Gen 33 | XteSC | STEP | Yakub bisi banmauanen, bisi neitamai bena dinmaupa, Esau cap, er jen talen neng denge weik 400 neng cap yakanmaipa, epu. Yambul karenai di epka cadi, er nyapu yuma bokudi, ton nyapuda Lea cap deipu, ton nyapuda Rahel cap deipu, tonda yuk nyapuda, er nerapu sisa sun melimna nerapu butene cap bokra deipu.

Genesis 33

1 Yakub bisi banmauanen, bisi neitamai bena dinmaupa, Esau cap, er jen talen neng denge weik 400 neng cap yakanmaipa, epu. Yambul karenai di epka cadi, er nyapu yuma bokudi, ton nyapuda Lea cap deipu, ton nyapuda Rahel cap deipu, tonda yuk nyapuda, er nerapu sisa sun melimna nerapu butene cap bokra deipu. 2 ‘Nedi bokra yuk-yuk deipnetopu benkunga,’ tenepudi, sun melimna nerapu cap, sundi duberei nyapu cap menmena dokotepu. Sun amnyo tarada Lea cap, er nyapu cap deipu. Siryada, Rahel cap, Yusup cap dokotepupa, berei.

3 Er Yakubda, bisi menmena banmaupa, er nyapsilip yumada amenda tara domyakanmaipa, er du bo Esau kunmaua damai yau. Esau damai yaupa, Yakubdi, Esau er gispal dona tep, ue yoneitam bari er nong genepdongopu. 4 Yakubdi ukupmau dinin, Esau er weit bo Yakub epudi, sepdara yanmau. Yanmaudi antapreipa, Esaudi Yakub tep iripudi, mutupu. Mutupdareidi, sun butene neng engepdarei.

5 Ukupreipa, Esau er giso erepra dinmaupa, Yakub er nerapu cap, er nyapu cap yakanmaipa, epudi asipetepu. “Weito, kan cap amenda tara yakanmang nesalada, ware nesala do?” pepra asipetepu. Asipetepupa, Yakubdi, “Gume, Allah er kange dipapu bicau tenepra meliamneupa, deiamsi nyapu adano,” pepu. 6 Upepupa, Yakub er melimna nerapu cap, sun nyapu cap Esau damai yaidi, er gispal dona tep genepdongopi. 7 Ukupipa, amenda taruda Lea cap, er nyapu cap yaidi, Esau er gispal dona tep genepdongopi. Siriada Yusup cap, Rahel cap yareidi gispal dona tep genepdongoprei.

8 Ukupreipa, Esaudi Yakub tep asipetepu. “Weito, sapi bisam cap, domba bisam cap, keledai bisam cap, gung weika di dekanmaremada, ware keca deiyo tep do?” pepra asipetepupa, Yakubdi, “Gume, kanda ne du bo kunerema cadi, nedi kan tep karepkenepa, ne kange deipkanerema tep dekene,” pepu. 9 Upepu dinin Esaudi, “Gume, ne weito. Neda akeca-keca yuma weike konum talenuna cadi, kan talerum kecada, kan nge pua. Ne gume,” pepu.

10 Esau upepupa, Yakubdi tamupra pepu. “Gume, ne du bo, kandi ne tep kange deipnememnyopda, ne ketenepmaken keca dopropo. Apepmakenada, tali tep men pepkene. Deiyoda, kandi ne tep kange deipra telepe pepnemempa, ne peda ila di kange deipkune. Kan urasin epkenedi, kange deipmanerada, Allah er urasin eptenedi, kange deiptenetopu tep pepkene.

11 Nun nai Allah bicau teneramneudi, weika di meliamneupa, akeca-keca weik talenune. Ne putanere keca yuma kwapmanera cadi, kan tep ‘Karepkamane’ tenen, duyanmaken kecada, tali lupra dopropo,” pepu. Yakubdi Esau tep puto di, “Dopropmayo,” pepra, weika di penmaua tep, Esaudi akeca-keca yuma dopropu. 12 Dopropudi upepu. “Ukutaruda nun yuma kikiman benkupe. Kan cap, ne cap kikiman bisi benkupe,” pepu.

13 Upepu dinin, Yakubdi upepu. “Gume, ne du bo, kan kaele. Ne nyapu yumada, sun puto gum cadi, bouna dipu embanunge. Tonda ner domba cap, ner sapi cap, sun nyapu tep moum tupa dinimanga cadi, sun tep moupra kaleknedi, amenda bouna dipu bisi deipra yakankamne. ‘Puto di bepyopda, ue tenpu tumi deiki di depropnenung’ tenen, pepne.

14 Atep nengeda, kanda ne du bo kunerema cadi, kandi mepra banmamumpane, ne cap, ne peinun keca cap, amenda tara yakankamepe. Ne peinun keca cap, ne nyapu cap nemari banmangetopu, ne peda bouna di yakankamne. Yakanmanyane, amenda taruda, kan damai Sier mutu yankamepe,” pepu. 15 Upepupa, Esaudi pepu. “Atep, ne melimna neng dopra deipkenepa, sun cap yankamarume,” pepupnen, Yakubdi tamupra pepu. “Gume, ne du bo, kan nyapsilip dopra derinada deiyo gum cadi, kandi ne tep kange deipnememnyopda, akonuma. Yuk keca ton men putapmasere,” pepu.

16 Yakubdi upepka tep nengeda, atumi dipu Esau tamupra, ‘Sier mutu benkaman’ tenen, gonga kepra bisi banmau. 17 Dinino, Yakubda Sukot mutu beu. Sukot mutu beu dingeda, er ati cap, er peiramu keca sun ati cap dopu. Akati-akati yuma, bura ati dopka cadi, amutu sida, Sukot mutu penunge.

18 Yakubda, Padan-Aram mutu tapra bisi baramnganen, Kanaan tara neitamai dinin, mutu sida Sikem mutu damai yana, er opkal tenda ati, ke tep deipu atida, acapu dopra deipu. Er ati deipkai di Sikem mutu nesala domi ati diramu. 19 Acapu kuramnganen, amenda taruda, er tenda ati dopra deipu tuaida, kunupu. Ada kunumna weik keca, er sida perak, denge weik 100 deiki, Hemor er nyapu tep karepudi, atu kunupra dopropu. Hemorda, er mi tenpu ton, er sida Sikem deiamu.

20 Yakubdi er tenda ati deipu mutu neitamaida, gel pala doprapudi, gel taplakra yakeipudi, Allah er gispal dona tep, gam keca popra derinai keteneipudi popra deriramu. Atu tep er sida El Elohe Israel ^{▼▼El Elohe – Ibrani upu deikida, ‘El Elohe Israel’ pepinge deiyoda, ‘Israel nesaladi, si eremenge Allahda, er puto pio weik kurure’ tenen, perami.} si pepra deipu.