Gen 31 | XteSC | STEP | Ataru neitamai di, Laban er nyapudi uperami. “Gume, nun nai talerur keca neitamai dadi, Yakubdi upula dororedi, isomka weik ngebo konum kurure. Dinino, nun nai er keca upula dororura di kurure,” peramipa, Yakub gekepu.

Genesis 31

1 Ataru neitamai di, Laban er nyapudi uperami. “Gume, nun nai talerur keca neitamai dadi, Yakubdi upula dororedi, isomka weik ngebo konum kurure. Dinino, nun nai er keca upula dororura di kurure,” peramipa, Yakub gekepu. 2 Tonda, Yakubdi utenepu. ‘Uo, ukutaruda Labandi ne tep kange yuk tenenerure. Dabal kupmanera tep do?’ tenepu.

3 Utenepupa, Allah er si Yahwehdi Yakub tep upepu. “Ukutaruda, kan nai yape talerami mutu, tonda kan yala nesala kunge mutu tamupra bena kunkamrume. Ukupmemnyopda, ne cap kikiman kunemedi melimkamkene,” pepu. 4 Upepupa, Yakub gekepudi, er nerapu Rahel cap, Lea cap tep aupu pepra dokotepu. “Sunda bura tara, nedi domba cap, kambing cap peinun mutu yareso,” peipupa, yarei.

5 Er damai yareipa, upepu. Men di sun nai bo Labandi ne tep, tali kange doupra teneramneu dinin, ukutaruda, erdi ne tep yuk kange doupnere. Mali kange doupra tenenmaner dinin, ne nai Isakdi taleamu Allahda tupa melimnerure. 6 Sun kaele, nedi sun nai Laban tep, pio pe deipra puto weika di pel doramsidi, tupa pel donune.

7 Ukunun dinin, sun nai bodi ue taru denge weik 10 taru deiki di upula doramneu. Ada, erdi, ‘Ukuprap karenkamkene,’ pepra pediramneu dinin, kange di ton cap ange tapra, yuk ngepu tenepredi, men di peipneutopu gum dinin, “Yuk ngepu karenkamkene,” pepra mawa dipu penerure.

Ukuramnerur dinin, Allah melimamnerura deiki di, Labandi mali weik men kweipneu. 8 Adi, Labandi ne tep, “Ukuda kan pel tep menengada, nun peinup keca kan-kan di tomboromnange doproptume,” peipneu taruda, agam keca nernge yumadi, sun nyapu tomboromna ngepu deriramipa, dopropsi. Ton taruda erdi, “Ukuda gegrepna ngepu doproptume,” peipneu taruda, agam peinup keca nernge yumadi, sun nyapuda gegrepna ngepu deriramipa, dopropsi. 9 Allah meliamneua deiki apel dororamsipa, sun nai taleamu gam kun kecada, ne tep kareramneu. Yakubdi er nerapu tep pepu.

10 Upepu dingeda, aupu ton pepu. “Uda, nun peinup keca walneramu taru neitamai di, ken deiki mapsipa, epsi keca pepkusene. Ada sun jem kambingdi nernge nyakamange nge yuma, sun urasinda gegrepnange cap, tomboromnange cap kunmaipa, epsi. 11 Epsipa, Allah er im deiki pel dore ngebo, malaikatdi, “Yakubo” pepra upupneupa, nedi “Akunmane,” pepsipa, Allahdi upepneu.

12 “Dipetepo. Agem kambingdi ner kambing nyakmangenge yumada, sun urasinda gegrepnange cap, tonda tomboromnange cappu kunmange. Ada tali tep gume. Deiyoda, Labandi mali-mali kukerur keca yuma tupa dinune. 13 Neda yuk ngebo gume. Betel mutu antapnumu Allah ne ca. Ada kandi Betel mutu neitamai ne gispal dona tep, pala gel taplakra deipmumdi, ne si ereprap, pedina upu peipnemume. Ukutaruda akurem mutu tapra, adipapu kan pe mutu, tamupra benkurume, pepkene.” “Allahdi upepneu.” Yakubdi er nerapu tep pepu.

