Genesis 36

1Aupu deikida, Esau, er si ton Edom, kuramu keca tep sekmepu. 2Esauda, er nerapu tep, Kanaan tara kurami nesala kan-kan di doamu. Esau er nerapu sida, Het ngebo er si Elondi deipu ner, aner sida Adah dopu. Tonda Anadi deipu ner, er sida Oholibama ton dopu. Aner er apu bo sida Sibeon. Erda Hewi mutu ngebo kuramu. 3Ton nerda, Ismaeldi deipu ner er sida Basemat, Esaudi dopu. Aner er weit ner sida, Nebayot kuramu.

4Esauda, Kanaan tara neitamai tupa kuramu taruda, er cap, Adah capdi sun mi Elifas deiprei. Esau er ner Basematdi, sun mi Rehuel deipu. 5Esau cap, Oholibama capdi sun nyapu Yeus cap, Yaelam cap, Korah cap deiprei. Anyapu yumada, Kanaan tara neitamai di deriramu.

6Esaudi, er nerapu yuma cap, er ner nyapu cap, er ati kikiman kurami nesala yuma cap, sundi peirami gam kun keca cap, uda ware keca do yuma, Kanaan tara neitamai dopra taleamu keca yuma doprapidi, yuk mutu bena kurami. Ada er weit bo Yakub kuramu mutu tapra, karenai dortara neitamai bena kuramu. 7Deiyoda, Yakub cap, Esau cap sun yuk-yuk dinin, sun taleamrei kecada pio weike kuramu. Atep, tenpu mutu neitamaipu kikiman men kupmanto kuramrei. Ada, sun butene di peiramrei gam kun keca pio weik cadi, tu go metek kupupa, yuk-yuk bena kuramrei.

8Ange tep nengeda, Esau cap, er nyapsilip cap Sier mutu dinin, mutu gon kwamngai bena kurami. 9Esauda, er si ton Edom peramya cadi, Edomit penge yala nesalada, sun apu boda er ca. Edomit nesalada, Sier mutu dinin, mutu gon kwamngai kurami.

10Esaudi deriramu nyapu sun sida ake. Esau er ner Adahdi deipu mida, Elifas cap, Esau er ner Basematdi deipu mida, Rehuel cap kuramrei. 11Elifasdi deriramu nyapu sida ake. Teman cap, Omar cap, Zefo cap, Gaetam cap, Kenas cap kurami. 12Esau er mi Elifasda, ner tenpu ton dopu ngeda, er si Timna kuramu. Anerdi er mi Amalek deipupa, Esau er ner Adahdi aneng tep, ‘Ne nyapu,’ peramu.

13Esaudi deipu mi Rehueldi deriramu nyapu sun sida, ake. Nahat cap, Serah cap, Syama cap, Misa cap kurami. Aneng yumada, Esau cap, er ner Basemat capdi deiprei mi Rehuel, erdi deiamu neng kurami. 14Esau er ner Oholibamadi deriramu nyapu sun sida, Yeus cap, Yaelam cap, Korah cap kurami. 15Esaudi deriramupa, ila nimi deiyo neng kepra kurami neng sun sida ake. Esaudi menmena deipu mi, Elifasdi deriramu nyapuda, ila nimi deiyo neng kepra kurami. Sun sida, Teman cap, Omar cap, Zefo cap, Kenas cap kurami.

16Korah cap, Gaetam cap, Amalek cap kurami. Aneng yumada, Elifasdi Edom mutu kuramu taru neitamai di deriramu. Sun nau nerda, Esau er ner Adah kuramu. 17Esaudi deipu mi Rehueldi deriramupa, ila nimi deiyo neng kepra, kurami neng sun sida ake. Nahat cap, Serah cap, Syama cap, Misa cap kurami. Aneng yumada, Rehueldi Edom mutu kuramu taru neitamai di deriramu. Sun nau ner sida, Esau er ner Basemat kuramu.

18Esau er ner Oholibamadi deriramupa, ila nimi deiyo neng kepra kurami neng, sun sida ake. Yeus cap, Yaelam cap, Korah cap kurami. Aneng yumada, Esau er ner Oholibamadi deriramu. Aner er nin sida Ana kuramu. 19Arup nimi si sekra deipmepu ngeda, sun nai boda Esau, (er si ton Edom) kuramu. Sun ila nimi deiyo neng kepra kuramitopu sekmepu.

