Gen 35 | XteSC | STEP | Amenda taruda, Allahdi Yakub tep upepu. “Kanda amutu tapra, Betel mutu bena kunkamrume. Betel mutu bememnyopda, ne gispal dona tep gel pala dopra, gel taplakra yakeipmemdi, ne tep gam keca popra karenkamnerume. Kandi, ‘Ne du bo Esau popkamner do?’ tenen, sepdara bisi baramum taruda, nedi kan damai yana belepra tengyasipa, epnemume. Ne gispal dona tep, pala gel taplakra deipkamnerume.” Allahdi Yakub tep epu.

Genesis 35

1 Amenda taruda, Allahdi Yakub tep upepu. “Kanda amutu tapra, Betel mutu bena kunkamrume. Betel mutu bememnyopda, ne gispal dona tep gel pala dopra, gel taplakra yakeipmemdi, ne tep gam keca popra karenkamnerume. Kandi, ‘Ne du bo Esau popkamner do?’ tenen, sepdara bisi baramum taruda, nedi kan damai yana belepra tengyasipa, epnemume. Ne gispal dona tep, pala gel taplakra deipkamnerume.” Allahdi Yakub tep epu.

2 Upepka tep, Yakubdi er nyapsilip yuma cap, er kikiman kurami nesala yuma cap tep upepu. “Sundi talerum isok si eremna keca cap, mali kun keca yuma cap tapmumdi, dumsisipu kudidankamrume. Tonda, ukutaru kenekmarum opkal kwiriptapra, ukupungepu kenekrume.

3 Apepmasentopu konum kupmumnyopda, ne cap Betel mutu bepedi, Allah er gispal dona tep, gel pala dopra, gel taplakra yakeipnedi, gam keca popra er tep karepkamne. Allahda, ne kange mun kange doupra, ikin kwamneu taru yuma mororamsipa, gekepra meliamneu. Tonda, ware mutu do yuma, ne embaramsidi kuramsi mutu yuma, er cap kikiman embaramnemupa, meliamneu.” Yakubdi er nyapsilip yuma tep pepu.

4 Yakubdi upepka cadi, er nyapsilip yuma, sun yuk mutu nesaladi karepipa, isok si eremna keca taleaminge cap, isok-isok gispal dona tep, sun amul bon potokra dongorami keca cincin cap, Yakub karepipa, dopra Sikem mutu neitamai, ila co iriamu tara tu palipra singipdongopu. 5 Ukupkopda, sun yumadi bisi banmai. Bisi banmaiya neitamaida, Allahdi amutu dana-dana tara kurami nesala tep, kwar dangna deiyo keca karepupa, Yakub er nyapsilip yuma tep kware kupupa, tenpu ngebo peda sun amnyo tara men dombei.

6 Yakub er cap banmai nesala yuma cap, Kanaan tara neitamai dinin, mutu si Lus mutu bei. Amutuda si butene peramya cadi, Betel mutu ton perami. 7 Sun yuma Betel mutu bei pangeda, Yakubdi Allah er gial dona cap, karena cap tep, gel pala dopra gel taplakra yakeipu. Uda, amutuda menop taru Yakubdi, ‘Ne du bo Esaudi popnerur’ tenen, sepdara beu taruda, Allahdi Betel mutu neitamai belepudi upu peipupa, Yakub gekepka cadi, Yakubdi amutu sida, ‘El Betel,’ pepra si sipepu.

8 Ataru neitamaida, Ribka er melimna ner Debora depupa, er nong dopra Betel mutu dinin, dutara tekamu co iriamu tara tu palipra peipidi engepi. Engepya tep, amutu sida, ‘Allon-Bacut,’ pepra si sipepi. 9 Uda Yakubda, Padan-Aram mutu tapra, Kanaan tara neitamai tamupra beu pangeda, Allahdi er damai belepudi, telep upu pepra deipu. 10 Allahdi Yakub tep upepu. “Kan sida ‘Yakub,’ pekenung dinin, ukutaruda, Yakub tupa men penkamkenge. Asi tapra, ukupu si ‘Israel,’ pepra si sipenkamkenunge,” pepra, Allahdi Yakub er ukupu si sipepra, ‘Israel,’ pepra deipu.

