Gen 30 | XteSC | STEP | Uda, Rahelda nyapu pio men deiamnga cadi, er du ner Lea tep nengeda, mali kange doupudi, dipru wilipudi, Yakub tep upepu. “Uo, nun butene di nyapu men deipteneme teptoda, ne depkaman ja,” pepu.

Genesis 30

1 Uda, Rahelda nyapu pio men deiamnga cadi, er du ner Lea tep nengeda, mali kange doupudi, dipru wilipudi, Yakub tep upepu. “Uo, nun butene di nyapu men deipteneme teptoda, ne depkaman ja,” pepu. 2 Upepupa, Yakubdi er ner tep yu weik kupupa, tamupra pepu. “Apepnerem ngeda, ware keca deiyo tep do? Neda Allah kununa tep pepnerum do? Allah er dipapu melipketupa, nyapu deiptume,” pepu.

3 Upepupa, Raheldi tamupra pepu. “Atep nengeda, ne pel melimna ner, Bila cap kikiman mapretumpa, ne nyapu tep, er dipu deipkamnetue,” pepu. 4 Upepka cadi, Raheldi, ‘Yakub er ner utopu kupkamar’ tenen, Bila dopra Yakub karepupa, Yakub cap, Bila cap kikiman maprei. 5 Mapreipa, amendada Bila mundu doupudi, dakuramnganen, sal mi tenpu deipu.

6 Sal mi deipupa, Raheldi ami er si tep, ‘Dan,’ pepra deipu. Ada Raheldi, “Ukuda nedi Allah tep mororamsi keca konum gekepneudi, ‘Aner moropmaner kecada telepe pua,’ tenepneudi, sal mi konum karepmanera tep, ami er sida Dan,” pepu. 7 Yakub cap, aner cap, kikimanpu dakuramipanen, amenda taruda Bila mundu doupudi, sal mi butenenge ton deipu.

8 Mi deipupa, Raheldi ami er si tep, ‘Naftali,’ pepra deipu. Ada Raheldi, “Gume, ne du ner tep ikin kange doupra kuramsi dinin, ukutaruda ne bisbisa kamna utopu kupkamana tep, ‘Ami er sida Naftali,’ pepne,” pepu. ^{▼▼Naftali – Ibrani upu deiki di, Naftali perami ngeda, ‘Ne ikin kupnerepa, pio pe deipra, pirirterenmanere’ tenen, perami.}

9 Ataru neitamaida Leadi, ‘Uo, neda kange di ton mundu men dounune. Nyape ton cap men derinune,’ tenen, kael kepudi, er pel melimna ner Silpa dopra, ‘Yakub er ner utopu kunkamre’ tenen, Yakub karepu. 10 Karepupa, Yakub dopudi, kikiman kuramreipane, Silpadi mundu doupudi, amenda taru sal mi deipu. 11 Deipupa, Leadi, ‘Ukuda telep kupnere,’ tenepudi, ami er si tep ‘Gad,’ pepra deipu.

12 – 13 Amenda taruda, Yakub cap kikiman kuramreipane, Silpadi sal mi butenenge ton deipupa, Leadi, ‘Uo, ne ila di kange deipne. Yuk nerapu yumadi ne tep, Leada tek sisi kange derirur ner, tenenkamenge,’ tenepu. Utenepka cadi, ami er si tep ‘Asyer,’ pepra deipu. ^{▼▼Aser – Ibrani upu deikida, Aser er upu deiyoda, ‘Kange derinerure’ tenen, perami. Aserda, ‘Kange derina’ tenen, perami.}

14 Uda, sun yuma dakuramipane, tenpu taruda, ada sun kouami keca er sida gandum, konum wisipupa, nong kirbanmai taru, tenpu tumida Rubendi tenpu keca ton, er sida mandrak epu. ^{▼▼mandrak – Ada, kait poramre co, er sida bunga terompet perameng co urasin utopu dinin, buma di teknedi du mouramu co epu. Aco du er sida mandrak perami. Israel nesaladi, ‘Aco du dakra jepmepepa, kange telep kunkamsere’ tenen, dakra jerami. Tonda, ‘You nerapu jepmengedi, amenda taru nyape deipkamenge’ tenen, dakra jerami. Aco duda, Ibrani upu deiki di, er si tep mandrak co du perami.} Rubendi, mandrak co du epudi, aco du dakrapudi, er nin Lea tep karerbeu. Karepupa, Rahel epudi, Lea tep, “Uo, ne du nero, ne ton karepnetume,” pepra malye pepra moropu. 15 Moropu dinin, Leada yu kupupa, tamupra pepu. “Uo, kanda warya tep do? Menop ada, ne dopsi ngebo upula dopropnemumada, ikin weik kupra deipnememdi, ‘Konuma,’ teneamtum dinin, ukutaru peda, ne midi karepmaner mandrak co du peda, upula dopropkunerem ngeda, kange di ton cap mali kupra deipkunerem do?” pepu. Upepupa, Raheldi tamupra pepu. “Gume, mandrak co du karepnerem pangeda, nedi, “Telepe,” peipnepa, alukunda Yakub kan damai yarepa, sun kikiman mapkarerume,” pepu.

