme. Yuk nengdi kan tep, ‘Er mali kuptu’ tenen, wipkengedi, mali upu pepra, kan nong deiki derinkamkenge nesala yumada, Allah pepredi sun pe tep mali kupra deipredi wiprepa, ikin weik kunkamre.

Ange utopu, ware nesala do yuma, sundi kan tep, ‘Erda telep kuptue’ tenen, telep upu pepra, kan nong deiki derinkamkenge nesala yumada, Allahdi melimrepa, sunda telep-teleppu kunkameng ja. Allahdi, ‘Ange yuma ukupkamre’ tenen, er tep moropnedi pepra deipne. Isakdi Yakub tep pepu.

30 Upepra deipupnen, Yakub er nai damai tapra bura beupnen, adipapu er du bo Esau akati weku. Erda bura kalengmaua di tamupra ati weku. 31 Wekudi pio telep jen keca keteneipudi, ‘Ne nai bo karepkun’ tenen, er nai damai karerbeu. Beudi upepu. “Naio, bukromemdi, ne bura tara di popra, dapmaken keca jepkurume. Jepmem dingeda, ‘Amenda taru akeca-keca yuma teleppu kupnetu’ tenen, telep upu ton pepra deipnetume,” pepra moropu.

32 Upepra moropmaupa, er nai Isakdi, “Kanda ware ngebodi aupu pepmanerem do?” pepra asipetepmau. Asipetepmaupa, Esaudi, “Gume, naio, neda kandi menmena taru deiamnemum mi, Esau akunman adano,” pepu.

33 Upepupa, Isak gekepudi, mambul kange doupmaua di, moropsepmaudi upepu, “Uo, ange tep nengeda, arup taru ware ngebodi bura tara kure keca popra, dapra duyanmaner do? Arup taru, kan kapul men wekmaum taru, akeca dopra jepmanu. Jepmanudi, angebo tep, ‘Pio teleppu kunkamre’ tenen, telep upu pepra, er nong deiki deipmanu. Ukupmanua tep nengeda, apepmanu upu yumada, tek sisi nong kupkamre. Allahdi melimrepa, erda pio telep kunkamre ja,” Isakdi pepu.

34 Upepupa, Esaudi er naidi pepmau upu gekepudi, pio mambul kange doupra, ila di ngolokudi, er nai tep upepu. “Uo, ne naio, kandi ne tep ton, pio telep upu pepra ne deiki ton deipnetume. Uo, ne pe tep telep upu peipnetume,” pepra moropu. 35 Upepra moropmau dinin, Isakdi, “Gume, arup taruda, kan weit bo inipmaua di, dina di pepmanerpa, kan tep peipmaketene upu, er tep konum pepmanupa, er dipu apio telep ngeda, konum upula dopropmakere,” pepu.

36 Upepupa, Esaudi upepu. “Uo, sundi er tep, si Yakub peprerumada, walito peprerume. Er si deiyoda, ‘Mawa di mok upu perur ngebo,’ kurura tepa. Ukuda ue taru butene taru deiki di, er dina di upu peipneupa, ne telep keca upula dopropneue. Menmena taru kan depmemnyopda, ne menmena deiamnemum mi tep karepnetum keca, upula dopropneue. Tonda ukutaruda, kandi telep upu peipnetum ngeda, upula dopropmanere,” pepu. Upepudi aupu ton pepu. “Uo, telep upu ton men kwapkerpa, ne tep ton, men pepnetum do? Telep peipnetum upuda konum gum kupre do?” pepra asipetepu.

37 Asipetepupa, Isakdi upepu. “Ne mi Esauo, arup taru aupu konum pepmanua deiki di, kan weit bo Yakubda ereipmanupa, erda kan deiki tara kupra, kan ila deiyo ngebo utopu kunkamkere. Kanda er amutara ngebopu kunkamreme. Tonda, er yala nesala yuma cap, er nyapsilip yuma capda, er amutarato kungedi, er tali pel don nesala utopu kunkamenge. Tonda, ‘Er pio telep kunkamre’ tenen, jen keca yala-yala weik cap, anggur tapu du purupra ketenepmenge me cap, ‘Weika di kupkamemere’ tenen, aupu ton konum pepra, er deikipu konum deipmanue. Atep nengeda, wareto upu ton tapakra pepketenepa, telep kupketu do?” pepra asipetepu.

