Gen 32 | XteSC | STEP | Uda, Yakub peda, ‘Ne nai damai Kanaan mutu neitamai benkun’ tenen, bisi banmau. Bisi banmau taruda, Allah er im deiki pel don nengda, bisi neitamai antapdai.

Genesis 32

1 Uda, Yakub peda, ‘Ne nai damai Kanaan mutu neitamai benkun’ tenen, bisi banmau. Bisi banmau taruda, Allah er im deiki pel don nengda, bisi neitamai antapdai. 2 Antapdaipa, Yakub epudi, “Uo, amutuda Allah er ke tep kuryai tepa,” pepudi, amutu si tep Mahanaim mutu si pepra deipu.

3 Yakub er du bo Esauda, ataru neitamai Edom tara neitamai dinin, mutu sida Sier mutu kuramu. 4 Sier mutu kuramnga cadi, Yakubdi nimi ton wepra dokotepupa, anengdi er du bo Esau damai lap perbei. Yakubdi sun kai upu perbei neng tep, “Ne du bo Esau tep ukupra-ukupra perbenkurume,” pepra karepu upu ake. “Ne du bo, neda kan amutara utopu ngebo kunune. Ataru neitamai yumada, Laban cap kikiman kuramnumanen, ukutaruda er mutu tapra yakanmane.

5 Ukutaruda, nedi talenun keca yala-yala weik kurure. Ada sapi bisam cap, keledai bisam cap, domba bisam cap, kambing bisam cap peinune. Tonda, ne pel melimna neng ton, nerapu ton weik kungepa talenune. Yakanmana cadi, ‘Kanda, ne deiyo ngebodi, ne tep kange deipnetum’ tenen, aupu dokotepmakene.” Yakubdi aupu pepra deipupa, er wepra deipu nengdi Esau damai kai perbei.

6 Lap perbeidi, Yakub damai tamupra yai dingeda upepi. “Nunda Esau damai lap perbepupa, ukutaru er cap, er cap yakanmai neng denge weik 400 neng capdi, ‘Yakub antapkup’ tenen, bisi yakanmange,” pepi. 7 Upepipa, Yakub gekepudi, kware pio weik kupupa, ila mambul kange doupra kunmau. Ukunmaudi, er cap kikiman kunmai nesala yuma neitamai di bokrapudi, nimi gung butene deipu. Ange utopu, er peiramudi, dekanmau gam kun keca yala-yala yuma cap, unta bisam cap neitamai bokra butene deipu.

8 Ukupka deiyoda ake. Ada Yakubdi, ‘Esaudi poryanerepa, tenpu gung tep popterepmare taru, ton yuk gungda bura sepdara bendoptenge,’ tenepu. 9 Utenepudi, ‘Allah melipnetu’ tenen, Allah tep moropu. Erdi moropu upuda ake. “Uo, ne nai Allaho, ne apu yapu Abraham cap, Isak cap, kan sipu erepra gispal doramkerei Allah kureme. Naio, kanda Yahwehdi upepnemume, ‘Kan pe mutu tamupra bememnyopda, kan yala nesala cap kikiman kunkamrume. Ukupmemnyopda, nedi melimkenepa, teleppu kweipkamkene,’ peipnemume.

10 Naio, neda mambul gum, mali ngebopu kununa cadi, kandi bicau teneramnemumdi, weika di meliamnerumnge cap, tonda kandi, ‘Ukupkamkene,’ peipnemumtopu tamna gum, pio tupa pel melipra donerumnge capda, men doproptene dinin, talipu karenerume. Menop taru ame goupra ortara mutu benamsi taruda, ne macapu taleamsi dinin, ukutaruda akeca-keca weik kwapmanerpa, bokra gung butene kepra deipmane.

