Gen 29 | XteSC | STEP | Yakubda, er kene mapmau keca yuma konum epudi bisi banmauanen, banmauanen, keteng yakan tara dinin, mutu si Padan-Aram mutu beu.

Genesis 29

Yakub Padan-Aram mutu yau taru tep pepu upu

1 Yakubda, er kene mapmau keca yuma konum epudi bisi banmauanen, banmauanen, keteng yakan tara dinin, mutu si Padan-Aram mutu beu. 2 Bena dipterepupa, ortarada, domba bisam gung weneri, yuk-yuk dinin betei kunmauai neitamai bukmaipa epu. Adomba bisam kunmaiyada, nimidi tu pumbon palipipa, mokon deiamu dinin, abon deiki tarada, ila ikin gel deipi.

3 Amutu neitamai kurami nesaladi kurami ngeda ake. Ada, sun domba pein nesaladi, ‘Nun domba bisam tep, me gwepra karepkamnup’ tenen, dana-dana tara di bulupra, tupa yakanmai taruda, abon deiki tara ikin gelda, tupa akuramu dinin, sun yuma konum yangopda, agel doprapidi, me gwepra sun domba bisam karerami. Konum karepidi, agel ka tamupra abon deiki deipidi, amokon buplan dekdongorami. Sun ukurami.

4 Sun domba pein nesala tali dakunmaipa, Yakubdi sun damai bena asipetepu. “Sunda ware mutu nesala kurum do?” pepra asipetepupa, “Nunda Haran mutu kunupe,” pepi. 5 Upepipa, Yakubdi, “Atep tenpu ngebo er apu bo sida Nahor, er sida Laban, sun kael do?” pepra asipetepu. Asipetepupa, sundi, “Aye, angebo Labanda nun kaele,” pepi.

6 Upepipa, Yakubdi, “Labanda telep kurur do, gum do?” pepra asipetepupa, sundi, “Gume, tupa telep kuredi, er keca weika di talerure. Tonda adio, er ner mi Rahel, er domba bisam dekanmar adano,” pepi. 7 Upepipa, Yakubdi upepu. “Sun domba bisam tali bukmanga, me gwepra men karepmarumada, ware keca deiyo tep do? Konum karepmatumpa, kange di ton cap sun betei jerbetenge. Ukutaru keteng komunipu tep, tali dakunmangepane ton men jepmengopda, putana weik kupkamare,” pepu. 8 Upepupa, sundi, “Gume, nun kunupada yuke. Yuk domba bisam pein nesala cap, sun domba cap, kapul men yange taruda, amokon bon buplan utopu tep, ikin gel men doronupe. Sun yuk neng ton yangepange,” pepi.

9 Sun yumadi aupu talenmai taruda, Raheldi er nai bo domba bisam duyanmau. Anerda domba pein ner tepa. 10 Yanmau pangeda, Yakubdi utenepu. ‘Uda, anerda ne mam bo ner mi cadi, ne neiki ner kurure. Tonda erdi peirur domba bisamda, ne mam bo domba cadi, me gwepra karepkune,’ tenepudi, ame mokon paliamya damai di bena, amokon buplan deiki deipi ikin gel dopra, puto di erepra gamopkotepu. Ukupu dingeda, me gweprapudi, er mam bo domba tep me karepu.

11 Yakub karepudi, Rahel tep buru talepra engenmau. 12 Engepmaudi, Yakubdi upepu. “Neda, kan nai bo er mal nerdi deipneue. Nanin er sida Ribka,” pepra lap pepupa, Rahel gekepudi, adipapu er nai Laban er damai sepdaro perbeu. 13 Raheldi er nai Laban tep, “Kan mi Yakub yanmare,” lap pepmaupa, gekepudi, ‘Antapkunem’ tenen, sepdara Yakub damai yanmaudi, “Telepe,” pepra iripudi, buru karepu. Buri talepdareipa, Labandi Yakub dopra, er pe ati dubeupa, Yakubdi er kunmau keca yuma lape pepu. 14 Upepupa, Laban kange deipudi, “Uo, ne mal nerdi deipu mi yanmaner adano,” pepu.

Yakubdi nerapu si Lea cap, Rahel cap dopu upu

15 Uda, Yakubda, Laban er mutu neitamai kikiman dakunmaipane, ware tenpu konum kupupa, Labandi Yakub tep upepu. “Ne mio, ne mal nerdi deipkeua cadi, ne melimna tep pel donmaneremada, mesumpu men dopkamreme. Apel konum melipra dopnemema dorona tep nengeda, wareto keca karepkamaken do?” pepra asipetepu. 16 Uda, Labandi deiamu ner nyapuda butene kuramrei. Menmena deipu ner mi, er sida Lea kuramu dinin, er weit nerda Rahel kuramu.

17 Lea er urasinda, yambul mali ner kuramu dinin, er asuruda, pio telep lengrur ner kuramu. Ukuramu dinin, er weit nerpuda, urasin pio telep ner, tonda er nonge yuma urasin pio telep ner kuramu. 18 Yakubda Rahel tep, bicau tenepra, ila di kange deiamnga cadi, mun peramu. Er nai Laban tep upepu. “Gume, mamo, kandi amenda deipmum ner mi, Rahel karepnetum teptoda, keteng tamun yoneitam bari deiki di pel melipra donkamkene. Konum kupnyopda, Rahel dopkamne,” pepu. 19 Upepupa, Labandi tamupra pepu. “E, ukupkamneme. Apepnerem ngeda telepe pua. Yuk yala ngebo doptupa, yambul telep teneptene dinin, kandi doptumtoda, pio kange deipkamne,” pepu.