14 Upepupa, Rahel cap, Lea capdi upeprei. “Gume, nun nai bo deprepa, amenda taru er taleamre keca bokeipkamenge kecada, nun ton men dopropkamneme. Nun butene tep tupa men teneserure. 15 Tonda erdi nun tep, ‘Sunda yuk mutu nerapu, ne yala nerapu gume,’ teneserure. Uda, kandi nun tep doronada konum kunupropseu. Kunupseudi, nun yo pununa tep doramu keca yumada konum jepropu.

16 Ange tep nengeda, nun kangeda, ‘Ware keca do yuma, Allahdi Laban er taleamu keca neitamai dororamu keca, kan Yakub tep kareramkeu keca yumada, kan cap, nun cap, nundi deiamupu nyapu cap tep kareramseu. Ange tep nengeda, Allahdi peipmakertopu, angepu kupkurume.’ Nunda telep pua tenimnume.” Rahel cap, Lea capdi Yakub tep peprei.

17 Upepreipa, Yakubdi er nerapu cap, er nyapu cap yuma dopra, unta bisam bali tara deiprapudi, amutu tapra bisi banmai. 18 Erdi taleamu gam kun keca yala-yala yuma, er urasin tara mepra baipane, erda amenda tara poproudi, beu. Tonda amutu si Padan-Aram mutu neitamai kuramu taru dopra taleamu keca yala-yala yuma kipra dubei. Bisi banmaiyada, ‘Ne nai Isak, Kanaan mutu neitamai, er damai benkamep’ tenepudi, bei.

19 Bisi kapul men bei taruda, Labandi, ‘Ne domba bisam potong tourbenkaman’ tenen, yuk mutu beupa, Raheldi er nai bodi er ati pum deiamu isok si eremna keca upula dopropu. 20 Tonda, Yakubdi er yamal bo Laban, Aram mutu kuramu ngebo tep, “Kan mutu tapra, ne pe mutu tamupra benkamne,” pepra men lap pepudi, tali inipra beua cadi, akupka deiki di mok upu pena utopu kupu.

21 Bisi beudi, amutu neitamai ila embaramu me er sida, Efrat me goupra ortara bisi banmaidi, ‘Nunda mutu gon kwamu mutu, er sida Gilead mutu neitamai benkamep,’ tenen, bei. 22 Yakub cap, er nyapsilip cap yuma bisi banmaipane, yuk nengdi Laban tep, “Yakubda nun mutu tapra sepdara beu,” pepra lap pepipa, gekepu. 23 Gekepudi, er yala nesala cap buluprapudi, ‘Yakub ormutu bisi neitamai antapkamep’ tenen, sun abisipu amenda sepdara banmai. Sepra banmaipane, ue taru yoneitam tumi deiki di banmaipane, Gilead mutu neitamai mutu gon kwamngai neitamai antapi.

24 – 25 Gilead mutu gon kwamngai neitamaida, Yakubdi er opkal tenda ati konum deipupa, sun acapu kunmaipa, Laban cap, er yala neng cap, amutupu yanmaidi, sun pe opkal tenda ati acapu deipi. Deipidi, mapmaipane, alukunda neitamai Allahdi Aram mutu ngebo Laban tep, ken mapmaua deiki di upepu. “Kanda kange moupra tenepkurume. Kandi Yakub tep, telep upu pe, mali upu peda pena gume. Kange moupra kunkurume,” pepu.

26 Upepupa, berekyopda, Labandi Yakub tep upepu. “Kanda ware kupmarem do? Inipra banmaremada, mok kuna utopu kupra deipmanereme. Tonda, nimi podangedi, nerapu upula dopropmengedi, dubaramengtopu, kandi ne ner nyapu butene dubenemume. 27 Ware deiyo tep, mok pepra, ne tapra inipra benemum do? Warya tep, ‘Benkamane,’ pepra men lap pepnemum do? Ange pepmanetum teptoda, nun yumadi sun tep, “Telepe dabeso,” pepra, dokotepmatepe. Tonda, kange deipra, mut sepdara, bum-bum pena er sida kecapi di mut peprap dokotepmatepe.

28 Angepu gum dinin, ton mali kupnemum ngeda, go men karepnemumpa, ne nerapu cap, sundi deiamrei nyapu cap tep, “Telepe dabeso,” pepra men mutupsi. Ange yuma konum kupmum ngeda, kange douna gum di walwal di kupmume.