11 ‘Ne du bo Esaudi yana popnerur’ tenen, tonda ‘Ne nerapu cap, sundi deiamrei nyapu cap, Esaudi poptaprur’ tenen, ne kware weik kunerure. 12 Kware kupmaner dinin, kandi upeipnemume. “Ne tek sisi pepkene. Weika di melipkenepane, kan kunkamrem keca yuma, teleppu kweipkamkene. Tonda, nedi melipkenepanen kandi deipmempa, dadeipdana dorkunkameng nesalada, ila laut pirman gel wenenga men nukmanto kuretopu, kan yala nesala peda kunkamenge.” Upeipnemuma cadi, kan tep moropkene.” Yakubdi Allah tep upepra moropu.

13 Moropudi, acapu er cap, er kikiman embanmai nesala cap mapmai. Mapmaiya, berekyopda, er bisi duyanmau keca neitamai di, ‘Telep kecada ne du bo Esau tep tali karepkaman’ tenen, wepra ketenepu. 14 Yakubdi wepra deipu kecada ake. Ner kambingda, denge weik 200 keteneipu. Jem kambingda, 20 wepra keteneipu. Ange utopu domba ngeda, ner domba 200 cap, jem domba 20 cap keteneipu.

15 Tonda, unta ^{▼▼unta – Akeca gambar dina tep, Kejadian 12:16 dinkurume.} ner bisam cap, sun nyapu cap, ner sapi 40 cap, jem sapi 10 cap, keledai ner bisam 20 cap, jem keledai 10 cap, akeca-keca yuma, ‘Esau er namna tep talipu karepkaman’ tenen, keteneipu. 16 Ukupudi, er melimna neng tep upepu. “Sun dipu agam kure keca yala yuk-yuk akuretopu kalengbenkurume. Sundi mepra banmarumpa, ne cap, ne nyapsilip cap, sun amnyo tara yankamape. Tonda, gam kure keca ton gung mepra banmaipa neitamaida, go tapra, ton gungda amenda bankamange. Utopu kepra yuk-yuk bokra bankamarume,” pepu.

17 Yakubdi upepudi, menmena taru benkamar ngebo tep upepu. “Mepra dabanmarumpa, ne du bo Esau cap bisi neitamai antaprumnyopda, erdi, ‘Sunda ware deiyo ngebodi taleserepa, kurum do? Tonda, agam kure keca sun urasin tara dekanmarumada, ware ngebo talerur do?’ pepra asipetepseryopda, sundi upepkamarume. 18 ‘Gume, kan amutara utopu ngebo Yakub erngepu kurure. Dinino, erdi kanda, er du bo tep talipu karepkere. Er Yakubda, nun amnyo tara tupa yakanmare.’ Upepkamrume,” Yakubdi menmena taru benkamar ngebo tep pepu.

19 Yakubdi aupu peiputopu, sun butene taru benkameng nesala cap, weneri taru bankameng nesala cap, tonda gam kure keca amenda taru bankameng nesala cap yuma tep, upepu. “Aupupu pepkamarume,” pepu. 20 “Tonda, sun peda lumdongona gume. ‘Esau kan amutara utopu ngebo nun amnyo tara tupa yakanmare,’ peipkurume.” Yakubdi er pel melimna neng tep upepra deipu. Yakubdi, ‘Upepkurum, upepkurum,’ pepmau upu yuma deiyo ton kupke.

Ada erdi, ‘Esau tep akeca-keca weik tali karepkaman keca menmena epyopda, ne tep kange deipkamnere. Ne amenda taru yanyopda, epneredi, ‘Telepe pua,’ tenepra, telep kupra buru karepkamanere. Akeca yumada, er namna tepa,’ Yakubdi tenepu.

21 Ukupra tenepka cadi, Esau tep karepkamau keca menepra dokotepmaupa, dubenmai dinin, er puda amutu acapu mapmau. 22 Alukunda neitamaida, Yakub bukroudi, er nerapu butene cap, er melimna ner butene cap, er nyapu 11 neng cap, bisi gonga kepra banmaidi, me sida Jabok me goupra ortara bei. 23 Sun bei taruda ukupu. Yakubdi er nyapsilip yuma dokotepmaupa, sun yumadi Jabok me goupra ortara beipane, er kipra bisi dekanmau keca yala-yala yuma ton, dokotepmaupa sundi dopra me ortara dubei.