20 Upepka cadi, ataru di dipra, keteng tamun yoneitam bari deiki Yakubdi, ‘Rahel dopkamane,’ tenen, Laban er pelpu tali doramu. Yakubdi Rahel tep pio mun peramudi, ila kange deiamnga cadi, ‘Uo, keteng tamun denge weik pel donmane,’ pio men teneramu. Er kangeda, ‘Gume ayoneitam bari keteng tamunda, ne ikine gume. Aketeng tamunda, ue tumi wenerito, dumbarito kurure,’ teneramu.

21 Ukupra tenepra pel doramupane, keteng tamun yoneitam bari konum kupupa, Yakubdi, ‘Ukuda aner Rahel doptene,’ tenepudi, Laban er damai bena pepu. “Mamo, nun peipnumumtopu konum kupsa tep, ne ner karepnemempa, dopdankaneme,” pepu. 22 Upepupa, Labandi, ‘Anesala yuma yangepa, nun yuma ner don kalemna kalepra kange deipra kikiman jepkamep’ tenen, nesala weik upupu.

23 Upupupa, sun yuma kalemna keca kikiman jepmaipa, ipropu pangeda, alukunda neitamaida, Labandi er menmena deipu ner mi Lea dopra, Yakub damai dubena karepupa, sun kikiman mapmarei. 24 Tonda Labandi, Lea er pel melimna ner tep, Silpa ton karepu.

25 Uda, Labanda mawa di Lea dopra, Yakub tep karepupa, Yakub tali mangkau kange doupra, aner cap mapmareipa, bukmaudi lukdana dungdang pepu. Ukupudi, Laban tep upepu. “Uo, ware keca deiyo tep, aner tali mawa di karepmanerem do? ‘Rahel karepkanerem’ tenen, keteng tamun yoneitam bari deiki di pel doramkesi dinin, amali kupnerem ngeda, ware tenipmaremdi, ange kupmanerem do?” pepra ila di wenepu. 26 Wenepupa, Laban dina di Yakub tep upepu. “Gume, nun amutu kuramnuptopu, kupmakene. Nunda du ner menmena karepmepepa, amenda tarupu weit ner ton karenupe. Weit nerda, menmena taru men karenupe.

27 Konum dopmarem ner gispal dona tep, tenpu minggu ton cap tali dakunmarerumpa, Rahel ton karepkamkene. Dinino kandi, “Keteng tamun yoneitam bari ton cap pel donkamkene,” peipnerema deikipu karepkamakene. Gum dingeda, gume,” pepu.

28 Labandi upepka tep nengeda, Yakubdi, “Telepe, ukupkamne,” pepu. Sun dakunmaipane, minggu tenpu ton konum kupupa, Labandi Rahel dopra, Yakub tep karepupa, er ner tep Rahel dopu.

29 Tonda, ‘Rahel er pel melimna ner kunkamre’ tenen, Labandi Rahel tep tenpu ner, er sida Bila karepu. 30 Yakubdi Rahel dopudi, sun kikiman mapmarei. Yakubdi Lea tep yambula di kange deiamu dinin, Rahel tep nengeda, bicau tenepra, ila di kange deiamudi, dipru kareamu. Rahel konum dopka cadi, keteng tamun yoneitam bari deiki di, Yakubdi Laban er pel tep, pel doramu dinin, kunumna keca dorona gum di, talipu pel doramu.

31 Yakubdi Lea tep, tek sisi kange men deiamnga cadi, Allah er si Yahwehdi aner tep bicau tenepudi, melipupa mundu doupu. Leada mundu doupu dinin, Rahel puda you nerpu kuramu. 32 Yakub cap, Lea cap, kikiman mapmareipa, Allahdi melipupa, Leadi mundu douamnganen, sal mi deipudi, er si tep Ruben pepra si karepu. ^{▼▼Ruben – Ibrani upu deikida, Ruben er deiyoda butene. Ton ngeda, ‘Sal mi adano’ tenen, perami. Ton ngeda, ‘Ne ikin kupneu ngeda kael kepnere’ tenen, perami.} Leadi er mi deipudi, upepu. “Ukuda, ne nai Allah, er si Yahwehdi kange mun kuramneunge kael kepneudi, konum melipmanere. Sal mi deipmana cadi, ukutaru ne akengebo Yakubdi bicau tenepneredi, kange derinkamnere,” pepu.

33 Sun dakunmaipane, amenda taru ton, kange di ton cap mundu douamudi, sal mi tenpu ton deipudi, er si tep, ‘Simeon,’ pepra deipu. Ada Leadi, “Gume, ne akengebodi ne tep bicau men tenenerurada, Allah er si Yahwehdi konum gekepu. Atep sal mi ton karepmanere,” pepra tenepka cadi, ami tep er si ‘Simeon,’ pepu. ^{▼▼Simeon – Ibrani upu deikida, Simeon deiyoda, ‘Ne upu gekenerur ngebo’ tenen, perami.}

34 Amenda taru ton mundu douamnganen, sal mi ton deipudi, er si tep ‘Lewi,’ pepra deipu. ^{▼▼Lewi – Ibrani upu deiki di, Lewi perami ngeda, ‘Nedi er tep kange derinune’ tenen, perami.} Si peprapudi, upepu. “Ukuda ne akengeboda, tek sisi kange deipkamnere. Er nyapu weneri konum deipsi adano,” pepu.

35 Amenda taru ton, mundu douamnganen, sal mi tenpu ton deipudi, er si tep ‘Yehuda,’ pepu. ^{▼▼Yehuda – Ibrani upu deiki di, Yehuda perami ngeda, gispal dona tep, “Telepe,” pena tep perami.} Upepudi, “Ukutaruda, Allah er si Yahweh tep, er si erepra, gispal donkamne,” pepu.