Gen 39 | XteSC | STEP | Uda, Yusup er du yapedi, Ismael yala nesala tep, Yusup dopra kunupipa, anengdi Yusup dopra Mesir mutu dubeidi, Potipar tep kunupi. Mesir mutu taleamu ila nimi deiyo ngebo Firaun, er jen talena neng sun deiyo ngeboda, Potipar kuramu. Ismael yala nesaladi, Yusup dopra duyaipa, Potipardi kunupudi taleamu.

Genesis 39

1 Uda, Yusup er du yapedi, Ismael yala nesala tep, Yusup dopra kunupipa, anengdi Yusup dopra Mesir mutu dubeidi, Potipar tep kunupi. Mesir mutu taleamu ila nimi deiyo ngebo Firaun, er jen talena neng sun deiyo ngeboda, Potipar kuramu. Ismael yala nesaladi, Yusup dopra duyaipa, Potipardi kunupudi taleamu. 2 Potipardi Yusup taleamu dinin, Allah er si Yahwehdi Yusup tep, weika di melimamupa, Yusupdi pel doramunge cap, kuramunge cap yumada, teleppu kuramu. Tonda, er tep taleamu ngebo, er ati pumbonpu kuramu.

3 Kikiman kuramreipane, Allah er si Yahwehdi Yusup tep, weika di meliamnga deiki di, er kuramu keca yuma pio teleppu kuramupa, er taleamu ngebo Potipardi ange yuma kael keamudi, Yusup tep kange deiamu. 4 Kange deiamudi, Yusup ereipupa, Yusupda Potipar er tali pel dona ngebo gum dinin, er pel deiyo ngebo kuramudi, sun kikimanpu kuramrei. Ukupra kuramreipa, Potipardi upepu. “Yusup, kanda ne talenun keca yuma cap, nati pel melimna nesala yuma cap, ne pel yuma cap tep, deiyonge erepra deipkene,” pepra deipupa, ukuramu.

5 Potipardi, ‘Ne keca yuma talepra deiyo ngebo kunkamre’ tenen, Yusup erepra deipu taru di gonga kepra, amenda taru neitamai yuma cap, Allah er si Yahwehdi aMesir ngebo keca yuma, pio weika di telep kweipupa, teleppu kupbaramu. Deiyoda, Allahdi Yusup tep kange deiamnga tep, erdi talepra pel doramunge yuma telep kweiamu. Ada, Potipar er ati pum kwamu keca cap, pel doramu keca cap, bura tara pel doramunge cap, wa peiamunge cap yumada, Allah er si Yahwehdi pio telep kweiamu.

6 Ange yuma pio teleppu kuramnga cadi, Potipardi uteneramu. ‘Gume, ne talenun keca cap, mambul pel cap yumada, Yusup er dipapu ne pel deiyo ngebo kuredi talenkamre. Erdi peiprepa, ne pel don nesala yumadi gekenapu kunkamenge,’ teneramu. Uteneramnga cadi, Potiparda, akeca-keca yuma mambul keca yuma tep nengeda, ‘Ware kupkamne do?’ tenen, pio men teneramu. Tali kange doupra teleppu kuramudi, ‘Atumida ne ware telep jen keca wepra jepkun do?’ tenen, angepu tenepra weamudi jeamu. Yuk ton gume.

Uda, sun yuma ukuprappu tali kuramipane, Yusupda, urasin pio telep ngebo kuramu. Tonda, er nong puto weik cap, urasin telep cap kuramu.

7 Ukuramnga cadi, Yusup er deiyo ngebo Potipardi domu nerdi, Yusup tep pio diramudi, kange deiamudi upepu. “Yusupo, ne cap kikiman maptenemnye,” pepra moropu. 8 Upepra moropu dinin, Yusupdi, “Ne gume, ange pio men kupkamneme,” pepra tapu. Tonda upepu. “Ne deiyo ngebo Potiparda, er talerur keca yuma cap, er ati kure keca yuma cap tep, mambul kange doupra, ‘Ware kupkamne do?’ pio men tenerure. Deiyoda, ‘Gume, Yusupdi ne keca yuma melipra talenerepa, ange yuma teleppu kunkamnere,’ tenenerura cadi, tali kange doupra kurure.