24 Anesala yuma me ortara goupra konum bendopmai dinin, Yakub er yuk er tenpupu akunmau. Er yuk kunmaupa, tenpu ngebo ton yanmau. Yakub mapmau taruda, malaikat tenpu ton, Yakub er damai yaudi, er nong yana talepdongpu. Yakub tep puto di talepmaupa, sun butene di, talepnurup pepdarei. Apio ukupdanmareipane, bereng yan tara kepu.

25 Ayanmau malaikatdi, ‘E, Yakubda bisbisa men kaptene’ tenen, kael kepmaudi, Yakub er kail yo, yo dimdongonai talepmaupa, kotoktapupa, pu weik jepu. 26 Sun butene di pio talepnurup pepdanmareipane, bereng yan tara kepupa, lukunda neitamai yanmau malaikatdi, Yakub tep upepu. “Ukuda tapra yapneo. Kandi ne talepmanerem ngeda tapnemempa, benkune,” pepra moropu. Upepra moropupane, Yakubdi angebo tep tamupra pepu. “Gume, ‘Allahdi melipkamemer’ tenen, telep upu pepra men deipnememnyopda, men tapkukene,” pepu.

27 Upepupa, amalaikatdi asipetepu. “Kan si dano,” pepra asipetepupa, “Ne sida Yakub,” pepu. 28 Upepupa, malaikatdi Yakub tep pepu. “Ukutaru ukupu si karepkukene. Ataru di dipra doryankamre taruda, kan si tep ‘Israel,’ ^{▼▼Israel Ibrani upu deiki di, ‘Israel’ penungada, er deiyoda ‘Angeboda, Allah cap pio pe deipra piriputepu’ tenen, penunge.} penkamkenge. Deiyoda, kandi Allah cap, yuk neng cap tep, pio pe deipra piripetenmarumdi, konum bisbisa kapmaruma tep, kan ukupu sida ‘Israel’ karepmakena cadi, dorkunkamre taruda, asipu penkamkenge,” malaikatdi Yakub tep pepu. 29 Upepupa, Yakubdi amalaikat tep asipetepu. “Kao, kan si ton lap pepnerume,” pepra moropu. Moropu dinin, amalaikatdi, “Gume, kanda ware deiyo keca tep, ne si asipetepnerume. Men pepkukene,” pepu. Upepudi, ‘Amenda dorkunkamre taru yuma, Allahdi Yakub tep telep kudinkamre’ tenen, Yakub deiki telep upu pepra deipu.

30 Malaikatdi, Yakub tep, telep upu pepra deipka tep, Yakubdi amutu si tep, ‘Peniel,’ ^{▼▼Peniel Ibrani upu deiki di, ‘Peniel’ penungada, er deiyoda, ‘Allah er urasin ake,’ tenen, penunge.} pepra deipu. Tonda aupu pepu. Amutu si tep, ‘Peniel,’ pepmana deiyoda, ake. Ada, ne nai bo Allah er urasin mening damai epmanu dinin, men poptapneua cadi, amutu si ‘Peniel,’ pepra deipne.

31 Ange yuma konum kupkopda, berekupa, Peniel mutu tapra bisi banmau. Bisi banmau taruda, kwanepdanen banmaue. Deiyoda, malaikatdi, Yakub er kail yo, yo dimdongonai talepmaupa, kotoktapupa, pu weik jenmaua tep, ataru di dipra pio kwanepdanen baramu. 32 Atep nengeda, Yakubdi deipupa, dadeipdanen barameng nesala yuma, sun Israel nesala yumadi gam keca popmengedi, galupra jerameng taruda, kail yo dam kurur melmelda pio men jenunge. Deiyoda, amalaikatdi, Yakub er kail yo, yo dimdongonai talepmaupa, kotoktapupa, pu weik jepka tep, pumun taru di dipra ataru neitamai yuma cap, ukutaru peda, Israel nesaladi domba do, kambing do, ware gam kure keca do, popmengedi galupra jenge taruda, kail yo dam kure melmel pio men jenunge.