29 – 30 Neda puto ngebo kununa cadi, popketene dinin, ambutumi lukundada, kan nai bodi si eremrur Allah ken mapmanua deiki di pepmanue. ‘Kandi Yakub tep, telep upu pe, mali upu peda, men pepkamarume. Kange moupra kupkamarume,’ peipmanue. Kanda, ‘Uo, ne nai damai tamupra betene,’ tenepmaremdi, bisi sepdara banmarem dinino, ware keca deiyo tep ne isok si eremna keca, nati pumbon dadi upula dopropmanerem do?” Labandi Yakub tep upepu.

31 Upepupa, Yakubdi tamupra pepu. “Angeda ukupsi dinin, kan dipetepsememdi, kan isok si eremna keca akwapreopda, akeca inipmare ngeboda poptaptume. Ukuda kan yala nesala cap, ne nyapsilip cap yuma akunmanga di dinkusenge. 32 Ne keca neitamai dipetepmemdi, kan pe keca akapyopda, adipapu tamupra dopropkurume.” Yakubdi Laban tep pepu. Yakubdi aupu yuma penmau taruda, ‘Raheldi Laban er isok si eremna keca upula dopropke’ tenen, men kael kepu. Tali mangkau kange doupra kunmaua di pepu.

33 Yakubdi upepupa, Labandi sun opkal tenda ati pum yuma wekrap dipterepbanmau. Menmena Yakub er tenda ati, adinen, Lea ernge, adinenda sun pel melimna nerapu, sun tenda ati wekra dipetepu dinin, er keca tenpunge peda menepu. Siryada, Rahel er tenda ati wekra dipetepu. 34 Uda, Raheldi, Laban er isok si eremna keca dopra, er unta bisam bali tara deiki bukmau keca pumbon dongopmaudi, akeca deiki tara bukmau. Laban er keca deiki bukmaua cadi, Labandi atenda ati pumbon yuma dipetepu dinin, akeca men epu. Men epupa, Rahel er nai bo tep upepu.

35 “Naio, nati wekmarempa, kan gispal dona tep, tekra buru karepmatene dinin, tupa atali bukmana tep nengeda, ‘Warya tep do?’ tenen, men derepkunereme. Deiyo akurura tepa. Ne yapi emban taru kupmanera tepa,” pepra inipu. 36 Uda, Labandi er epterepmau keca men epupa, Yakubdi er tep yu kupupa, wenepu. “Neda ware mali keca kupmanu do? Ne ware mali keca kupmanupa, kandi ‘Erda mali ngebo’ tenepneremdi, kalekra poryanmanerem do?

37 Ne keca yuma neitamai konum dipetepmarempa, kan pe ati kecada epmarem do? Nundi kan keca inipmap ngeda akwapmar do? Akapyopda, dopra acapu deipmempa, kan yala nesala cap, ne yala nesala cap, sun yumadi nun butene tep upu bokeipkusenge. 38 Neda keteng tamun denge weik 20 tahun deiki pel doramkesi. Ataru neitamaida kan domba cap, kambing cap peiramkesi dinin, sundi ongna pio gume. Tonda, kan jem kambing popra men jeramsi.

39 Bura yu kamdi kan gam kun keca porami taruda, sun nong dopra kan damai men duyasi. Ne peiamsinge neitamai bokra sun yo punuamsi. Tonda, keteng komuni do, lukunda neitamai do, yuk nengdi kan gam kun keca upula dororaminge tep nengeda, kandi ne tep, ‘Kunumna keca karepneo’ peamnemumpa, kareramkesi. 40 Uda, angepu gum dinin, ne pe nong kuramsi ngeda pepkune. Keteng komuni neitamaida, keteng bupu di jeamneue. Lukunda neitamaida, bul weik kupupa, pio barye bungamsi. Telep kupra men maramsi.