9 Akati neitamaida, mambul neng ton akunung dinin, neda sun deiki tarapu, ila mambul ngebo kunune. Ne deiyo ngebo Potipardi, akeca-keca yuma karenerure. Tenpunge peda men tamnerur dinino, kanpuda erdi domu ner cadi, er dipapu talekerure. Nedi gume. Pio teleppu kunerura tep, wareto deiyo tep, apepmanerem keca, pio mali keca kupteneya deiki di, Allah er si yaniptene do? Gume, Allah tep mali men kupkamne,” pepu.

10 Yusupdi Potipar er ner tep aupu pepu dinin, tumi-tumi yumada, anerdi Yusup tep aupupu pio pepra mororamupa, erdi aner tep, “Gume, kikiman men mapkamneme. Tonda tali kuna peda, tenpaipu kikiman men kupkamneme,” pepra pio tamnapu kuramu. 11 Ukuramu dinin, tenpu tumida, ‘Ne ati pum pel dopkun’ tenen, Yusupdi Potipar ati pum wekmau. Er akati wekmau taruda, sun ati pum pel melimna nesala ton men kunmai.

12 Yusupda, akati pum weka kunmaupa, anerdi er deiki tara kenekmau opkal talepropudi, “Ukuda kan cap mapkuneme,” pepra puto di pepmau. Upepmaupane, Yusupdi, ‘Gume, pio men kupkune’ tenen, er deiki kenekmau opkal kwiriptapudi, akati pumbon di bura tara sepdara benmau. 13 Sepra benmaupa, anerdi Yusup er kwiriptapmau deiki opkal epu dingeda er ati pel don nesala upupu.

14 Bura benmau pangeda, anerdi er ati melimna nesala upupmaupa, yanmai pangeda upepu. “Sun ton diso. Yuk mutu nengdi, aIbrani ngebo duyaipa, erdi nun amutu kunup nesala tep, mali kupra deipseredi, autunkamsere. Erda, ‘Aner nyakun’ tenen, nati wekra talepterepmaneu dinin, ila di ngolokmanu. 15 Ngolokmanupa, gekepmaneudi, kware kupmaupa, er tapmau deiki kenekmau opkal tenena gum di, tali lupra bura tara sepdara benmaue,” pepu.

16 Upepudi, Yusup kwiriptapmau deiki opkal dopra aner er damaipu mawa deipmaupa, amenda taru er aiki ngebo Potipar tamupra ati yau. 17 Yaupa, anerdi er aiki ngebo tep aupu pepu. “Gume, kandi kunupra duyamum ngebo, Ibrani kaber ngeboda pio mali kupnere. Erda, ‘Aner tali nyakun’ tenen, nati wekra talepterepmaneu. 18 Dinino, nedi, ‘Yuk nengdi melipnetenge’ tenen, ila di ngolokmanupa, Yusup kenekmau deiki tara opkal taprap bura tara sepdara benmaue,” pepu.

19 Anerdi er akengebo Potipar tep, aupu ton lap pepmaudi, “Ukuda, kan pel melimna ngebodi, kupmanere ngeda, kael keprume,” pepra mok upu pepmaupa, Potipar gekepudi, yu weik kupu. 20 Yu pio weik kupka cadi, Potipardi Yusup dopra, wenemna ati dongopu. Ada Mesir mutu ila nimi deiyo ngebo Firaundi, mali neng sun wenemna tep dongoramu ati dongopu.

21 Wenemna ati dongopu dinin, Yusup akati pumbon kuramu taru yumada, Allah er si Yahwehdi, Yusup tep bicau teneramudi, weik melimamupa, awenemna ati deiyo ngebodi Yusup tep kange deriramu. 22 Yusup tep kange deriramnga cadi, awenemna ati deiyo ngebodi, ‘Yusupdi akati dongoramepu neng yuma, sun deiyo ngebo kunkamre,’ tenepudi ereipupa, akati kurami keca yuma tep, Yusupdi kalekra taleamu.

23 Allah er si Yahwehdi ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} Yusup tep weika di meliamupa, er pel doramunge yuma cap, er kuramunge yuma cap, teleppu kuramnga tep nengeda, awenemna ati deiyo ngebodi, tali kange doupudi, ‘Akeca-keca yuma Yusupdi talenkamra tep, telepe pua,’ teneramu.