16 Upepmareia tep, aidona taru Yakubda, er wai dam di tamupra ati yakanmau taruda, Lea bisi neitamai bena antapmaudi, upepu. “Yakubo, ne mi Rubendi mandrak co du karepmanernge dopra, Rahel tep karepmanue. Akeca deiki di kan tep, kunumna utopu karepmanua cadi, alukunda kan cap kikiman mapkaneme,” pepu. Upepupa, alukunda Yakub cap, Lea cap kikiman mapmarei.

17 Mapmareipa, Allahdi Lea mororamunge gekepudi, melipupa, Yakub cap kikiman kuramreipane, Lea mundu doupu. Douamnganen, amenda taruda er mi pamu baringe deipu. 18 Deipudi upepu. “Ne akenge ngebo Yakub, er ner dona tep, ne melimna ner karepsa cadi, ukuda Allah melipmanere,” pepudi, asal mi er si tep ‘Isakar,’ pepra deipu. ^{▼▼Isakar – Ibrani upu deikida, Isakar upu deiyoda, ‘Menenga keca’ tenen, perami.}

19 Ange utopu amenda taru ton, Yakub cap kikiman maramreipane, mundu douamnganen, sal mi ton deipu. 20 Erdi yoneitam bari deipu sal mi, er si tep ‘Zebulon,’ pepra deipu. ^{▼▼Zebulon – Ibrani upu deikida, Zebulonda, ‘Gisal dona’ tenen, perami.} Ton upepu. “Allahdi meliamneupa, ne aiki ngebo tep telep keca karenuna cadi ukuda erdi ne tep gispal dopra kange deipkamnere. Nedi er nyapu ngantan bari konum deipsa tepa,” pepu. 21 Yuk taruda, Leadi ner mi tenpu deipudi, er si tep, ‘Dina,’ pepra deipu.

22 Amenda taruda, Rahel yambulanun you ner utopu kuramu ngeda, Allah tenepudi, Rahel mororamunge gekepudi, melipupa, mundu doupu. 23 Rahelda mundu douamnganen, sal mi deipu. Deipudi, upepu, “Ukuda ne nyapu derina gum tep, ali dangamsada, Allahdi konum gum kupra deipnere,” pepu.

24 Upepudi, ami er si tep ‘Yusup,’ pepra deipu. Ada, ‘Allah er si Yahwehdi kange di ton cap melipnetupa, sal mi ton deiptene,’ tenen, ami sida ‘Yusup,’ pepu. 25 Raheldi Yusup deipu taru dinin, yambulanun dakunmaipane, Yakubdi Laban tep upepu. “Ne pe mutu tamupra betene tenepne. 26 Ange putapnera tep kandi, “Telepe” peipnetumpa, ne nerapu cap, ne nyapu cap dopropnedi, bisi benkamne. Sun dorona tep nengeda, kan tep pel weik doramkesi. Apel weik doramkesa deiki di, kan kaele, sun kunumna utopu weika di kareramkesi,” pepra moropu.

27 Moropupa, Labandi tamupra pepu. “Uo, ‘Benkamane,’ tenepmaremada yapo, ne kabo. Kanda ne mutu neitamai kurema tep nengeda, Allah er si Yahwehdi weika di melimserepa, ne pe tep pio telep kemdinerure. 28 Atep nengeda, kandi ‘Ukuprap karepnetue,’ tenepmaremngepu katuai pepnerempa, weike kuptua peda, adipapu tali lupra karepkamakene. Ware kuprap putaprur do? Pepneo,” pepu.

29 Labandi upepupa, Yakubdi tamupra pepu. “Mamo, kan kaele. Aketeng tamun yuma denge weik neitamai yuma, tamna pio gume di, pio telep kupra kan pel doramkesipa, kan domba bisam cap, kan unta bisam cap pio weik kupbarami. 30 Ne kapul men yasi taruda, kandi taleamum kecada, yambulpu kwamu dinin, ne yasidi amutu kuramsa deiki di, ukutaru kandi talerum kecada pio weik kurure. Ne pel dopra kuramne keca deiki di, Allah er si Yahwehdi kan tep, pio telep kemdikerure. Dinino, ukutaruda ne dano. Ware taru gonga keptenedi, ne pe nyapsilip tep pel dopnedi, doronkamne do?” Yakubdi pepu.

31 Upepupa, Labandi Yakub tep upepu. “Kan pel doramuma pununa tep, wareto keca karepkuken do?” pendeupa, Yakubdi, “Gume, akeca-keca karena gum dinin, ne tenipman ngepu tep, ‘Telepe’ pepnetuma, kan kambing cap, domba cap tupa melipra peinkamkene. Tonda, ‘Mali kuprur’ tenen, akambing cap, adomba yuma cap tupa kalengkamne.

