Gen 37 | XteSC | STEP | Atep nengeda, Yakubda er nai bo Isak kuramu tarapu, Kanaan tara neitamai bena kuramu.

Genesis 37

1 Atep nengeda, Yakubda er nai bo Isak kuramu tarapu, Kanaan tara neitamai bena kuramu. 2 Er cap, er nyapsilip cap, sundi kurami keca upuda ake. Yakub er mi Yusupda, keteng tamun 17 tahun konum nepu taru neitamaida er cap, er weitap duap cap, sun nai er domba bisam tep kikiman kalekra peirami. Yusup cap kikiman kurami nengda, sun nin Rahel gum dinin, ada Bila cap, Silpa capdi deiamrei nyapu tepa. Sunda weitap duap kurami dinin, mali-mali kuramipane, Yusup epudi, er nai tep lap perbaramu.

3 Uda Yakubda, nyapu weik deriramu dinin, sunda yambulanunpu kange deiamu dinino, Yusupda, Yakub er konum wisi deiamu taru neitamai deipka cadi, Yusup tep ila di kange deiamudi, dipru kareramu. Atep nengeda, tenpu taru Yakubdi er mi Yusup tep deiki tara kenengami opkal, warna weik kupunge, pio telepnge tali karepu. 4 Yakubdi Yusup tep kange deriramu dinin, er yuk nyapu yumada, Yusup tep utenerami. ‘Gume, nun nai bodi Yusup tep pio mambul tenerur dinin, nun tep ngeda yambul teleppu teneserure’ tenepra dipru wilimamidi, Yusup tep telep upu pio men perami.

5 Atenpu lukunda neitamaida, Yusupda kene mapmaua deiki di epmau keca, er du yape tep lap penmau. Ange yuma lap penmaua tep nengeda, sundi er tep, ‘Erda nun pio songe,’ tenerami. 6 – 7 Yusupdi pepu ngeda ake. “Ne du yape, ne ken mapmanua deiki di epmanu kecada, lap pepsenepa, gekepneso. Ne ken mapmanera neitamaida, nun yuma kikiman pel donmapdi, nun kouamupu keca terigu sekra, tapu di koupra derinmape. Manmaneng utopu keca, er sida terigu, sekra deipmapepane, nedi deipmanu ngeda tekrapmaupa, sundi tapu koupra derinmarumnge yumada, nenge damai bulupra yanmaidi, gispal dona tep, giso genepra kunmai,” Yusupdi pepu.

8 Upepmaupa, er du yape yumadi, ‘E deiyo ace,’ tenepidi, upenmai. “Uda kandi tenepmaseremada kael kepkepe. ‘Neda ila nimi deiyo ngebo Raja kupnepa, ne du yape yuma ne amutara kupmengedi, gispal donkamnenge,’ tenepmaserem do?” pepmai. Upepmaidi, menop taru Yusup tep mali kange douami dinin, ataru di dipra, pio mali kange doupidi, ‘Erda, nun songe,’ tenerami.

9 Amenda taru, Yusupdi ken deiki ton mapudi, er du yape tep upepu. “Ne du yape sun gekepneso. Ne ken mapmanu taru epmanu kecada ake. Uda, keteng cap, ware cap, kuru sebelas cap, sun yumadi ne tep gispal dopmanengdi, giso genepmangue,” pepmau. 10 Upepmaudi, er nai bo ton aupupu pepmaupa, er nai Yakubdi upepu. “Ken deiki mapmaumpa, epmaum kecada dano? Kan ware keca deiyo tep tenepmaserempa, ‘Ne nai cap, nanin cap, ne du yape yuma cap, sun yumadi ne gispal dona tep, ne damai yangedi, giso genepkamenge’ tenen, pepmaserem do?” pepra wenepu.

11 Yusup er du yape yuma, sun dipru wiliprapidi, Yusup tep, mali kange doupidi, ‘Nunpuda ila neng kuptepe, erda gume,’ teneramidi, mali kange doupmai. Ukupmai dinino, Yusup er nai bo Yakub er puda, Yusupdi pepmaunge tupa teneramu. 12 Uda dataru neitamaida, Yusup er du yape yumadi, ‘Amutu betei jenkameng’ tenen, sun nai bo peiramu domba dopra, Sekem mutu dubei. 13 Dakuramipane, amenda taru Yakubdi Yusup tep upepu. “Kan kaele, kan du yapedi ne domba yuma dopra, Sekem mutu damai dubeipa, ormutupu betei jenmange. Atep, ‘Telep kunmang do?’ tenen, dokotepkenepa, dirberume,” pepupa, Yusup “Telepe,” pepu.

