Genesis 34

1Uda, Yakub cap, er nyapsilip cap yuma, acapu dakunmaiyane, Lea cap, Yakub capdi deiamrei ner, er sida Dinadi, amutu neitamai kurami nerapu uruna tep dipra embeu. 2Embeupa, Hewi mutu ngebo dinin, amutu taleamu ngebo er sida Hamor, erdi deipu mi er sida Sikemdi Dina epudi, upula dopra nyaku.

3Upula nyaku dinin, aner tep dipru karepupa, Yakub er ner mi Dina tep kange deipudi, aner tep bouna di telep upu pepra deipu. 4Ukupra kupu dingeda, Sikemdi er nai bo Hemor tep upepu. “Gume, naio, ‘Aner doptene’ tenen, pio putanerura cadi, mororbenkurume,” pepu.

5Yuk nengdi Yakub tep, “Tenpu ngebodi kan ner mi upula nyaku,” pepra lap pepi taruda, erdi deriramu nyapu yumada, gam kure keca er taleamunge yuma peina tep, bura mutu neitamaipu kunmaiya cadi, Yakubdi utenepu. ‘Gume, ne nyapuda bura tara di tamupra ati men yanmangu taruda, tali dimpepra kaukepnedi, dinapu kunmanepane,’ “Sun yangepane,” pepu. 6Ataruda, Sikem er nai bo Hemordi, ‘Yakub cap upu talepkanem’ tenen, Yakub damai beu.

7Beu taruda, yuk nengdi Yakub er nyapu tep, arup taru Sikemdi mali kupunge lap penmaipa, gekepidi mambul kange doupmaidi, yu weik kupu. Ada tali tep gum dinin, Sikemdi Yakub er ner mi dopra upula nyakua deiki di, pio ali dangna keca, nimi men kuptenge keca, konum kupka tep, mali kange doupra yu weik kupu.

8Ukupu dakunmai dinin, Hemordi Yakub tep upepu. “Ne mi Sikemda, kan ner mi Dina tep dipru konum karepka cadi, ‘Kan ner mi nun karepsetume’ tenen, moropkene. 9Sun ner nyapuda, nun nyapu dona tep karepsetume. Ange utopu nun ner nyapuda, sun nyapu dona tep karenkamsepe,” pepra moropu. “Nerapu cap, nimi cap dopdanapu kunkamepe,” pepra moropu. 10Upepu dingeda aupu ton pepu. “Nun kunup mutu neitamai yumada, nun cap, sun cap kikiman kuna cap, kunumna cap, pel dona cap yumada telep pua. Kikiman kupepa, sun putasere mutuda kunumkamrume. Ange peda telep pua,” pepu.

11Upepupa, er mi Sikemdi Dina er nai Yakub cap, er weit yapu yuma cap tep upepu. “Sundi ne tep kange deipnetum teptoda, sundi moronkamnerumutopu, akeca yuma tali lupra karenkamsetene. 12Ner tappa cap, sun gispal dona tep, tali karena keca capda, sun tenepmumtopu ila di moropnetumnya peda, telep pua. Sundi pepnerumtopu, angepu karenkamsene. Dinino, tenpu keca puda moropsene. ‘Aner karepnetumpa, doptene’ tenen, moropsene.” Sikemdi Yakub cap, er nyapu cap tep pepra moropu.

13Upepra moropu dinin, Sikemdi sun mal ner upula nyakua tep nengeda, Yakub er nyapudi Sikem cap, er nai bo Hemor cap tep, mawa dipu inipra mok upu pepi. 14Sunda upepi. “Uo, ‘Aner karepneso,’ pepmaseremada men kuptepe. Deiyoda, kanda den bam bol deiki tarange men sektapkuiya cadi, nun mal ner men doptume. Kanto ngebodi nun mal ner doptumopda, nun ali kupsetu.

15Dinino, kandi moropmaserem ngeda, nun tenepenge kuptumtoda, ‘Telepe,’ pepra, aner karepketepe. Gum dingeda, gume. Nun tenepe ngeda ake. Nunda den bam bol deiki tarange sektapseinge utopu, kan cap, sun tara kaber neng yuma cap sektapsetengepa, sunda nun kupetopu kutumtoda, nun mal ner karepketepe.

16Tonda apepmaptopu kuprumnyopda, nun yumadi sun tara nerapu donkamepe. Ange utopu, sundi nun tara nerapu donkamrume. Ner tali dodanapu kunkamepe. Ukupra dakuramepedi, sun kumumnya neitamaipu, ati dopra kunkamepe. Kikiman kupedi, tenpu yala nesala utopu kunkamepe. 17Nundi penmaptopu, ‘Den bam bol deiki tarange sengna telepe’ tenen, sekmumnyopda, telep pua. Gum dingeda, nundi nun mal ner dopra benkamepe,” pepra, mawa di peptapi.