11 Tonda, Allahdi ^{▼▼Allah – Acada, Ibrani upu deiki di, Allah er si tep, ‘Allah Shadday’ pepra seki. Aupu ‘Shadday’ deiyoda, sundi, ‘Allahda akeca-keca yuma talepra, pio deiki tara kuredi, Ila Puto Deiyo Ngebo kurure,’ tenena tep ‘Shadday’ pepra seki. Sun kael kemna tep, angeda konum jenek kupra sekmepu.} Israel tep upepu. “Neda akeca-keca yuma talepra, pio deiki tara kunedi, Ila Puto Deiyo Ngebo kunune. Ne putoda, pio weike. Kandi nyapu weik deipbaramempane, kan yala nesala weik kupbankamenge. Kandi deipmempa, dadeipdanen baramenganen, deipmengepa, kunkameng nesalada, yala-yala weik kupbankamenge. Tonda, kan yala nesala kan-kan di, ila nimi deiyo neng ton tekmengedi kunkamenge.

12 – 13 Kan apu yapu Abraham cap, Isak cap tep kareramsi mutu yumada, kan tep karepkamkene. Ange utopu, kandi deipmempa, dadeipdanen baramnganen, dorkunkameng nesala peda, amutu yuma karepnepa, talepra kunkamenge,” Allahdi Yakub tep pepu. Allahdi aupu pepra deipmau mutu, aca dipu ka tamupra im deiki welepu. 14 – 15 Beupa, Yakubdi ila lyom gel dopra tekra deipudi, jen me cap, minyak cap agel deiki diktapu. Ada, sun upu talepmareiaipu, Allah er gispal dona tep akeca diktapu. Diktapudi, er cap, Allah cap, upu talepdarei mutu si tep, ‘Betel mutu,’ pepra, si sipepra deipu.

16 Uda, amenda taru Betel mutu ton tapidi, bisi banmai. Bisi banmaiyanen, Efrata mutu kapul men bei dinin, bisi neitamaida, Rahel mi deiyo gonga kepra, pu jenmaupa dounmaudi, ‘Mi deipkun’ tenen, piripetepu dinin, ikin weik kupu. 17 ‘Mi deipkun’ tenen, pirinmauanen, ikin kupmau taruda, er mi derina melimna nerdi upepu. “Kanda kwar dangna gume. Mi tenpu konum deipmareme,” pepu.

18 Pu jenmaupa, dounmauanen, depmanto kupudi, isine dakropmanto kupu taruda, ukupu deipmau mi er si tep, ‘Ben-Oni,’ pepra, si sipepu. Si pepudi adipapu depu. Anerdi asi pepra deipmau dinin, ami er nai bodi, “Gume, er sida Benyamin penkamepe,” pepra, si sipepra deipu.

19 Rahelda Efrata mutu bana tep, bisi neitamai bei taru depupa, tu palipi. Efrata mutuda amutu si butene ngeda, Betlehem ton penunge. 20 Rahel konum tu palipra peipya deikida, Yakub lyom gel dopropudi, tekra deipu. Alyom gel tekra deipu ngeda, tupa dinupe. Ada Rahel palipyaipu kurure.

21 Israelda, (ada Yakub) amutu tapra bisi banmaiyanen, mutu si Migdal-Eder mutu kirikra yambulanun ortara bena kurami. 22 Israel cap, er nyapsilip cap, amutu neitamai kurami taruda, er mi Rubendi, er nai domu ner ton, er sida Bila, inipra upula nyaku. Ukupupa, yuk nengdi gekepra lap pepipa, Israel gekepudi mali kange doupu.

23 Uda, Yakubdi deriramu nyapuda, 12 neng kurami. Yakub cap, Lea capdi deriramrei nengda sun si ake. Menmenada Ruben deipreidi, amenda taru Simeon cap, Lewi cap, Yehuda cap, Isakar cap, Zebulon cap deiamrei. 24 Yakub cap, Rahel capdi deriramrei neng sun sida ake. Yusup cap, Benyamin cap deiprei.

25 Tonda, Rahel er melimna ner cap, Yakub capdi deiprei neng sun sida ake. Dan cap, Naftali cap deiprei. 26 Tonda Yakub cap, Lea er melimna ner, er sida Silpa capdi deiprei neng sun sida, Gad cap, Asyer cap deiprei. Animi si yumada, Yakub Padan-Aram mutu neitamai kuramu taru di deriramu.

27 Yakubda Migdal-Eder mutu tapra, ka tamupra er nai damai beu. Ada, Mamre mutu dinin, yuk mutu si Kiriat Arba damai bena kuramu. (Amutu tenpu dinin, mutu si ton Hebron mutu penunge). Amutuda, er apu yapu Abraham cap, Isak cap kuramrei mutu tepa. 28 Isakda keteng tamun denge weik 180 tahun deiki di kuramu.

29 Dakuramnganen, siryada depudi isin dakropupa, er nyapu Esau cap, Yakub capdi tu palipra sun nai er nong peiprei. Isak depu taruda, konum pio wisi deipudi depu.