20Tonda atara neitamai kuramu ngebo, Hori mutu ngebo er sida, Sier kuramu. Sierdi deriramu nyapu sun sida ake. Lotan cap, Syobal cap, Sibeon cap, Ana cap kurami. 21Disyon cap, Ezer cap, Disyan cap kurami. Sierdi deriramu nyapuda, ila nimi deiyo neng kepra kuramidi, Hori mutu taleami. 22Lotandi deriramu nyapu sida ake. Hori cap, Heman cap kuramrei. Lotan er mal ner sida Timna kuramu.

23Syobaldi deriramu nyapu sida ake. Alwan cap, Manahat cap, Ebal cap, Syefo cap, Onam cap kurami. 24Sibeondi deriramu nyapu sida ake. Aya cap, Ana cap kuramrei. Angebo Anada, er nai bo Sibeon taleamu keledai bisam dopra, nimi gumai bura tara mutu peiramu taru neitamai, me bungnai dinin, bupu me gutuka yakaramupa, epu. 25Anadi deipu mi er sida Disyon. Anadi deipu ner mi er sida, Oholibama kuramu.

26Ana er mi Disyondi deriramu nyapuda, sun si ake. Hemdan cap, Esyban cap, Yitran cap, Keran cap kurami. 27Sier, er mi Ezerdi deriramu nyapu sun sida ake. Bilhan cap, Zawan cap, Akan cap kurami. 28Sier, er mi Disyandi deriramu nyapu sun sida ake. Us cap, Aran cap kuramrei.

29Atep, sun Hori yala nesala talena tep, ila nimi deiyo neng kepra tekamidi kurami neng, sun sida ake. Lotan cap, Syobal cap, Sibeon cap, Ana cap kurami. 30Disyon cap, Ezer cap, Disyan cap kurami. Animi deiyo neng sun yuma, Sier tara neitamai dinin, Hori yala nesala taleamidi, yuk-yuk bokra kuramitopu sekmepu.

31Edom tara neitamai tekamidi, ila nimi deiyo neng kepra, Raja neng kurami neng sun sida pepkupe. Anengda, sun Israel yala nimi deiyo neng, Raja neng kapul men kurami taru, Edom tara taleami neng tep sekupe. 32Beordi deipu mi er sida, Beladi Edom tara talepra ila nimi deiyo ngebo kuramudi, ila ati arum domu ngeda, Dinhaba mutu perami.

33Bela depu pangeda, Bozra mutu ngebo er sida, Serahdi deipu mi er sida, Yoabdi tekra amutu ila nimi deiyo ngebo kuramu. 34Dakuramnganen, Yobab depu pangeda, Temanit ngebo er sida Husyam, erdi tekra amutu ila nimi deiyo ngebo kuramu.

35Dakuramnganen, Husyam depupa, Bedad di deipu mi er sida, Hadad tekra amutu ila nimi deiyo ngebo kuramu. Erda Moab mutu neitamai di, Midian tara nesala popbaramudi bisbisa kapu. Hadaddi domu ati arum sida, Aweit mutu perami. 36Hadad dakuramnganen depu pangeda, Masreka mutu ngebo, er sida Samla tekra amutu ila nimi deiyo ngebo kuramu. 37Dakuramnganen, Samla depu pangeda, ila me damai domi mutu si Rehobot mutu ngebo, er sida Shaul tekra, amutu ila nimi deiyo ngebo kuramu.

38Dakuramnganen, Akbor er mi Bahal-Hanandi tekra, amutu ila nimi deiyo ngebo kuramu. 39Dakuramnganen, Bahal-Hanan er mi Akbor depu pangeda, yuk ngebo er sida Hadar tekra, amutu ila nimi deiyo ngebo kuramu. Erdi domu ati arum sida, Pahu mutu perami. Erdi domu ner sida Metabel kuramu. Aner er nin sida Matered kuramu. Matered er nin sida Mesahab kuramu.

40Uda, atep nengeda, Esaudi deipupa, dadeipdanen baramyane, deriramipa amenda taru ila nimi deiyo neng kepra kurami neng sun sida ake. Sun yala yuk-yuk cap, sun mutu yuk-yuk cap akuramutopu sekmepu. Ada, Timna cap, Alwa cap, Yetet cap, 41Oholibama cap, Ela cap, Pinon cap, 42Kenas cap, Teman cap, Mibsar cap, 43Magdiel cap, Iram cap kurami.

Asi sekmepu nengda, Edom mutu taleamidi ila nimi deiyo neng kepra kuramidi, sun tu yuk-yuk taleamidi, ati arum yuk-yuk dorami. Asekmepu upuda, Esaudi deriramupa, dadeipdanen baramyane, kurami neng si tep sekmepu. Sun yumada, Edom mutu neitamai kuramya tep, sun yala sida Edomit yala nesala perami.