38 Isakdi upepupa, Esaudi er nai tep upepu. “Uo, ‘Ne mi telep kunkamre’ tenen, telep upu tenpunge peda men peipnetum do? Uo, ne naio, ‘Allahdi meliprepa, teleppu kunkamre’ tenen, upu tenpunge puda peipnetume, naio,” pepra, ila di engenmau. Esaudi engenmaupa, Isakdi er tep aupu pepra deipu. 39 “Allahdi melimkerepa, ukupkamreme. Kan kunkamremaida, pio telep tuai gume. Atep wa pepra kouamempane, amenda taruda, meteka dipu kinkamreme. Im neitamai di mo tuai sangrepa, akeca-keca telep kuramretopu gum dinin, mo gum mutu neitamai, akeca-keca ikinpu kuramretopu kunkamreme.

40 Tonda, parang ya talepra, nimi pona ngebopu kunkamreme. Kan weit bo, er amutara kumemdi, er pelpu donkamrem dinino, amenda taruda dabal weik kupkerepa, ‘Yukai betene’ tenen, pio putaprepa, ‘Er tep ne song,’ tenepmemdi, er tapra yukai mepronkamreme.” Isakdi er mi Esau tep upepra deipu.

41 Uda, ataru yuma neitamaida, Esaudi er weit bo Yakub tep, tulum weik kuramupa, pio tenenapu kuramu. Deiyoda, ‘Ne nai bodi pio telep upu pepra, Yakub er nong deiki deipka deiki di teleppu kunkamre,’ tenenapu kuramnga tep, er weit bo tep, tulum tupa kwamu. Ange tep nengeda, Esaudi er pe dipru neitamaida, ‘Ne nai bo deprepa, er gispal dona tep engena taru konum kupyopda, ne weit bo Yakub poptapkamne,’ pio teneramu.

42 Angepu teneramupa, Ribkadi ange kael kepudi, er amenda taru deiamu mi Yakub upupupa, yau. Yaupa, Ribkadi Yakub tep upepu. “Kan du bo Esaudi, kan tep tulum weik kupkerepa, ‘Angebo poptapkamne’ tenen, pio tenimnapu kurura deiki di, kan pona tep kange derirure. 43 Atep nengeda, ne mio, nedi pepkukentopu, angepu gekepra kupkamreme. Ne du bo Labanda, Haran mutu neitamai kuryai, sepdara benkurume.

44 Er mutu bena dakunmamemyane, kan du bo yu weik kuramre ngeda, konum gum kupyopda, amutu tamupra yatume. 45 Ada, oryankamre taru neitamaida, kan du bodi kan tep yu weik kupmarenge gum kupyopda, kandi er tep mali kupmumnge ton lupronkamre. ‘Ne weit bo men popkune,’ tenepre taruda, nedi kai upu dokotepkenepa, gekepmemnyopda, Laban er mutu tapra, amutu tamupra yatume. Ange men kupmepyopda, tenpu tumi deiki dipu sun butene peda deprerumpa, ikin kange weik kunerure. ‘Angeda warya tep do?’ tenen, pepkene,” pepu.

46 Upepu dingeda, Ribkadi Isak tep upepu. “Amutu neitamai kunge nerapu, sun Het yala nerapuda, ne dabale weik kunerura tep, nun mi Yakubdi amutu nerapu kan-kan di, er ner dopyopda, ne dabal weik tep, deptenya peda telepe pua. ‘Amutu kunge Het nerapu mali kuramengtopu kure ner doprur,’ tenena tep pepkene,” pepu.