14 Upepupa, er naidi, “Kan du yape cap, sundi kalengmang domba cap, ‘Yuma telep kunmang do?’ tenen, dipetepmemdi, ne gekena tep, tamupra peryankamnerume,” pepu. Upepudi dokotepupa, Yusupdi amutu Hebron ban mutu tapra bisi bendopu. 15 Bisi banmauanen, Sekem mutu bena, ‘Ne du yape dan cei kunmang do?’ tenen, dirtererbenmaupane, tenpu ngebo akunmauai di asipetepu. “Kanda ware keca tep, tali dipetepra embanmarem do?” pepra asipetepu.

16 Asipetepupa, Yusupdi tamupra, “Gume, ne du yape tep erterenmane. Sun domba bisam betei jenmangpa, sundi kalekra dinmange mutuda, kan kael kepmumdi, pepnetum do?” pepra asipetepu. 17 Asipetepupa, angebodi upepu. “Gume, amutu tapra yukai konum bei. Sundi, ‘Dotan mutupu benkamepe,’ pepipa, gekepsi,” pepu. Upepka tep, Yusupdi Dotan mutupu bena dipetepupa, er du yape karenai dadi epu.

18 Yusup orkarenai dadi yakan taru, er du yapedi Yusup epidi, “Erda nun popmeko,” pepra upu sisingmai. Sundi upepmai. 19 “Uda, diso. Ken deiki maramre ngeboda, ortara di yakanmar adano. 20 Ukupmeko. Er tep, poptapmepedi, amutu kure ila tu pumbon kwamyai tenpu, er nong dopra akeca tenpu neitamai dokotepkamepe. Ukupmepedi, amenda taru yuk neng tep, “Gume, bura kuramre keca ila yu kamdi popudi, er nong yuma jepropu,” pepkamepe. Ange yuma konum kupmepyopda, ‘Erdi ken deiki mapredi, peserur kecada, nong tek sisi kupkamre do, gum do?’ tenen, dinkamepe. Ukupmeko,” pepra upu sisingdanmai.

21 – 22 Upu sisingdanmai taru, sun kan-kan tenpu ngebo, er sida Rubendi, ‘Ne weit bo Yusup melipra lyepkun’ tenen, upepu. “Uo, ne kayape. Yusupda tek sisi men poptapkupe. ‘Popmepepa, er yapi embenkur,’ tenena gum dinin, er gam kepman dopropmepedi, amutu me pio gum mutu neitamai kwamu tu pumbon ilange neitamai dokotepmepedi, talipu taptepe. Tek sisi poptapna gume, er tali depkamar ja,” pepu. Rubendi aupu pepka deiyoda, ‘Amenda taru, ne inipra tamupra yanedi, ne weit bo lyepra dopropnyopda, ne nai bo damai tamupra dubenkamne,’ tenepudi, dina di pepu.

23 Rubendi pepu upu sun yuma gekepya cadi, Yusup er du yape damai yau pangeda, sun yumadi er nong talepra, er deiki tara kenekmau opkal, warna weik kupu ngeda, (ada er nai bodi karepmemeunge) kwiriptapidi, 24 er nong dopra amutu kwamu ila tu pumbon donoki. Atu pumbonda, me mokon ton men kwamu.

25 Ukupmaidi, ‘Jen keca jepkup’ tenen, damaipu bukmai taruda, ormutu karenai dadi, nimi gung weik Ismael yala nesala yakanmaipa, epi. Ada, sun Ismael yala nesala Gilead mutu dordi amutu yakanmaipa, epi. Sun Ismael nesaladi, bunga yala-yala weik getepmainge sun unta bisam bali tara deiki deipmaiya di, pio weik dekanmai. Sun dekanmai kecada, ‘Jen keca tau pepkamre’ tenen, yungamenge keca, er sida bumbu cap, nimi kwetena tep nong bol deiki lingna keca, er sida balsam cap, nintong telep keca er sida damar ladan cap, dekanmai. Ada, ‘Mesir mutu dubepedi, amutu nesaladi akeca kunupkameng’ tenen, dubenmai.