41 Kan amutara kupra pel dororamkesi taru, keteng tamun 20 tahun deiki di ukuramneue. Kan ner nyapu butene tep nengeda, keteng tamun 14 tahun deiki pel doramsa deiki di dopsi. Domba cap, kambing cap karepnemumnge tep nengeda, keteng tamun 6 tahun deiki di pel doramsi. Apel doramsinge, er yo pununa tep, ‘Kan menenga kecada ukuprap karenkamsene’ pepra deipnemum dinin, kange di ton cap, ange tapra, yuknge tenepmumdi, ue taru 10 taru neitamai yuk-yuk pepnemume. 42 Uda, ne apu bo Abrahamdi si eremamu Allah, tonda ne nai bo Isakdi, ‘Erda ila mambule’ tenen, si eremamu Allahda, erdi men meliamnetu teptoda, ne kaele. Kandi ne tep “Tali mesumpu berume,” pepnemumpa, talipu kuptene. Akeca-keca yuma men kupnetue. Dinino, Allahdi ne ikin kuramneunge cap, ne pe buru weik doramsinge cap dinerura cadi, ambutumi lukunda neitamai erdi kan tep wenepmakene.” Yakubdi Laban tep yu kupupa, pepu.

43 Upepupa, Labandi Yakub tep, tamupra pepu. “Gume, kandi dopmum nerapuda, ne ner nyapu kurunge. Sundi deiamrei nyapuda, ne nyapu kununge. Agam kure keca yala-yala yumada, nengepu kurure. Ukutaru adinmarem keca yumada, tek sisi nengepu kurure. Dinino, ne kangeda, atumi dipu anerapu cap, sundi deiamrei nyapu cap tep ware kuptene do? Guma tep dakwapye. 44 Ange tep nengeda, kan cap, ne capdi, “Ukupra-ukupra kunkamneme,” pepra pedina upu pepra deipnemedi, aupuda, nun butene tep upu bongdina deiyo keca pio kunkamsere.” Labandi Yakub tep pepu.

45 – 46 Upepka tep, Yakubdi ila lyom gel doprapudi, acapu tekra iku. Ikudi er yala nesala tep, “Sun ton gel bulupra adamaipu deipyakaso,” pepupa, gel buluprapidi, acapu deipi. Ukupidi, agel bupra deipmaiyaipu jen kikiman jepi. 47 Amutu si tep ngeda Labandi Yegar-Sahaduta pepu dinin, Yakubdi, ‘Amutu sida, Galed mutu,’ pepu.

48 – 49 Labandi, “Ne yuk, kan yuk, nun mutu yuk-yuk kunkamnem taru neitamaida, ‘Mali kweipdarung’ tenen, Allah er si Yahwehdi ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} kalekra dinkamsere,” pepka cadi amutu tenpu dinin, er si ton Mispa mutu perami.

50 Tonda Labandi upepu, “Yakubo, Allahdi, ‘Mali kweipdarung’ tenen, pio kalekra dinkamsera cadi, lumdongona gume. Kandi ne ner nyapu butene tep mali kweipmemnyopda, Allahdi dinkamkere. Tonda, ne ner nyapu butene konum dopmuma cadi, yuk nerapu ton dopmemnyopda, Allahdi dinkamkere. Atep ukuna gume. Yuk neng cap, nun cap kikiman bukrap aupu men talepmanem dinino, Allah er dipapu pio dinkamserada, lumdongona gume.” Labandi Yakub tep pepu.

51 – 52 Upepudi, aupu ton dukdongopra pepu. “Ukuda alyom gel tekra ikmaumnge cap, agel weik bulupra deipmangunge capda epmareme. Ada nun upu bongdina deiyo keca utopu kupkamsere. Ne dingeda, ne mutu ortara di yana agel deipmapai kirikra kan tara men poryankamkene. Ange utopu kan dingeda, kan mutu atara di yana agel deipmapai kirikra ne mutu ortara men poryankamsene. 53 Aupu tep nengeda, nun butene di, “Telepe,” konum pepmanema cadi, Allahdi, ‘Tek kupkamreng do, gum do?’ tenen, pio kalekra diseredi, upu bongdinkamsere. Ada Abrahamdi si eremamu Allah, tonda Nahordi si eremamu Allah tep pepne,” pepu.

54 Upepudi, Allah er gispal dona tep, gam keca popra Allah tep karepu. Karepudi, kalemna keca kaleprapidi, er cap, er nyapsilip cap, er yala nesala yuma cap kikiman jen jepmaidi, amutu gon kwamyaipu mapmai. 55 Mapmaiya, berekyopda, Labandi er ner nyapu cap, sundi deiamrei nyapu cap tep mutupudi, “Daberume” peprapudi, ‘Allahdi telep kweipkamre’ tenen, telep upu ton pepra, sun deiki deipudi, amutu tapra er pe ati bisi tamupra beu.