Gen 28 | XteSC | STEP | Isakdi er mi Yakub tep kongpepupa yaupa, telep upu pepra deipudi, aupu ton pepu. “Ne mio, amutu kunge nerapu, Kanaan tara nerapuda men dopkamrume.

Genesis 28

1 Isakdi er mi Yakub tep kongpepupa yaupa, telep upu pepra deipudi, aupu ton pepu. “Ne mio, amutu kunge nerapu, Kanaan tara nerapuda men dopkamrume. 2 Ange gum dinin, adipapu Padan-Aram mutu neitamai dinin, kan apu bo er sida Betuel, er ati bememdi, kan mam bo Laban, erdi deiamu nerapu kan-kan, tenpu ner wepra dopkamrume.

3 Ukupkamrema tep, ‘Allahdi ^{▼▼Allahdi – Acada, Ibrani upu deiki di, Allah er si tep, ‘Allah Shadday’ pepra seki. Aupu ‘Shadday’ deiyoda, sundi, ‘Allahda akeca-keca yuma talepra, pio deiki tara kuredi, Ila Puto Deiyo Ngebo kurure,’ tenena tep, ‘Shadday’ pepra seki. Sun kael kemna tep, angeda konum jenek kupra sekmepu.} melimkamker’ tenen, putanere ngeda ake. Akeca-keca yuma talepra, pio deiki tara kuredi, Ila Puto Deiyo Ngebo kurur Allahdi melimkerepa, nyapu pio weike derinkamrume. Tonda, kandi deipmempa, dadeipdanen bankameng nesala, ‘Weik kupbangedi, dana-dana tara kunkameng’ tenen, putanerure. 4 Tonda, Allahdi Abraham tep, “Ukupkamkene,” pepra, pediramu upu yumada, ‘Allahdi kan pe tep, tonda kandi deipkamrem nesala yuma cap tep, ange utopu ukunkamser’ tenen, putapnere. Tonda, nun yumada amutu neitamai kupe taruda, nimi bo nengpu kunup dinin, ‘Amenda taruda, kandi atara yuma talenkamrem’ tenen, putapnere. Uda, Allahdi Abraham tep, atu yuma kareramnga tep, pepne.” Isakdi Yakub tep pepu.

5 Isak upepra deipudi, Yakub dokotepupa, Yakubda, ‘Ne mam bo Laban er damai bena kunkamne’ tenen, Padan-Aram mutu beu. Labanda, Yakub er nin Ribka, er du bo kuramu. Laban er nai bo Betuelda, Aram tara ngebo kuramu. 6 – 7 Yuk nengdi Yakub er du bo Esau tep upepi, “Gume, kan nai bodi kan weit Yakub tep, telep upu pepra deipudi, ‘Padan-Aram mutu ner epra dopkamre’ tenen, dokotepu. Tonda, “Kanaan tara nerapu dona meme,” pepra deipupa, Yakub gekepudi, er nai er nin pepreitopu kupu.” Lap pepipa, Esau gekepu.

8 Upepipa, Esau aupu gekepka deiki di, jenek kupra kael kepu. ‘Ne nai bo Isakda, Kanaan tara nerapu pio song tenerure’ tenen, kael kepu. 9 Kael kepka cadi, er nai bo yala ngebo Ismael damai beudi, Ismaeldi deiamu ner mi tenpu dopropu. Esauda, yuk nerapu ton menop taru konum doamu dinin, aner ton tapakra dopu. Adopu ner er sida, Mahalat kuramu. Anerda, Abrahamdi deiamu mi, Ismaeldi deipu ner mi kuramu. Aner er weit ner sida, Nebaiyot kuramu.

Yakubda Betel mutu mapudi, kene deiki epu keca

10 Yakubda, Bersyeba mutu tapra, ‘Haran mutu benkaman’ tenen, bisi banmau. 11 Bisi banmauanen, keteng orwengbenkou taruda, telepai epudi, ‘Acapu mapkun,’ tenepupa, ipropu. Ipmau taruda, Yakub epterepudi, pala gel telepnge epudi, ‘Ne giso eremna tep, adeiki mapkune,’ tenepudi, dopra deipudi, mapmau.

12 Acapu mapmau taru neitamai di, kene deiki di, ila moromna co utopu keca epu. Angeda tangga-tangga urasin utopu kupu. Ton tuai mutu adinen, im deiki tara dukdongopra kupmaupa, epu. Amoromna co epupa, Allah er im deiki pel don nesala malaikatda, udini welepna, idinu kwerepna kemaipane epu.