26 Atep Ismael yala nesala yakanmaipa, Yusup er du yape epmaidi, sun kan-kan tenpu ngebo, er sida Yehudadi upepu. “Kaepe, nun weit bo tep tali inipra poptapmepyopda, nundi wareto menenga keca doproptepe do? 27 Gum tep, ukupmeko. Yusupda nun weit sisa kurura cadi, men popkup dinin, sun Ismael yala nesaladi, ‘Er tep dopra dubetenge’ tenen, er dopra sun tep kunupmepyopda, telep keca doproptepe,” pepu. Upepupa, sun yumadi, “Telepe, angepu kupkupe,” pepi.

28 Upepipa, sun Midian mutu kunumna nesala, Ismael yala nesala, Yusup er du yape kunmanguai damai yanmaipa, er du yapedi, tu pumbon dokotepmanguai dadi Yusup dopra, sun Ismael nesala tep kunupi. Kunupipa, er du yapedi kunumna weik keca, er sida perak seper empat kilo ^{▼▼seper empat kilo peramengeda, satu kilo dopra, neitamai bokra dumbari yuk-yuk deipmenge nge, tenpu ngeda seper empat kilo kurure.} dopropi. Ismael nesaladi Yusup dopra, Mesir mutu dubei.

29 Amenda taruda Rubendi, ‘Yusup lyepkun’ tenen, sun dokotepmai ila tu pumbon damai diryanmaupa, Yusup men kupmaupa, men epmaudi, ‘Uo’ tenen, mambul kange doupra, er pe opkal gweleptapu. 30 Ukupudi, er weit yapu damai tamupra benmaudi upepu. “Uo, Yusup dopra tu pumbon dokotepmapuaida, men kunmare. Ukuda, ne mambul kupnere. Ware kupkaman do?” pepra malye pepu. 31 Malye pepmaua cadi, sun yumadi Yusup er deiki tara kenekmau opkal, warna weik kwamu ngeda, doprapidi, kambing bisam popra, er yapi mokon neitamai dongopipa, yapi weik aopkal deiki bapu.

32 Ukupi dingeda, Yusup er deiki opkal, warna weik kwamunge dopra, sun nai Yakub damai dubeidi, benbenepmaidi upepi. “Uo naio, aopkalda, tali bura tara kupupa, epmapudi dopra duyanmakepe. ‘Kan mi Yusup ernge do?’ tenen, dipeteprume,” pepi. 33 Dina di upepipa, Yakub dipetepudi upepu. “Uo, aopkalda tek sisi ne mi Yusup ernge kurure. Ne kangeda, bura tara yu weik kamdi, Yusup popra jepropudi, er nong yuma konum sekra buluksingipu,” pepra engenmau.

34 Yakub engenmaudi, mambul kange doupmaudi, er opkal gweleptapmaudi, ‘Ne mi Yusup konum depmau’ tenen, ataru weika di engena cap, mali kange douna cap pio kunmaue. Tonda, amutu nesaladi, ‘Yuk neng epsengedi, uo sunda nimi depmanga tep engenmange, tenenkamseng’ tenen, kenengami opkal ton Yakubdi keneku.

35 Ataru neitamaida, Yakubdi menop deiamu nyapu cap, nerapu capdi, ‘Nun nai bo er dipru kwa dipkup’ tenen, er damai yanmangu dinin, Yakubdi men gekepu. Erdi upepu. “Gume, mambul kange doupra engenapu kunmanyane, amenda taru depnyopda, ne mi depupa, kunmareyaipu ne ton benkamne,” pepra malye penmaudi, er mi Yusup tep engena weik kuramu.

36 Yakubdi mali kange doupra engenmau taruda, sun Midian mutu dinin, Ismael yala nengdi, Mesir mutu beidi, Yusup dopra nimi si Potipar tep kunupi. Potiparda, ada Mesir mutu taleamu ila nimi deiyo ngebo Firaun, er amutara pel doramu ngebo, er jen talena neng sun deiyo ngebo kuramu. Atep, Potipardi Yusup kunupudi taleamu.