32 Ne tenepman ngeda ake. Atumi neitamaida, kan domba cap, kan kambing cap dipetepnedi, gegeptuamrenge cap, torboroma daramrenge cap, epnyopda dopropkamane. Tonda dipetepnedi, mirin domba bisam mi ton epnyopda, ange yuma dopropkamane. Adomba cap, akambing cap, arup pepkenetopu dopropnyopda, ada ne pel doramkesinge er pununa tep, menenga utopu keca kupkamnere.

33 Konum kupnyopda, amenda doryankamre taru neitamai di, ne peinkamne domba cap, kambing cap dipetepnememnyopda, gegeptuamre kambing cap, torboroma daramre kambing cap gum dinin, yuk yalange ton akupyopda, ‘E, akambingda nenge, upula dopropmanue,’ tenepkamnerume. Ange utopu, ne peinkamne domba yuma dipetepmemnyopda, mirin domba gum dinin, kurun yalange do, yuk urasin kuprenge do akuprepa, epmemnyopda, ‘E, adombada nenge upula dopropmanue,’ tenepkamnerume. Ato kambing cap, domba cap epmemnyopda, ‘Erda mokpu perur ngebo,’ tenepkamnerume. Dinino, ne pepmakento yalapu epmemnyopda, ‘E, erda tek sisi perur ngebo,’ tenepkamnerume.” Yakubdi Laban tep pepu. 34 Upepupnen, Labandi, “Angeda telepe pua,” pepu.

35 Labandi, “Telepe,” pepu dinin, atumi deiki dipu er kambing yuma cap, er domba yuma cap bena dipetepudi, jem kambing cap, ner kambing cap, gegetuamunge ton, torboroma daramunge ton, tonda mirin domba nyapu yuma ton, ayuma dopropu. Laban dopropudi, er pe nyapu tep inipra karepupa, sundi yukai peirbei. 36 Akambing cap, adomba nyapu cap iniprapudi, adipapu bisi sepdara banmauanen, atara mutu dinin, ortara mutu tumi weneri mapra beu. Ange ukupra mali kupu taruda, Yakubdi tali mangkau kange doupra, Laban er gam kun keca yuknge tali peinmau.

37 Dinino, amenda taru Yakubdi ukupu. Bol kurun co utopu co weprapudi, aco teru sekra deipu. Ton ngeda, kwelem co utopu ngeda, kurun konum kupu dinin, ton ngeda dang co utopu ngeda, deiki bol kouptapupa, nong yopu deipupa kurupu. 38 Ukupudi, abol kurun co dopra, kambing cap, domba cap me jerbaramyai damai deipu. Ada, ‘Walnepman kambing cap, domba cap, me jeryakankameng taruda, akurun co katuai kuprepa epnyopda, sun nyapuda kurun ngepu deipkamneng’ tenen, deipu.

39 Ukupupa, amenda taru akambing cap, adomba cap me jeryakarami taru neitamaida, nernge walneramu taruda, akurun co dinmandi nyangdarami. Ukuramya tep, amenda taru sun nyapuda gegeptuamnenge cap, torboroma daramnenge cap, tauturung nenge cap, derirami.

40 Ukuramipa, Yakubdi adomba nyapu cap, akambing nyapu cap yuma dopra, er mawa tep sun yukai deriramu dinin, konum nepne ngeda, yukai deriramu. Weiknge yuk deriramupane, sun walnerami taruda, ner domba cap, ner kambing cap dopra, Laban er jem kambing cap, domba cap damai deriramu. Ada talinge tep gum dinin, gegeptuamrenge cap, torboroma daramrenge cap damai deriramupa, nyangdaramidi, sun nyapu deipbarami ngeda doprapudi, ernge yukai deriramu. Laban er yalange yukai deriramu. Ukuramnga deiki di, Yakub er domba bisam cap, er kambing bisam cap pio weik kupbarami.

41 Tonda ner ngeda, puto weik cap, nong telep cap kuramidi walnerami taruda, Yakubdi akurun coda, sun me jeryakaramya urasin damai, deriramupa, akurun co epra nyangdarami. 42 Dinino, ner ngeda puto gum kupnedi, nong bol malinge kuamne ngeda, sun walneramne taruda, akurun co men deriramu. Ange tep nengeda, Yakub apel yuma dopbaramnga deiki di, domba cap, kambing cap, nong bol mali kupnedi, puto boun kuramne ngeda, Laban er tara deriramu dinin, puto weik ngeda, Yakub er pe tara deriramu.

43 Ukuramnga deiki di, Yakub er peiramu keca yala-yala yuma pio weik kupbaramupa, isomka ngebo kuramu. Tonda er pel melimna neng cap, pel melimna nerapu cap, er unta bisam cap, er keledai bisam cap ayuma weik kupbarami.