13 Tonda amoromna co deiki tarada, Allah er si Yahwehdi, itekudi, upepu.

Neda, kan apu bo Abraham cap, kan nai bo Isak cap, si erepnereidi, gispal doramnerei ngebo Allah, ne si Yahweh akunune. Kanda atu mapmaremaida, atara yuma karepkamkene. Tonda, kandi deipmempa, dadeipdanen bankameng nesala peda, atu talenkamenge. 14 Kandi dadeipmempa, dorderinkameng nesalada, denge pio weik kupbankamenge. Tuai mutu neitamai yuma kalkal tu sikke utopunge pio weik, men nukmanto kuretopu kunkamenge. Dana-dana tara yuma, keteng yakan tara di dukdongopra, orketeng orwengbare tara daneitamai yuma cap, uda, mutu dam tara di dukdongopra dapu tara, utara neitamai yuma cap, ban-ban yuma kunkamenge.

Amenda taruda, tuai mutu ban-ban yuma kunkameng nesala yala-yala yuma tep nengeda, kan yala ngebo deiki di, telep kupra deipkamne. Ada, kandi deipmempa, dadeipdanen baramenganen, amenda taru kan yala nengdi deipkameng mi kurya deiki di, nesala ban-ban yuma telep kupra deipkamne.

15 Angepu gum dinin, tonda kan kunkamrem taru yumada, ne cap kikiman kunkamneme. Kan benkamrem mutu yumada, ne cap kikiman benkamneme. ‘Mali kupra deipkenung’ tenen, nedi kan tep, pio kalengkenepane, amenda taruda, amutu neitamaipu telep kuprappu, kange di tamupra duyankamkene. Nedi kan tep, ‘Ukupkamkene, akeca karenkamkene,’ pepra, pedinmaken keca yuma kapul men dopropmem taru neitamaida, ne cap pio kikiman kunkamneme. Men tapkamkene. Allahdi Yakub tep pepu.

16 Allahdi Yakub er ken mapmaua deiki di pepupa, Yakub bukroudi upepu. “Uo, ne nai bo Allah er si Yahweh, amutu neitamai kuner dinin, ne tali mangkau kange doupra kupmanua tep, men tenepmanue,” pepu. 17 Upepudi kware kupupa, aupu ton pepu. “Uo, amutuda, ila mambul mutu adano. Ada tali mutu gum dinin, Allah er kuryai utopu, tonda im deiki welerban bisi buplanai utonun kurure,” pepu.

18 Uda, mapmaua bereng tarada, ipna sisa di bukroudi, er giso eremna tep deipmau pala gel dopra, tekra deipu. Ada, ‘Gume, amutu epmanu kecada, pio tenenapu kunkamne’ tenen, agel tekra deipu. Tekra deipudi, ‘Amutuda ila mambule’ tenen, co du si zaitun, minyak zaitun dopra agel deiki diktapu. 19 Ukupudi amapmau mutu si tep, “Betel mutu,” pepra si pepra deipu. (Ibrani upu deikida, Betel deiyoda, ‘Allah er ati ake,’ tenepra perami). Yakub mapmau mutu yambulanun ortara nesala ati sida, Lus mutu perami dinin, erdi amutu tep, ukupu si pepra deipu.

20 Tonda, Yakubdi Allah tep aupu ton pedinmau. “Ne bisi bankaman taru neitamai yumada, Allah er si Yahwehdi, pio melipra kalengneredi, ne putapkamner keca, jen keca do, opkal do, pio kareramnereanen, 21 amenda taru telep kupra, ne nai damai tamupra duyaneryopda, nedi er si Yahwehpu pio eremkamne. Erda, ne nai bo Allah pio kunkamnere.

22 Apala gel tekra deipmanaida, yuk nesaladi ton, acapu er si eremkamenge. Tonda, Allah karenkamner keca yuma neitamai di bokra, er gispal dona tep, sepuluh persen (10%) ^{▼▼Sepuluh persen (10%) peramenge ngeda, ada meteka di bokra karenunga tep, penunge. Sepuluh ribu dingeda, seribu karenunge. Seratus ribu dingeda, sepuluh ribu karenunge. Ada, ‘Allahdi akeca yuma kareserura tep, er gispal dopkup’ tenen, akeca bokra karenunge.} karenkamne,” Yakubdi Allah tep apedina upu upepra deipu.