18Uda, Yakub er nyapudi penmai upu gekenmaidi, Hemor cap, er mi Sikem capdi, ‘Apepmaseng upuda telep pua,’ teneprei. 19Hemor, er ati kunmai nesala weik ton akurami dinin, sun yumadi Sikem tep, ‘Erda ila mambule,’ tenerami. Sikemdi Yakub er ner mi Dina tep, kange ila di deipka cadi, sun anengdi penmai upu gekepudi, ‘Angeda yuk taru gume, adipapu kupkune,’ tenepu.

20Ange tep nengeda, Hemor cap, erdi deipu mi Sikem cap, ‘Nun tara neng cap upu talerbenkunem’ tenen, sun ati arum domyai dana-dana tara wiami beilya buplan damai berei. 21Bereidi awekmai neng tep upeprei. “Anengdi nun amutu kunup nesala tep, kange deipra teleppu tenesenunge. Atep, nun yumadi telepe pepmepyopda, sun anengdi nun mutu neitamai kikiman kuna cap, pel dona cap, kunumna cap yumada, kikiman kunkamsengada telep pua. Nun mutuda pala weik mutu cadi, go weik akwapsere. Nundi sun tara nerapu doptepe. Sundi nun tara nerapu doptenge. Ukupra, tali dodanapu kunkamepe.

22Dinino sundi, ‘Angepu kupkamrume,’ pepra, deipmaseng kecapu kupmepyopda, nun yumadi tenpu yala nesala utopu kupra, kikiman kunkamepe. Sundi pepmaseng keca men kupmepyopda, telep kupra kikiman men kutepe. Ada, sundi den bam bol deiki tarange sengtamamengtopu kupmepyopda, telep kupra kikimanpu kutepe.”

23“Uda, sun yuma tenipetepso. Sun talengedi peinung keca cap, sun tu cap, wa cap yumada, amenda taru nun ngepu kupkamsere. Tali pepmanem gume. Nun yumadi sun pepmaseng upu tep, ‘Telepe,’ pepmako. Ukupmepyopda, nun kan-kan tali kunkamenge,” pepra lap peprei. 24Upepreipa, akati arum domi mutu neitamai kurami neng yuma, beilya buplan neitamai bura benmai neng yumadi, Hemor cap, Sikem cap peprei upu tep, “Telepe ukupkupe,” pepi. Upepya tep nengeda, amutu neitamai kurami neng yuma, sun den bam bol deiki tarange sektapi.

25Sekidi, dakunmaipane, ue weneri tumi konum kupupa, pu weik tupa jenmau taruda, Yakub er nyapu butene, sun sida Simeon cap, Lewi cap sun parang ya doprapreidi, amutu kunmai neng porberei. Amutu neng tali mangkau kange doupmai ai bukmai taru neitamaida, Dina er du yapu butene di, amutu kurami neng yuma poptaprei. 26Popbanmareiyanen, Hemor cap, er mi Sikem cap popreidi, sun ati pumbon dadi, sun mal ner Dina dalupropreidi, amutu tapra bei.

27Uda, sun mal ner Dinada, amutu ati arum neitamai, Sikemdi upula nyakua tep, amutu neng du neng yuma poptaprei pangeda, Yakub er nyapu yumadi amutu nesala taleami keca yuma dalupra dororami. 28Ada, sun domba yuma cap, sun sapi yuma cap, sun keledai yuma cap, sun ati-ati derirami keca cap, bura tara peirami keca cap, kourami keca cap, akeca-keca yuma upula dororami.

29Ukupra dororamidi, amutu nerapu yuma cap, amutu nyapu yuma cap, sun kunumna weik keca yala-yala yuma cap, sun ati pum derirami keca yuma cap dororami. 30Ukuramya tep nengeda, Yakubdi Simeon cap, Lewi cap tep upepu. “Uo, sun butene di mali kupmareruma deiki di, amutu neitamai kunge nesala, sun Kanaan tara nesala yuma cap, sun Feris tara kunge nesala yuma capdi, ne tep nengeda, ‘Tong peramre keca utopu kurure,’ tenepnengedi, ‘Nun songe,’ penkamnenge. Atep ne nong deiki ikin keca weik deipmanererume. Nun yala nesalada, yambulanunpu kunup dinin, sunda pio weik kununga cadi, sun yuma bulupra kikiman poryasenge pangeda, ne cap, ne nyapsilip yuma cap, poptapra bisbisa kapsetenge,” pepra wenepu.

31Yakubdi upepupa, sun butene di upeprei. “Upepmaserum dinino, Sikemdi nun mal ner upula nyakunge tep nengeda, ‘Angeda mambul gume. Nun mal nerda, co bo karepnepa, tali-tali nyangdarameng nerapu utopu kurura cadi, dakwapye,’ pepra kaukepmateneme teptoda, telep do?” peprei.